នេះជាយុទ្ឋសាស្រ្តទីផ្សារ ដែលគ្រប់ម្ចាស់អាជីវកម្មត្រូវដឹង
យុទ្ធសាស្ត្រទីផ្សារ ត្រូវបានបង្កើតឡើងជាដំបូងដោយលោក Neil Borden ជាប្រធានសមាគមន៍ទីផ្សារអាមេរិចក្នុងឆ្នាំ១៩៥៣ និងជាសាស្ត្រាចារ្យមហាបរិញ្ញាផ្នែកទីផ្សារ និងផ្សព្វផ្សាយនៃសាកលវិទ្យាល័យហាវើត (Havard University) ដែលត្រូវបានគេប្រទះឃើញក្នុងរៀវភៅមួយក្បាលរបស់លោកបោះពុម្ភឆ្នាំ១៩៤២ មានចំណងជើងថា The Economic Effects of Advertising ។ ក្រោយមកអ្នកទីផ្សារម្នាក់ លោក E. Jerome McCarthy បានស្នើឡើងនូវការធ្វើចំណែកថ្នាក់ 4Ps នៅឆ្នាំ១៩៦០។ យុទ្ធសាស្ត្រនេះ គឺជាគន្លឹះមួយក្នុងផែនការទីផ្សារ ដែលគេហៅថា 4Ps មានដូចជា Product, Price, Place, និង Promotion ។ បច្ចុប្បន្នយុទ្ធសាស្ត្រនេះត្រូវបានប្រើប្រាស់ដោយអ្នកនាំទំនិញទៅកាន់ផ្សារទូទាំងពិភពលោក។
P1: Product (ផលិតផល)
ផលិតផលត្រូវបានគេមើលឃើញថាជាតម្រូវការរបស់អ្នកប្រើប្រាស់។ វាអាចជាទំនិញរូបីយ ឬសេវាកម្ម។ ផលិតផលនីមួយៗតែងតែមានវដ្តជីវិតរបស់វារួមមាន កំណើនថេរ លែងសូវពេញនិយម និងនៅទីបញ្ចប់ការលក់ថយចុះឈានរហូតដល់លែងមានតម្រូវការ។ ដូច្នេះ បណ្ដាអ្នកនាំយកទំនិញទៅកាន់ផ្សារ គួរសិក្សាពីទីផ្សារឲ្យបានល្អិតល្អន់ទៅលើអាយុកាលនៃវដ្តផលិតផល។ តើទំនិញ ឬសេវាកម្មរបស់ខ្លួនជាទំនិញ ឬសេវាកម្មដែលមនុស្សគ្រប់រូប តែងតែត្រូវការជាចំបាច់?
ក្នុងការអភិវឌ្ឈផលិតផលត្រឹមត្រូវ អ្នកត្រូវតែឆ្លើយសំនួរខាងក្រោម៖
- ១. តើអតិថិជនចង់បានអ្វីពីសេវាកម្ម ឬផលិតផល?
- ២. តើអតិថិជននឹងប្រើប្រាស់វាដោយរបៀបណា?
- ៣. តើអតិថិជននឹងប្រើប្រាស់វានៅកន្លែងណា?
- ៤. តើលក្ខណៈពិសេសបែបណាដែលផលិតផលត្រូវតែមាន ដើម្បីបំពេញតម្រូវការរបស់អតិថិជន?
- ៥. តើមានលក្ខណៈចាំបាច់អ្វីដែលអ្នកខកខាន?
- ៦. តើអ្នកកំពុងបង្កើតលក្ខណៈពិសេសដែលអតិថិជនមិនត្រូវការដែរឬទេ?
- ៧. តើផលិតផលឈ្មោះអ្វី?
- ៨. តើឈ្មោះហ្នឹងវាងាយស្រួលចាំ ឬគេស្គាល់ដែរឬទេ?
- ៩. តើទំហំ និងពណ៌របស់វាយ៉ាងណាដែរ?
- ១០. តើភាពខុសគ្នាពីផលិតផលរបស់អ្នក និងផលិតផលរបស់គូប្រកួតប្រជែងរបស់អ្នកយ៉ាងណាដែរ?
- ១១. តើផលិតផល ឬសេវាកម្មនោះមានលក្ខណៈដូចម្តេច? ការរចនាឡើងស្អាត ឬល្អប៉ុណ្ណា?
P2: Price (តម្លៃ)
ទំហំថវិកាដែលអតិថិជនត្រូវតបស្នងសម្រាប់ផលិតផល ឬសេវាកម្មមានសារៈសំខាន់ណាស់ ក្នុងការកំណត់ប្រាក់ចំណេញរបស់ក្រុមហ៊ុន និងរយៈពេលឈរជើងនៅក្នុងទីផ្សារ។ ការប្រែប្រួលតម្លៃ មានឥទ្ធិពលយ៉ាងខ្លាំងទៅលើយុទ្ធសាស្ត្រទីផ្សារ និងអាស្រ័យលើភាពបត់បែននៃតម្លៃផលិតផល ដែលជះឥទ្ធិពលទៅលើតម្រូវការ និងការលក់ផងដែរ។ យុទ្ធសាស្ត្រកំណត់តម្លៃ ផ្អែកលើកត្តាសំខាន់ៗ ៣ ជាមូលដ្ឋាន៖
- ការពិនិត្យមើលតម្លៃប្រកួតប្រជែងទីផ្សារ
- តម្លៃវាយលុកទីផ្សារ និង
- តម្លៃសមរម្យអាចទទួលយកបាន។
នេះគឺជាសំណួរសំខាន់មួយចំនួនដែលអ្នកគួរសួរខ្លួនឯង នៅពេលអ្នកកំពុងចង់កំណត់តម្លៃផលិតផល ឬសេវាកម្ម៖
- ១. តើអ្នកត្រូវចំណាយថវិកាប៉ុន្មានដើម្បីផលិតទំនិញ ឬសេវាកម្មនោះ?
- ២. តើអតិថិជនយល់ឃើញបែបណាទៅលើទំនិញ ឬសេវាកម្មរបស់អ្នក?
- ៣. តើតម្លៃបច្ចុប្បន្នរបស់ផលិតផល ឬសេវាកម្មអាចខ្ពស់ជាង ឬទាបជាងតម្លៃរបស់គូប្រគួតប្រជែង?
P3: Place (ទីតាំងចែកចាយ)
ទីតាំងចែកចាយ គឺឆ្ពោះទៅយកលទ្ធភាពទទួលបានផលិតផល ឬភាពងាយស្រួលសម្រាប់អតិថិជនក្នុងការរកទិញផលិតផល។ យុទ្ធសាស្ត្រចែកចាយ ដែលពេញនិយមជាងគេគឺការចែកចាយទៅកាន់ដេប៉ូ ឬឈ្មួញកណ្ដាលឲ្យលក់បន្ត។យុទ្ធសាស្ត្រទីតាំងចែកចាយ ធ្វើយ៉ាងណាដើម្បីឲ្យសាធារណជនបានមើលឃើញពីផលិតផលរបស់យើងបានគ្រប់ទីកន្លែងទាំងអស់។ការធ្វើបែបនេះ គឺជាការសម្រួលដល់អតិថិជនផងដែរ។
P4: Promotion (ការឃោសនាផ្សព្វផ្សាយ)
មធ្យោបាយផ្សាយឃោសនាត្រូវបានប្រើប្រាស់ដើម្បីផ្ដល់ព័ត៌មានឲ្យអតិថិជនគោលដៅបានយល់ និងបង្ហាញផលិតផល និងសេវាកម្ម។ មធ្យោបាយទាំងនោះរួមមាន៖ ការផ្សាយពាណិជ្ជកម្ម ទំនាក់ទំនងសាធារណៈ ការរៀបចំលក់ និងកម្មវិធីលក់ពិសេស។ ការឃោសនាអាចធ្វើទៅបានតាមប្រព័ន្ធផ្សព្វផ្សាយ អ៊ីនធើណេត ផ្លាកបាណូ កម្មវិធីតាំងពិពណ៌ និងព្រឹត្តិការណ៍ផ្សេងៗ។ ជាពិសេសក្នុងបរិបទបច្ចុប្បន្ននេះ គឺគេផ្តោតយកចិត្តទុកដាក់លើបណ្តាញសង្គមខ្លាំងបំផុត។ ក្រៅពីនេះ ការដែលអតិថិជនបានប្រើប្រាស់ផលិតផលលោកអ្នកហើយពេញចិត្ត រួចណែនាំផ្ទាល់មាត់ទៅដល់អ្នកប្រើប្រាស់ដទៃទៀត ក៏ចាត់ទុកជាការផ្សាយឃោសនាដែរ ហើយថែមទាំងមានប្រសិទ្ធភាពខ្ពស់ថែមទៀតផង។ ក្រៅពីនេះ ការបញ្ចុះបញ្ចូលរបស់បុគ្គលិកផ្នែកលក់ដើរតួនាទីយ៉ាងសំខាន់សម្រាប់ទំនាក់ទំនងសាធារណៈ។
នៅក្នុងចំណុច Promotion នេះ ត្រូវបានអ្នកម៉ាឃីតធីងប្រើយុទ្ធសាស្ត្រ Promotion Mix ដើម្បីបង្កើនការផ្សព្វផ្សាយ។ ក្នុងនោះមាន ៤ ចំណុចសំខាន់ៗនេះរួមមាន៖
- Advertising (ការផ្សព្វផ្សាយពាណិជ្ជកម្ម ឧ. វិទ្យុ, ទូរទស្សន៍, ផ្ទាំងប៉ាណូ…)
- Personal Selling (បុគ្គលិកផ្នែកលក់របស់អង្គភាព)
- Sale Promotion (លក់បណ្តើរផ្សព្វផ្សាយបណ្តើរ គឺនៅពេលផ្សព្វផ្សាយមានទំនិញលក់នៅនឹងកន្លែងផ្សព្វផ្សាយ ឧ. ការតាំងពិព័រណ៌, ប្រគំតន្ត្រី,…)
- Public Relation (ទំនាក់ទំនងសាធារណៈ គឺអង្គភាពផ្តល់ទៅឲ្យសារធារណៈ ឬធ្វើកិច្ចការដើម្បីសាធារណៈ ដូចជា៖ ធ្វើបង់ឲ្យអង្គុយ ជួយមន្ទីរពេទ្យគន្ធបុប្ផា កាកបាទក្រហម… ដែលជាការឧបត្ថមដោយក្រុមហ៊ុនរបស់គេ)។
- Direct Marketing (អ្នកលក់ប្រើយុទ្ធសាស្ត្រផ្ញើសារ (SMS) ឬទូរសព្ទផ្ទាស់ទៅកាន់អតិថិជ ឬក៏សុំជួបផ្ទាល់ដើម្បីបង្ហាញពីទំនិញ និងសេវាកម្មរបស់ពួកគេ)។
- Internet Marketing (ផ្សព្វផ្សាយតាមប្រព័ន្ធអ៊ីនធើណិតដូចជា៖ គេទំព័រ ហ្វេសប៊ុក…) ។
យ៉ាងណាមិញ នៅក្នុងសៀវភៅជំនាន់ថ្មីនេះ មានទ្រឹស្តីទីផ្សារមួយចំនួនបានបន្ថែមយុទ្ធសាស្ត្រទីផ្សារ ឬគោលការណ៍ម៉ាឃីតធីង ៣ ចំណុចទៀត ពោលគឺពី 4Ps ទៅ 7Ps ។ ៣ ចំណុចថ្មីនោះ គឺផ្តោតទៅលើការផ្តល់សេវាកម្មរបស់អ្នកលក់ រួមមាន៖
People (ការផ្តល់សេវាកម្មរស់អ្នកលក់ល្អ ឬមិនល្អ)
Process (ដំណើរការនៃការផ្តល់សេវាកម្មរបស់អ្នកលក់លឿន ឬក៏យឺត)
Physical Environment (បរិយាកាសរូបសាស្ត្រ គឺការតុបតែងហាងឲ្យបានស្អាត ល្អ កន្លែងមានខ្យល់បរិសុទ្ធ ឬមិនមាន) ។
សរុបមក យុទ្ធសាស្ត្រទីផ្សារ 4Ps ឬ 7Ps គឺជាយុទ្ធសាស្ត្រទីផ្សារដ៏មានប្រសិទ្ធភាពសម្រាប់អាជីវកម្ម។ តាមរយៈការអនុវត្តន៍នូវយុទ្ធសាស្ត្រមួយនេះ អ្នកនឹងអាចស្គាល់កាន់តែច្បាស់អំពីអាជីវកម្មរបស់អ្នក និងអតិថិជនគោលដៅរបស់អ្នក។ លើសពីនេះទៅទៀត វាក៏អាចជួយអ្នកក្នុងការកំណត់ថាអ្វីដែលដំណើរការ និងអ្វីដែលមានបញ្ហានៅក្នុងការធ្វើអាជីវកម្មទាំងមូលផងដែរ។
អត្ថបទទាក់ទង
ស្វែងយល់ អំពីការវិភាគ PESTLE, ការវិភាគ SWOT និងទ្រឹស្ដីកម្លាំងទាំង៥ របស់លោក Porter