គន្លឹះសំខាន់ៗចំនួន ៥ ដើម្បីធ្វើការសម្រេចចិត្តប្រកបដោយប្រសិទ្ឋភាព
ការសម្រេចចិត្ត គឺជាការសម្រេចតាមគោលបំណងណាមួយ ល្បិចណាមួយ និងមធ្យោបាយណាមួយជាកំណត់ ដើម្បីឈានទៅសម្រេចគោលដៅណាមួយ។ នេះមានន័យថា ក្នុងចំណោមបព្វហេតុតែមួយប៉ុណ្ណោះដែលដើរតួសំខាន់បំផុត និងដើរតួជាអ្នកកំណត់។ វាក៏ជាការជ្រើសរើសជម្រើសនៅក្នុងចំណោមជម្រើសដទៃទៀតដែលអាចនាំឱ្យអ្នកទៅសម្រេចបានជាសមិទ្ធផលអ្វីមួយ ទោះបីជាតូច ឬធំក៏ដោយ។ វាជារឿងសាមញ្ញទេ ដែលមនុស្សម្នាក់ៗត្រូវប្រឈមនឹងការសម្រេចចិត្ត ក៏ប៉ុន្តែពេលខ្លះអ្នកប្រាកដជាពិបាកខ្លាំងក្នុងការសម្រេចជ្រើសយកជម្រើសដែលល្អបំផុតសម្រាប់អ្នក។ លើសពីនេះ វាកាន់តែពិបាកជាងនេះទៅទៀត នៅពេលដែលជម្រើសខ្លះមានភាពស្រដៀងគ្នាខ្លាំង ហើយអ្នកមិនចង់បាត់បង់ជម្រើសណាមួយទៀតផងនោះ។ ជាក់ស្តែង ការសម្រេចចិត្ត គឺធ្វើទៅតាមលក្ខខណ្ឌដែលបានកំណត់ ប្រសិនបើជម្រើសនោះមិនដើរស្របតាមលក្ខខណ្ឌចង់បាន អ្នកប្រាកដរំលងជម្រើសនោះចោលជាក់ជាមិនខាន។
មនុស្សគ្រប់គ្នាសប្បាយចិត្តនៅពេលដែលពួកគេសម្រេចចិត្តត្រូវ។ ប៉ុន្តែនៅពេលដែលពួកគេសម្រចចិត្តខុសម្តងៗ គឺតែងតែស្តីបន្ទោសឲ្យខ្លួនឯង ឬអ្នកដែលជួយសម្រេចចិត្តជំនួសពួកគេ។ នេះមានន័យថា ពួកគេមិនដែលចេះទទួលខុសទេ គឺទទួលយកតែអ្វីដែលត្រូវប៉ុណ្ណោះ។ តើគួរធ្វើបែបណាទើបសម្រេចចិត្តត្រូវ និងមានប្រសិទ្ធភាព? ហើយធ្វើយ៉ាងដូចម្តេចទើបពួកគេចេះទទួលយកកំហុសរបស់ខ្លួន?
១. ត្រូវគិតពិចារណាឲ្យបានស៊ីជម្រៅមុននឹងសម្រេចចិត្ត
អ្នកគួរតែគិតពិចារណា វិភាគ វែកជែករកហេតុផល គុណសម្បត្តិ និងគុណវិបត្តិឲ្យបានគ្រប់ជ្រុងជ្រោយ និងច្បាស់លាស់មុននឹងសម្រេចចិត្តធ្វើអ្វីមួយ។
២. រកប្រភពដែលអ្នកទុកចិត្តដើម្បីជួយពិគ្រោះយោបល់
ក្រៅពីគំនិតដែលអ្នកបានគិតស៊ីជម្រៅហើយនោះ អ្នកគួរតែរកមិត្តភក្តិ បងប្អូន គ្រូបង្រៀន ឬអ្នកជំនាញមកពិភាក្សាជួយផ្តល់ជាគំនិត និងយោបល់ ដើម្បីឲ្យការសម្រេចចិត្តនោះកាន់តែមានប្រិសទ្ធភាពខ្ពស់។
៣. ត្រូវមានគោលជំហរខ្លួនឯងច្បាស់លាស់
ត្រូវតែធ្វើការសម្រេចចិត្តដោយឈរលើគោលជំហររបស់ខ្លួនឯងឲ្យបានច្បាស់ ដោយមិនត្រូវធ្វើការសម្រេចចិត្តតាមអ្វីដែលអ្នកដទៃ បង្ខំ ជំរុញ ឬគំរាមកំហែងណាមួយនោះទេ។ ប៉ុន្តែអ្នកត្រូវយកគំនិតពួកគេមកពិចារណា រួចសឹមធ្វើការសម្រេចចិត្តដោយខ្លួនឯង។
៤. ធ្វើការសម្រេចចិត្តដោយមិនផ្អែកលើអារម្មណ៍
កុំសន្យានៅពេលដែលអ្នកសប្បាយចិត្ត កុំធ្វើការសម្រេចចិត្តនៅពេលដែលអ្នកកំពុងតែខឹងឬមួម៉ៅនឹងគេ។ អ្នកមិនត្រូវធ្វើការសម្រេចចិត្តដោយសារតែ ស្រឡាញ់ ចូលចិត្ត ស្អប់ដោយកំហឹងគុំកួន ឬសម្រេចចិត្តដើម្បីផលប្រយោជន៍នរណាម្នាក់ ឬក្រុមណាមួយនោះទេ។
៥. អ្នកជាអ្នកសម្រេចចិត្ត ហើយអ្នកក៏ជាអ្នកទទួលខុសត្រូវដែរ
អ្នកត្រូវតែទទួលខុសត្រូវដោយខ្លួនឯងចំពោះការគិត និងការសម្រេចចិត្តរបស់អ្នក បើទោះជាទទួលបានលទ្ធផលល្អ ឬមិនល្អយ៉ាងណាក៏ដោយ ហើយមិនត្រូវស្តីបន្ទោសខ្លួនឯង ឬនរណាម្នាក់នោះទេ ព្រោះនេះវាជាជម្រើសដែលអ្នកបានជ្រើសរើស។
អត្ថបទទាក់ទង