អត្ថប្រយោជន៍សំខាន់ៗចំនួន ៤ ក្នុងការបង្កើតវប្បធម៍ស្តាប់បុគ្គលិកនិយាយ
ការចូលរួមឲ្យយោបល់ ឬផ្ដល់ព័ត៌មានរបស់និយោជិត មានសារៈសំខាន់ណាស់ចំពោះអនាគតអាជីវកម្ម ព្រោះបុគ្គលិកលំៗ នឹងនាំអន្តរាយដល់ផែនការអនាគត។
សូមចាប់ផ្ដើមមើលយុទ្ធសាស្ត្រដើម្បីបង្កើនកម្រិតចូលរួមឲ្យយោបល់ ឬផ្ដល់ព័ត៌មានរបស់និយោជិតឲ្យពួកគេហ៊ាននិយាយ ហ៊ានជូនយោបល់ ហ៊ានផ្ដល់ព័ត៌មានពិតដែលរឿងទាំងនោះយើងមិនចង់ឮក្ដី ឲ្យតែជាការពិតដែលមានផលល្អចំពោះក្រុមហ៊ុន និងស្ថាប័ន។
កំហុសជាទូទៅរបស់អ្នកគ្រប់គ្រង គឺមានទំនោរទៅរកការជឿថា រាល់ការសម្រេចចិត្តទាំងអស់របស់ខ្លួន ចាំបាច់ត្រូវចេញពីឋានៈខ្ពស់បំផុតនៃឋានានុក្រម ប៉ុន្តេតាមការពិតវិញ វិធីល្អបំផុតដើម្បីអនុវត្តយុទ្ធសាស្ត្រ គឺចាប់ផ្តើមជាមួយគំនិតនិយោជិត ទើបខ្សែសង្វាក់នៃការអនុវត្តប្រព្រឹត្តទៅដោយរលូន។
ខាងក្រោមនេះជាអត្ថប្រយោជន៍សំខាន់ៗចំនួន ៤ ក្នុងការបង្កើតវប្បធម៍ស្តាប់បុគ្គលិកនិយាយ៖
១. បង្វឹកការនិយាយ និងស្តាប់
ការនិយាយល្អ គឺនិយាយត្រូវរឿង ការស្តាប់ល្អ គឺស្តាប់មនុស្សសាច់ការ ដូច្នេះការចូលរួមនិយាយ និងជួយឲ្យពួកគេឱ្យខិតខំប្រឹងប្រែង ឬចេះវិធីទំនាក់ទំនងយ៉ាងទាន់សម័យ និងមានលក្ខណៈអាជីព មិនកំប្លុកកំប្លែងខុសរឿង ឬកាច មានះខុសបែបបទ។ ទីបំផុត បុគ្គលិកមានអារម្មណ៍ថា ស្ថាប័នបានជួយឲ្យកម្រិតនៃសមត្ថភាពទំនាក់ទំនង និងតម្លៃនៃការចូលរួមគំនិតរបស់គេកើនឡើង បានន័យថា គ្រប់គ្នាត្រូវបានក្រុមហ៊ុនគោរព និងឲ្យតម្លៃ។
ការចូលរួមរបស់និយោជិត គឺជាផ្នែកចាំបាច់មួយនៃប្លង់មេ ដែលនឹងបង្កើតឲ្យមានកន្លែងធ្វើការមានសុវត្ថិភាពផ្លូវចិត្ត ទំនុកចិត្ត និងជឿនលឿន។
២. ពង្រឹងគុណតម្លៃ
តាំងពីមេដឹកនាំរហូតដល់អ្នកបោសសម្អាត ការចេះធ្វើឲ្យនិយោជិតគ្រប់គ្នាមានអារម្មណ៍ថា ពួកគេជាផ្នែកមួយនៃក្រុមហ៊ុន ហើយវត្តមានរបស់ពួកគេនៅកន្លែងធ្វើការដោយស្មារតីមុតមាំមិនមែនលំៗ គឺជាកត្តាសំខាន់ក្នុងការរក្សាកម្រិតនៃការចូលរួមខ្ពស់បំផុត។ និយោជិតដែលចូលរួមពេញដៃពេញជើង មានន័យថា ផលិតភាពនឹងកើនឡើង ប្រាក់ចំណេញនឹងស្ទុះឡើង កម្រិតភាគហ៊ុនរបស់ម្ចាស់ភាគហ៊ុនកើនឡើង ហើយលទ្ធផលនៃការពេញចិត្តរបស់អតិថិជនអាចល្បីចេញបង្កើតប្រេនរឹងមាំ ធ្វើឲ្យក្រុមហ៊ុនមានកេរ្តិ៍ឈ្មោះពិបាកផ្តួលដែលមនុស្សជាច្រើនស្រមៃចង់បាន។
៣. អនុវត្តិការស្ទង់មតិ
ការស្ទង់មតិ ជាទិន្នន័យសំខាន់របស់ក្រុមហ៊ុន។ មនុស្សមិនងាយនិយាយជាមួយការស្ទង់មតិនៅខាងក្រៅទេ ព្រោះគ្មានប្រយោជន៍សម្រាប់ខ្លួនគេ តែនៅក្នុងស្ថាប័ន ការជំរុញនិយោជិតរបស់អ្នកឲ្យមានការបញ្ចេញយោបល់ ពួកគេពិបាកប្រកែក ហើយទាំងនេះជាវិធីធ្វើឲ្យពួកគេរៀនចាប់អារម្មណ៍ រៀននិយាយ ចំណែកអ្នកជិះសេះលែងដៃ យើងក៏នឹងរកឃើញការទទួលខុសត្រូវលំៗរបស់គេ។ ចូរបង្កើតរបៀបនៃការស្ទង់មតិមួយដែលមានសំណួររភ្ជាប់សម្រាប់វាស់វែងការចូលរួមរបស់និយោជិកត និងស្វែងរកដំណោះស្រាយ ពិសេសតើធ្វើយ៉ាងណាមានប្រៀបលើដៃគូប្រកួតប្រជែង។
៤. ផ្ដល់សិទ្ធិអំណាចដល់ពួកគេ
ចូរធ្វើពួកគេអាចយកចំណេះដឹងនៃក្រុមនីមួយៗដើម្បីមកឲ្យដំណឹង មកចូលរួមច្នៃប្រតិដ្ឋ ឬមកកែលម្អ។ នៅពេលនោះ ពួកគេនឹងក្លាយជាផ្នែកមួយនៃដំណោះស្រាយដោយស្វ័យប្រវត្តិ ហើយពួកគេទំនងជាមិនសូវបង្កើត ឬធ្វើជាមូលហេតុនៃបញ្ហាទេ។
ក្នុងនាមជាអ្នកគ្រប់គ្រង តែងមានទំនួលខុសត្រូវក្នុងការជួយដឹកនាំនិយោជិតឲ្យក្លាយជាក្រុមដែលទទួលបានជោគជ័យ និងសាមគ្គីភាពរឹងមាំ ហើយការចង់បានបែបនេះ ត្រូវចាប់ផ្តើមដោយការសហការគ្នានៃគំនិតសិន ទើបការអនុវត្តិនានាប្រព្រឹត្តទៅបានរលូន។
អត្ថបទទាក់ទង
ចំណុចធំៗចំនួន ២ ដែលអន្ទងចិត្តបុគ្គលិកគំរូឲ្យនៅក្រុមហ៊ុនមួយបានដោយមិនប្រើលុយ