តើធ្វើយ៉ាងណាដើម្បីលើកទឹកចិត្តក្រុមការងាររបស់អ្នករាល់ថ្ងៃ?
អ្នកដឹកនាំ គឺសំដៅទៅលើអ្នកត្រួសត្រាយផ្លូវ និងជាអ្នកនាំមុខគេរាល់កិច្ចការទាំងឡាយ វាមិនមែនជាការងារស្រួលដូចជាពាក្យដែលយើងគ្រប់គ្នានិយាយឡើយ។ ដើម្បីក្លាយជាមេដឹកនាំដែលពូកែ ឈ្លាសវៃ រឹងមាំ និងដ៏ខ្លាំងក្លាម្នាក់ គាត់ត្រូវតែចេះពីយុទ្ធសាស្រ្ត ចិត្តសាស្រ្ត ដើម្បីស្វែងយល់អំពីតម្រូវការ និងអារម្មណ៍របស់បុគ្គលិក ជាពិសេសនោះ គឺការបង្វឹកបុគ្គលិក ពីបុគ្គលិកដែលគ្មានសម្ថតភាពទៅជាបុគ្គលិកឆ្នើម ដែលអាចជួយជំនួសកិច្ចការរបស់ខ្លួនបានយ៉ាងល្អពេលដែលខ្លួនមិននៅ។ អ្នកដឹកនាំត្រូវតែជាអ្នកប្រឹក្សា អ្នកកំណត់វិន័យ អ្នកលើកទឹកចិត្ត និងអ្នកផ្តល់កម្លាំងចិត្តម្នាក់ទៅដល់បុគ្គលិក ឬកូនក្រុមរបស់ខ្លួនផងដែរ។ ការកំណត់នូវការរំពឹងទុកមួយដែលខ្ពស់ វាមិនមែនត្រឹមតែលើកទឹកចិត្តដល់បុគ្គលិកតែប៉ុណ្ណោះទេ តែវាក៏ជាកាតាលីករមួយយ៉ាងសំខាន់ដែលអាចធ្វើឲ្យអាជីវកម្ម និងដំណើរការរបស់ក្រុមហ៊ុនវិវត្តន៍ទៅមុខយ៉ាងរលូន។
ខាងក្រោមនេះ គឺជាវិធីសាស្រ្តមួយចំនួន ដើម្បីលើកទឹកចិត្តក្រុមការងាររាល់ថ្ងៃ ក្នុងការជម្នះឧបសគ្គ ខិតខំធ្វើការងារឲ្យមានប្រសិទ្ទភាពខ្ពស់ ដើម្បីសម្រេចគោលដៅ និងភាពជោគជ័យ៖
១. លើកទឹកចិត្តអ្នកដទៃឱ្យធ្វើតាមរបៀបផ្ទាល់ខ្លួន
ការប្រមូលផ្តុំបុគ្គលម្នាក់ៗមករួមសាមគ្គីគ្នាជារឿងសំខាន់មួយ ប៉ុន្តែអ្នកក៏ត្រូវទទួលស្គាល់លក្ខណៈពិសេសរបស់សមាជិកក្រុមម្នាក់ៗដែរ។ សមាជិកក្រុមការងារដែលមានកម្លាំងចិត្តខ្ពស់បំផុតជាមនុស្សដែលទទួលបានគម្រោងសមស្របតាមបណ្តុំជំនាញរបស់គេ និងទទួលបានការគាំទ្រឱ្យរីកចម្រើនក្នុងរបៀបផ្ទាល់ខ្លួនរបស់គេ។ ត្រូវមានភាពស្មោះត្រង់នៅក្នុងការផ្តល់យោបល់ និងត្រូវចេះរិះគន់ក្នុងរបៀបស្ថាបនា ព្រមទាំងបង្ហាញផ្លូវដើម្បីធ្វើការឱ្យកាន់តែប្រសើរឡើង។ ការផ្តល់ឱកាសឱ្យសមាជិកក្រុមការងារម្នាក់អនុវត្តគំនិតនិងរបៀបផ្ទាល់ខ្លួនរបស់គេពេលខ្លះក៏សំខាន់ដែរ។
២. ចែករំលែកកម្លាំងចិត្តរួម
គ្មានអ្វីដែលធ្វើឱ្យក្រុមការងារមានសាគ្គីភាពដូចការមានបេសកកម្មរួម ឬការមានជំនឿរួមគ្នានោះទេ។ ក្រុមការងាររបស់អ្នកនឹងមានកម្លាំងចិត្តនៅពេលគេទាំងអស់គ្នាគិតនិងយល់ស្របតាមគោលដៅរួមមួយ។ ការមានបេសកកម្មរួម គោលដៅច្បាស់លាស់ដើម្បីសម្រេចឱ្យបានសក្តានុពល គួបផ្សំជាមួយនឹងគុណតម្លៃរួមនឹងធ្វើឱ្យក្រុមការងារមួយរួមសាមគ្គីគ្នាក្នុងរបៀបមួយដែលមានឥទ្ធិពល។ ក្រុមការងារមួយដែលមានការរួបរួមគ្នានិងមានចិត្តតែមួយអាចរក្សាទំនាក់ទំនងជាមួយគ្នាយ៉ាងមានប្រសិទ្ធភាពខ្ពស់។
៣. ដឹកនាំដោយធ្វើជាគំរូគេ
ក្នុងនាមជាអ្នកដឹកនាំគេ រឿងសំខាន់គឺត្រូវផ្តល់គំរូលើកទឹកចិត្តដល់គេ។ កុំគ្រាន់តែប្រាប់ក្រុមការងាររបស់អ្នកអំពីរបៀបឱ្យ តែត្រូវឱ្យដើម្បីបង្កើតគំរូ។ ប្រសិនបើអ្នកមានឆន្ទៈចំពោះបុព្វហេតុអ្វីមួយ អ្នកត្រូវបង្ហាញក្រុមការងាររបស់អ្នក និងផ្តល់ឱកាសឱ្យគេបានចូលរួមក្នុងបុព្វហេតុនោះផង។ មេដឹកនាំដែលអនុវត្តដូចពាក្យសម្តីជាមនុស្សដែលមានឥទ្ធិពលខ្លាំងក្នុងការផ្តល់កម្លាំងចិត្តដល់អ្នកដទៃ។ អ្នកនឹងបាត់បង់តម្លៃប្រសិនបើអ្នកមិនអាចរក្សាពាក្យសម្តីរបស់ខ្លួនឯងបាន។ ជាងនេះទៅទៀត អ្នកត្រូវផ្តោតការយកចិត្តទុកដាក់លើក្រុមការងារណាដែលបង្ហាញស្មារតីចង់ចេះចង់ដឹង និងចង់ធ្វើកិច្ចការឱ្យបានប្រសើរជាងគេ ដោយទទួលស្គាល់និងផ្តល់តម្លៃចំពោះគំរូដែលគេបង្កើតឡើង។
៤. តាំងចិត្តផ្តល់ឱ្យលើសពីការចង់បានមកវិញ
មេដឹកនាំល្អបំផុតក៏ច្រើនតែជាអ្នកផ្តល់ឱ្យច្រើនបំផុតដែរ។ កែប្រែផ្នត់គំនិតនៃតម្លៃ ឈប់បារម្ភច្រើនជ្រុលចំពោះអ្វីអ្នកនឹងទទួលបានមកវិញ ហើយត្រូវចាប់ផ្តើមគិតលើរឿងដែលអ្នកអាចផ្តល់ឱ្យបាន។ នៅពេលក្រុមការងាររបស់អ្នកដឹងថាអ្នកបានព្យាយាមធ្វើកិច្ចការនិងគិតគូរច្រើនដល់ពួកគេ ពួកគេនឹងស្ម័គ្រចិត្តធ្វើការយ៉ាងច្រើនឱ្យអ្នកវិញ។ អ្នកត្រូវធ្វើខ្លួនឱ្យគេអាចពឹងអាស្រ័យបានគ្រប់ពេល ហើយបើមិនអាចជួយអ្វីបានភ្លាមៗទេ អ្នកត្រូវរក្សាទំនាក់ទំនងឱ្យមានប្រសិទ្ធភាពខ្ពស់។ តាំងចិត្តផ្តល់ជូនដោយឥតលក្ខខណ្ឌ ពីព្រោះប្រសិនបើអ្នកឱ្យរបស់ដោយស្រណោះដៃ វាមិនមែនជាការឱ្យពិតប្រាកដទេ។
សរុបមក អ្នកប្រហែលអាចទទួលបានជោគជ័យខ្លះដែរក្នុងការព្យាយាមធ្វើកិច្ចការទាំងអស់តែម្នាក់ឯង ប៉ុន្តែការពង្រីកពាណិជ្ជកម្មរបស់អ្នកឱ្យកាន់តែធំ មិនមែនជាបន្ទុកដែលអ្នកអាចរែកពុនលីទូលតែម្នាក់ឯងបានទៀតទេ។ ហេតុដូច្នេះហើយ បានជាចាំបាច់អ្នកត្រូវមានក្រុមការងារជួយគាំទ្រដល់បេសកកម្មរបស់អ្នក។ នៅពេលអ្នកមានក្រុមការងារត្រឹមត្រូវហើយ ជំហានបន្ទាប់មកទៀត គឺត្រូវលើកទឹកចិត្តក្រុមការងារឱ្យមើលឃើញតម្លៃនៃការព្យាយាមធ្វើការ និងលទ្ធផលវិជ្ជមាននៅពេលខាងមុខ។
សម្រួលពី៖ www.entrepreneur.com
អត្ថបទទាក់ទង