កូនសោដឹកនាំចំនួន ៣ ដើម្បីជួយគាំទ្រក្រុមរបស់អ្នកក្នុងពេលមានវិបត្តិ
ក្នុងចំណោមរឿងទាំងអស់ដែលអ្នកដឹកនាំអាជីវកម្មបានរៀនក្នុងកំឡុងពេលនៃរោគរាតត្បាតនេះ គឺការប្រាស្រ័យទាក់ទង។ ការប្រាស្រ័យទាក់ទង គឺជាមធ្យោបាយមួយដែលធ្វើឡើងដើម្បីបញ្ជូនសារ ឬព័ត៏មាន ឬគំនិតយោបល់ផ្សេងៗទៅអ្នកដទៃ ដើម្បីឲ្យគេទទួលបានសារ ឬព័ត៏មាន និងទទួលបានមកវិញនូវការឆ្លើយតប។ ក្នុងនាមជាអ្នកដឹកនាំអាជីវកម្ម ក៏អាស្រ័យលើការកំណត់សំឡេងសម្រាប់ការប្រាស្រ័យទាក់ទងជាមួយបុគ្គលិក និងអ្នកគ្រប់គ្រងរបស់យើងដែរ។ នេះគឺជាកូនសោដឹកនាំចំនួន ៣ ដើម្បីជួយគាំទ្រក្រុមរបស់យើងក្នុងពេលមានវិបត្តិ៖
១. ពឹងផ្អែកលើភាពជាអ្នកដឹកនាំក្រុមហ៊ុន
យើងមិនអាចធ្វើបានទាំងអស់ទេ ដូច្នេះត្រូវមានការសន្ទនាច្បាស់លាស់ជាមួយថ្នាក់ដឹកនាំរបស់យើង ដែលអាចជួយលើកទឹកចិត្តពួកគេឲ្យបោះជំហានទៅមុខ និងប្រឈមនឹងបញ្ហាដែលក្រុមហ៊ុនកំពុងប្រឈមមុខក្នុងពេលមានវិបត្តិនេះ។ វិធីសាស្ត្រក្រុមនេះនឹងធានាថា បុគ្គលិកទាំងអស់មានអារម្មណ៍ថាពួកគេគឺជាផ្នែកមួយនៃអនាគតរបស់ក្រុមហ៊ុនមិនខានឡើយ។
២. បង្កើតបណ្ដាញទំនាក់ទំនងទៀងទាត់
ក្នុងកំឡុងពេលមានវិបត្តិ ការប្រាស្រ័យទាក់ទង គឺជាអ្វីគ្រប់យ៉ាងទាំងអស់។ នៅក្នុងអាជីវកម្មធំៗ ឬស្ថាប័ន សូមព្យាយាមធ្វើការជាមួយក្រុមតូចៗ ឬតាមផ្នែកនីមួយៗ។ លើកទឹកចិត្តនិយោជិកឲ្យសួរសំណួរ និងបង្ហាញពីការព្រួយបារម្ភ តម្រូវការ ភាពមិនច្បាស់លាស់ និងសម្ពាធគ្រួសារ ឬការងារ។ ចូរបង្ហាញពីភាពបត់បែន និងឆន្ទៈរបស់យើងក្នុងការសម្របខ្លួនជាមួយពួកគេឲ្យមែនទែន។
៣. បង្ហាញបុគ្គលិកគ្រប់គ្នាពីរឿងត្រូវយកចិត្តទុកដាក់
និយោជិតភាគច្រើន តែងតែចង់មានអារម្មណ៍ថា ត្រូវបានគេឲ្យតម្លៃដោយចៅហ្វាយរបស់ពួកគេ។ នេះជារឿងមួយដែលមានសារៈសំខាន់សម្រាប់និយោជិត ជាងប្រាក់ឈ្នួលរបស់ពួកគេទៅទៀត។ ដូច្នេះ ក្នុងកំឡុងពេលមានវិបត្តិ ដើម្បីឲ្យបុគ្គលិកដឹងថាប្រធានបានយកចិត្តទុកដាក់ចំពោះសុខុមាលភាពរបស់ពួកគេ ដូចជាគ្រួសារតែមួយ។ សូមឲ្យបុគ្គលិកបានដឹងថា អាជីវកម្មរបស់យើង ក៏ចង់ឲ្យពួកគេមានអារម្មណ៍ថាមានសុវត្ថិភាព ហើយមានសុខភាពល្អពេលបំពេញការងារ។ និយោជិតរបស់យើងគ្រប់គ្នា តែងចង់ឲ្យអាជីវកម្ម ឬស្ថាប័នដែលគេធ្វើការទទួលបានជោគជ័យ។ សូមចែករំលែកជាមួយពួកគេនូវផែនការស្តាឡើងវិញរបស់យើង និងជំហានដែលយើងកំពុងធ្វើដើម្បីការលូតលាស់ឡើងវិញទាំងអស់គ្នា។ ការទទួលបានព័ត៌មានជាក់លាក់ នឹងជួយនិយោជិកតរបស់គ្រប់គ្នាមានអារម្មណ៍ថា ពួកគេគឺជាផ្នែកមួយនៃភាពជោគជ័យរបស់ក្រុមហ៊ុន។
ជារួមមក បើគ្មានការប្រាស្រ័យទាក់ទងគ្នាដ៏មានប្រសិទ្ធភាពទេនោះ ទោះបីមានយុទ្ធសាស្ត្រដ៏ឆ្នើមបំផុត និងផែនការដឹកនាំបានល្អបំផុតយ៉ាងណាក៏ដោយ ក៏មិនអាចទទួលជោគជ័យមួយរយភាគរយបានឡើយ។