រឿងលំបាកទាំង ៨ ដែលមនុស្សធម្មតាពិបាកធ្វើ

មាន​ដែល​ចាប់​អារម្មណ៍​ពី​ខ្លួន​ឯងទេ​ថា ​តើ​អ្នកមាន​ចំណុច​ពិសេស​អ្វីខ្លះ​នៅ​លើ​ខ្លួន? អ្នកខ្លះ​និយាយ​ថា​​ ខ្ញុំ​ស្គាល់​ខ្លួន​ឯង​ច្បាស់​ណាស់ ​គ្មាន​អ្នកណា​ស្គាល់​ខ្ញុំ​ជាង​ខ្ញុំ​ស្គាល់​ខ្លួន​ឯង​ទេ។ អត់ទេ! ​គ្រប់គ្នា​តែង​ផ្លាស់ប្ដូរ​ចរិត​ទៅ​តាម​ពេល​វេលា ​ប៉ុន្តែ​ទោះ​ពេលវេលា​ផ្លាស់ប្ដូរ​យ៉ាងណា ​យើង​ក៏​នៅ​តែ​ជា​យើង​ដដែល។

ចុះតើអ្វីជាភាពខុសគ្នារវាងមនុស្សរឹងមាំ និងមនុស្សធម្មតា? នោះគឺមនុស្សរឹងមាំជ្រើសរើសធ្វើអ្វីដែលលំបាក ប៉ុន្តែផ្ដល់ផ្លែផ្កាច្រើន។​ ខាងក្រោមនេះជាការលំបាកដែលមនុស្សពិបាកធ្វើ៖

១. គ្រប់គ្រងកំហឹងរបស់ខ្លួន

ការគ្រប់គ្រងកំហឹងរបស់ខ្លួនមិនបានល្អ មិនមែនជាការងាយស្រួលនោះទេ។ នៅក្នុងសៀវភៅសុភាសិតបានឲ្យយើងដឹងថា មនុស្សមានប្រាជ្ញា គឺជាមនុស្សដែលមិនឆាប់ខឹង។ បើអ្នកអាចគ្រប់គ្រងកំហឹងរបស់ខ្លួនបានល្អ គឺមានន័យថា អ្នកជាមនុស្សម្នាក់ដែលរឹងមាំ។ ការគ្រប់គ្រង់កំហឹងបានល្អ មិនមែនមានន័យថា យើងមិនចេះខឹងនោះទេ ប៉ុន្តែវាមានន័យថា យើងដឹងថាពេលណាត្រូវបញ្ចេញកំហឹង ហើយពេលណាត្រូវប្រើប្រាស់វាដើម្បីជាប្រយោជន៍ដល់យើង ឬក្រុមរបស់យើង។​

២. ក្រោកឡើងពីព្រលឹមរៀងរាល់ថ្ងៃ

ការក្រោកពីព្រលឹម មិនមែនជាការងាយស្រួលនោះទេ។ មនុស្សរឹងមាំ អាចក្រោកឡើងពីព្រលឹមបានដោយគ្មានភាពត្អួញត្អែរ តែឯមនុស្សទន់ខ្សោយបិទម៉ោងរោទ៍ ហើយដេកបន្ត។

៣. មិនខ្វល់នូវការគិត ឬការរិះគន់របស់អ្នកដទៃ

មនុស្សភាគច្រើនបាក់ទឹកចិត្ត ហើយខ្វល់ខ្វាយច្រើន នៅពេលគេមិនយល់ព្រម ឬគេរិះគន់អំពីខ្លួន ប៉ុន្តែមនុស្សដែលរឹងមាំ ដែលជឿលើអ្វីដែលខ្លួនមាន គឺមិនខ្វល់អំពីការគិត ឬការរិះគន់របស់អ្នកដទៃនោះទេ។ អញ្ចឹងហើយបានជាវាជាការលំបាកមួយសម្រាប់មនុស្សដែលរៀនរស់នៅជាមួយវា។ ពេលខ្លះការគិត ឬការរិះគន់របស់អ្នកដទៃ គឺត្រឹមត្រូវ ប៉ុន្តែមិនប្រាកដថាវាត្រឹមត្រូវទាំងអស់នោះទេ។

៤. និយាយពាក្យថាទេ

មនុស្សមិនសូវចូលចិត្តមនុស្សដែលនិយាយពាក្យ “ទេ” មកកាន់ខ្លួននោះទេ អញ្ចឹងហើយបានជាមានតែមនុស្សដែលរឹងមាំប៉ុណ្ណោះ ហ៊ាននិយាយពាក្យថា “ទេ” ទៅកាន់មនុស្សណាម្នាក់។

៥. គ្រង់គ្រងពាក្យសម្ដីរបស់ខ្លួន

មានពាក្យស្លោកមួយបាននិយាយថា ពាក្យសម្ដី គឺនិយាយចេញពីអណ្ដាតដែលគ្មានឆ្អឹង ប៉ុន្តែអាចសម្លាប់ដួងចិត្តរបស់មនុស្សបាន។ ការគ្រប់គ្រងពាក្យសម្ដី ត្រូវបានលើកឡើងដោយមនុស្សជាច្រើន ហើយវាពិតជាលំបាកក្នុងការណាស់ក្នុងការគ្រប់គ្រងថាតើត្រូវនិយាយយ៉ាងណាឲ្យត្រូវតាមកាលៈទេសៈ។ អញ្ចឹងហើយបានជាមនុស្សដែលនិយាយច្រើនរមែងខុសច្រើន រីឯអ្នកនិយាយតិច ខុសតិច។

៦. សុំនូវអ្វីដែលពួកគេចង់បានពីមនុស្សចម្លែក

ភាពភ័យខ្លាច បណ្ដាលឲ្យមនុស្សពិបាកក្នុងការសុំអ្វីដែលពួកគេចង់បាន ព្រោះខ្លាចគេបដិសេធ។ នេះជាមូលហេតុដែលធ្វើឲ្យសិស្សថ្មី ខ្លាចក្នុងការសួរគ្រូ ឬមនុស្សម្នាក់ពិបាកក្នុងការនិយាយជាមួយអ្នកដទៃ។ ករណីកើតឡើងច្រើនជាមួយអ្នកលក់ អ្នកជំនួញ និងមនុស្សដែលចង់ស្វះស្វែងរកនូវចំណេះដឹងថ្មី ប៉ុន្តែភាពភ័យខ្លាចបានរាំងស្ទះពួកគេមិនឲ្យធ្វើវា។

៧. និយាយភាសានៃសេចក្ដីស្រលាញ់

ដើម្បីឲ្យគ្រួសារមានសុភមង្គល ហើយបុគ្គលរីកចម្រើន យើងត្រូវចាប់ផ្ដើមដោយនិយាយភាសាទាំង ៥ នៃសេចក្ដីស្រលាញ់ដែលនិពន្ធដោយលោក ហ្គារី ឆាពមែន (Gary Chapman)។

ភាសាទី១៖ ពាក្យសម្ដីវិជ្ជមាន ជាពាក្យសរសើរគ្នា លើកទឹកចិត្តគ្នាជាដើម។

ភាសាទី២៖ ការបម្រើគ្នា៖ មនុស្សយើងមានភាពអាត្មានិយមដែលស្វែងរកចង់ឲ្យតែគេបម្រើ ប៉ុន្តែមិនចូលចិត្តបម្រើគេនោះទេ។ វាជាការលំបាកណាស់ក្នុងការបម្រើគ្នា ព្រោះលក្ខណៈមនុស្សខុសគ្នា ដែលយើងមិនអាចផ្គោបចិត្តគ្នាបានទាំងអស់នោះទេ ប៉ុន្តែការបម្រើគ្នាទៅវិញទៅមក ជាអ្វីដែលមានតែមនុស្សរឹងមាំខ្លាំងនោះទេ អាចធ្វើបាន។

ភាសាទី៣៖ ជូនកាដូរទៅកាន់គ្នា៖ តាមពិត ការជូនកាដូរទៅកាន់គ្នាទៅវិញទៅមកមិនលំបាកនោះទេ ជាពិសេសសម្រាប់អ្នកមានលុយ ប៉ុន្តែកាដូរដែលចេញពីចិត្ត គឺត្រូវការការប្ដេជ្ញាចិត្ត។ ការឲ្យកាដូទៅកាន់គ្នា ធ្វើឲ្យមនុស្សមានអារម្មណ៍ពិសេសនៃសេចក្ដីស្រលាញ់។

ភាសាទី៤៖ ការចំណាយពេលជាមួយគ្នា៖ នៅក្នុងសង្គមដែលរវល់ ដូចសព្វពិបាកក្នុងការស្វែងរកពេលវេលាល្អៗជាមួយគ្នា។ ប៉ុន្តែមនុស្សដែលរឹងមាំ គេឈ្លៀតពេលវេលាដែលរវល់របស់គេដើម្បីចំណាយពេលជាមួយមនុស្សដែលខ្លួនស្រលាញ់។

ភាសាទី៥៖ កាយវិការខ្វល់ខ្វាយពីគ្នា៖ ដូចជាការឱបគ្នា បង្រៀកស្មាគ្នា បង្ហាញពីដួងចិត្តខ្វល់ខ្វាយពីគ្នា គឺគ្រប់គ្នាអាចធ្វើបាន ប៉ុន្តែការធ្វើដែលចេញពីចិត្តមិនមែនងាយស្រួលនោះទេ។

៨. ហ៊ាននិយាយពាក្យថាសុំទោស ហើយសូមនឹងពាក្យជួយខ្ញុំ

យើងធ្វើការសិក្សាដោយយកមនុស្ស ១០នាក់ មកពិសោធន៍ បង្ហាញឲ្យឃើញថា នៅពេលជួបស្ថានការណ៍មួយដែលខ្លួនធ្វើខុស គឺពិបាកណាស់ក្នុងការនិយាយពាក្យសុំទោស។ បើយោងតាមទស្សនវិជ្ជាបានបង្ហាញពីមូលហេតុដែលធ្វើឲ្យយើងពិបាកនិយាយ នោះគឺដោយសាការនិយាយពាក្យសុំទោស ធ្វើឲ្យខ្លួនគាត់មានអារម្មណ៍ថាអន់ មានអារម្មណ៍ថាខ្លួនជាមនុស្សគ្មានតម្លៃ ប៉ុន្តែសេចក្ដីពិតនោះ គឺផ្ទុយទៅវិញ បើយើងនិយាយពាក្យទាំងនេះ មនុស្សគេនឹងកាន់តែស្រលាញ់យើង ហើយយកចិត្តទុកដាក់នឹងយើងខ្លាំងជាងមុនទៅទៀត។


អត្ថបទទាក់ទង

ហេតុអ្វីបានជាមេដឹកនាំប្រកបដោយប្រសិទ្ធភាពខ្ពស់បរាជ័យ?

 

Leave a Reply