រឿងខ្លី៖ ក្រពើ​ចង់​ស៊ី​បេះដូង​ស្វា អានហើយកាលណា អ្នកអាចពិចារណាមិនឲ្យចាញ់បោកគេទាំងក្នុងការងារ និងការរកស៊ី

កាលពីព្រេងនាយ​មាន​ស្វា​មួយ​អាស្រ័យ​លើ​ដើម​ប្រប​មាត់​ស្ទឹង​។​ ​ដោយហេតុ​តែ​ចង់​ស៊ី​បេះដូង​ស្វា​ ​ក្រពើ​ដែល​រស់នៅ​ក្នុង​ស្ទឹង​នោះ​បាន​ហែល​មក​ក្បែរ​ ​ហើយ​និយាយ​ល្បួង​ស្វា​ថា​ ​តើ​បង​ស្វា​ឯង​ចង់​ទៅលេង​កោះ​អណ្ដែត​កណ្ដាល​ស្ទឹង​ដែរ​ទេ​?

​ស្វា​ដែល​មានចិត្តចង់​ទៅ​លែង​ផង​នោះ​ ​ក៏​យល់ព្រម​ ​ដោយ​ឡើងជិះ​លើ​ខ្នងក្រពើ​។​ ​ខណៈនោះ​ ​ក្រពើ​បាន​ពណ៌នា​អំពី​រឿង​នេះ​ ​រឿង​នោះ​ប្រាប់​ស្វា​ ​រហូត​ទៅដល់​ពាក់កណ្ដាល​ស្ទឹង​ ​ក្រពើ​សួរ​ស្វា​ថា​ ​តើ​បង​ឯង​មាន​បេះដូង​ទេ​ ​ខ្ញុំ​ចង់បាន​បេះដូង​របស់​បង​ស្វា​ឯង​ធ្វើជា​ថ្នាំ​ព្យាបាល​ជំងឺ​ខ្ញុំ​?

​ឮ​ដូចនេះ​ ​ស្វា​គិតក្នុងចិត្ត​ថា​ ​យីអើ​! ​អាក្រពើ​នេះ​ចង់​ស៊ី​អញ​ទេតើ​។​ ​គិត​ហើយ​ ​ស្វាត​ប​ទៅវិញ​ថា​ ​អូ​! ​បង​ក្រពើ​ ​បេះដូង​ខ្ញុំ​ទុក​នៅនឹង​ចុងឈើ​មិនបាន​យកមក​តាម​ខ្លួន​ទេ​ ​បើ​បង​ចង់បាន​បេះដូង​ខ្ញុំ​ ​ចូរ​បង​ជូន​ខ្ញុំ​ត្រឡប់ទៅ​ដើមឈើ​នោះ​វិញ​ ​ខ្ញុំ​នឹង​យក​បេះដូង​ខ្ញុំ​ជូន​បង​ធ្វើជា​ថ្នាំ​ព្យាបាល​ជំងឺ​។​ ​គ្រាន់តែ​ទៅ​ជិតដល់​ត្រើយ​ ​ស្វា​ក៏​លោត​ឡើងដើមឈើ​នោះ​បាត់​ទៅ​។​

​រឿង​នេះ​បានជា​គតិ​ថា​ ​អំពើល្អ​របស់​មនុស្ស​យង់ឃ្នង​មិន​ប្រា​ដ​កថា​ ​ជា​អំពើល្អ​ពិតប្រាកដ​ឡើយ​។​ ​មូលហេតុ​ដែល​មនុស្ស​ប្រភេទ​នេះ​ធ្វើល្អ​ ​ព្រោះ​គេ​តែ​បាន​សម្លឹង​ឃើញ​ផលប្រយោជន៍​ពី​យើង​។​ ​ជួនកាល​អំពើល្អ​នោះ​អាច​ជា​ធ្នាក់​ទាក់​ប្រយោជន៍​ពី​យើង​ផង​ក៏​ថា​បាន​។​ ​នៅ​ក្នុង​សង្គម​ជាក់ស្ដែង​រឿង​បែប​នេះ​មិនខ្វះទេ​ ​ដែលគេ​ប្រើ​ស្រីស្រស់​ទាក់​ស្នេហ៍​ ​យក​ប្រាក់​ជានុ​យ​ទាក់ចិត្ត​ជាដើម​ ​ហើយ​នៅទីបញ្ចប់​គេ​ស្រូប​យក​ទៅវិញ​ស្ទើរតែ​លិចលង់​បាត់បង់​គ្រប់បែបយ៉ាង​។​

​ម្យ៉ាង​នៅ​ក្នុង​រឿង​ដដែល​នេះ​ ​ក៏មាន​បង្កប់​អត្ថន័យ​មួយ​គួរ​យកមក​ពិចារណា​ផង​ដែរ​ ​នោះ​គឺ​អ្វី​ដែល​ស្ដែង​ឡើង​តាមរយៈ​តួអង្គ​ស្វា​បាន​ឱ្យ​ឃើញ​ថា​ ​ការ​មាន​ប្រាជ្ញា​ ​ការ​ដឹង​ឧបាយ​សត្រូវ​ ​និង​អាច​​​រក​ល្បិច​តប​តយ​ក​រួចខ្លួន​វិញ​ភ្លាម​ៗ​ដោយ​ជោគជ័យ​ ​ជា​ឧបាយ​មិន​ចំណាយ​កម្លាំង​។

ដកស្រង់ចេញពីទស្សនាវដ្ដី​រឿងព្រេង​ខ្មែរ​ថ្មី​ នៃ​ពុទ្ធសាសនបណ្ឌិត្យ


អត្ថបទទាក់ទង

រឿងខ្លី៖ អ្នកលក់ប៊ឺ និងអ្នកដុតនំ ផ្តល់អត្ថន័យទាក់ទងនឹងភាពស្មោះត្រង់

 

Leave a Reply