វិធីសាស្រ្តចំនួន ៨ ដែលអ្នកអាចធ្វើការសាកល្បងមនុស្សម្នាក់ទៅលើអត្តចរិត និងភាពស្មោះត្រង់របស់គាត់
ការសាកល្បង គឺពិតជាសំខាន់ ព្រោះយើងបើគ្មានការសាកល្បង វាអាចផ្ដល់ផលអាក្រក់ណាស់សម្រាប់យើងនៅថ្ងៃខាងមុខ។ ការសាកល្បង ជួយឲ្យយើងដឹងថាតើមនុស្សណាស្មោះត្រង់ ឬមនុស្សណាអាចទទួលខុសត្រូវលើកិច្ចការដែលយើងដាក់ឲ្យធ្វើដែរឬទេ? ការសាកល្បង ជួយយើងឲ្យស្គាល់ពីការពិត និងការកុហកទាំងឡាយក្នុងមនុស្ស។
កាលណាយើងនិយាយការសាកល្បង គឺមានច្រើនចំណុច។ យើងសាកល្បងទៅលើ៖
- ភាពស្មោះត្រង់
- អត្តចរិត
- ភាពជាអ្នកដឹកនាំ
- ភាពឆ្លាតវៃ និងប្រាជ្ញារបស់មនុស្សដើម្បីដោះស្រាយបញ្ហា
- ទំនាក់ទំនងក្នុងគ្រួសារ និងការងារ
- សុខភាពផ្លូវកាយ
ទោះបីជាមានច្រើនយ៉ាងណាក៏ដោយ អ្វីដែលយើងត្រូវផ្ដោតជាងគេ គឺការសាកល្បងលើអត្តចរិត និងភាពស្មោះត្រង់ ព្រោះវាមានភាពសំខាន់បំផុត។ មូលហេតុដែលវាសំខាន់បំផុត ព្រោះវាប៉ះពាល់គ្រប់ផ្នែកនៃជីវិតរបស់មនុស្ស។ ខាងក្រោមនេះជារបៀបដែលយើងធ្វើការសាកល្បងមនុស្សម្នាក់ទៅលើអត្តចរិត និងភាពស្មោះត្រង់របស់គាត់៖
១. ប្រើប្រាស់កត្តាលុយ
លុយជាឧបករណ៍ដើម្បីសាកល្បងថាតើមនុស្សម្នាក់ស្មោះត្រង់ឬទេ? មានអំណួតឬទេ? លោភលន់ឬទេ? មានចិត្តមេត្តាករុណាឬទេ? ជាធម្មតាយើងប្រើប្រាស់លុយជាឧបករណ៍មួយដើម្បីតេស្តភាពស្មោះត្រង់របស់មនុស្ស មុនពេលឲ្យមនុស្សនោះចូលកាន់តំណែងសំខាន់ណាមួយ។ យើងចាំមើលថាតើមនុស្សម្នាក់លោភលន់ចង់បានតែលុយ ឬចង់ធ្វើអ្វីដែលមានតម្លៃក្នុងជីវិត? ចងចាំថា មនុស្សដែលចង់ធ្វើអ្វីដែលសំខាន់ ហើយមានតម្លៃមួយជីវិតមិនគិតតែពីលុយនោះទេ គឺគេមានគុណតម្លៃស្នូលក្នុងជីវិតរបស់ខ្លួន។
២. ប្រើប្រាស់កិច្ចការ
របៀបមួយទៀត គឺយើងដាក់កិច្ចការឲ្យគាត់ធ្វើ ហើយយើងចាំមើលថាតើគាត់ស្មោះត្រង់នឹងកិច្ចការនោះឬទេ? តើគាត់មានទំនួលខុសត្រូវល្អដែរឬទេ? សូមចងចាំថា គុណភាពនៃកិច្ចការ គឺអាស្រ័យលើលទ្ធផលនៃកិច្ចការដែលគាត់បានធ្វើ។
៣. ប្រើប្រាស់បញ្ហា
យើងប្រើប្រាស់បញ្ហា (ពេលខ្លះយើងបង្កើតបញ្ហា) ដើម្បីតេស្តសាកល្បងមនុស្សម្នាក់ថាតើគាត់ឆ្លើយតបយ៉ាងណានៅពេលបញ្ហាកើតឡើង តើគាត់ស្មោះត្រង់ឬទេ? តើគាត់អត់ធ្មត់ឬទេ? តើគាត់មានលេសច្រើនឬទេ? តើគាត់មានភាពរអ៊ូរទាំច្រើនឬទេ? បើគ្មានបញ្ហាទេ យើងក៏មិនដឹងថាតើនរណាជាមនុស្សដែលស៊ូទ្រាំខ្លាំងដែរ ដូចជាមាសសុទ្ធ បើមិនដាក់វាទៅក្នុងភ្លើង យើងប្រាកដជាមិនដឹងច្បាស់ ១០០% នោះទេ ថាវាជាមាសសុទ្ធនោះ។ បញ្ហាជាឧបករណ៍ដើម្បីជួយមនុស្សឲ្យរីកចម្រើន ហើយក៏ជាឧបរណ៍ដើម្បីចម្រាញ់មនុស្សដែរ។
៤. ប្រើប្រាស់រង្វាន់
តើមនុស្សនឹងប្រតិកម្មយ៉ាងណានៅពេលគេទទួលបានរង្វាន់? តើគេស្កប់ចិត្ត ហើយលែងរីកចម្រើន? តើគេមានអំណួត ហើយមើលងាយទៅកាន់អ្នកចាញ់? ហើយតើគេមានអត្តចរិតយ៉ាងម៉េចសម្រាប់មនុស្សដែលចាញ់ ឬមនុស្សដែលមិនទទួលបានរង្វាន់?
៥. ប្រើប្រាស់កត្តាអវត្តមាន
អវត្តមាន គឺកើតឡើងនៅពេលគ្មានយើងនៅជាមួយ។ យើងប្រើប្រាស់កត្តាអវត្តមានរបស់យើង ដើម្បីដឹងថាមនុស្សម្នាក់ពិតជាស្មោះត្រង់នឹងយើងឬទេ? ហើយថាតើគេធ្វើអ្វីខ្លះពេលគ្មានយើង? តើគេមានអត្តចរិតដូចពីមុនឬទេ? តើនឹងមានអ្វីផ្លាស់ប្ដូរខ្លះពេលយើងមិននៅ?
៦. ប្រើប្រាស់ពាក្យសម្ដីដែលប្រកបដោយប្រាជ្ញា
ស្លាប់ ឬរស់ ព្រោះពាក្យសម្ដី ហើយយើងតែងតែទទួលផលនូវអ្វីដែលយើងនិយាយនោះ។ បើនិយាយដោយប្រើប្រាជ្ញា តើគាត់ហ្នឹងប្រតិកម្មយ៉ាងណា? យើងប្រើប្រាស់ពាក្យសម្ដីរបស់យើងដើម្បីដឹងថាតើមនុស្សម្នាក់ពូកែគិតឬទេ ឬមួយក៏គ្រាន់តែស្ដាប់ហើយយល់ព្រមដោយគ្មានមតិយោបល់? តើគាត់ត្រចៀកសរ ឆាប់ជឿយើងដោយគ្មានការពិចារណាឬទេ? តើគាត់និយាយពីក្រោយខ្នងឬទេ?
៧. ប្រើប្រាស់ពេលវេលា
យើងបង្កើតប្រព័ន្ធពេលវេលា ហើយអង្គេតមើលអំពីរបៀបដែលគាត់ប្រើប្រាស់ពេលវេលា។ តើគាត់ជាមនុស្សដែលចាំសិនឬទេ? តើគាត់ជាមនុស្សតម្អក់ ឬស្ពឹកស្រពន់និងកិច្ចការរបស់គាត់ឬទេ?
៨. ប្រើប្រាស់គុណតម្លៃស្នូល
មនុស្សគ្រប់គ្នាមានតម្លៃស្នូលរបស់ខ្លួន។ មនុស្សខ្លះយកគ្រួសារជាតម្លៃស្នូល រីឯអ្នកខ្លះទៀតយកការសិក្សាជាតម្លៃស្នូល។ នៅពេលដែលយើងឲ្យគាត់ធ្វើកិច្ចការណាមួយដែលប៉ះពាល់ដល់គុណតម្លៃស្នូលរបស់គាត់ តើគាត់ព្រមធ្វើដែរឬទេ។ មនុស្សខ្លះសុខចិត្តលះបង់គ្រួសារ ដើម្បីមាសប្រាក់ និងអំណាច។ អញ្ចឹងហើយបានជាយើងត្រូវប្រុងប្រយ័ត្ន។ កុំជ្រើសរើសមនុស្សណាដែលសុខចិត្តជ្រើសរើសធ្វើកិច្ចការរបស់យើង ហើយបំបាត់គុណតម្លៃស្នូលរបស់ខ្លួន។
អត្ថបទទាក់ទង