វិធីឃ្លាំមើលចំនួន ៣ ដែលគេប្រើប្រាស់ក្នុងការជ្រើសរើសអ្នកដែលមានតួនាទីជាអ្នកគ្រប់គ្រង
ការជ្រើសរើសបុគ្គលិក គឺជាការអភិវឌ្ឍនូវការដាក់បំពេញបេក្ខជនសម្រាប់ធ្វើការនៅក្នុងអង្គភាពមួយដែលត្រូវការ។
ការគ្រប់គ្រង គឺដំណើរការធ្វើផែនការ ការចាត់តាំង ការដឹកនាំ និងការត្រួតពិនិត្យ ទៅលើការប្រើប្រាស់ធនធានមនុស្ស និងធនធានដទៃទៀតដើម្បីសម្រេចគោលដៅអង្គភាព។
អ្នកគ្រប់គ្រង គឺជាអ្នកអនុវត្តការងារនៅក្នុងអង្គភាមួយ ឬអង្គការចាត់តាំងមួយដោយរៀបចំជាប្រព័ន្ធរបស់មនុស្ស ដើម្បីសម្រេចគោលដៅជាក់លាក់មួយ។
ដោយគេជឿថា គ្មានបុគ្គលិកណាចង់លាឈប់ពីការងារទេ ពួកគេលាឈប់ពីអ្នកគ្រប់គ្រង ដូច្នេះហើយការជ្រើសរើសអ្នកគ្រប់គ្រង មានឥទ្ធិពលយ៉ាងខ្លាំងទៅលើលទ្ធផលការងារ ឬអាជីវកម្មទាំងមូល។ ទំនាក់ទំនងរបស់អ្នកគ្រប់គ្រងជាមួយបុគ្គលិក គឺមានសារៈសំខាន់ខ្លាំងណាស់ រហូតដល់ធនធានមនុស្សប្រើវិធីឃ្លាំមើលខាងក្រោមនេះក្នុងការជ្រើសរើសអ្នកដែលមានតួនាទីជាអ្នកគ្រប់គ្រង៖
១. ខ្សោយជំនាញទន់
ជំនាញទន់ (Soft Skills) ដែលពេញនិយមបំផុតនាពេលបច្ចុប្បន្នផ្តោតលើ ៧ យ៉ាងនេះ រួមមានភាពជាអ្នកដឹកនាំខ្លួនឯងឲ្យលេចធ្លោ ការចេះដឹកនាំការងារជាក្រុម ជំនាញទំនាក់ទំនង ជំនាញដោះស្រាយបញ្ហា មានសីលធ៌មនិងវិន័យការងារ មានភាពបត់បែននិង សម្របខ្លួន។ អ្នកគ្រប់គ្រងដែលខ្សោយជំនាញទន់ នេះ នឹងមិនទទួលជោគជ័យដាច់ខាត។ សំណួរមួយចំនួនដែលគេនឹងសួររំញោចជំនាញទន់ មានដូចជាតើអ្នកបែងចែកបែបណារវាងទំនាស់បុគ្គល និងគំនិតផ្ទុយគ្នាក្នុងការងារ? តើអ្នកដោះស្រាយបញ្ហាដោយខ្លួនឯង ឬពិភាក្សាជាមួយអ្នកណាខ្លះដោយរបៀបណា? ។ល។
២. ដណ្ដើមមុខមាត់
ភាសាអង់គ្លេសថា Credit ។ អ្នកគ្រប់គ្រងល្អ តែងតែទទួលខុសត្រូវចំពោះការអនុវត្តរបស់ក្រុមរបស់ខ្លួន ហើយនឹងមិនបោះចោលសមាជិកក្រុមណាម្នាក់ឡើយ ខណៈដែលនៅតែផ្ដល់ការសរសើរដល់សមាជិកក្រុមពួកគេជាសាធារណៈ ទោះបីជាគំនិតមេ MasterPlan ត្រូវបង្កើតដោយគាត់ ដែលជាអ្នកចាត់ការទូទៅក្តី។ មិនមានអ្វីអាក្រក់ ស្មើនឹងមានអ្នកគ្រប់គ្រងដែលទាមទារក្ដោបយកនូវជ័យជំនះ ហើយទម្លាក់កំហុសនានាទៅឲ្យក្រុមនោះឡើយ។ ដើម្បីឃ្លាំមើលប្រការនេះ គេនឹងសួរអ្នកនូវសំណួរនានាមានដូចជា តើហេតុអ្វីអ្នកឈប់ពីកន្លែងចាស់? តើអ្នកធ្លាប់បរាជ័យទេ ហេតុអ្វី? ប្រសិនអ្នកបន្ទោសកន្លែងចាស់ ឬក្រុមការងារចាស់អ្នក សូមកុំសង្ឃឹមឆ្លងដំណាក់កាលនេះរួច។
៣. មិនគួរឲ្យទុកចិត្តបាន
អ្នកគ្រប់គ្រង ចាំបាច់ត្រូវមានបុគ្គលិកលក្ខណៈដែលទទួលបានទំនុកចិត្តខ្ពស់លើសពីមនុស្សទូទៅ ពុំនោះទេ គ្មានអ្នកណាព្រមធ្វើតាមសម្តីគាត់ឡើយ។ គាត់ត្រូវតែរក្សាសម្តីខ្លួនបាន និងមានការគោរពនូវកិច្ចព្រមព្រាងជាក្រុម។ ប្រសិនបើគាត់ជាមនុស្សមាក់ងាយក្រុមការងារតាឋមរយៈការភូតកុហក ឬបោកបញ្ឆោត សមាជិកក្រុមផ្សេងទៀតនឹងឆាប់កត់សម្គាល់ ហើយងាយនឹងបែកខ្ញែកលទ្ធផលឈានដល់បរាជ័យ។
សំណួរដែលធនធានមនុស្សងាយលើកមកសួរចំណុចនេះរួមមាន តើចំណុចខ្សោយអ្វីខ្លះក្នុងបុគ្គលិកលក្ខណៈរបស់អ្នក ដែលអ្នកចង់មកកែប្រែជាថ្មីក្នុងកន្លែងថ្មីនេះ? នេះជាសំណួរដ៏ពិបាក! បេក្ខជន ត្រូវការបកស្រាយវែង ហើយការបកស្រាយនោះ គេអាចលួចឃ្លាំងមើលបុគ្គលិកលក្ខណៈសុចរិត ឬអត់ក្នុងការអត្ថាធិប្បាយរបស់បេក្ខជនបាន។
ពាក្យមួយគេពោលថា ជំនាញអាចបង្វឹក ចរិតដូរមិនបានឡើយ!!!
អត្ថបទទាក់ទង