គុណសម្បត្តិចំនួន ៥ ដើម្បីអភិវឌ្ឍភាពជាអ្នកដឹកនាំឆ្ពោះទៅរកវឌ្ឍនភាព
មនុស្សគ្រប់គ្នា សុទ្ធតែជាមេដឹកនាំ គ្រាន់តែអ្នកខ្លះ ជាអ្នកដឹកនាំខ្លួនឯង ដើម្បីឆ្ពោះទៅរកគោលដៅមួយ រីឯអ្នកខ្លះ ជាអ្នកដឹកនាំក្រុមដែលមានមនុស្សច្រើននាក់ ដើម្បីធ្វើកិច្ចការអ្វីមួយឲ្យទទួលបានលិទ្ធផលអ្វីមួយដែលពួកគេពេញចិត្ត។ យ៉ាងណា អ្នកដឹកនាំល្អ ហើយអាចវិវត្ដន៍ខ្លួនទៅរកភាពជោគជ័យបាន គឺដាច់ខាតមិនដែលដើររំលងចំណុចសំខាន់ទាំង ៥ ខាងក្រោមនេះឡើយ៖
១. មានគណនេយ្យភាព
នេះសំដៅដល់កាតព្វកិច្ចរបស់បុគ្គលដែលមាននាទីទទួលខុសត្រូវចំពោះសកម្មភាពរបស់ខ្លួន ទទួលយកអ្វីត្រូវ អ្វីខុស និងបង្ហាញលទ្ធផលប្រកបដោយតម្លាភាព។ ដូច្នេះប្រសិនបើមេដឹកនាំទទួលខុសត្រូវលើអ្វីមួយ (ឧទាហរណ៍គម្រោងធំមួយ) វាមានន័យថា ពួកគេកំពុងកាន់កាប់ភាពជាម្ចាស់របស់វាទាំងស្រុង ពួកគេទទួលខុសត្រូវដោយខ្លួនឯងចំពោះភាពជោគជ័យ ឬបរាជ័យនៃការងារមួយនោះ។ ប្រសិនបើគម្រោងនោះខកខានថ្ងៃផុតកំណត់ ពីព្រោះមនុស្សម្នាក់នៅក្នុងក្រុមរបស់ពួកគេ មិនបានចូលរួមចំណែកពេញលេញនៃការងារ អ្នកដឹកនាំជាអ្នកចេញមុខទទួលខុសត្រូវ។ ក្នុងនាមជាអ្នកគ្រប់គ្រង ការទទួលខុសត្រូវ ជារឿងមួយចាំបាច់ ដើម្បីធានាថាសមាជិកក្នុងក្រុមរបស់ពួកគេទាំងអស់គ្នា ត្រូវបំពេញការងារតាមភារកិច្ចគ្រប់យ៉ាង។
២. មានទំនាក់ទំនងល្អជាមួយកូនចៅ
យើងដឹងហើយថា បច្ចុប្បន្នមានអត្រាអ្នកកើតជំងឺបាក់ទឹកចិត្តដោយសារការងារច្រើនណាស់ ហើយបញ្ហានេះធ្វើឲ្យឈានដល់ការធ្វើអត្តឃាតក៏មាន ព្រោះពួកគេតែងទទួលរងសម្ពាធពីថ្នាក់លើ។ ដូច្នេះខណៈអ្នកដឹកនាំម្នាក់ ដឹកនាំកូនចៅខ្លួនបានល្អ ពួកគេជ្រើសយកការប្រាស្រ័យទាក់ទងជាមួយបុគ្គលិកជាបញ្ហាសំខាន់ ដើម្បីមានការរីកចម្រើន ទាំងសមត្ថភាពបុគ្គលិក និងការងារក្រុម ហើយក៏ជះឥទ្ធិពលដល់ការរីកចម្រើនរបស់អង្គភាពទាំងមូលផងដែរ។
៣. មានភាពស្មោះត្រង់ត្រឹមត្រូវ
វាត្រូវបានគេកត់សម្គាល់ថា ជាអ្នកដឹកនាំដែលយល់ច្បាស់ថាអ្វីត្រូវ និងអ្វីខុស ជាអ្នកដឹកនាំពោរពេញទៅដោយសីលធម៌ អ្នកដឹកនាំល្អ ដើរតួនាទីជាអ្នកតម្រឹមរៀបចំចាត់ចែកមនុស្សឲ្យបានត្រឹមត្រូវតាមជំនាញ និងទេពកោសល្យរបស់បុគ្គលិកម្នាក់ៗ។ បន្ទាប់ពីការដាក់ចេញនូវផែនការយុទ្ធសម្រាប់ក្រុម អ្នកដឹកនាំប្រភេទនេះមានបំណងធំដើម្បីឃើញបុគ្គលិក និងអ្នកនៅក្រោមបង្គាប់មានការរីកចម្រើន។
៤. មានការលើកទឹកចិត្ត
អ្នកដឹកនាំល្អ ដឹងច្បាស់ថាការលើកទឹកចិត្តបុគ្គលិកជាផ្នែកសំខាន់បំផុតក្នុងការជំរុញទឹកចិត្តឲ្យបុគ្គលិករីកចម្រើន ខឹតខំបំពេញការងារ រៀនសូត្របានច្រើន។ លើសពីនេះអ្នកដឹកនាំដឹងច្បាស់ថា នៅពេលមានការលើកទឹកចិត្តទោះតាមរយៈពាក្យសម្ដី កាយវិការ ហិរញ្ញវត្ថុ ឬមិនមែនហិរញ្ញវត្ថុក្តី ការលើកទឹកចិត្តនោះតែងជះឥទ្ធិពលដល់សកម្មភាព និងលទ្ធផលការងារជាក់ជាមិនខាន។ អ្វីដែលលើសពីការបំពេញចិត្តបុគ្គលិក ការលើកទឹកចិត្តនេះបានដើរតួនាទីយ៉ាងសំខាន់ក្នុងការជំរុញទឹកចិត្តបុគ្គលិក ឬនរណាម្នាក់ឲ្យត្រលប់មកប្រសើរឡើងវិញបាន ពិសេសនៅក្នុងអង្គភាពមួយដែលបុគ្គលិកមានបញ្ហាបាក់ទឹកចិត្តបណ្ដាលមកពីការបំពេញការងារ។
៥. មានភាពអត់ធ្មត់ខ្ពស់
ចង់ធ្វើជាអ្នកដឹកនាំល្អត្រូវចិត្តធ្ងន់បន្តិចទើបបាន បើអ្នកមានចិត្តឆេវឆាវពេកអ្នកមិនអាចគ្រប់គ្រងនរណាម្នាក់បានឡើងព្រោះសូម្បីអារម្មណ៍ខ្លួនឯងអ្នកគ្រប់គ្រងមិនបានផង មានហេតុផលអ្វីដែលអាចគ្រប់គ្រងអ្នកដទៃហើយរំពឹងទទួលបានលទ្ធផលល្អនោះ។ ការអត់ធ្មត់របស់អ្នកដឹងនាំជារឿងសំខាន់ ព្រោះរាល់ការបំពេញការងារគឺសុទ្ធតែជួបបញ្ហា ហើយបញ្ហាទាំងនោះអ្នកដឹកនាំត្រូវចេញមុខជួប និងដោះស្រាយមុនទម្លាក់ឲ្យបុគ្គលិក។ ការអត់ធ្មត់របស់អ្នកដឹកនាំអាចបង្ហាពីមហិច្ឆតាដ៏ធំធេងដែលពួកគេមាន ហើយពួកគេនឹងមិនងាយអស់សង្ឃឹមឡើងក្នុងបេសកកម្មរបស់ពួកគេ ហើយពេលដែលពួកគេជោគជ័យក៏អាចបង្ហាញថាពួកគេមានបទពិសោធន៍គ្រប់គ្រាន់សម្រាប់ភាពជោគជ័យមួយនេះ។
សរុបមក ពាក្យថាអ្នកដឹកនាំល្អ ជាបុគ្គលដែលមានភាពទទួលខុសត្រូវខ្ពស់ ដឹកនាំក្រុមឲ្យបំពេញការងារមួយប្រកបដោយភាពជោគជ័យ និងរីកចម្រើន។ អ្នកដឹកនាំល្អ តែងយឹតយោងសមាជិកក្រុមទាំងអស់ឲ្យរីកចម្រើនជាមួយគ្នា មិនមើលបំណាំ មិនទម្លាក់កំហុស និងទាញយកប្រយោជន៍តែម្នាក់ឯង តែអ្វីដែលគេគិត គឺលទ្ធផលរួមចេញពីស្នាដៃរួមទាំងអស់គ្នា។
អត្ថបទទាក់ទង
កាតព្វកិច្ចសំខាន់ចំនួន ៥ ដែលមេដឹកនាំក្រុមគួរមានចំពោះក្រុម