សំណួរចម្បងៗចំនួន ៥ ដែលអ្នកត្រូវឆ្លើយ ដើម្បីតម្រង់ទិសដៅជីវិត
តើគោលដៅជាអ្វី? ហេតុអ្វីបានជាយើងចាំបាច់ត្រូវកំណត់គោលដៅនៃជីវិតរបស់ខ្លួន?
គោលដៅ គឺជាទីបញ្ចប់ ឬជាកម្មវត្ថុនៃជោគជ័យដែលយើងចង់បាន។ យើងចាំបាច់ត្រូវកំណត់គោលដៅនៃជីវិតរបស់ខ្លួន ពីព្រោះ៖
- ដើម្បីរៀបចំអនាគតឱ្យបានល្អប្រសើរ
- ដើម្បីចំណេញពេលវេលា ប្រាក់កាស កម្លាំងកាយ និងចិត្ត
- ដើម្បីអភិវឌ្ឍន៍ចំណេះដឹង និងជំនាញឱ្យកាន់តែប្រសើរឡើង
- ដើម្បីត្រួសត្រាយផ្លួវសម្រាប់ដើរឱ្យបានស្រួល
- មានគម្រោងផែនការជាមុនដើម្បីទប់ទល់នឹងឧបសគ្គ និងបញ្ហានានាចំពោះមុខ
- ដើម្បីជាត្រីវិស័យសម្រាប់ចង្អុលបង្ហាញទិស កុំឱ្យងាកផ្តេសផ្តាស់នាំឱ្យខាតប្រយោជន៍ ខាតកម្លាំង និងខាតពេលវេលា។
គោលដៅ ជារបស់សំខាន់សម្រាប់មនុស្សដែលមានគំនិតជោគជ័យ បើគ្មានគោលដៅទេ លោកអ្នកបានត្រឹមតែធ្វើលេងៗទេ។ ភាពខុសគ្នារវាងមនុស្សដែលមានគោលដៅ និងមនុស្សដែលគ្មានគោលដៅ ប្រៀបដូចជាភាពខុសគ្នារវាងកីឡាករវាយសីជើងឯក និងកូនក្មេងដែលវាយសីតែម្នាក់ឯង គ្មានគូប្រជែង និងមិនមានអ្នកដាក់ពិន្ទុឱ្យ។
ទោះបីជាមនុស្សភាគច្រើនបានដឹងសារៈសំខាន់នៃការកំណត់គោលដៅ ក៏មានតិចនាក់ណាស់ដែលមានគោលដៅពិតប្រាកដ។ មុនពេលទៅដើរកម្សាន្តនៅកន្លែងណាមួយជាមួយក្រុមការងារ គេឃើញមនុស្សនាំគ្នាចូលរួមគិតរៀបចំផែនការថាត្រូវទៅណាខ្លះ ប៉ុន្តែនៅក្នុងដំណើរជីវិតវិញ មិនសូវមាននរណាគិតរៀបចំផែនការសម្រាប់ដើរទេ។
គោលដៅ តំណាងឱ្យការប្រឈមដែលត្រូវជម្នះ។ មេដឹកនាំមានគោលដៅផ្ទាល់ខ្លួនផង និងគោលដៅសម្រាប់ស្ថាប័នផងដែលត្រូវផ្តោតគ្រប់ពេល។ តាមពិតទៅ គោលការសំខាន់មួយនៃភាពជាអ្នកដឹកនាំ គឺការកំណត់គោលដៅសម្រាប់មនុស្សជាច្រើននាក់ដែលមិនអាចបង្កើតគោលដៅដោយខ្លួនឯង។
គោលដៅ មានទាំងវែង និងខ្លី។ ពេលខ្លះ លោកអ្នកត្រូវធ្វើដំណើរឆ្លងប្រទេស ប៉ុន្តែពេលខ្លះទៀតលោកអ្នកគ្រាន់តែទៅផ្សារក្បែរផ្ទះប៉ុនណោះ។ នៅពេលលោកអ្នកទៅដល់គោលដៅវែងឆ្ងាយ ជីវិតរបស់លោកអ្នកនឹងផ្លាស់ប្តូរយ៉ាងខ្លាំង ហើយដំណើរដែលនាំលោកអ្នកទៅដល់គោលដៅនោះបានប្រែក្លាយលោកអ្នកឱ្យកាន់តែរឹងមាំ និងមានភាពវៃឆ្លាតជាងមុន។
តើលោកអ្នកអាចកំណត់គោលដៅវែងបានដោយរបៀបណា? បើចង់ដឹងច្បាស់ សូមរកពេលស្ងៀមស្ងាត់សម្រាប់ខ្លួនឯង និងព្យាយាមឆ្លើយសំណួរទាំង ៥ ខាងក្រោមនេះ៖
១. តើខ្ញុំចង់ធ្វើអ្វី?
២. តើខ្ញុំចង់ក្លាយជាអ្វី?
៣. តើខ្ញុំចង់ឃើញអ្វីខ្លះ?
៤. តើខ្ញុំចង់មានអ្វីខ្លះ?
៥. តើខ្ញុំចង់ទៅកន្លែងណាខ្លះ?
នៅក្រោមសំណួរនីមួយៗនេះ សូមលោកអ្នកសរសេរគោលដៅវែងឆ្ងាយឱ្យបានច្រើនបំផុតតាមតែអាចនឹកឃើញ។ លោកអ្នកមិនចាំបាច់ត្រូវបង្ខំចិត្តនឹកគិតពេកទេ ហើយក៏មិនចាំបាច់ត្រូវកំណត់ពេលវេលាក្នុងការនឹករកចម្លើយដែរ។ បណ្តោយឱ្យចិត្តនឹកគិតរាវរកតាមសម្រួល ហើយលោកអ្នករង់ចាំកត់ត្រាទុកឱ្យបានពី៣ទៅ៦ចម្លើយសម្រាប់សំណួរនីមួយៗ។ នៅក្នុងដំណាក់កាលនេះ សូមទាន់បារម្ភរឿងលម្អិតនៃចម្លើយទាំងនោះ។
ឧទាហរណ៍ថា នៅក្នុងសំណួរទីមួយ លោកអ្នកចង់សរសេរសៀវភៅមួយក្បាលអំពីប្រវត្តិគ្រួសារតាំងពីដូនតាមក។ លោកអ្នកគ្រាន់តែសរសេរពាក្យថាប្រវត្តិគ្រួសារប៉ុណ្ណេះជាការស្រេច រួចនៅពេលនឹកឃើញថាចង់ទៅលេងប្រទេសណា លោកអ្នកគ្រាន់តែសរសរឈ្មោះប្រទេស ឬកន្លែងនោះបានហើយ។
បន្តគិតដោយប្រើប្រាស់សំណួរទាំងនេះ លោកអ្នកប្រហែលនឹងភ្ញាក់ផ្អើលចំពោះរឿងខ្លះដែលផុសឡើងក្នុងគំនិតនៅពេលនេះ ។ លោកអ្នកប្រហែលធ្លាប់មានបំណងប្រាថ្នាជាច្រើនដែលលាក់ទុក ឬកប់បាត់ក្នុងពេលវេលា ហើយលំហាត់នេះជាវិធីនាំយកបំណងប្រាថ្នាទាំងអស់នោះចេញពីជម្រៅចិត្ត។ពេលលោកអ្នកយល់ថាបានសរសេរគោលដៅវែងឆ្ងាយល្មមគ្រប់គ្រាន់ហើយ សូមអានគោលដៅទាំងអស់នោះជាថ្មីម្តងទៀត។ បន្ទាប់មក នៅក្បែរគោលដៅនីមួយៗនោះ សូមលោកអ្នកសរសេរឆ្នាំនិងពេលវេលាដែលត្រូវសម្រេចឱ្យបាន។
ក្រោយពីមានគោលដៅច្រើន និងកំណត់ពេលវេលាសម្រាប់គោលដៅនីមួយៗរួចហើយ ដល់ពេលដែលត្រូវសួរខ្លួនឯងបន្តទៀតថាតើគោលដៅណាដែលសំខាន់ពិតប្រាកដ ហើយគោលដៅណាដែលគ្រាន់តែជាការកម្សាន្ត។ ជ្រើសរើសគោលដៅ ៤ ពីកម្រងសំណួរនីមួយៗដែលមានពេលកំណត់ត្រូវសម្រេចបានខុសៗគ្នាពីតិចខែ ឬឆ្នាំ ទៅច្រើនខែ ឬ ឆ្នាំ។
មុននឹងបញ្ចប់លំហាត់បង្កើតគោលដៅវែងឆ្ងាយក្នុងជីវិត លោកអ្នកត្រូវអនុវត្តមួយជំហ៊ានទៀត ពីព្រោះថាគោលដៅដែលមានកម្លាំងរុញច្រានពិតប្រាកដត្រូវតែមានហេតុផលពីក្រោយនោះ។ ហេតុអ្វីបានជាលោកអ្នកចង់សម្រេចគោលដៅទាំងនោះ? ចូរសរសេរហេតុផលរបស់លោកអ្នកសម្រាប់គោលដៅនីមួយៗឱ្យបានច្បាស់លាស់ និងល្អិតល្អន់។ បើមិនអាចរកហេតុផលគ្រប់គ្រាន់ទេ ប្រហែលលោកអ្នកត្រូវវាយតម្លៃគោលដៅខ្លះឡើងវិញ។ លោកអ្នកប្រហែលមានសុបិន្តច្រើនជាងគោលដៅ ហើយនេះជាពេលល្អបំផុត ដើម្បីរកមើលភាពខុសគ្នា។
អត្ថបទទាក់ទង
បុគ្គលិកលក្ខណៈទាំង ៥ ដែលអ្នកគួររៀនសូត្រតាមដើម្បីសម្រេចគោលដៅ