តើអ្វីជាការប្រកាសជ្រើសរើស និងរើសយកបុគ្គលិក?
ការប្រកាសជ្រើសរើសបុគ្គលិក
វាគឺជាដំណាក់កាលដំបូងនៃការប្រតិបត្តិគ្រប់គ្រងធនធានមនុស្សក្នុងអង្គភាពតូច មធ្យម និងធំ ក្នុងការស្វែរកធនធានមនុស្ស ដើម្បីបំពេញការងាររបស់អង្គភាព។ អ្នកគ្រប់គ្រងតែងតែយកចិត្តទុកដាក់ធ្វើការផ្សព្វផ្សាយ និងវិភាគឲ្យបានល្អិតល្អន់ទៅលើការងារ តម្រូវការ តួនាទី និងលក្ខណៈសម្បត្តិរបស់បេក្ខភាពការងារដើម្បីធ្វើយ៉ាងណាឲ្យការប្រកាសជ្រើសរើសបុគ្គលិកមានប្រសិទ្ធភាព ហើយទទូលបានធនធានប្រកបដោយគុណភាព ដែលនាំឲ្យការប្រតិបត្តិមានដំណើរការបានល្អ មានទំនួលខុសត្រូវខ្ពស់ និងការជឿរជាក់ ព្រមទាំងទំនុកចិត្តរបស់បេក្ខជនការងារ ដែលកត្តាទាំងនេះជាលក្ខណៈផ្ទាល់នៃការប្រកាសជ្រើសរើសឲ្យបានសមស្របទៅនឹងទីផ្សារពលកម្មពលបច្ចុប្បន្ន ដោយឆ្លើយតបទៅនឹងតម្រូវការរបស់អង្គភាព។
ការប្រកាសជ្រើសរើស វាអាស្រ័យយ៉ាងសំខាន់លើការវិភាគការងារ ដែលក្នុងការវិភាគការងាររួមមានដូចជា៖
- ការពិពណ៌នាការងារ (មុខងារតួនាទី ភារកិច្ច ការទទួលខុសត្រូវ សិទ្ធិអំណាច) និង
- ការបញ្ជាក់ពីសមត្ថភាពការងារ (ចំណេះដឹង ជំនាញ សមត្ថភាព ចរិកលក្ខណៈផ្សេងៗ និងបទពិសោធន៍)
ដែលជាកត្តាដ៏សំខាន់ចាំបាច់ក្នុងការប្រកាសជ្រើសរើសបុគ្គលិកត្រូវតែអនុវត្តទៅតាមដំណាក់កាលនីមួយៗតាមនីតិវិធី ដើម្បីធានាទទួលបានបេក្ខជនការងារដែលមានសមត្ថភាពពិតប្រាកដក្នុងការបំពេញតម្រូវការដែលអ្នកគ្រប់គ្រងបានសិក្សាយ៉ាងត្រឹមត្រូវជាមុនដោយផ្អែកលើផែនការធនធានមនុស្ស។
ផែនការ ត្រូវរៀបចំដោយអ្នកគ្រប់គ្រងធនធានមនុស្ស ដោយពិនិត្យលើវដ្តជីវិតរបស់អង្គភាព ឬស្ថាប័នរបស់ខ្លួន ដែលរួមមានបួនដំណាក់កាល គឺ៖
- ចាប់ផ្ដើម
- ការរីកចម្រើន
- មានស្ថេរភាព និង
- ការផ្លាស់ប្ដូរ។
វិធីសាស្ត្រធ្វើផែនការធនធានមនុស្ស ជាទូទៅត្រូវផ្អែកលើសមាសភាពសំខាន់ៗមួយចំនួនដើម្បីធ្វើការត្រួតពិនិត្យ និងពិចារណាទៅលើផែនការទាំងនេះ រួមមាន៖
- ផែនការសម្រាប់តម្រូវការអនាគត
- ផែនការសម្រាប់តុល្យភាពអនាគត
- ផែនការសម្រាប់ជ្រើសរើសបុគ្គលិក និង
- ផែនការសម្រាប់អភិវឌ្ឍបុគ្គលិក។
ជាមួយគ្នានេះដែរ ការប្រកាសជ្រើសរើស គឺ (ការប្រកាសជ្រើសរើសខាងក្នុងអង្គភាព និងកាជ្រើសរើសក្រៅពីអង្គភាព) រួមបញ្ចូលទាំងការកំណត់នូវប្រព័ន្ធផ្សព្វផ្សាយពាណិជ្ជកម្មប្រកាសជ្រើសរើស គោលដៅបេក្ខជនការងារដូចជា បណ្ដាញសង្គម ការសែតជាតិ និងការសែតអន្តរជាតិ ដែលបេក្ខជនការងារតែងតែមើលញឹកញាប់ជាងគេ និងតាមប្រព័ន្ធវេបសាយណាដែលគេបានប្រើប្រាស់ និងមានឥទ្ធិពលបំផុត ព្រោះការផ្សព្វផ្សាយពាណិជ្ជកម្មប្រកាសជ្រើសរើសចំគោលដៅអាចនាំមកនូវបុគ្គលិកដែលពោពេញទៅដោយសមត្ថភាព និងអាចឲ្យអង្គភាពសម្រេចគោលដៅ។
ការជ្រើសរើសយកបុគ្គលិក
នេះជាដំណាក់កាលបន្ទាប់ពីការប្រកាសជ្រើសរើសនៅក្នុងការគ្រប់គ្រងធនធានមនុស្ស។ នេះជាកត្តាសំខាន់ដែលតម្រូវឲ្យអ្នកគ្រប់គ្រងធនធានមនុស្សពិចារណាយ៉ាងយកចិត្តទុកដាក់ក្នុងការសម្រាំងយកបេក្ខជនមកបម្រើរការងារក្នុងអង្គភាពប្រកបដោយប្រសិទ្ធភាពខ្ពស់។ ការជ្រើសរើសយកបុគ្គលិក វាអាស្រ័យទៅលើកត្តាសំខាន់ៗមួយចំនួននៅក្នុងការប្រកាសជ្រើសរើសនិយោជិតទៅតាមអង្គភាព ឬក្រុមហ៊ុននីមួយៗ ដូចជា៖
- ការបំពេញ និងពិនិត្យមើលបែបបទដាក់ពាក្យសុំធ្វើការ
- សម្ភាសន៍ការងារ
- ការធ្វើតេស្ត
- ការពិនិត្យមើលសាវតារបស់បេក្ខជន
- ការពិនិត្យមើលសុខភាព
- ការសម្រេចជ្រើសរើសយក និង
- ការសាកល្បងការងារ ជាដើម។
វិធីសាស្ត្រនេះ គឺអ្នកគ្រប់គ្រងធនធានមនុស្សយកមកអនុវត្តក្នុងការគ្រប់គ្រងធនធានមនុស្ស ដើម្បីសម្រេចទៅតាមគោលដៅរបស់អង្គភាព។ ការជ្រើសរើសបុគ្គលិកល្អ វាក៏ជាផ្នែកមួយឲ្យការងារល្អដែរ ហើយការជ្រើសរើសបុគ្គលិកមកដែលមិនមានឆន្ទៈតាមតម្រូវការរបស់អង្គភាព វាក៏ជាការខាតបង់របស់អង្គភាពដែរ។ ដើម្បីឲ្យការជ្រើសរើសយកបុគ្គលិកមានប្រសិទ្ធភាព អង្គភាពបានប្រគល់តួនាទីនេះមកខាងផ្នែកមន្រ្តីសម្របសម្រួលធនធានមនុស្ស និងរដ្ឋបាលជាអ្នកទទួលអនុវត្ត និងរិះរកនីតិវិធី និងការិយាល័យដែលពាក់ព័ន្ធ។
មុនពេលធ្វើសេចក្ដីសម្រេចចិត្តជ្រើសរើស បេក្ខជនត្រូវបានគេរៀបចំតាមរយៈការធ្វើសម្ភាសន៍បន្ថែមទៀតជាមួយសមាជិកបុគ្គលិកធនធានមនុស្ស គឺដើម្បីប្រមូលព័ត៌មានទាំងអស់ក្នុងអំឡុងពេលនៃការជ្រើសរើស ហើយនឹងបញ្ជាក់នូវព័ត៌មានមិនទាន់ច្បាសលាស់ទាំងនោះ។ ការសម្ភាសនេះ កើតឡើងក្រោយពេលផ្នែកធនធានមនុស្សសម្រេចចិត្តជ្រើសរើសបេក្ខជន។ ជាទូទៅ នៅពេលអ្នកគ្រប់គ្រងជ្រើសរើសមនុស្សដែលពេញចិត្តបំផុត ហើយគេគិតថាពេញចិត្តនឹងការងារ សម្ភាសន៍ចុងក្រោយមានការប្រកួតប្រជែងផ្នែកបុគ្គលិកលក្ខណៈយ៉ាងពិសេស។ ការជ្រើសរើស ត្រូវបានបែងចែកទៅតាមកម្រិតគ្រប់គ្រងផ្សេងៗក្នុងស្ថាប័ននីមួយៗ ដោយក្ដោបក្ដាប់នូវការបំពេញបែបបទដាក់ពាក្យសុំធ្វើការ ដឹកនាំធ្វើការសម្ភាសការងារ ការធ្វើតេស្ដ ការពិនិត្យមើលប្រវត្តិសវតា និងការរៀបចំសម្រាប់ការពិនិត្យមើលលើសុខភាពជាដើម។ ដូចនេះ ការសម្ភាសចុងក្រោយ និងការសម្រេចចិត្តជ្រើសរើសយក ជាទូទៅភារៈកិច្ចនេះត្រូវបានអ្នកគ្រប់គ្រង និងអ្នកគ្រប់គ្រងផ្នែកធនធានមនុស្ស ក្ដោបក្ដាប់គ្រប់ជំហានទាំងអស់នៃការអនុវត្ត រហូតដល់ការសម្រេចចិត្តជ្រើសរើសចុងក្រោយនៃការជ្រើសរើសបុគ្គលិក។
អត្ថបទទាក់ទង