សំណួរសំខាន់ៗទាំង ៨ ដែលអ្នកត្រូវឆ្លើយក្នុងពេលសម្ភាសន៍ការងារ
ការត្រៀមចម្លើយពីសំណួរទូទៅសម្រាប់ការសម្ភាសន៍ គឺជាការត្រៀមខ្លួនសម្រាប់ការសម្ភាសន៍។ សព្វថ្ងៃ សំភាសន៍ការងារ ត្រូវបានគេយល់ថាវាជាកិច្ចការមួយដែលលំបាក ត្រូវការប្រឹងប្រែងម៉ត់ចត់ និងទូលំទូលាយណាស់ ដោយសារតែវាជាសិទ្ធិអ្នកសម្ភាសន៍ក្នុងគោលបំណងជីកសួរអ្នក ដើម្បីពួកគេអាចជ្រើសរើសយកមនុស្សម្នាក់សាកសមសម្រាប់ការងាររបស់គេ។ សម្ភាសន៍ការងារ គឺមិនត្រឹមតែជាឱកាសមួយសម្រាប់អ្នកដើម្បីទទួលបានការងារនោះទេ ប៉ុន្តែក៏ជាឱកាសមួយសម្រាប់ឲ្យអ្នកសំភាសន៍វាស់ស្ទង់នូវដំណើរការគិតរបស់អ្នក និងយល់ដឹងពីក្តីសង្ឃឹម គោលដៅ និងមហិច្ឆតារបស់អ្នកផងដែរ។
មិនថាការសម្ភាសន៍ក្នុងទម្រង់បែបសម្ភាសន៍ផ្ទាល់មុខក្ដី សម្ភាសន៍តាមទូរសព្ទក្តី ឬតាមវីដេអូក្ដី បេក្ខភាពទាំងអស់ត្រូវតែត្រៀមខ្លួនឱ្យបានរួចរាល់ ព្រមទាំងដើម្បីទទួលបានជោគជ័យក្នុងការស្វែងរកការងារថ្មីដែលអ្នកកំពុងតែដាក់ពាក្យនេះ។ ក្រៅពីការត្រៀមខ្លួនដោយការស្លៀកពាក់ត្រឹមត្រូវ ការមកដល់មុនម៉ោងកំណត់ អ្នកក៏ត្រូវដឹងខ្លះៗអំពីសំណួរដែលគួរត្រៀមក្នុងការឆ្លើយតបពេលសម្ភាសន៍ផងដែរ។ ខាងក្រោមនេះ គឺជាសំណួរសំខាន់ៗទាំង ៨ ដែលអ្នកត្រូវឆ្លើយក្នុងពេលសម្ភាសន៍ការងារ៖
១. ចូររៀបរាប់អំពីខ្លួនអ្នក
នេះប្រហែលជាសំណួរដំបូងគេក្នុងការចាប់ផ្ដើមការសម្ភាសរបស់បេក្ខជនហើយអ្នកដែលសួរសំណួរនេះក៏មិនមែនដើម្បីកម្សាន្ត ឬលេងសើចដែរ។ អ្វីដែលអ្នកសួរសំណួរនេះចង់ឱ្យបេក្ខជនបញ្ចូលក្នុងចម្លើយរបស់ពួកគេមានដូចជា៖
- តើអ្នកមានបទពិសោធន៍អ្វីដែលសមស្របជាមួយការងារដែលអ្នកកំពុងតែដាក់ពាក្យដែរឬក៏អត់?
- តើអ្នកមានសមត្ថភាពអ្វីពិសេស បើធៀបជាមួយបេក្ខជនដទៃ?
- តើបុគ្គលិកលក្ខណៈផ្ទាល់ខ្លួនរបស់អ្នកត្រូវជាមួយការងារដែលអ្នកកំពុងដាក់ពាក្យនេះឬអត់?
គន្លឹះក្នុងការឆ្លើយសំណួរនេះអ្នកអាចចាប់ផ្ដើមដោយនិយាយអំពីអ្វីដែលធ្វើឱ្យអ្នកស្រលាញ់ការងារ ឬអាជីពរបស់អ្នកសមិទ្ធផលដែលអ្នកសម្រេចបានក្នុងអាជីពពីមុន ផែនការការងាររបស់អ្នកបច្ចុប្បន្ន និងហេតុផលនៃការកំណត់ផែនការនេះជាដើម។
២. តើអ្នកស្គាល់ក្រុមហ៊ុនរបស់យើងតាមរយៈអ្វី?
បេក្ខជនភាពច្រើនតែងឆ្ងល់ថា ហេតុអ្វីអ្នកសម្ភាសន៍សួរសំណួរនេះ។ ចម្លើយ គឺក៏ព្រោះពួកគេចង់ដឹងថាតើអ្នកបានស្រាវជ្រាវពីក្រុមហ៊ុនគេ មុននឹងមកសម្ភាសន៍នេះដែរឬទេ។ ពួកគេក៏ចង់ដឹងថា តើអ្នកមានបានស្វែងយល់ថាតើក្រុមហ៊ុនរបស់ពួកគេស័ក្ដិសមសម្រាប់ជាកន្លែងការងារក្នុងក្ដីស្រមៃរបស់អ្នកដែរឬក៏អត់។
គន្លឹះដើម្បីឆ្លើយសំណួរនេះឱ្យបានល្អ អ្នកមិនគួរអាន ឬសូត្រឡើងវិញនូវព័ត៌មានដែលមាននៅលើទំព័រមុខរបស់វ៉េបសាយក្រុមហ៊ុនឡើយ ព្រោះវាមិនមែនជាការស្រាវជ្រាវទេ តែវាជាការចាំមាត់ទៅវិញ។ ចូរជ្រើសរើសព័ត៌មានសំខាន់ៗ ១ ឬ ២ ដែលបង្ហាញពីចំណុចខ្លាំងរបស់ក្រុមហ៊ុន ដូចជាបេសកកម្ម ចក្ខុវិស័យ ឬផលិតផល/សេវាកម្មរបស់ក្រុមហ៊ុនជាដើម។ អ្នកអាចពន្យល់ពីអ្វីដែលធ្វើឱ្យអ្នកស្ញប់ស្ញែងទាក់ទងនឹងក្រុមហ៊ុន និងថាតើវាអាចទាក់ទាញអ្នកឱ្យមកដាក់ពាក្យតាមរបៀបណា។
៣. តើអ្នកមានចំណុចខ្លាំងអ្វីខ្លះ?
សូមផ្ដោតទៅលើចំណុចទាំងឡាយណាដែលអ្នកដឹងថាស្ថាប័នចង់បាន ទោះបីអ្នកមានចំណុចទាំងនោះតិចតួចក៏ដោយ។ ចំណុចទាំងនោះ អ្នកអាចដឹងមុនតាមរយៈតម្រូវការការងារដែលស្ថាប័នបានចែងក្នុងពេលប្រកាសរើសបុគ្គលិក។
៤. តើអ្វីខ្លះជាចំណុចខ្សោយរបស់អ្នក?
ជ្រើសរើសចំណុចខ្វះខាតណាដែលទាក់ទងនឹងការងារ ប្រសើរជាងទាក់ទងនឹងខ្លួនអ្នកផ្ទាល់។ ម្យ៉ាងទៀតគួររៀបរាប់ចំណុចខ្សោយដែលអ្នកបានធ្វើអ្វីមួយដែលធ្វើឲ្យភាពខ្វះខាតនោះបានប្រសើរឡើងវិញ ដូចជាការដែលបានចូលរួមវគ្គបណ្ដុះបណ្ដាលជាដើម។
៥. ហេតុអ្វីបានជាអ្នកលាឈប់ពីការងារមុន?
ត្រូវចាំថា ពេលអ្នកសម្ភាសន៍សួរសំណួរនេះ មិនមែនបានន័យថាពួកគេចង់ដឹងរឿងផ្ទាល់ខ្លួនរបស់អ្នកពេកនោះទេ តែគឺពួកគេចង់ដឹងអំពីមូលហេតុដែលអ្នកឈប់ពីការងារមុន និងដើម្បីចង់ដឹងថាតើអ្នកអាចនឹងជួបជាមួយស្ថានការណ៍ដែលអ្នកបានជួបកាលពីមុនដែរឬក៏អត់។ ប្រសិនបើស្ថានការណ៍ដែលអ្នកបានជួបដូចគ្នានឹងអ្វីដែលនឹងមាននៅកន្លែងការងារថ្មីនេះ នោះអ្នកសម្ភាសន៍អាចនឹងគិតថាអ្នកប្រហែលជាមិនសូវស័ក្ដិសមសម្រាប់ប្រឈមជាមួយការងារថ្មីនេះឡើយ។
គន្លឹះដើម្បីឆ្លើយសំណួរនេះ ត្រូវតែនិយាយដោយបង្ហាញភាពស្មោះត្រង់អំពីអ្វីដែលបានកើតឡើងដោយពាក្យសម្ដីបង្ហាញការគោរព និងបង្ហាញការស្វែងរកដំណោះស្រាយរបស់អ្នកក្នុងអំឡុងពេលការងារមុន។ មួយវិញទៀត ប្រសិនបើហេតុផលនៃការឈប់របស់អ្នកអាចមិនមែនជារឿងល្អ អ្នកក៏មិនគួរជ្រើសរើសយកការនិយាយអាក្រក់ពីកន្លែង ឬមេចាស់របស់អ្នកដែរ ព្រោះវាបង្ហាញពីអាកប្បកិរិយាមិនល្អ។ អ្នកអាចប្ដូរទៅជានិយាយពីអ្វីដែលអ្នកចង់ស្វែងរកនៅកន្លែងថ្មីដើម្បីសម្រេចគោលដៅការងារវិញទើបជាការប្រសើរ។
៦. ហេតុអ្វីអ្នកចង់ធ្វើការនៅទីនេះ?
អ្នកសម្ភាសន៍សួរសំណួរនេះ ព្រោះពួកគេចង់ដឹងអំពីគោលដៅអាជីពការងាររបស់អ្នក និងចង់ដឹងថាតើផែនការរបស់អ្នកស័ក្ដិសមជាមួយតួនាទីដែលអ្នកកំពុងតែដាក់ពាក្យកម្រិតណា។ ធម្មតានិយោជកចង់បានបុគ្គលិកដែលមានឆន្ទៈធ្វើការងារ។ ដូច្នេះហេតុផលដែលអ្នកដាក់ពាក្យមកធ្វើការនៅកន្លែងពួកគេ គឺជាឧបករណ៍ដើម្បីវាស់ស្ទង់អំពីទឹកចិត្តស្រលាញ់ការងារ និងឆន្ទៈរបស់អ្នកនេះហើយ។
គន្លឹះដើម្បីឆ្លើយសំណួរនេះ ចូរប្រាប់អ្នកសម្ភាសន៍នូវអ្វីដែលអ្នកចាប់អារម្មណ៍ទាក់ទងនឹងក្រុមហ៊ុន បរិយាកាសការងារនៅទីនោះ ក៏ដូចជាតួនាទីដែលអ្នកកំពុងដាក់ពាក្យ។ មិនខុសពីសំណួរទី២ ការស្រាវជ្រាវអំពីក្រុមហ៊ុន អាចជួយអ្នកឱ្យត្រៀមខ្លួនឆ្លើយសំណួរទាំងនេះបានយ៉ាងមានទំនុកចិត្ត។
៧. តើអ្នកសង្ឃឹមថានឹងរៀនសូត្រអ្វីខ្លះពីតួនាទីនេះ?
សំណួរនេះ អ្នកសម្ភាសន៍នៅតែចង់ដឹងពីឆន្ទៈការងាររបស់អ្នក។ ក្រៅពីនេះ ពួកគេក៏ចង់ដឹងថា តើអ្នកគឺជាមនុស្សដែលចូលចិត្តរៀនសូត្រពីការងារ ពីមនុស្សជុំវិញខ្លួនដើម្បីរីកចម្រើនដែរឬអត់ផងដែរ។
គន្លឹះដើម្បីឆ្លើយសំណួរនេះ អ្នកគួរតែផ្ដោតអារម្មណ៍លើបទពិពណ៌នាការងារ (JD) ដែលអ្នកកំពុងដាក់ពាក្យពេលនេះ ហើយមើលថាតើមានចំណុចណាខ្លះដែលអាចឱ្យអ្នកបានរៀនសូត្របន្ថែមបាន។
៨. តើអ្នករំពឹងប្រាក់ខែប៉ុន្មានពីតួនាទីនេះ?
សំណួរនេះច្រើនតែត្រូវបានចោទសួរមុនពេលឈានទៅដល់សំណួរ “តើអ្នកមានអ្វីចង់សួរមកពួកយើងវិញឬអត់?” ។ ជាទូទៅ អ្នកសម្ភាសចង់ដឹងថាតើក្រុមហ៊ុនអាចផ្ដល់ប្រាក់ខែដល់អ្នកស្របទៅនឹងការរំពឹងទុករបស់អ្នកដែរឬក៏អត់។ និយាយម្យ៉ាងទៀត អ្នកសម្ភាសន៍តែងប្រើសំណួរនេះដើម្បីចម្រាញ់ចំនួនបេក្ខជនដែលកំពុងដាក់ពាក្យក្នុងតួនាទីជាក់លាក់មួយផងដែរ។
សំណួរនេះ អាចមានការលំបាកតិចតួចដល់បេក្ខជន ព្រោះពួកគេមិនសូវហ៊ានឆ្លើយក្នុងចំនួនជាក់លាក់ អាចគិតថាតិចពេក ឬច្រើនពេកដែលមិនសមនឹងតួនាទីនេះ។ ដូច្នេះគន្លឹះដើម្បីឆ្លើយសំណួរនេះ អ្នកគួរតែស្រាវជ្រាវជាមុនថាតើតួនាទីប្រហាក់ប្រហែលនេះនៅក្រុមហ៊ុនផ្សេងៗប៉ុន្មាន (តម្លៃចន្លោះ) ដើម្បីអាចយកមកថ្លឹងថ្លែងជាមួយអ្វីដែលអ្នកនឹងឆ្លើយតបទៅគេនោះ។
សរុបមកវិញ ចម្លើយរបស់អ្នកគួរតែបង្ហាញពីតម្រូវការនៃមុខតំណែងដែលអ្នកបានស្នើសុំ (Apply) នោះ។ អ្នកពុំចាំបាច់ចងចាំចម្លើយណាមួយឡើយ ប៉ុន្តែអ្នកត្រូវឆ្លើយទៅតាមការយល់ដឹងរបស់អ្នក ដើម្បីចៀសផុតពីការជាប់គាំឆ្លើយពុំរួច។
ពេលខ្លះអ្នកសម្ភាសន៍សួរអ្នកនូវសំណួរធម្មតា ប៉ុន្តែពេលមួយគេអាចសួរនូវសំណួរដែលពិបាកឆ្លើយ និងមិនបានត្រៀម
ទុកដែលបង្ខំចិត្តឲ្យអ្នកឆ្លើយភ្លាមៗទៅតាមការនឹកឃើញ។ មានសំនួរជាច្រើនផ្សេងៗគ្នាដែលអ្នកសម្ភាសន៍អាចសួរ
មកកាន់អ្នកដូចជា សំណួរទាក់ទងនឹងសមត្ថភាព ប្រវត្តិផ្ទាល់ខ្លួន ប្រវត្តិការងារ ចរិកលក្ខណៈ ជំនាញទំនាក់ទំនង និងប្រាក់ខែជាដើម។ របៀបនៃការឆ្លើយសំណួររបស់អ្នកនឹងបង្ហាញប្រាប់អ្នកសម្ភាសន៍ថាអ្នកមានចំណេះដឹងប៉ុណ្ណា។
អត្ថបទទាក់ទង