ជំនាញផ្លូវចិត្តសំខាន់ៗចំនួន ៤ របស់អ្នកដឹកនាំអាជីវកម្មជោគជ័យ
បញ្ហាតានតឹងចិត្ត ឬការថប់បារម្ភ ដែលមនុស្សភាគច្រើនតែងហៅតាមភាសាអង់គ្លេសថា ស្រ្តេស (Stress) ជាបញ្ហាដែលកំពុងដុះដាលពេញទី ជាពិសេសក្នុងសតិអារម្មណ៍របស់មនុស្សគ្រប់រូបដោយមិនដឹងខ្លួន។
តាំងពីមុនការមកដល់នៃសហស្សវត្សថ្មីនេះទៅទៀត យុទ្ធសាស្រ្តផ្លូវចិត្តដែលគេប្រើប្រាស់នៅក្នុងវិស័យកីឡា បានជ្រួតជ្រាបទៅក្នុងវិស័យអាជីវកម្ម ដើម្បីបង្កើនប្រសិទ្ធភាព និងផលិតភាព។ កីឡាកជើងខ្លាំង ដឹងយ៉ាងច្បាស់ថា គេត្រូវគ្រប់គ្រងស្ថានភាពផ្លូវចិត្ត និងអារម្មណ៍របស់គេឱ្យបានល្អ មុនពេលយកឈ្នះគូប្រជែង។ មេដឹកនាំអាជីវកម្ម ក៏ត្រូវការយុទ្ធសាស្រ្តបែបនេះដែរ ដើម្បីក្លាយជាមនុស្សជោគជ័យ។ គេដឹងថា គោលការនេះនឹងប្រយោជន៍ច្រើនពីការវិនិយោគមកវិញ បើគេអនុវត្តបានត្រឹមត្រូវ។
កម្លាំងចិត្ត ការផ្តោតចិត្ត គោលដៅច្បាស់លាស់ និងការគ្រប់គ្រងសម្ពាធផ្លូវចិត្ត ជាតម្រូវការចាំបាច់សម្រាប់មនុស្សគ្រប់គ្នាដែលព្យាយាមដើម្បីធ្វើការឱ្យបានដល់កម្រិតល្អបំផុតនៅក្នុងវិស័យអ្វីក៏ដោយ។ បន្ថែមពីលើនេះ លោកអ្នកត្រូវចេះប្រើប្រាស់ជំនាញស្នូលទាំងអស់ បើអ្នកចង់ក្លាយជាមេដឹកនាំអាជីវកម្មជោគជ័យ៖
១. ហ្វឹកហាត់សុទិដ្ឋិនិយម និងទទួលស្គាល់ចំណុចអវិជ្ជមាន
ជាទូទៅ មេដឹកនាំអាជីវកម្ម តែងតែហ្វឹកហាត់ការគិតក្នុងរបៀបដែលក្រុមមនុស្សក្រោមបង្គាប់មិនបានគិតដល់។ ការងាររបស់មេដឹកនាំ គឺត្រូវធ្វើកិច្ចការណាដែលមនុស្សផ្សេងទៀតខ្លាចមិនហ៊ានធ្វើ ពង្រីកអាជីវកម្មដើម្បីជោគជ័យ។ ហ្វឹកហាត់សុទិដ្ឋិនិយមតាមរយៈការឆ្លើយសំណួរទាំងនេះ៖
- តើមានមេរៀនអ្វីដែលទទួលបានពីកំហុសឆ្គង ឬបរាជ័យ?
- តើមានចំណុចណាដែលអាចកែប្រែដើម្បីបញ្ជៀសបញ្ហាដែលបានកើតឡើងនោះ?
- តើមានគំនិតអ្វី ទស្សនៈអ្វី និងលទ្ធភាពអ្វីដែលបានកើតចេញពីស្ថានភាពដែលគ្មាននរណាម្នាក់ចង់បាននេះ?
មេដឹកនាំជោគជ័យ តែងតែព្យាយាមឆ្លើយសំណួរទាំង៣ ខាងលើនេះ។ ហើយដំណើរស្វែងរកចម្លើយរបស់លោកអ្នកនឹងបណ្តុះផ្នត់គំនិតរីកចម្រើនទាំងក្នុងខ្លួនលោកអ្នក និងក្នុងក្រុមការងារដែលលោកអ្នកដឹកនាំ។
២. ចាប់ដួងតារាក្នុងពេលសម្លឹងមើលព្រះចន្ទ
បើលោកអ្នកកំណត់គោលដៅចង់ប្រាក់ចំណូល ២៥០ ០០០ដុល្លារ ក្នុងមួយឆ្នាំ តើលោកអ្នកនឹងរៀបចំសកម្មភាពសម្រាប់ខ្លួនឯង និងក្រុមការងារឱ្យធ្វើការឆ្ពោះទៅរកប្រាក់ចំណូលក្នុងចំនួនប៉ុណ្ណោះមែនទេ? ឬមួយលោកអ្នកនឹងប្រាប់ក្រុមការងារ និងខ្លួនឯងថាត្រូវធ្វើការរកឱ្យបាន ៣០០ ០០០ ដុល្លារ ជំនួសវិញ? ចូរកំណត់គោលដៅលើក្រដាសឱ្យខ្ពស់ជាងគោលដៅអនុវត្តជាក់ស្តែង ដើម្បីលោកអ្នកអាចសម្រេចគោលដៅមួយដោយមិនប៉ះពាល់ដល់គោលដៅមួយទៀត។
៣. ហ្វឹកហាត់ការសង្កេតខ្លួនឯង និងការពិចារណា
ក្នុងនាមជាមេដឹកនាំអាជីវកម្ម លោកអ្នកប្រឈមនឹងសម្ពាធច្រើនពីគ្រប់បញ្ហានៅក្នុងក្រុមហ៊ុន។ ការហ្វឹកហាត់យុទ្ធសាស្រ្តដែលជួយពង្រឹងសមត្ថភាពគ្រប់គ្រងអារម្មណ៍ជាជំនាញមិនអាចខ្វះបាន។ លោកអ្នកអាចធ្វើបែបនេះបាន ដោយអនុវត្តតាមគន្លឹះងាយចំនួន ៣ គឺ៖
- ត្រូវទប់ចិត្តមុននឹងប្រតិកម្មតបចំពោះហេតុការណ៍អ្វីមួយ
- ចេះកំណត់ពេលវេលាទប់ចិត្តឱ្យបានទាន់ពេល និង
- ធ្វើខ្លួនឱ្យទៅជាអ្នកសង្កេតស្ថានភាពរបស់ខ្លួនឯង។
៤. ជំនាញស្រមើស្រមៃនឹងជួយជំរុញល្បឿនរីកចម្រើន
ជំនាញស្រមើស្រមៃ មានធាតុផ្សំច្រើនជាងការត្រឹមតែបិទភ្នែក និងគិតដល់រឿងជោគជ័យ។ ការស្រមើស្រមៃដែលមានប្រសិទ្ធភាព តម្រូវឱ្យមានផែនការ លំដាប់លំដោយពេលវេលា និងដំណាក់កាលច្បាស់លាស់។ ប្រព័ន្ធក្នុងខួរក្បាលលោកអ្នក ចម្រោះយកពត៌មានណាដែលគាំទ្រ និងដឹកនាំលោកអ្នកឆ្ពោះទៅសម្រេចបានលទ្ធផលដែលលោកអ្នកផ្តោតចិត្ត។ ហេតុដូច្នេះហើយ លោកអ្នកត្រូវប្រុងប្រយ័ត្នចំពោះអ្វីដែលត្រូវផ្តោតចិត្តលើ គឺត្រូវប្រើប្រាស់គ្រប់ញាណទាំងអស់យ៉ាងលម្អិត ហើយត្រូវហ្វឹកហាត់ឱ្យបានទៀងទាត់។
អត្ថបទទាក់ទង
ឥរិយាបថនៃភាពជាអ្នកដឹកនាំចំនួន ១៥ ដើម្បីគ្រប់គ្រងស្ថាប័នប្រកបដោយប្រសិទ្ឋភាព និងប្រសិទ្ឋផល
Thank you so much for your kindly sharing golden idea .May I have detail of ការគ្រប់គ្រង និងដឹកនាំ
ជំនាញផ្លូវចិត្តសំខាន់ៗចំនួន ៤ របស់អ្នកដឹកនាំអាជីវកម្មជោគជ័យ