សញ្ញាទាំង ៨ ដែលបញ្ជាក់ថា អ្នកមានបុគ្គលិកលក្ខណៈដ៏ខ្លាំងក្លា
បុគ្គលិកលក្ខណៈរបស់មនុស្ស គឺមានភាពផ្សេងៗគ្នាទៅតាមចរិកធម្មជាតិដែលមានពីកំណើត និងអាស្រ័យទៅការចិញ្ចឹមអប់រំរបស់គ្រូសារនីមួយៗ។ ភាពជោគជ័យកើតពីការខិតខំប្រឹងប្រែង ការតស៊ូ ការលះបង់ ចំណង់ ការប្ដេជ្ញាចិត្តយ៉ាងខ្លាំងក្លា និងបុគ្គលិកលក្ខណៈរឹងមាំរបស់អ្នក។ ខាងក្រោមនេះជាសញ្ញាទាំង ៨ ដែលបញ្ជាក់ថា អ្នកមានបុគ្គលិកលក្ខណៈដ៏ខ្លាំងក្លា៖
១. អ្នកមិនអាចស្ថិតក្នុងភាពល្ងង់ខ្លៅបានទេ
អ្នកបានចំណាយពេលវេលាជាច្រើនដើម្បី សិក្សា និង ត្រិះរិះពីរឿងដែលល្អៗហើយអ្នកប្រហែលជាមិនចូលចិត្តស្ដាប់នរណាម្នាក់និយាយពីអ្វីដែលគេមិនបានដឹងច្បាស់ទេ។ ពីមួយថ្ងៃទៅមួយថ្ងៃ អ្នកបានខិតខំដើម្បីពង្រឹងចំណេះដឹងរបស់ខ្លួនជាប្រចាំ ដើម្បីអភិវឌ្ឍខ្លួនជានិច្ច។
២. អ្នកកែប្រែបញ្ហាទៅជាឱកាសវិញ
អ្វីដែលគ្រោះថ្នាក់គឺជាឱកាសដ៏ល្អសម្រាប់អ្នក ក្នុងការរៀនសូត្រដើម្បីជម្នះវា។ បុគ្គលទន់ខ្សោយតែងតែសុំចុះចាញ់នៅពេលជួបឧបសគ្គធ្ងន់ធ្ងរ តែមនុស្សខ្លាំងវិញ តែងគិតថាវាជាឱកាស។
៣. អ្នកដឹងពីវិធីនៃការស្ដាប់
ជាការពិតទៅប្រសិនបើអ្នកមិនមានជំនាញក្នុងការស្ដាប់អ្នកដទៃទេនោះ អ្នកប្រាកដជា ដឹងច្បាស់ថា អ្វីដែលគួរស្ដាប់ និង អ្វីដែលមិនគួរស្ដាប់ ព្រោះក្នុងលោកនេះមានរឿងច្រើនខ្លាំងណាស់ ដូច្នេះបើចំណាយពេលច្រើនពេកជាមួយរឿងមិនល្អនោះ វាគ្មានផ្ដល់ផលប្រយោជន៍អ្វីក្រៅពីការឈឺក្បាលកាន់តែខ្លាំងនោះទេ។
៤. មិនចូលចិត្តទទួលយកការដោះសារ
នៅពេលអ្នកមានបុគ្គលិកលក្ខណៈដ៏រឹងមាំមួយអ្នកមិនចូលចិត្តអោយអ្នកដទៃមកចំណាយពេលគ្មានប្រយោជន៍មកដោះសាអំពីបញ្ហាដែលបានកើតឡើងនោះទេ ហើយគេខ្លួនឯងគឺរឹតតែមិនចូលចិត្តនិយាយដោះសាដើម្បីនៅពេលខ្លួនធ្វើខុសនោះដែរ។ ប៉ុន្តែបុគ្គលិកលក្ខណៈដ៏រឹងមាំ គឺតែងព្យាយាមរកដំណោះស្រាយ ហើយខិតខំធ្វើវាឲ្យអស់លទ្ធភាព ជាជាងនិយាយដោះសាដើម្បីយករួចខ្លួន។
៥. អ្នកប្រយ័ត្នណាស់មុននឹងសម្រេចចិត្តអោយនរណាម្នាក់ចូលក្នុងជីវិតអ្នក
ទោះបីពេលខ្លះអ្នកមិនទាន់ស្គាល់ច្បាស់ពីខ្លួនឯងក៏ដោយក៏អ្នកមិនទាមទារអោយនរណាម្នាក់មកប្រាប់អ្នកថាតើអ្នកមានសមត្ថភាពអ្វីដែរ។ក្នុងន័យនេះ អ្នកអាចស្ដាប់ពួកគេនិយាយ ប៉ុន្តែអ្នកពិតជាមិនអនុញ្ញាតឲ្យនរណាម្នាក់មកសម្រេចចិត្ត ជំនួសអ្នកបានឡើយ។
៦. អ្នកមិនចូលចិត្តការនិយាយរឿងអត់ប្រយោជន៍
សម្រាប់មនុស្សខ្លាំង ពួកគេមិនចូលចិត្តចំណាយពេលក្នុងការនិយាយរឿងដែលអត់ប្រយោជន៍នោះទេ ព្រោះថា វាគ្មានចំណេញអ្វីឡើយ ក្រៅពីនាំឲ្យខាតពេល។ ដូច្នេះហើយ ប្រសិនបើអ្នកចូលចិត្តនិយាយរឿងដែលសំខាន់ៗ និង មានប្រយោជន៍នោះ មានន័យថា អ្នកជាមនុស្សដែលមានបុគ្គលិកលក្ខណៈអស្ចារ្យ។
៧. អ្នកមិនខ្លាចអ្វីទាំងអស់
អ្នកនឹងមិនអោយភាពភ័យខ្លាចទាំងនោះចូលមកក្នុងជីវិតអ្នកហើយក៏មិនអោយវាបញ្ជាផ្លូវជីវិតរបស់អ្នកបានដែរ។
៨. អ្នកមិនទាមទារការចាប់អារម្មណ៍
មនុស្សអស្ចារ្យមិនចាំបាច់ ព្យាយាមធ្វើឲ្យគេចាប់អារម្មណ៍នោះទេ ប៉ុន្តែគឺគ្រាន់តែធ្វើអ្វីដែលខ្លួនយល់ថា ត្រឹមត្រូវ និង មានប្រយោជន៍ប៉ុណ្ណោះ ទោះបីជាអ្នកដទៃគិតយ៉ាងម៉េចក៏ដោយ។
សរុបមកវិញ វាប្រាកដណាស់ដែលអាចមានមនុស្សមួយចំនួន ញញើតអំពីបុគ្គលិកលក្ខណៈដ៏ខ្លាំងក្លារបស់អ្នក។ ពេលខ្លះបុគ្គលិកលក្ខណៈរឹងមាំរបស់អ្នក ក៏ធ្វើឲ្យមនុស្សដទៃយល់ខុសថា មកលើអ្នកថា ជាមនុស្សមិនល្អ ឬថាជាមនុស្សក្បាលរឹងក៏មាន។ ប៉ុន្តែទោះបីជាយ៉ាងណាក៏ដោយ អ្វីដែលពិសេស និងជាការកត់សម្គាល់នោះ គឺពួកគេមិនហ៊ានមកធ្វើអ្វីផ្ដេសផ្ដាស ឬមើលស្រាលអ្នកបានឡើយ ព្រោះក្នុងក្រសែភ្នែករបស់ពួកគេ បានចាត់ទុកអ្នកជាមនុស្សខ្លាំងមួយទៅហើយ។
សម្រួលពី៖ Michael Prywes, 8 Signs You Have A Strong Personality That Might Scare Some People, Lifehack
អត្ថបទទាក់ទង