យុទ្ធសាស្ត្រទីផ្សារសំខាន់ៗចំនួន ៤ ដែលក្រុមហ៊ុនភាគច្រើនកំពុងប្រើប្រាស់

មិនថាសម្រាប់អាជីវកម្មទើបនឹងបង្កើតថ្មី ឬក៏អាជីវកម្មឈរជើងនៅលើទៅផ្សារបានយូរប៉ុណ្ណានោះទេ ការធ្វើទីផ្សារ និងការលក់នៅតែជាចំណុចស្លាប់រស់របស់ក្រុមហ៊ុន។ យ៉ាងណាមិញដើម្បីធ្វើឲ្យការធ្វើទីផ្សាររបស់ក្រុមហ៊ុននីមួយៗទទួលបានភាពជោគជ័យ វាមិនមែនជារឿងដែលសាមញ្ញ ហើយនឹងងាយស្រួលនោះទេ វាតម្រូវឲ្យមានការឆ្លងកាត់ដំណាក់កាលជាច្រើន រាប់ទាំងពីការស្វែងយល់ពីផលិតផលរបស់យើងផ្ទាល់ ការសិក្សាស្រាវជ្រាវអំពីអតិថិជន និងទីផ្សារជាដើម ដូចនេះហើយម្ចាស់អាជីវកម្ម ក៏ដូចជាក្រុមហ៊ុននីមួយៗ ត្រូវរិះរកមធ្យោបាយ និងយុទ្ធសាស្រ្តនានា ក្នុងការផ្សព្វផ្សាយដើម្បីធ្វើឲ្យផលិតផល ក៏ដូចជាសេវាកម្មរបស់គាត់ ទទួលបានការស្គាល់ និងទំនុកចិត្តពីអតិថិជនកាន់តែច្រើនជាងមុន។

យ៉ាងណាមិញ យើងសង្កេតឃើញថា យុទ្ធសាស្ត្រទីផ្សារសំខាន់ៗចំនួន ៤ ដែលក្រុមហ៊ុនភាគច្រើនកំពុងប្រើប្រាស់នោះមានដូចជា៖

• យុទ្ធសាស្រ្តការពារ
• យុទ្ធវាយលុក
• យុទ្ធសាស្រ្តវាយឆ្មក់
• យុទ្ធសាស្រ្តទ័ពព្រៃ

យុទ្ធសាស្រ្តទាំង៤ គឺមានការប្រើប្រួលទៅតាមក្រុមហ៊ុន ឬអង្គភាព​នីមួយៗ។ ចំពោះយុទ្ធសាស្រ្តការពារខ្លួន គឺភាគច្រើនក្រុមហ៊ុនដែលប្រើប្រាស់យុទ្ឋសាស្រ្តនេះ ជាក្រុមហ៊ុនដែលឈរនៅលំដាប់កំពូល ឬលេខរៀងទី១។

ឧទាហរណ៍ ក្រុមហ៊ុន កូកាកូឡា (Coca Cola) និងក្រុមហ៊ុន ប៊ិបស៊ី (Pepsi)។ យើងសង្កេតឃើញថា ក្រុមហ៊ុន Coca Cola គឺបានឈរនៅចំណុចកំពូលទៅហើយ ឯក្រុមហ៊ុន Pepsi ចង់ដណ្តើមទីផ្សាររបស់ក្រុមហ៊ុន Coca Cola អញ្ចឹងលុះត្រាតែក្រុមហ៊ុន Pepsi មានធនធាន ឬកម្លាំងធំជាងកូកាកូឡាយ៉ាងតិចក៏ចាប់ពី២ ទៅ ៣ដង ឬលើសពីហ្នឹង ទើបអាចដណ្តើមទីផ្សារពីកូកាកូឡាបាន។ តែជាជាងប្រើធនធានច្រើន ហើយក៏មិនបានទីផ្សារច្រើនដែរនោះ ទើបបានជាក្រុមហ៊ុន Pepsi បានប្តូរយុទ្ធសាស្រ្តវាយលុកចេញទៅជាយុទ្ធសាស្រ្តវាយឆ្មក់វិញ ដោយក្រុមហ៊ុន Pepsi បានបញ្ចេញផលិតផលថ្មីមួយ នោះគឺ ស្ទីង (Sting)។ បើយើងមើលទៅអាចឃើញថា Sting ផលិតឡើងដើម្បីប្រកួតជាមួយ Pepsi ដែលជាផលិតផលរបស់ក្រុមហ៊ុនតែមួយ តែបើយើងសង្កេតឲ្យជ្រៅទៅទៀតនោះ យើងនឹងឃើញថា Sting ផលិតឡើងដើម្បីវាយឆ្មក់ទីផ្សារ Coca Cola។ ឯ Coca Cola ដែលជាក្រុមហ៊ុនការពារខ្លូនពីមុននោះ ក៏បានបញ្ចេញផលិតមួយថ្មីដែរ នោះគឺផលិតផល សាំមូរ៉ៃ (Samurai) ដើម្បីទៅដណ្តើមទីផ្សារពី Sting វិញ។ ដោយសារតែមានវត្តមានផលិតផល Samurai ហ្នឹងហើយ បានជា Sting បានប្រើយុទ្ធសាស្រ្តការពារខ្លួនវិញ ឯ Samurai បានប្រើយុទ្ធសាស្ត្រវាយលុកវិញ។ 

សរុមមក ក្រុមហ៊ុនទាំង ២ នេះបានប្តូរយុទ្ធសាស្រ្តទៅមកៗ ដើម្បីឲ្យក្រុមហ៊ុនរបស់ខ្លួនអាចកាន់ចំណែកធំនៅលើទីផ្សារ។ 

ឥឡូវ យើងមកសង្កេតមើលក្រុមហ៊ុនមួយចំនួនទៀតដែលប្រើយុទ្ធសាស្រ្ត ទី៤ គឺ យុទ្ធសាស្រ្តទ័ពព្រៃ។ យុទ្ធសាស្រ្តទ័ពព្រៃ គឺជាការដកខ្លូនឲ្យឆ្ងាយពីការប្រកួតប្រជែងដើម្បីដណ្តើមចំណែកទីផ្សារ ឬទីតាំងអាចឈរជើងបាន។ ជាក់ស្តែង កាលសហរដ្ឋអាមេរិក និងចិនដណ្តើមទីផ្សារគ្នា ធ្វើឲ្យផ្នែកសេដ្ឋកិច្ចប្រទេសតូចៗដែលបានពឹងផ្អែកទីផ្សារធំទៅលើប្រទេសទាំងពីរហ្នឹងក៏បានការរង្គោះរង្គើរដែរ។

យើងសាកក្រឡេកមកមើលការប្រកួតប្រជែងនៅប្រទេសកូរ៉េ រវាង អ៊ីម៉ល (E Mall) និងម៉ាត សេវែន អ៊ីលេវែន (7 Eleven)។ ម៉ាត សេវែន អ៊ីលេវែន (7 Eleven) បានប្រើយុទ្ធសាស្រ្តទ័ពព្រៃបានយ៉ាងជោគជ័យ ដោយទៅបង្កើតម៉ាតតូចៗជាច្រើននៅតាមទៅប្រជុំជនជាច្រើន ជាជាងទៅបើទីតាំងធំដើម្បីទៅប្រកួតជាមួយ អ៊ីម៉ល (E Mall) ព្រោះថា អ៊ីម៉ល បានឈរជើងនៅតំបន់ធំៗរួចទៅហើយ។ ចំពោះមនុស្សវិញ គឺពួកគេមិនព្យាយាមចំណាយពេលជិះឡាន ពីចំងាយទៅ អ៊ីម៉ល ដោយគ្រាន់តែចង់ទិញភេសជ្ជៈ ១កំប៉ុង ឬច្រាសដុសធ្មេញ ១ដើម នោះទេ។ ព្រោះតែបែបនេះហើយ បានជាយុទ្ធសាស្រ្តទ័ពព្រៃរបស់ ម៉ាត សេវែន អ៊ីលេវែន (7 Eleven) ទទួលបានជោគជ័យបំផុត។

អទ្ថបទទាក់ទង

ស្វែងយល់ អំពីការវិភាគ PESTLE, ការវិភាគ SWOT និងទ្រឹស្ដី​កម្លាំង​ទាំង​៥​ របស់​លោក​ Porter​