រឿងខ្លី៖ បុរសជនជាតិអារ៉ាប់ និងសត្វអូដ្ឋ

កាលពីព្រេងនាយ មានបុរសជនជាតិអារ៉ាប់ និងសត្វអូដ្ឋ បានធ្វើដំណើរឆ្លងកាត់វាលខ្សាច់​ដ៏ធំ​ល្វឹង​ល្វើយ​។ ពេលយប់ អាកាសធាតុចុះត្រជាក់ខ្លាំង ហើយ​បុរសជនជាតិអារ៉ាប់នោះ ក៏បានចូលគេងក្នុងតង់ ដោយទុកឲ្យសត្វអូដ្ឋដេកនៅខាងក្រៅ។

ដល់ពេលយប់កាន់តែជ្រៅ  អាកាសធាតុកាន់តែត្រជាក់ខ្លាំងឡើងៗ ហើយសត្វអូដ្ឋក៏​អើតក្បាល​ចូលទៅ​ក្នុង​តង់ម្ចាស់ខ្លួន រួចសួរ៖ “តើខ្ញុំអាចសុំដេក ដោយគ្រាន់តែដាក់ក្បាលចូលក្នុងតង់នេះបានទេ?” ម្ចាស់វាក៏យល់ព្រម។ លុះបន្តិចមកទៀត សត្វអូដ្ឋក៏សុំម្ចាស់ម្តងទៀតដោយសុំដាក់កចូលថែមទៀត ពីព្រោះ​កាន់តែ​ត្រជាក់​ខ្លាំង ហើយម្ចាស់ក៏មិនថាអីដែរ។ ក្រោយមកទៀត សត្វអូដ្ឋក៏សុំដាក់ខ្លួន​ចូលថែម​ទៀត ហើយម្ចាស់ក៏​ព្រមតាមសំណើ។

ដោយសារតែតង់នោះតូច មិនអាចផ្ទុកខ្លួនសត្វអូដ្ឋដ៏ធំ និងម្ចាស់វាបានឡើយ។ សត្វអូដ្ឋ បានទទួល​ភាព​កក់ក្តៅយ៉ាងខ្លាំង និងដោយសារចេះតែសុំម្ចាស់បាន វាបានស្នើសុំឲ្យម្ចាស់ចេញដេកខាងក្រៅ  ពីព្រោះ​វាពិបាកដេកណាស់។ ឮការស្នើសុំដូចនេះ ម្ចាស់ក៏កើតក្តីខឹងក្រោធឡើង រួចក៏បណ្តេញសត្វអូដ្ឋ​ថ្លើមធំនោះចេញក្រៅវិញ ធ្វើឲ្យវារងអាកាសធាតុត្រជាក់ម្តងទៀត។

គតិអប់រំក្នុងរឿងនេះ គឺមុនពេលយើងសម្រេចចិត្តឲ្យនរណាម្នាក់ ឬអ្វីមួយចូលទៅ ក្នុងជីវិត​របស់​យើង​ត្រូវគិតឲ្យបានច្បាស់។ ការអនុញ្ញាតឲ្យសភាវៈ​​អាក្រក់ ដូចជាទម្លាប់អាក្រក់ ការគិត​អវិជ្ជមាន​​ជាដើម តែងតែនាំមកនូវក្តីអំពល់ និង​អាចរុញច្រានយើងធ្លាក់ទៅក្នុង​គ្រោះភ័យជា​មិនខាន។


អត្ថបទទាក់ទង

រឿងខ្លី៖ ឃ្មុំ និងអាទិទេព

 

Leave a Reply

Your email address will not be published.