តិចនិក ៦ យ៉ាង ដើម្បីបង្កើនទំនាក់ទំនងនៅកន្លែងធ្វើការឲ្យកាន់តែប្រសើរ
ទំនាក់ទំនង ឬការប្រស្រ័យទាក់ទង គឺជាដំណើរការនៃការផ្តល់ព័ត៌មានពីមនុស្សម្នាក់ទៅមនុស្សម្នាក់ ឬពីមនុស្សម្នាក់ទៅមនុស្សច្រើននាក់។ ដំណើរការនៃការទំនាក់ទំនង គឺជាឥទ្ធិពលក្នុងការសម្រុះសម្រួលរវាងមនុស្ស យ៉ាងតិចពីរនាក់ ដែលផ្លាស់ប្តូរគំនិតគ្នាទៅវិញទៅមក។
ទំនាក់ទំនងវិជ្ជមាននៅកន្លែងធ្វើការ គឺជាផ្នែកសំខាន់មួយនៃភាពជោគជ័យក្នុងអាជីព។ នៅពេលអ្នកបង្កើតទំនាក់ទំនងល្អនៅកន្លែងធ្វើការ អ្នកនឹងសម្គាល់ឃើញពីការកើនឡើងនៃផលិតភាពការងារ រួមនឹងសេចក្ដីសុខទាំងមូលផ្នែកផ្លូវចិត្តរបស់អ្នក។ នៅក្នុងអត្ថបទនេះ យើងនឹងពិភាក្សាអំពីអត្ថប្រយោជន៍នៃការកសាងទំនាក់ទំនងនៅកន្លែងធ្វើការ ក៏ដូចជាជំហានជាក់លាក់ដែលអ្នកអាចធ្វើដើម្បីអភិវឌ្ឍខ្លួនឯងនិងអ្នកដទៃ។
តើទំនាក់ទំនងនៅកន្លែងធ្វើការគឺជាអ្វី?
ទំនាក់ទំនងនៅកន្លែងធ្វើការ គឺជាអន្តរកម្មដែលអ្នកមានជាមួយមិត្តរួមការងាររបស់អ្នក។ នៅពេលដែលអ្នកមានទំនាក់ទំនងប្រកបដោយប្រសិទ្ធភាពជាមួយអ្នកជំនាញផ្សេងៗក្នុងក្រុមហ៊ុន និងសមាជិកក្រុម នោះអ្នកទំនងជារីករាយក្នុងការបំពេញការងារ និងកាន់តែរីករាយពីមួយថ្ងៃទៅមួយថ្ងៃផងដែរ។ ការកសាងទំនាក់ទំនងនៅកន្លែងធ្វើការ គឺសំខាន់ណាស់សម្រាប់ភាពជោគជ័យក្នុងអាជីព។ ទំនាក់ទំនងជាមួយមិត្តរួមការងារក្នុងកន្លែងធ្វើការ មិនត្រឹមតែជួយដល់ការបង្កើតបណ្តាញទំនាក់ទំនងប៉ុណ្ណោះទេ ប៉ុន្តែវាក៏អាចផ្តល់ឱ្យអ្នកនូវការណែនាំ និងការលើកទឹកចិត្តដែលអ្នកត្រូវការដើម្បីជោគជ័យក្នុងតួនាទីរបស់អ្នកផងដែរ។
មធ្យោបាយក្នុងការបង្កើតទំនាក់ទំនងនៅកន្លែងធ្វើការ
ការកសាងទំនាក់ទំនងវិជ្ជមាននៅកន្លែងធ្វើការ អាចកើតឡើងដោយធម្មជាតិចំពោះមនុស្សមួយចំនួន ហើយមានលក្ខណៈងាយស្រួល។ ប៉ុន្តែវាក៏ជារឿងដ៏លំបាកសម្រាប់មនុស្សមួយចំនួនផងដែរ ដែលតម្រូវឱ្យមានការហាត់ពត់លត់ដំ ហើយប៉ុន្មានជំហានខាងក្រោមនេះ អាចជាគន្លឹះជួយអ្នកបាន៖
១. សួរសំណួរ និងស្តាប់
ការសួរសំណួរ និងការស្តាប់យ៉ាងសកម្មនឹងមិនត្រឹមតែអនុញ្ញាតឱ្យអ្នកស្វែងយល់បន្ថែមអំពីមិត្តរួមការងាររបស់អ្នកប៉ុណ្ណោះទេ ប៉ុន្តែក៏ជាផ្នែកមួយដ៏សំខាន់នៃដំណើរការនៃការកសាងទំនាក់ទំនងផងដែរ។ នៅពេលអ្នកសួរសំណួរអំពីជីវិតផ្ទាល់ខ្លួនរបស់មិត្តរួមការងារ គោលដៅអាជីព ឬតម្រូវការប្រចាំថ្ងៃ នោះមានន័យថាអ្នកកំពុងបង្ហាញចំណាប់អារម្មណ៍លើពួកគេ។ សូមផ្តល់ឱកាសឱ្យពួកគេចែករំលែកព័ត៌មានលម្អិតអំពីជីវិតរបស់ពួកគេ មុនពេលចែករំលែកព័ត៌មានផ្ទាល់ខ្លួនរបស់អ្នក។ ដូចគ្នានេះផងដែរ តាមរយៈការសួរសំណួរ និងការលើកទឹកចិត្តដល់ការប្រាស្រ័យទាក់ទងបើកចំហ មិត្តរួមការងាររបស់អ្នកនឹងមកភ្ជាប់ទំនាក់ទំនងជាមួយអ្នកកាន់តែប្រសើរជាងមុន។ ប៉ុន្តែចូរចាំថា សំណួរជជីករឿងរ៉ាវផ្ទាល់ខ្លួនមួយចំនួន ពុំគួរសួរនៅកន្លែងការងារនោះឡើយ។
២. ផ្តល់ជំនួយ
ការដកបន្ទុកចេញពីមិត្តរួមការងារនៅពេលដែលពួកគេកំពុងជួបបញ្ហា ឬមិនអាចបញ្ចប់ការងារតាមគម្រោងបាន គឺជាវិធីដ៏ល្អមួយដើម្បីកសាងទំនាក់ទំនងល្អ។ ប្រសិនបើអ្នកសម្គាល់ឃើញថាមិត្តរួមការងារមានអារម្មណ៍ធុញថប់ ហើយមានការងារត្រូវបំពេញច្រើន សូមពិចារណាផ្តល់ជំនួយដល់ពួកគេ។
៣. ដឹងថាពេលណាត្រូវសុំជំនួយ
ការសុំជំនួយក៏អាចចាប់ផ្តើមទំនាក់ទំនងនៅកន្លែងធ្វើការផងដែរ។ តាមរយៈការស្នើសុំឱ្យមិត្តរួមការងារចូលរួមនៅក្នុងគម្រោង ឬកិច្ចការងាររបស់អ្នក នឹងជួយឱ្យអ្នកមានឱកាសកាន់តែច្រើនដើម្បីស្គាល់ពួកគេ។ សូមចងចាំផងដែរថា អ្នកទំនងជាទទួលបានជំនួយដែលអ្នកត្រូវការ នៅពេលដែលអ្នកបានផ្តល់ជំនួយដូចគ្នាដល់អ្នកដទៃពីមុនមក។ ទំនាក់ទំនងមានទាំងការផ្តល់ឱ្យនិងទទួលយកហើយអ្នកអាចបង្ហាញពីបញ្ហានេះដោយការសុំ និងផ្តល់ជំនួយ។
៤. កោតសរសើរតួនាទីរបស់និយោជិតម្នាក់ៗ
ការសរសើរគឺជាអ្នកបង្កើតទំនាក់ទំនងដ៏មានឥទ្ធិពល។ គ្រប់ការងារ គ្រប់កន្លែងធ្វើការ គឺសុទ្ធតែមានបញ្ហាប្រឈមត្រូវដោះស្រាយចៀសមិនផុត ដែលពេលខ្លះបង្កជាបញ្ហាល្អក់កករនៅកន្លែងការងារ។ ទោះយ៉ាងណា ជាជាងការសន្និដ្ឋាន ឬទម្លាក់កំហុស វាអាចមានប្រយោជន៍ក្នុងការស្វែងរកដំណោះស្រាយចំពោះបញ្ហា។ ការធ្វើការប្រកបដោយផលិតភាព និងវិជ្ជាជីវៈ ការបង្ហាញអារម្មណ៍ដឹងគុណដល់ក្រុមការងារ នឹងអនុញ្ញាតឱ្យអ្នកចាប់ផ្តើមបង្កើតទំនាក់ទំនងជាវិជ្ជមាន និងល្អប្រសើរពីមួយពេលទៅមួយពេល។
៥. ស្វែងយល់ពីចំណុចខ្លាំង និងចំណុចខ្សោយរបស់អ្នក
មុននឹងផ្តោតលើការអភិវឌ្ឍទំនាក់ទំនងនៅកន្លែងការងារ វាអាចមានប្រយោជន៍ក្នុងការយល់ដឹងពីចំណុចខ្លាំង និងចំណុចខ្សោយផ្ទាល់ខ្លួនរបស់អ្នក។ ការយល់ដឹងនូវពីរចំណុចនេះគឺនឹងបង្កឱកាសឱ្យលោកអ្នកស្គាល់ខ្លួនឯងកាន់តែច្បាស់ដោយផ្តោតទៅលើ៖
- ការយល់ដឹងដោយខ្លួនឯង៖ ការយល់ដឹងដោយខ្លួនឯងគឺជាសមត្ថភាពក្នុងការដឹងពីតម្រូវការ និងបំណងប្រាថ្នារបស់អ្នកផ្ទាល់នៅក្នុងអាជីព និងទំនាក់ទំនង។
- ការគ្រប់គ្រងខ្លួនឯង៖ ការគ្រប់គ្រងខ្លួនឯងគឺជាសមត្ថភាពក្នុងការគ្រប់គ្រងអារម្មណ៍ និងគំនិតរបស់អ្នក។
- ការយល់ចិត្ត៖ ការយល់ចិត្ត គឺជាសមត្ថភាពក្នុងការយល់ និងយល់ចិត្តចំពោះស្ថានភាពរបស់អ្នកដទៃ។
- ជំនាញសង្គម៖ ការអភិវឌ្ឍជំនាញសង្គមសំខាន់ៗដូចជា ការធ្វើការងារជាក្រុម ការដោះស្រាយជម្លោះ ការទំនាក់ទំនង និងជំនាញដោះស្រាយបញ្ហាគឺមានសារសំខាន់នៅពេលបង្កើតទំនាក់ទំនងថ្មី។
៦. កំណត់ពេលវេលាដើម្បីអភិវឌ្ឍទំនាក់ទំនង
ការកសាងទំនាក់ទំនងវិជ្ជមាននៅកន្លែងធ្វើការ គឺត្រូវការពេលវេលា ព្រោះថាភារកិច្ចប្រចាំថ្ងៃនៃមុខតំណែងរបស់អ្នកអាចធ្វើឱ្យពិបាកក្នុងការស្វែងរកពេលវេលាដើម្បីធ្វើទំនាក់ទំនងជាមួយសមាជិកក្រុមផ្សេងទៀត។ តាមរយៈការកំណត់ពេលវេលាដើម្បីអភិវឌ្ឍទំនាក់ទំនង អ្នកនឹងឃើញថាវាកាន់តែងាយស្រួលក្នុងការប្រាស្រ័យទាក់ទងជាមួយ និងស្គាល់មិត្តរួមការងាររបស់អ្នក។ អ្នកអាចកំណត់ពេលវេលាក្នុងអំឡុងពេលអាហារថ្ងៃត្រង់ ក្នុងអំឡុងពេល ១០នាទីដំបូងនៃថ្ងៃធ្វើការរបស់អ្នក ឬនៅពេលដែលអ្នកកំពុងចាកចេញពីការិយាល័យនៅថ្ងៃចុសប្ដាហ៍។ អ្នកថែមទាំងអាចកំណត់ពេល ១០នាទីដំបូងនៃកិច្ចប្រជុំជាពេលវេលាដែលមនុស្សគ្រប់គ្នាចាប់ដៃគ្នាទៅវិញទៅមកបានផងដែរ។
អត្ថបទទាក់ទង