កំហុស ៤ យ៉ាងក្នុងជីវិត ដែលអ្នកគួរតែរីករាយដែលបានសម្រេចចិត្តធ្វើវា
ជីវិតរបស់មនុស្សម្នាក់ៗ គឺមិនមែនរស់នៅ ដើម្បីគេចវេសចេញពីបញ្ហានោះទេ ប៉ុន្តែជីវិតរស់នៅដែលមានន័យ និងពិតប្រាកដមួយនោះ គឺជាការរស់នៅដោយធ្វើការរៀនសូត្រពីកំហុសឆ្គង ឬបញ្ហាទាំងអស់នោះ។ ហើយប្រសិនបើនៅក្នុងជីវិតមិនដែលជួបនឹងបញ្ហា ឬឧបសគ្គសោះនោះ អញ្ចឹងជីវិតរស់នៅរបស់យើង គឺមិនអាចរីកចម្រើន ហើយក៏មិនអាចមានភាពលូតលាស់ទៅមុខបាននោះទេ។ ហើយអ្វីដែលអ្នកត្រូវដឹងផងដែរនោះ គឺមនុស្សជោគជ័យរូបណាក៏ដោយ ដែលនៅលើលោកនេះ គឺមិនអាចមានលទ្ធភាពទទួលបានអ្វីៗ ដែលពួកគេមានដូចសព្វថ្ងៃនេះបាននោះទេ ប្រសិនបើជីវិតរបស់ពួកគេមិនជួបនឹងបញ្ហាទាល់តែសោះនោះ។
ដូច្នេះប្រសិនបើអ្នកបានត្រៀមខ្លួនរួចរាល់ហើយ ខាងក្រោមនេះជាកំហុសមួយចំនួនក្នុងជីវិត ដែលអ្នកគួរតែរីករាយដែលបានសម្រេចចិត្តធ្វើវា៖
១. ជ្រើសរើសធ្វើការងារដែលអ្នកមិនស្រលាញ់ ឬមិនចង់ធ្វើ
មនុស្សម្នាក់ណាក៏ដោយ នៅពេលដែលពួកគេចាប់ផ្ដើមប្រើជីវិតចូលប្រឡូកនៅក្នុងសង្គម និងជាពិសេសសង្គមការងារ ពួកគេម្នាក់ៗតែងតែមានក្ដីស្រមៃជាក់លាក់មួយ ចំពោះការងារដែលពួកគេចង់បាន និងចង់ធ្វើ។
ខណៈពេលដែលអ្នកត្រូវតែបន្តនូវក្ដីស្រមៃទាំងនោះ វាជាការចាំបាច់បំផុតដែលអ្នកត្រូវដឹងថា មុនពេលទទួលបានអ្វីៗទៅតាមការស្រមៃនោះ អ្នកត្រូវធ្វើការឆ្លងកាត់នូវដំណាក់កាលមួយចំនួនដែលមិនអាចរំលងបាន ដូចជាការធ្វើការងារដែលអ្នកមិនសូវពេញចិត្ត ឬខុសពីជំនាញរបស់ខ្លួនជាដើម។
ជាឧទាហរណ៍ជាក់ស្ដែង ពីជីវិតរបស់មហាសេដ្ឋី ម៉ាក ខ្យូបែន (Mark Cuban) វិញ ការងារដំបូងបំផុតនៅក្នុងជីវិតរបស់លោកនោះ គឺលោកធ្វើការជាភ្នាក់ងារលក់ថង់ដាក់សម្រាមតាមផ្ទះមួយរូប។ ហើយសម្រាប់មនុស្សខ្លះ ការងារប្រភេទនេះ គឺពិតជាមិនសាកសមនោះទេ ជាមួយនឹងមនុស្សដែលមានមហិច្ឆតា និងក្ដីស្រមៃខ្ពស់ដូចជាលោក ម៉ាក ខ្យូបែន ។ ប៉ុន្តែសម្រាប់លោក ម៉ាក វិញ ការងារដំបូងនេះ គឺជាមេរៀនដ៏មានតម្លៃ ហើយបានជួយបង្រៀនអោយគាត់ មានការប្ដេជ្ញាចិត្តខ្ពស់ និងវិធីសាស្ដ្រនៅក្នុងការលក់ដ៏ជំនាញ ដែលគាត់ជ្រើសយកមកប្រើនៅលើវិថីឆ្ពោះទៅកាន់ភាពជោគជ័យរបស់ខ្លួននាពេលក្រោយមកទៀត។
អ្នកតពិនិត្យឃើញទេថា ការជ្រើសរើសធ្វើការងារអ្វីក៏ដោយ ទោះជាយើងពេញចិត្ត ឬមិនពេញចិត្ត វាគឺមិនមែនជាកំហុសឆ្គងនោះទេ ប៉ុន្តែវានឹងក្លាយទៅជាកំហុសក្នុងជីវិតរបស់អ្នក ប្រសិនបើរូបអ្នកនៅតែបន្តធ្វើកិច្ចការដដែលៗនោះពេញមួយជីវិត ដោយមិនព្រមធ្វើការផ្លាស់ប្ដូរ ហើយដើរតាមក្ដីស្រមៃរបស់ខ្លួន។ ដូច្នេះប្រសិនបើប្រិយមិត្ត សម្រេចចិត្តធ្វើជាបុគ្គលិកឲ្យក្រុមហ៊ុនមួយណាក៏ដោយ អ្នកគប្បីធ្វើការរៀនសូត្រពីការងារទាំងអស់នោះឲ្យបានច្រើនតាមដែលអាចធ្វើទៅបាន ប៉ុន្តែក៏មិនត្រូវធ្វើការលះបង់នូវមហិច្ឆតា និងការងារដែលជាក្ដីស្រមៃរបស់ខ្លួនចោលដូចគ្នាដែរ។
២. ផ្លាស់ប្ដូរទីលំនៅទៅកាន់ទីកន្លែងថ្មី ឬប្រទេសថ្មី
ការផ្លាស់ប្ដូរទីលំនៅទៅរស់នៅទីកន្លែងថ្មី គឺទាមទារនូវសេចក្ដីក្លាហានខ្ពស់ ពីព្រោះសម្រាប់មនុស្សម្នាក់ វាមានន័យថា ពួកគេនឹងត្រូវបាត់បង់មិត្តភក្ដិចាស់ៗ ចាកចេញឆ្ងាយពីសាច់ញាតិ ឬក្រុមគ្រួសារ ត្រូវទៅរស់នៅតែម្នាក់ឯង ពឹងលើសមត្ថភាពរបស់ខ្លួន ដើម្បីទ្រទ្រង់ជីវិត ហើយជាការពិត វាគឺពិតជាបទពិសោធន៍ដែលគួរឲ្យភ័យខ្លាចមួយសម្រាប់អ្នកដែលផ្លាស់ប្ដូរទីកន្លែងរស់នៅដំបូងៗ។
ក្នុងកំឡុងពេលដំបូងៗ ការចាកចេញពីផ្ទះ ហើយមករស់នៅតែម្នាក់ឯង ទោះដើម្បីការសិក្សា ឬដើម្បីការងារក្ដី វាប្រៀបបីដូចជាកំហុសដ៏ធំមួយ ដែលអ្នកបានធ្វើនៅក្នុងជីវិត ពីព្រោះអ្នកមិនបានស្គាល់ ឬអាចពឹងពាក់នរណាម្នាក់បាននោះទេ លើកលែងតែខ្លួនឯង។ លើសពីនេះទៅទៀត អ្នកក៏ប្រហែលជាមិនទាន់ស្គាល់ភូមិសាស្ដ្រថ្មីនេះបានច្បាស់លាស់នៅឡើយដែរ។
មូលហេតុដូចដែលបានលើកឡើងខាងលើនេះហើយ ដែលធ្វើឲ្យការរស់នៅទីកន្លែងថ្មី អាចធ្វើឲ្យអ្នកមានអារម្មណ៍ឯកោ និងជាពេលវេលាដែលអ្នកពិបាកសម្របខ្លួនបំផុត។ តែទោះបីជាបែបណា នៅពេលដែលអ្នករស់នៅទីនោះយូរៗទៅ នៅពេលដែលអ្នកស្គាល់ភូមិសាស្ដ្របានច្បាស់ ហើយថែមទាំងមានមិត្តភក្ដថ្មីថែមទៀតនោះ វានឹងធ្វើឲ្យអារម្មណ៍ឯកោរបស់អ្នកត្រូវកាត់បន្ថយ។ ត្រូវចាំថា រាងកាយរបស់មនុស្សយើង គឺមានសមត្ថភាពពិសេស ដែលអាចធ្វើការសម្របបាន ទៅតាមទីកន្លែង និងបរិយាកាសដែលខ្លួនស្ថិតនៅ។ ដូច្នេះ ប្រសិនបើពីដំបូងអ្នកមានអារម្មណ៍ស្ដាយក្រោយ ចំពោះការសម្រេចចិត្តចាកចេញមករស់នៅទីកន្លែងថ្មី ចំណាយពេលយូរទៅ អ្នកនឹងអាចទទួលអារម្មណ៍ថា វានឹងធ្វើឲ្យអ្នករឹងមាំជាងមុន ហើយជាការសម្រេចចិត្តដ៏ត្រឹមត្រូវបំផុតរបស់ខ្លួន។
៣. ផ្ដាច់ទំនាក់ទំនងជាមួយនឹងមនុស្សដែលអ្នកបានទាក់ទងជាមួយជាយូរមកហើយ
នៅត្រង់ចំណុចនេះ មនុស្សរូបណាក៏ដោយ នៅពេលដែលពួកគេបានសម្រេចចិត្ត បែកគ្នាជាមួយនឹងដៃគូដែលខ្លួនបានទាក់ទងមកជាយូរមកហើយនោះ ពួកគេតែងតែមានអារម្មណ៍សង្ស័យ និងសោកស្ដាយចំពោះការសម្រេចចិត្តរបស់ខ្លួន។ មានអ្នកខ្លះ លួចសួរខ្លួនឯងថា “តើខ្ញុំបានបង្កើតកំហុសដ៏ធំមួយក្នុងជីវិត តើមែនដែរឬទេ?” ហើយអ្នកខ្លះប្រហែលជាគិតថា ខ្លួនបានធ្វើការបោះបង់ចោលនូវឱកាសដ៏កម្រមួយ ក្នុងការទទួលបានដៃគូ ឬមិត្តមួយរយឆ្នាំនៅក្នុងជីវិត ហើយអ្នកនឹងមិនអាចមានឱកាសស្វែងរកបាន មនុស្សល្អដូចជាអ្នកចាស់ម្នាក់នោះបាននោះទេ។
ប៉ុន្តែអ្វីដែលជាការពិតនោះ គឺប្រសិនបើកាលៈទេសៈក្នុងជីវិតរបស់អ្នក វាជាកត្តាដែលបង្ខំឲ្យអ្នកចាំបាច់ត្រូវតែធ្វើការលះបង់ទំនាក់ទំនងមួយនោះចោល នោះគឺមានន័យថា ទំនាក់ទំនងមួយនោះ ប្រហែលមិនមែនជាទំនាក់ទំនងដែលល្អបំផុតដូចទៅនឹងអ្វីដែលអ្នកធ្លាប់បានគិតនោះទេ ទោះស្ថិតចំពោះស្ថានការណ៍បែបណាក៏ដោយ។ ត្រូវចងចាំថា ទំនាក់ទំនងដែលល្អរវាងមនុស្សពីរនាក់ ពេលខ្លះ គឺពិតជាអាចមានពេលរីករាយ ហើយនឹងពេលកើតទុក្ខ ប៉ុន្តែប្រសិនបើក្នុងករណីដែលមានភាគីម្ខាង សម្រេចចិត្តបញ្ចប់នូវទំនាក់ទំនងមួយនោះមែន អញ្ចឹងមានន័យថា ទំនាក់ទំនងនេះបានមកដល់ទីបញ្ចប់ហើយ ហើយបើទោះបីជាភាគីណាមួយ ចង់ធ្វើការអូសបន្លាយ ឬពន្យាពេលក៏ដោយ ក៏វាមិនអាចផ្ដល់ប្រយោជន៍ដល់នរណាម្នាក់បានតទៅទៀតដែរ។ លើសពីនេះ អ្វីដែលអ្នកទទួលបាន គឺមានតែការឈឺចាប់ ហើយនឹងទុក្ខកង្វល់តែប៉ុណ្ណោះ។
ដូច្នេះវាមិនមែនជាកំហុសនោះទេ ទោះជាអ្នក ឬដៃគូរបស់អ្នក ចង់បញ្ចប់នូវទំនាក់ទំនងដែលមានជាយូរជាមួយគ្នានោះមក។ ហើយលើសពីនេះទៅទៀត ប្រសិនបើការសម្រេចចិត្តបែកគ្នារបស់អ្នកទាំងពីរ គឺអាចអនុញ្ញាតិឲ្យភាគីទាំងសងខាង អាចបន្តការរីកចម្រើនរបស់ខ្លួនទៅបាន នោះវារឹតតែមិនមែនជាកំហុស។ បន្ទាប់ពីនោះ នៅពេលដែលអ្នកអាចស្វែងរកឃើញដៃគូដែលពិតប្រាកដ ដែលអ្នកអាចមានលទ្ធភាពរស់នៅជាមួយនឹងគ្នាពេញមួយជីវិតបាន នោះការលះបង់អ្នកចាស់ ហើយនឹងអតីតកាលនានាកន្លងមក វានឹងធ្វើឲ្យអ្នកយល់ឃើញថា វាជាការសម្រេចចិត្តដ៏ត្រឹមត្រូវបំផុតមួយនៅក្នុងជីវិតរបស់អ្នក។
៤. ចំណាយពេលធ្វើកិច្ចការ ឬដាក់ទុនវិនិយោគ ទៅលើអ្វីមួយដែលមិនទទួលបានលទ្ធផលសោះ
ត្រូវចាំថា មនុស្សដែលទទួលបានជោគជ័យមួយរូបណាក៏ដោយ គឺសុទ្ធតែសម្រេចចិត្តធ្វើការប្រថុយ និងយល់ព្រមទទួលយកហានិភ័យពីការវិនិយោគផ្សេងៗរបស់ខ្លួន។ ពីព្រោះអ្វីដែលជាការពិតនោះ គឺមនុស្សម្នាក់ មិនអាចសម្រេចក្ដីសុបិន្ដ ឬគោលដៅដែលខ្លួនកំណត់បានទេ ប្រសិនបើរូបគេ មិនសម្រេចចិត្តធ្វើការលះបង់ពេលវេលា លុយកាក់ និងកម្លាំងកាយចិត្តក្នុងការធ្វើកិច្ចការទាំងអស់នោះ។
ចំពោះការលះបង់ទាំងអស់ដែលបានរៀបរាប់ពីខាងលើ ភាគច្រើន គឺមិនសូវទទួលបានលទ្ធផលផ្លែផ្កាគួរជាទីពេញចិត្តនោះទេ ហើយពេលខ្លះ វាអាចធ្វើឲ្យមនុស្សម្នាក់ខកបំណង បាក់ទឹកចិត្ត ហើយថែមទាំងត្រូវចំណាយប្រាក់ច្រើនចោល ដោយឥតប្រយោជន៍ថែមទៀតផង។ មានមនុស្សភាគច្រើន ដែលសុខចិត្តយល់ព្រមឲ្យឧបសគ្គទាំងអស់នេះ យកឈ្នះលើខ្លួនបាន ប៉ុន្តែសម្រាប់មនុស្សដែលជោគជ័យវិញ ទោះជាជួបនឹងឧបសគ្គ ឬបញ្ហាបែបណា ទោះជាការវិនិយោគដំបូងរបស់ខ្លួនត្រូវបរាជ័យ ក៏ពួកគេនៅតែអាចមានលទ្ធភាពក្រោកឈរ ហើយចាប់ផ្ដើមជាថ្មីម្ដងទៀតបាន។
សូមចងចាំទុកថា ការចំណាយធនធាន និងពេលវេលា ធ្វើកិច្ចការ ឬការវិនិយោគដែលទទួលបរាជ័យ ហើយមិនទទួលបានលទ្ធផលអ្វីនោះ គឺមិនមែនជាកំហុសនៅក្នុងជីវិតទេ ប៉ុន្តែវាគឺជាឱកាសដ៏សែនកម្រមួយទៅវិញ ដែលអនុញ្ញាតិឲ្យអ្នកបានធ្វើការសិក្សារៀនសូត្រ ទៅលើមុខវិជ្ជាដែលអ្នកមិនធ្លាប់បានជួប ហើយដែលអ្នកមិនធ្លាប់បានរៀននៅឯសាលាកាលពីមុនមកបាន។ ប៉ុន្តែប្រសិនបើអ្នកអនុញ្ញាតិឲ្យការបរាជ័យណាមួយ ធ្វើឲ្យអ្នកមានចិត្តភ័យខ្លាច មិនហ៊ានក្រោកឈរសារជាថ្មីវិញនោះ នេះទើបជាកំហុសដ៏ធំបំផុត ដែលអ្នកនឹងមានការសោកស្ដាយនាពេលអនាគត។
នៅទីបំផុត ប្រសិនបើអ្នកអាចមានលទ្ធភាពយកឈ្នះនូវភាពភ័យខ្លាច ហើយនៅតែអាចក្រោកឈរបន្តធ្វើកិច្ចការដែលអ្នកតែងតែស្រមៃជាបន្តទៅទៀត នោះអ្នកពិតជាអាចទទួលបានជោគជ័យយ៉ាងពិតប្រាកដ។ បន្ទាប់ពីអ្នកទទួលបាននូវភាពជោគជ័យហើយ នៅពេលដែលអ្នកសម្លឹងបកក្រោយវិញ អ្នកនឹងអរគុណខ្លួនឯង និងអរគុណដល់ការបរាជ័យទាំងឡាយនៅក្នុងជីវិត ដែលបានបង្វឹកអ្នកឲ្យក្លាយទៅជាមនុស្សរឹងមាំ និងជោគជ័យដូចសព្វថ្ងៃនេះ។
អត្ថបទទាក់ទង