សាកល្បងប្រើវិធីសាស្រ្តទាំង៤នេះ នៅពេលអ្នកមានគម្រោងថ្មីដែលត្រូវធ្វើ
ជាការពិតណាស់ នៅពេលបង្កើតគម្រោងថ្មីៗ យើងត្រូវការការចូលរួមជាមតិយោបល់ និងផែនការសកម្មភាពល្អៗពីបុគ្គលិកដែលកំពុងអនុវត្តផ្ទាល់ ប៉ុន្តែអ្វីដែលអ្នកគ្រប់គ្រងទទួលបានពីបុគ្គលិកភាគច្រើននោះ គឺការរអ៊ូរទាំ ដើម្បីកុំឱ្យធ្វើសកម្មភាពថ្មី ព្រោះវាជារឿងដែលមិនអាចទៅរួច។ ពាក្យដែលបុគ្គលិកជាច្រើនលើកឡើងដូចជា ខ្ញុំធ្វើមិនកើតទេ! ដាក់តែផែនការ តែគ្មានបើកផ្លូវឱ្យ ឬ ខ្ញុំមិនចេះ មិនអាចអនុវត្តវាបានទេ! … ជាដើម តែងតែធ្វើឱ្យអ្នកគ្រប់គ្រង ម្ចាស់សហគ្រាស ឬស្ថាប័នឈឺក្បាលនៅពេលចាប់ផ្តើមគម្រោងថ្មីម្តងៗ។
បន្ថែមពីលើនេះ ប្រសិនបើអ្នកគ្រប់គ្រងជម្នះលើការគិត ហើយដាក់ផែនការឱ្យពួកគាត់ធ្វើវិញ យើងនឹងឃើញថាផែនការសកម្មភាពខ្លះ នឹងត្រូវបរាជ័យទៅវិញ ព្រោះបុគ្គលិកខ្លះចូលចិត្តមើលបញ្ហាច្រើនជាងដំណោះស្រាយ។
ដូច្នេះហើយ ដើម្បីឱ្យបុគ្គលិកក្លាយជាមនុស្សវិជ្ជមាន និងអាចចូលរួមអភិវឌ្ឍស្ថាប័នច្រើនជាងមុន អ្នកដឹកនាំគួរបង្រៀន ឬពន្យល់ឱ្យពួកគាត់ប្រើប្រាស់វិធីសាស្រ្ត ក៏ដូចជាធនធាន និងគំនិតផ្តួចផ្តើម (Resources and Initiative)។ នៅក្នុងវិធីសាស្រ្ត ធនធាន និងគំនិតផ្តួចផ្តើមនេះ លោក Stephen R. Covey អ្នកនិពន្ធសៀវភៅ ទម្លាប់ ៧ ប្រការរបស់បុគ្គលឆ្នើម (7 Habits of Highly Effective People) បានលើកឡើងលើចំណុចសំខាន់ៗចំនួន៤ ដើម្បីឱ្យយើងក្លាយជាមនុស្សសកម្ម និងសម្រេចកិច្ចការងារគ្រប់យ៉ាង បើទោះបីជាយើងមិនធ្លាប់មានបទពិសោធន៍ច្រើន ឬជារឿងថ្មីសម្រាប់យើងក៏ដោយ។ វិធីសាស្រ្តទាំង ៤ នោះរួមមាន៖
១. ចំណេះដឹង
ជាទូទៅ បើយើងទទួលគម្រោងថ្មីណាមួយ ឬចង់ធ្វើអ្វីមួយដែលមិនធ្លាប់ធ្វើសោះ យើងមិនចាំបាច់ទៅប្រកែកភ្លាមៗថា យើងធ្វើមិនបាននោះទេ តែគួរសាកល្បងស្រាវជ្រាវឱ្យអស់ពីសមត្ថភាពជាមុនសិន។ ជាទូទៅឱ្យតែយើងព្យាយាមស្រាវជ្រាវ និងឃើញរឿងល្អៗជាច្រើន ដែលយើងមិនដែលធ្លាប់ដឹងពីមុនមក ឬថាមិនត្រូវយើងអាចនឹងពង្រឹងសមត្ថភាពការងារបច្ចុប្បន្ននេះឱ្យកាន់តែខ្លាំងផងក៏ថាបាន ព្រោះគម្រោងថ្មីៗរបស់ស្ថាប័នភាគច្រើនទាក់ទងជាមួយនឹងគោលដៅសំខាន់របស់ក្រុមហ៊ុន ហើយក៏ទាក់ទងទៅនឹងអ្វីដែលយើងកំពុងធ្វើខ្លះដែរ។ ដូចនេះហើយ មុននឹងប្រកែកថាធ្វើមិនបាន គួរសាកល្បងស្រាវជ្រាវ ឬសួរគេឱ្យអស់លទ្ធភាពសិន។
២. មនុស្ស
នៅពេលយើងទទួលគម្រោងថ្មីមួយ ប្រសិនបើយើងជាមនុស្សអវិជ្ជមាន យើងនឹងអាចឈឺក្បាល បើមេដឹកនាំមិនបានពន្យល់លម្អិត ឬបង្រៀនយើងពីវិធីសាស្ត្រសម្រេចវា តែបើសិនយើងជាមនុស្សឯករាជ្យវិញ យើងនឹងយល់ថាវាជាឱកាសល្អក្នុងការបង្ហាញសមត្ថភាព។
នៅទីនេះ គឺគេចង់ឱ្យយើងប្រមូលផ្តុំមនុស្សដែលមានសមត្ថភាពមកជួយលើគម្រោងថ្មីរបស់យើង។ ជាធម្មតា ការធ្វើការងារធំៗ និងថ្មីៗមិនអាចធ្វើតែម្នាក់ឯងដោយងាយស្រួលនោះទេ តែប្រសិនបើយើងចេះប្រមូលមនុស្សខ្លាំងមកជុំវិញខ្លួនយើង នោះយើងនឹងអាចដោះស្រាយវាបានយ៉ាងងាយ ទោះជាពីមុនយើងមិនដែលធ្វើវាក៏ដោយ។
៣. ហិរញ្ញវត្ថុ
ចំណុចនេះភាគច្រើនសម្រាប់អ្នករកស៊ី តែក៏មិនមែនមិនប្រាកដថាមិនត្រូវជាមួយអ្នកធ្វើការដែរ។ គម្រោងខ្លះដែលមេដាក់ឱ្យកុំថាឡើយគំនិត ឬការណែនាំ សូម្បីតែលុយក៏គាត់មិនឱ្យដែរ។ ហេតុនេះមនុស្សជាច្រើនតែងតែយល់ថាវាជាសម្ពាធ ហើយជារឿងមិនអាចទៅរួច។ ផ្ទុយមកវិញ ប្រសិនបើយើងជាមនុស្សវិជ្ជមាន និងមានឆន្ទៈច្បាស់លាស់ក្នុងការសម្រេចរឿងគ្រប់យ៉ាងចំពោះមុខ យើងអាចប្រើប្រាស់គ្រប់វិធីដើម្បីធ្វើវាឱ្យសម្រេច។ គម្រោងខ្លះគ្មានលុយក៏អាចសម្រេចបានដែរ ប្រសិនបើយើងដឹងវិធីធ្វើ ឬវិធីប្រើគម្រោងនេះទៅបង្កើតលុយ ជាឧទាហរណ៍ប្រសិនបើគម្រោងដែលយើងកំពុងធ្វើនេះ ជាព្រឹត្តិការណ៍សង្គមណាមួយយើងអាចស្នើសុំការសហការ និងការចូលរួមថវិកាពីភាគីពាក់ព័ន្ធផ្សេងៗបាន។
ចំពោះអ្នករកស៊ីវិញក៏ដូចគ្នា មុននឹងចាប់ផ្តើមគម្រោងកុំអាលផ្តោតខ្លាំងពេកលើរឿងលុយ តែត្រូវពិចារណាលើភាពប្រាកដនិយមនិងភាពច្បាស់លាស់របស់យើងជាមុនសិន។ ប្រសិនបើគម្រោងនោះច្បាស់លាស់និងល្អពិតប្រាដកហើយ យើងអាចមានវិធីច្រើនទៀតក្នុងការរកលុយឬប្រមូលមូលនិធិពាណិជ្ជកម្ម។ ហេតុនេះធ្វើអ្វីក៏ដោយបើមិនទាន់ខំអស់សមត្ថភាពកុំទាន់បោះបង់ចោល។
៤. បច្ចេកវិទ្យា
បច្ចុប្បន្ននេះ ជាសម័យបច្ចេកវិទ្យាដែលការងារជាច្រើន មើលទៅដូចជាមិនអាចទៅរួច តែបច្ចេកវិទ្យាអាចធ្វើបាន។ហេតុនេះប្រសិនបើគិតថា ការងារដែលមេដាក់ឱ្យឬគម្រោងណាមួយជារឿងមិនអាចទៅរួច គួរសាកល្បងស្វែងរកវិធីឆ្លាតវៃក្នុងបច្ចេកវិទ្យាឱ្យអស់លទ្ធភាពសិន។ ពេលខ្លះដំណាក់កាលលំបាកនេះ អាចជាដំណាក់កាលសំខាន់ដែលធ្វើឱ្យជីវិតរបស់យើងផ្លាស់ប្តូរពីបុគ្គលធម្មតាមកជាអ្នកដែលមានសមត្ថភាពខ្លាំងជាងគេក្នុងស្ថាប័ន ដោយសារការប្រើបច្ចេកវិទ្យា។
អត្ថបទទាក់ទង