រឿងខ្លី៖ នំប៉ាវ និងទ្រព្យសម្បត្តិ
មានប្ដីប្រពន្ធមួយគូ ដែលទាំងពីរនាក់ ទាំងខ្ជិល ទាំងល្មោភស៊ី ថែមទាំងជាមនុស្សលោភដូចគ្នា។ គេឈ្លោះទាស់សម្ដីគ្នា ញឹកញាប់ ដោយសារតែរឿងកំប៉ិកកំប៉ុក ដោយគ្មានអ្នកណា សុខចិត្តចាញ់អ្នកណាសោះឡេីយ។
ថ្ងៃមួយគេទិញនំប៉ាវបី មកហូប គេហូបអស់ម្នាក់មួយ នៅសល់មួយចុងក្រោយ គេមិនទាន់ហ៊ានលូកទេ។
គេអង្គុយសំឡឹងនំប៉ាវចុងក្រោយនេះ យ៉ាងយូរ…
ប្ដីក៏គិតឃេីញវិធីមួយ “ឥឡូវនេះ យេីងភ្នាល់គ្នា អ្នកណាហារមាត់និយាយមុន ឬក្រោកមុន អ្នកនោះអត់បានស៊ីនំ ដែលនៅសល់នេះទេ។”
ប្រពន្ធឆ្លេីយ “អឺ! ភ្នាល់ក៏ភ្នាល់ យេីងចាំតែចាញ់ឯងតេី!”
ពួកគេអង្គុយចាំរៀងៗខ្លួន មិនមាត់មិនក រហូតដល់ថ្ងៃលិច នៅតែមិនដឹងចាញ់ឈ្នះ។
ពេលនោះ មានចោរម្នាក់កំពុងដេីររកលួចអីវ៉ាន់ វាឃេីញផ្ទះស្ងាត់ជ្រងំ ដោយគិតថាគ្មានគេនៅ វាក៏រុញទ្វារចូល ហេីយដេីរលបៗ ដល់ក្នុងផ្ទះ ឃេីញមនុស្សពីរនាក់ អង្គុយទល់មុខគ្នា។ វាភ្ញាក់ព្រេីតប្រុងនឹងរត់ចេញ តែវាឃេីញមនុស្សទាំងពីរនាក់ មិននិយាយស្ដី មិនកម្រេីក គ្រាន់តែសម្លឹងមុខគ្នា។
ដេីម្បីកុំឱ្យខាតពេល ចោរចាប់ផ្ដេីមប្រមូលយកអីវ៉ាន់បណ្ដេីរៗ ហេីយងាកមេីលទៅមនុស្សទាំងពីរមិនមានប្រតិកម្មអ្វីទាំងអស់ ចោរគិតថាអ្នកទាំងពីរ ច្បាស់ជាមនុស្សខ្វិន និងគ ហេីយ ដូច្នេះវាក៏ប្រមូលយកតែរបស់របរណាដែលល្អៗនិងមានតម្លៃប្រសេីរជាង។
ទាំងពីរនាក់ប្ដីប្រពន្ធ ខំសម្លឹងនឹកស្ដាយទ្រព្យសម្បត្តិ តែគ្មានអ្នកណាហ៊ានហេីបមាត់ឬកម្រេីកអ្វីសោះ ព្រោះខ្លាចចាញ់។
មុននឹងចេញទៅវិញ ចោរពិនិត្យឃេីញនាងជាភរិយា ដូចជាស្រស់ស្អាតគ្រាន់បើ វាក៏ឆ្លៀតឱកាស ចូលមកស្ទាបអង្អែលលេងសេីច។ បុរសជាប្ដី សំងំស្ងៀមគ្មានកម្រេីក។ ប្រពន្ធទ្រាំលែងបាន ក៏ងេីបស្ទុះភ្លែតស្រែកខ្លាំងៗថា “លឿនមក ជួយចាប់ចោរ! ឯងនេះ ល្ងេីមែន! គ្រាន់តែនំមួយសោះ សូម្បីតែចោរចូលផ្ទះ ក៏គ្មានហ៊ានមាត់មួយអ៊ឺះ!
ប្ដីឃេីញប្រពន្ធបេីកមាត់និយាយ ក៏សប្បាយចិត្តយ៉ាងខ្លាំង គេចាប់យកនំមកស៊ី ហេីយនិយាយថា “ហ៊ែះហ៊ែ! ទីបំផុតឯងចាញ់យេីងហេីយ! អញដឹងថាអញមុខតែឈ្នះ!
គតិអប់រំ៖ ត្រូវចេះថ្លឹងថ្លែង រឿងតូចរឿងធំ រឿងចាំបាច់ និងមិនចាំបាច់។ រឿងខ្លះ ឈ្នះចាញ់ហេីយ នាំមកតែការខាតបង់ទៅវិញ។