តើអ្វីជាគោលបំណងនៃយុទ្ធសាស្រ្តដឹកនាំ?
យុទ្ធសាស្រ្ត ជាសិល្បៈនៃការរៀបចំ ឬការដឹកនាំ ដើម្បីសម្រេចកិច្ចការឲ្យស្របតាមគោលបំណង និងគោលដៅដែលបានកំណត់។
ភាពជាអ្នកដឹកនាំ គឺសំដៅលើបុគ្គលដែលមានឥទ្ធិពលក្នុងការគ្រប់គ្រង និងចាត់ចែងកិច្ចការ ព្រមទាំងបង្កើតយុទ្ធសាស្ត្រ ដើម្បីឲ្យអ្នកក្រោមបង្គាប់អនុត្តតាមប្រកបដោយប្រសិទ្ធផល និងប្រសិទ្ធភាពនៃការងារ។
ការដឹកនាំ គឺជាមុខងារទីបីនៃការគ្រប់គ្រង ជាការបង្ហាញឲ្យឃើញនូវសមត្ថភាពរបស់អ្នកគ្រប់គ្រង ដែលចូលរួមដោយផ្ទាល់ក្នុងការដឹកនាំ ណែនាំ ជំរុញរាល់សកម្មភាពការងាររបស់អ្នកក្រោមបង្គាប់ឲ្យប្រព្រឹត្តតាមខ្លួន ដើម្បីឆ្ពោះទៅរកគោលដៅដែលបានកំណត់។
យុទ្ធសាស្ត្រដឹកនាំ គឺជាវិធីសាស្រ្តគ្រប់គ្រង ដឹកនាំ និងប្រើប្រាស់ធនធានប្រកបដោយប្រសិទ្ធភាព។ យុទ្ធសាស្ត្រដឹកនាំ ត្រូវធ្វើឡើងដោយមានគោលបំណង។ មិនមានការបង្កើតយុទ្ធសាស្ត្រដែលជោគជ័យណាមួយ ដែលអាចកើតឡើងទៅបាន ដោយមិនមានគោលដៅច្បាស់លាស់នោះឡើយ ។
ពិតណាស់ នៅពេលមានគោលបំណង ឬគោលដៅច្បាស់លាស់ នោះអ្នកដឹកនាំនឹងមានទុនដើម្បីកំណត់ទស្សនៈវិស័យ បេសកកម្ម គោលដៅ និងឈានដល់ការធ្វើគម្រោងសកម្មភាពដើម្បីឈានទៅដល់ការសម្រេចគោលបំណងនោះ។
តើត្រូវកំណត់នូវគោលបំណងតាមរបៀបណា? ខាងក្រោមនេះ គឺជាវិធីសាស្ត្រដើម្បីជាគន្លឹះក្នុងកាបង្កើតនូវគោលបំណង៖
- កំណត់ឲ្យបាននូវការរំពឹងទុកសម្រាប់ថ្ងៃអនាគត
- កំណត់ឲ្យបាននូវការរំពឹងទុករបស់ភាគីពាក់ព័ន្ធ ឧទាហរណ៍ សម្រាប់ស្ថាប័ន តើក្រុមប្រឹក្សាភិបាលស្ថាប័នចង់បានបែបណា សម្រាប់ម្ចាស់អាជីវកម្ម បុគ្គលិក អតិថិជន អ្នកផ្គត់ផ្គង់ អ្នកផ្តល់កម្ចី សង្គម រដ្ឋាភិបាល…?
- ស្គាល់ឲ្យបានច្បាស់នូវធនធាន និងកែខៃធនធានឲ្យកាន់តែមានសក្តានុពល
- រក្សាឲ្យបាននូវក្រមសីលធម៌ និងការទទួលខុសត្រូវខ្ពស់
ការដឹកនាំដែលទៅមុខ ចាំបាច់ត្រូវមានគោលបំណង។ វាប្រៀបបាននឹងភ្នែករបស់យើង តើអ្នកនឹងដើរដល់គោលដៅបានដោយរបៀបណាបើភ្នែករបស់អ្នកងងឹត?
សូមណែនាំសៀវភៅ ការគ្រប់គ្រង និងអភិវឌ្ឍស្ថាប័ន (១២ មេរៀន ដើម្បីឈានទៅរកភាពជោគជ័យរបស់ស្ថាប័ន)
សម្រាប់ការជាវ ឬព័ត៌មានបន្ថែម៖ ០៩៦ ២៧០ ៦៥៦៥ (តេលេក្រាម)
