រឿង ៥យ៉ាង ដែលអ្នកត្រូវដឹងក្នុងពិភពអាជីវកម្ម
ការបើកអាជីវកម្មមួយដែលដើរទៅមុខមានប្រាក់ចំណូលមិនមែនជារឿងងាយស្រួលដូចស្ដាប់ឮនោះទេ។ ខាងក្រោមនេះរឿង ៥យ៉ាង ដែលអ្នកត្រូវដឹងក្នុងពិភពអាជីវកម្ម៖
១. គំនិតមិនបានការអីនោះទេ ប្រសិនបើមិនមានការអនុវត្ត
យើងសុទ្ធតែមានគំនិតជាច្រើននៅក្នុងខួរក្បាលយើងដែលសុទ្ធតែជាគំនិតល្អ ដែលអាចជួយផ្លាស់ប្ដូរពិភពលោកបាន។ នរណាៗក៏ចេះស្រម៉ៃ និងនឹកឡើងនូវគំនិតអាជីវកម្មល្អដែរ។
មនុស្សមួយចំនួនមានអំនួតទៅនឹងគំនិតរបស់ខ្លួនឯងជ្រុលដោយសារតែគំនិតអាជិវកម្មរបស់ពួកគេប្លែកថ្មីពិសេសជាងគេ តែគេមិនជាយល់ថា គំនិតវាគ្មានបានការអ្វីទាំងអស់បើសិនជាមិនធ្វើគំនិតនោះឱ្យចេញជាការពិតទេនោះ។
កុំធ្វើឱ្យខ្លួនឯងផុងខ្លួនជាប់ទៅនឹងក្តីស្រម៉ៃថាអាជីវកម្មនឹងជោគជ័យបើគ្រាន់តែអ្នកមានតែគំនិតនោះ។ ប្រហែលជាពីមុនមកមានមនុស្សច្រើនពាន់អ្នកហើយធ្លាប់នឹកឃើញនូវគំនិតមួយនោះឡើងមក ប៉ុន្តែគំនិតរបស់អ្នកអាចនឹងប្រសើរជាងគេ អាចនឹងដើរបានល្អជាងគេ លុះត្រាតែអ្នកចាប់ផ្ដើមធ្វើ នឹងបង្ហាញគេថាគំនិតនេះដើរមែន។
សរុបសេចក្តីមក អត្ថបទនេះមិនមែនធ្វើឱ្យអ្នករួញរាខ្លាចដើរថយចេញពីការចាប់ផ្ដើមអាជីវកម្មផ្ទាល់ខ្លួននោះទេ ប៉ុន្តែជាការផ្តល់នូវគំនិតក៏ដូចជាប្រាប់អ្នកពីរឿងដែលអ្នកនឹងជួបប្រទះ ដើម្បីឱ្យអ្នករៀបចំខ្លួនឱ្យខ្លាំង ក្លាយទៅជាខ្លួនអ្នកដែលប្រសើរជាងមុន។
២. សំខាន់ គឺលទ្ធផល
រឿងមួយដែលប្រហែលជានាំឱ្យអាជីវកម្មមួយចំនួនបរាជ័យនោះគឺ ការបោះបង់របស់ម្ចាស់អាជីវកម្មនៅពេលដែលគេខំប្រឹងធ្វើការមួយទំហឹង ប៉ុន្តែលទ្ធផលដែលទទួលបានមិនដូចអ្វីដែលរំពឹងទុក។
ពេលដែលយើងធ្វើការឱ្យគេ យើងដឹងច្បាស់ណាស់ថាតើយើងអាចរកលុយបានយ៉ាងម៉េច ដោយគិតយ៉ាងសាមញ្ញថា ធ្វើការកាន់តែច្រើនម៉ោងបូកជាមួយការខំប្រឹងប្រែង យើងនឹងទទួលបានប្រាក់កម្រៃកាន់តែច្រើន។ ហើយប្រសិនបើយើងមិនទទួលប្រាក់កម្រៃតាមការងារដែលយើងបានធ្វើទេនោះ យើងនឹងដូរកន្លែងរើទៅកន្លែងថ្មីមួយទៀត។
តែអាជីវកម្មខុសពីណឹង! នៅក្នុងការរកស៊ី អតិថិជន អ្នកដែលប្រើប្រាស់សេវាកម្ម ឬផលិតផលរបស់អ្នក អត់ខ្វល់ថាអ្នកខំប្រឹងធ្វើការខ្លាំងយ៉ាងណា ហត់យ៉ាងណាទេ អ្វីដែលសំខាន់ពិតប្រាកដនោះគឺលទ្ធផលនៃផលិតផល ឬសេវាកម្មដែលអ្នកផ្ដល់ឱ្យគេ។
អ្នកខ្លះទៅត្អូញត្អែថា ខំប្រឹងបង្កើតវាអស់ពេលជាយូរមកហើយ គ្មាននរណាចាប់អារម្មណ៍ទិញសោះ មិនសមសោះ ក្រោយមកគេក៏សម្រេចចិត្តមែនទែនថាបោះបង់ចោល ដោយសារតែពួកគេមិនបានដឹងថានៅក្នុងអាជីវកម្មអ្វីដែលសំខាន់ពិតប្រាកដនោះគឺ លទ្ធផលតែប៉ុណ្ណោះ។
៣. មិនចាំបាច់ថាត្រូវតែបង្កើតថ្មីទេ
មានការគិតខ្វែងគំនិតគ្នាជាច្រើនទាក់ទងទៅនឹងការបង្កើតអាជីវកម្មដែលថាប្រសិនបើអ្នកចង់ចាប់ផ្ដើមអាជីវកម្ម អ្នកត្រូវតែរកនឹកឃើញនូវគំនិតមួយដែលថ្មីស្រឡាង និងខុសគេ ហើយគំនិតនេះមិនសូវជាត្រូវប៉ុន្មានទេ។
គំនិតថ្មីរបស់អ្នកអាចនឹងមានឱកាសបរាជ័យច្រើនជាងអ្វីដែលអ្នកគិត។ វិធីដ៏ល្អមួយក្នុងការចាប់ផ្ដើមអាជីវកម្មក្នុងករណីអ្នកជាអ្នកថ្មីថ្មោងមិនសូវជាមានបទពិសោធន៍ផងនោះគឺ ការដែលជ្រើសយកគំនិតអាជីវកម្មដែលមានស្រាប់ដែលដំណើរការពិតៗ ថែមគ្រឿងលក្ខណៈពិសេសរបស់អ្នក ហើយចាប់ផ្ដើមវា។
នេះក៏ដោយសារតែគំនិតអាជីវកម្មនេះវាជោគជ័យរួចទៅហើយ ជាហេតុធ្វើឱ្យអ្វីដែលអ្នកត្រូវធ្វើនោះគឺខំប្រឹងធ្វើ នោះឱកាសជោគជ័យរបស់អ្នកនឹងមានច្រើន។ ជាឧទាហរណ៍រឿងពិតៗក្នុងវិស័យបច្ចេកវិទ្យា អ្នកនឹងឃើញក្រុមហ៊ុនបច្ចេកវិទ្យាមួយចំនួនដើរតាមដំណើររបស់Apple។ នេះក៏ដោយសារតែ Apple ជាអ្នកនាំមុខគេអាចនិយាយថាបងធំនៅក្នុងទីផ្សារ ក្នុងវិស័យបច្ចេកវិទ្យានេះ ហេតុនេះ Apple ហ៊ានប្រថុយដាក់បង្ហាញនូវរបស់ថ្មីប្លែកបាន ប៉ុន្តែក្រុមហ៊ុនមួយចំនួនទៀតមិនអាចប្រថុយដូចច្នោះបានទេ។
បើមិនជឿមើលតែក្បាលឆក (Notch) នៅលើ iPhone X ទៅ Apple ជាអ្នកដែលប្រកាសបង្ហាញក្បាលឆកនេះមុនគេ ក្រោយមកគេឃើញមានក្រុមហ៊ុនបច្ចេកវិទ្យាមួយចំនួនទៀតចាប់ផ្ដើមប្រើប្រាស់ការរចនាបែបនេះដែរ។
៤. មិនចាំបាច់ទាល់តែមានលុយច្រើនទើបអាចចាប់ផ្ដើមអាជីកម្មបាននោះទេ
វាមិនមែនជារឿងចម្លែកនោះទេ ដែលអាជីកម្មអាចទ្រាំទ្ររស់ទៅមុខតទៀតបានទាល់តែមានលុយ ដោយសារតែមានចំណាយជាច្រើនដែលត្រូវប្រើ ដូចជាប្រាក់ខែបុគ្គលិក ថ្លៃឈ្នួលជួលការិយាល័យអីជាដើម។ ប៉ុន្តែចំណាយទាំងអស់ណឺងកើតមានឡើងទាល់តែអាជីវកម្មណឹងជោគជ័យដើរទៅមុខដែរ។
អាជីវកម្មខ្នាតតូចភាគច្រើនមិនចាំបាច់អីត្រូវការលុយទាំងបាច់ៗដើម្បីចាប់ផ្ដើមនោះទេ ជាពិសេសពពួកអាជីវកម្មដែលពេញនិយមសព្វថ្ងៃ អាជីវកម្មតាមអនឡាញនេះ។ ជាមួយនឹងបច្ចេកវិទ្យា និងអ៊ីនធឺណេត អ្វីដែលត្រូវការចាំបាច់ពិតប្រាកដនោះគឺការប្រឹងប្រែងធ្វើការឥតរុញរា ធ្វើរហូតទាល់តែវាចំណេញ។
កុំបំបាក់ក្តីសង្ឃឹមរបស់អ្នកជាមួយនឹងគំនិតដែលថា ត្រូវសន្សំលុយឱ្យសល់រាប់ម៉ឺនដុល្លាសិនមុននឹងចាប់ផ្ដើម។ ចាំថា ដំបូងឡើយ ក្នុងអាជីវកម្មរបស់អ្នក អ្នកមានតួរនាទីគ្រប់យ៉ាង អ្នកជាអ្នកលក់ អ្នកសរសេរកូដ អ្នកចរចារ អ្នកវិនិយគ អ្នកគ្រប់គ្រងហូរហែរ អ្នកមានតួនាទីតាមដែលអាជីវកម្មអ្នកត្រូវការ។
៥. អាជីវកម្មមិនសប្បាយដូចដែលអ្នកគិតនោះទេ
មានមនុស្សជាច្រើនគិតខុសទៅលើការដែលធ្វើជាម្ចាស់អាជីវកម្មខ្លួនឯង។ វាមិនដូចជាអ្វីដែលយើងតែងតែឃើញក្នុងរឿងកុននោះទេ វាជារឿងមួយដ៏គួរឱ្យធុញទ្រាន់និងស្ដ្រេសខ្លាំងគួរសមដែរ។ អ្នកនឹងជួបមនុស្សជាច្រើនប្លែកផ្សេងៗ ដែលមានអត្តចរិតគ្រប់យ៉ាង ដែលខ្លះទៅ អ្នកស្ទើរតែនឹងគិតថា អ្នកមិនគួរចាប់ផ្ដើមវាទេ។
នេះមិនមែនជាការឱ្យអ្នកងាកត្រឡប់ក្រោយបោះបង់ចោលនូវក្តីស្រម៉ៃនោះទេ តែជាការរំឮកអ្នកឱ្យស្វែងយល់ រៀន និងអភិវឌ្ឍជំនាញខាងផ្នែកទំនាក់ទំនង ជួបនឹងមនុស្ស ចរចានិយាយជាមួយអតិថិជន ឬក៏ដៃគូរ។ អ្នកត្រូវមានភាពអត់ធ្មត់ ចេះគ្រប់គ្រងកំហឹង និង ស្ត្រេស កុំចេះតែជះ ដាក់គេដាក់ឯង បើមិនដូចច្នោះទេ មិនយូរមិនឆាប់អាជីវកម្មរបស់អ្នកនឹងបិទទ្វា។
មានពេលដែលធ្វើឱ្យអ្នកសប្បាយចិត្ត មានទឹកមាត់ឡេបជាច្រើនដូចជា នៅពេលដែលអ្នកទទួលបានអតិថិជនដំបូង ឬក៏ទទួលបានប្រាក់ចំណេញជាលើកដំបូង។ ប៉ុន្តែរឿងទាំងអស់់នេះមិនមែនកើតឡើងរហូតពេញមួយថ្ងៃទេ មុននឹងអ្នកឈានដល់ការសម្រេចគោលដៅប៉ុនណឹង អ្នកត្រូវឆ្លងកាត់ជាមួយនឹងការងារដ៏គួរឱ្យធុញជាច្រើនដែលអ្នកត្រូវធ្វើ។
សរុបមក ការដែលមានអាជីវកម្មមួយនៅក្នុងដៃ ជាក្តីស្រម៉ៃមួយដែលនរណាៗក៏មានក្នុងបេះដូងមកជាយូរហើយដែរ។ នរណាមិនចង់ ងើបមកធ្វើអ្វីដែលខ្លួនស្រឡាញ់ដោយមិនចាំបាច់ភ័យមាននរណាមកស្ដីបន្ទោសត្រួតពីលើនោះ។ ប៉ុន្តែនិយាយ ស្រួលជាងធ្វើ មានមនុស្សតិចតួចប៉ុណ្ណោះដែលក្លាយទៅជាម្ចាស់អាជិវកម្មដែលជោគជ័យពិតប្រាកដ ហើយភាគច្រើនបើបានធ្វើការងារដែលមានលក្ខខណ្ឌរាងគ្រាន់បើបន្តិចហើយក៏មិនចង់ចាកចេញពីកន្លែងរបស់ខ្លួនឡើយ ដោយមានតែខំធ្វើការបន្តទៀតឱ្យក្លាយជាបុគ្គលិកឆ្នើម ឡើងប្រាក់ខែ បន្តរឋានៈ។
អត្ថបទទាក់ទង
គន្លឹះសំខាន់ៗ ចំនួន៤ ក្នុងការចាប់ផ្តើមអាជីវកម្មជាមួយនឹងដើមទុនតិច