តើការស្រាវជ្រាវ និងអភិវឌ្ឍន៍ (R&D) គឺជាអ្វី?
ការស្រាវជ្រាវ និងអភិវឌ្ឍន៍ (Research and Developemnt – R&D) ពិតជាមានសារៈសំខាន់ណាស់សម្រាប់មនុស្សជាតិ សង្គម ពណិជ្ជកម្ម និងគ្រប់វិស័យទាំងអស់។ ជាពិសេស វាពិតជាមានសារៈសំខាន់ក្នុងការលើកតម្កើងនវានុវត្តន៍ និងភាពជាសហគ្រិននៅកម្ពុជា។
តើអ្វីទៅជាការស្រាវជ្រាវ? ការស្រាវជ្រាវគឺ បានមកពីពាក្យបង្រួមពីរ ឡើងវិញ (Re) និង ស្វែងរក (Search) តាមវចនានុក្រមបានកំណត់ថា ជាអត្ថន័យកំណត់ទុកជាមុនម្តងទៀតសាជាថ្មី ឬម្តងទៀតដោយមានប្រធានបទពិនិត្យដោយយកចិត្តទុកដាក់ធ្វើតេស្ត ឬធ្វើការស្វែងរក។
- R = Review the literature រំឮកទ្រឹស្តី
- E = Experience refiected បទពិសោធន៍ និងការឆ្លុះបញ្ចាំង
- S = Surveys ការអង្កេត
- E = Estimate, essay, and extensive analysis of data ប៉ាន់ស្មានការសាកល្បង និងវិភាគទិន្នន័យ
- A = Auditor ការធ្វើសវនកម្ម សវនករ
- R = Run the process detailed ដំណើរការដោយលម្អិត
- C = Colection of data andconclusion justified ប្រមូលទិន្នន័យ និងធ្វើការសន្និដ្ឋានដោយត្រឹមត្រូវ
- H = High ethical standards applied ប្រកបដោយបទដ្ឋានក្រមសីលធម៌ខ្ពស់
ករណីក្រុមហ៊ុនអាជីវកម្ម ការស្រាវជ្រាវ និងអភិវឌ្ឍន៍ គឺមានសារៈសំខាន់សម្រាប់ផ្តល់នូវចំណេះដឹង និងការយល់ដឹងដ៏មានឥទ្ធិពលដែលនាំឱ្យមានភាពប្រសើរឡើងដល់ដំណើរការដែលមានស្រាប់ ដែលអាចត្រូវបានបង្កើនប្រសិទ្ធភាពការផលិតទំនិញ និងសេវាកម្ម និងការកាត់បន្ថយថ្លៃផលិត។ វាក៏អនុញ្ញាតឱ្យក្រុមហ៊ុនអភិវឌ្ឍផលិតផល និងសេវាកម្មថ្មីៗ ដើម្បីឱ្យអាជីវកម្មរបស់ខ្លួនអាចរស់រាន និងលូតលាស់នៅក្នុងទីផ្សារប្រកួតប្រជែងបាន។
សហរដ្ឋអាមេរិក ចិន ឥណ្ឌា ជប៉ុន និង អាល្លឺម៉ង់ បានក្លាយជាប្រទេសនាំមុខគេ ក្នុងការចំណាយសាធារណៈខ្ពស់លើការស្រាវជ្រាវ និងអភិវឌ្ឍន៍។ សហរដ្ឋអាមេរិក បានចំណាយទឹកប្រាក់ចំនួនប្រមាណ ៦១២,៧១ ប៊ីលានដុល្លារ ដែលស្មើនឹង ៣,១% នៃផលិតផលសរុបក្នុងស្រុកនៅឆ្នាំ ២០១៩ ខណៈចិនបានចំណាយប្រាក់ប្រមាណ ៥១៤,៨០ ប៊ីលានដុល្លារ (២,២% នៃ ផ.ស.ស. ក្នុងឆ្នាំ២០១៩) និងប្រទេសអាល្លឺម៉ង់ដែលឈរលើលេខរៀងទី៥ បានចំណាយប្រាក់លើការស្រាវជ្រាវ និងអភិវឌ្ឍន៍ចំនួន ៣,២% នៃ ផ.ស.ស. ប្រចាំឆ្នាំ ឬស្មើនឹងចំនួនប្រាក់ប្រហែល ១៣១,៩៣ប៊ីលានដុល្លារ។
បេីនិយាយជារួម ប្រទេសដែលយកចិត្តទុកខ្លាំងលេីការស្រាវជ្រាវ និងអភិវឌ្ឍន៍ មិនមែនជាប្រទេសដែលមានចំណាក់ថ្នាក់នៅលើគេនោះទេ ប៉ុន្តែគឺជាប្រទេសអ៊ីស្រាអែល ដែលមានការចំណាយជាង ៤,៩% នៃផ.ស.ស ក្នុងឆ្នាំ២០១៩ (១៦,៨៨ ប៊ីលានដុល្លារ) ឈរលើលេខរៀងទី ១៩។ ប្រការនេះ ដោយសារចំណូលជាតិសរុបរបស់អ៊ីស្រាអែល មានតិចតួចជាងប្រទេសទាំងប្រាំខាងលេីឆ្ងាយ។
គេបានមេីលឃើញថា ក្រុមហ៊ុនវិទ្យាសាស្ត្រដូចជា ខាងវិស័យបច្ចេកវិទ្យា និងគ្រឿងអេឡិចត្រូនិក និងវិស័យសុខាភិបាល បានយកចិត្តទុកដាក់ខ្លាំងលេីការស្រាវជ្រាវ និងអភិវឌ្ឍន៍។ ក្រុមហ៊ុនដែលឈរលើកំពូលតារាងរួមមាន៖ Amazon, Alphabet Inc., Volkswagen Group, Samsung Electronics, Microsoft, Huawei, Intel, Apple Inc., Roche Holding, Johnson & Johnson។ Amazon ដែលជាក្រុមហ៊ុនផ្នែក Software and Internet របស់អាមេរិកបានឈរនៅលេខរៀងទី១ ក្នុងការចំណាយខ្ពស់ជាងគេលើការស្រាវជ្រាវ និងអភិវឌ្ឍន៍ ដែលមានទំហំទឹកប្រាក់ប្រមាណ ២២,៦២ ប៊ីលានដុល្លារ (តិចជាងប្រាក់ចំណូលជាតិសរុបរបស់កម្ពុជាតែជាង ៤ ប៊ីលានដុល្លារទេ) ខណៈ ក្រុមហ៊ុន Johnson & Johnson ដែលឈរលើលេខរៀងទី១០ បានចំណាយប្រាក់ប្រមាណ ១០,៥៥ ប៊ីលានដុល្លារក្នុងមួយឆ្នាំ។
ខាងលេីជាស្ថានភាពទូទៅរបស់ពិភពលោក និងការប្រកួតប្រជែងគ្នាក្នុងការស្វែងរករបបគំហើញថ្មីៗ និងផលិតផលថ្មីៗរបស់ក្រុមហ៊ុនធំៗ ប៉ុន្តែប្រទេសកំពុងអភិវឌ្ឍ ពិសេសក្រុមហ៊ុនធនតូច និងមធ្យម មិនមានទាំងប្រាក់ និងមធ្យោបាយ ដេីម្បីអភិវឌ្ឍអាជីវកម្មរបស់ពួកគេនោះទេ។
ជាទូទៅ គេបានកំណត់ការស្រាវជ្រាវ និងអភិវឌ្ឍន៍ជាបួនប្រភេទផ្សេងៗគ្នា ដូចជា៖
១. ការស្រាវជ្រាវមូលដ្ឋាន (Basic research)
វាគឺជាការសិក្សាស្រាវជ្រាវដេីម្បីស្វែងរកចំណេះដឹងថ្មីៗ ដោយយកចិត្តទុកដាក់សំខាន់លើទ្រឹស្ដី និងបទពិសោធន៏។ វាធ្វើឡើងតាមរយៈឯកសារ និងការប្រមូលផ្ដុំពត៌មានដែលពាក់ព័ន្ធ។ ឧទាហរណ៍៖ ការសិក្សារៀនសូត្រជាមួយគ្រូក្នុងថ្នាក់ ការចូលរួមសិក្ខាសាលា ឬ តាមរយៈការអាន ស្តាប់ និងឃើញ។
២. ការស្រាវជ្រាវអនុវត្ត (Applied research)
នេះគឺជាការសិក្សាស្រាវជ្រាវដេីម្បីដោះស្រាយបញ្ហាអ្វីមួយ ដែលកំពុងកើតឡើងជាក់ស្ដែង។ ឧទាហរណ៍៖ សេដ្ឋវិទូនៃក្រសួងសេដ្ឋកិច្ចកម្ពុជា កំពុងតែសិក្សាស្រាវជ្រាវអភិវឌ្ឍន៍សេដ្ឋកិច្ចកម្ពុជាក្នុងវិបត្តិកូវីដ-១៩។ ក្រុមហ៊ុន Moderna កំពុងសិក្សាស្រាវជ្រាវផលិតវ៉ាក់សាំងប្រភេទថ្មី ដើម្បីការពារពីជំងឺកូវីដបំលែងថ្មី។ ការស្រាវជ្រាវប្រភេទនេះ ត្រូវចំណាយប្រាក់ច្រើន ដើម្បីស្វែងរកគ្រប់មធ្យោបាយក្នុងការទទួលបានលទ្ធផលដែលចង់បាន។
៣. ជំនួយបច្ចេកទេស (Technical service)
វាគឺជាទម្រង់ស្រាវជ្រាវ និងអភិវឌ្ឍន៍ដែលជួយសម្របសម្រួលដល់បញ្ហាប្រឈមចំគោលដៅ។ ឧទាហរណ៍ថាក្រុមហ៊ុនវាយតម្លៃអចលនទ្រព្យមួយ បានដឹងថាមានបុគ្គលិករបស់ខ្លួន ចំនួន ៥នាក់ មិនចេះប្រើប្រាស់កម្មវិធីកុំព្យូទ័រដេីម្បីគណនាទំហំដី និងវាយតម្លៃទឹកប្រាក់ ដូច្នេះគេបានជួលគ្រូដែលមានជំនាញខាងនេះ មកបណ្ដុះបណ្ដាល ឲ្យចំនឹងអ្វីដែលអ្នកទាំង ៥ ខ្វះខាត។ ករណីជំនួយបច្ចេកទេសទៅកសិករ ទៅកម្មករកាត់ដេរក៏ដូចគ្នា និងមានឧទាហរណ៍ផ្សេងៗគ្នាជាច្រើនទៀតអាចរាប់ចូលក្នុងទម្រង់ស្រាវជ្រាវ និងអភិវឌ្ឍន៍ប្រភេទទីបួននេះ។
៤. ការអភិវឌ្ឍន៍ (Development)
ចំណុចនេះគឺជាការអភិវឌ្ឍអ្វីដែលមានស្រាប់ឲ្យល្អប្រសើរ។ ករណីដែលពួកគេពត៌មានគ្រប់គ្រាន់អំពីបញ្ហាប្រឈម និងរបៀបដោះស្រាយ។ ឧទាហរណ៍ថា ដើម្បីលេីកកម្ពស់វិស័យអប់រំនៅកម្ពុជា ក្រសួងអប់រំបានមេីលឃើញអំពីរបៀបអប់រំបែបថ្មីមួយខុសពីមុន។ ដូច្នេះដើម្បីដឹងថាទម្រង់ថ្មីនេះជោគជ័យឬទេ គេត្រូវអនុវត្តក្នុងកម្រិតតិចតួចមួយដេីម្បីដកស្រង់ពិសោធន៏ (ករណីសាលាជំនាន់ថ្មីនៅតាមវិទ្យាល័យមួយចំនួន)។ វាជាការបោះប្រាក់ធ្វើសកម្មភាពច្រើនជាងទម្រង់ទី២ និងត្រូវចំណាយពេលវេលាច្រើន។
ជាសង្ខេប ការស្រាវជ្រាវ និងអភិវឌ្ឍន៍ពិតមានសារៈសំខាន់ណាស់ ដេីម្បីស្វែងរកដំណោះស្រាយលើបញ្ហាផ្សេងៗក្នុងសង្គម និងអាជីវកម្ម ប៉ុន្តែចាំបាច់ណាស់ វាត្រូវលេីគោលការណ៍វិទ្យាសាស្ត្រ និងការពិត។
អត្ថបទទាក់ទង