អាថ៌កំបាំងចំនួន ៣ សម្រាប់ពង្រឹងភាពខ្លាំខាងផ្លូវចិត្តរបស់អ្នក
យើងភាគច្រើនយល់ដឹងអំពីរបៀបសាងភាពខ្លាំងនៃរាងកាយ ប៉ុន្តែមានមនុស្សជាច្រើនមានការភាន់ច្រឡំ អំពីជំហានដើម្បីឈានទៅរកការសាងភាពខ្លាំងនៃចិត្ត។ ក្នុងចំណោមវិធីសាស្រ្តជាច្រើនក្នុងការពង្រឹងផ្លូវចិត្ត មានអាថ៌កំបាំងចំនួន ៣ ដែលអ្នកត្រូវយល់ដឹង៖
១. និយាយជាមួយខ្លួនឯងដូចជាមិត្តដ៏គួរឲ្យទុកចិត្តម្នាក់ (Talk to Your Yourself Like a Trusted Friend)
អ្នកវិទ្យាសាស្រ្ត បានរកឃើញថា មនុស្សយើងមានការគិត ៧ម៉ឺនដង ក្នុង១ថ្ងៃ។ វាមានន័យថា អ្នកមាន ៧ម៉ឺនឱកាស សម្រាប់១ថ្ងៃ ក្នុងការធ្វើឲ្យចិត្តរបស់អ្នកខ្លាំង ឬចុះខ្សោយ។
ការគិតរបស់អ្នក មានឥទ្ធិពលធំធេងខ្លាំងណាស់ទៅលើអារម្មណ៍ និងអាកប្បកិរិយារបស់អ្នក។ អ្វីៗក្នុងខ្លួនអ្នក នឹងមានដំណើរការឆ្ពោះទៅរកការគិតរបស់អ្នក។ ឧទាហរណ៍ ការគិតថា “ខ្ញុំនឹងមិនអាចប្រលងជាប់ការងារនេះទេ” ឬ “គ្មាននរណាមួយនឹងស្តាប់ខ្ញុំទេ” នឹងមានឥទ្ធិពលលើអកប្បកិរិយារបស់អ្នកនៅក្នុងផ្លូវមួយ ដែលអ្នកនឹងទទួលបានផលបែបនេះ។
ចូរចាប់ផ្តើមអនុវត្ត ដោយផ្លាស់ប្តូរការគិតបែបអវិជ្ជមានចេញ ដោយជំនួសមកវិញនូវការគិតបែបវិជ្ជមានជាមួយភាពជាក់ស្តែង។ នៅពេលដែលអ្នកដឹងខ្លួនថា អ្នកកំពុងគិតថា “ខ្ញុំនឹងចាញ់ ឬ ខ្ញុំគ្មានតម្លៃទេ” ចូរប្រាប់ខ្លួនអ្នកថា ការគិតនេះ គឺមិនត្រឹមត្រូវនោះទេ។
ចូរអនុវត្តដោយសួរខ្លួនឯងថា “ខ្ញុំនឹងនិយាយប្រាប់មិត្តរបស់ខ្ញុំថាម៉េច ប្រសិនបើគាត់គិត និងនិយាយបែបអវិជ្ជមានចំពោះខ្លួនគាត់។” បន្ទាប់មក ចូរនិយាយពាក្យពីរោះលួងលោម និងលើកទឹកចិត្តបែបនេះចំពោះខ្លួនឯង។
២. គ្រប់គ្រងអារម្មណ៍របស់អ្នក (Take a Charge of Your Emotions)
ការបណ្តោយឲ្យអារម្មណ៍របស់អ្នកមកគ្រប់គ្រងជីវិតរបស់អ្នក វានឹងបំផ្លាញភាពខ្លាំងខាងផ្លូវចិត្តរបស់អ្នក។ ខណ:ពេលដែលវាជារឿងធម្មតាដែលយើងមានអារម្មណ៍មិនល្អម្តងម្កាល ប៉ុន្តែការស្ថិតនៅជាមួយគំនិតអវិជ្ជមាន វាដូចជាការដែលកំពុងចុះចំណោតមួយដែលរអិលខ្លាំងអញ្ចឹង – សេចក្ក្តីតីទុក្ខព្រួយ នាំទៅរកការសោកសង្រេងអាណិតអាសូរខ្លួនឯង កំហឹងនាំទៅរកការឈឺចាប់ និងការថប់អារម្មណ៍នឹងនាំទៅរកភាពភ័យខ្លាច។
បញ្ហាមួយចំនួនធំ កើតចេញពីសេចក្តីប្រាថ្នាបញ្ចៀសការលំបាក។ ជាឧទាហរណ៍ មនុស្សដែលខ្លាចបរាជ័យ តែងតែបោះបង់ការប្រឈមថ្មីៗក្នុងក្តីបំណងបញ្ចៀសក្តីកង្វល់។ ការបញ្ចៀសការលំបាកផ្លូវអារម្មណ៍ វាជាដំណោះស្រាយរយៈពេលខ្លី តែនឹងនាំអ្នកទៅជួបបញ្ហាក្នុងរយៈពេលវែង។
ការយល់ដឹងថា តើអារម្មណ៍របស់អ្នកនឹងមានឥទ្ធិពលលើជីវិតរបស់អ្នកយ៉ាងណា នឹងជួយអ្នកឲ្យចេះគ្រប់គ្រងអារម្មណ៍របស់អ្នក ជាជាងការបណ្តោយឲ្យអារម្មណ៍របស់អ្នកគ្រប់គ្រងជីវិតរបស់អ្នក។ ចូរប្រឈមនឹងអារម្មណ៍លំបាកទំាងឡាយ និងចាប់ផ្តើមគ្រប់គ្រងជីវិតរបស់អ្នក។ នៅពេលដែលអ្នកអាចប្រឈមនឹងភាពលំបាកផ្លូវអារម្មណ៍បានកាន់តែច្រើន អ្នកនឹងពង្រឹងជំនឿជឿជាក់ក្នុងការទទួលយកបញ្ហាប្រឈមថ្មីៗបានកាន់តែច្រើនផងដែរ។
៣. ចូរធ្វើការបង្កើតជម្រើសដែលមានប្រយោជន៍ (Make a Productive Choice)
វាមិនអាចទៅរួចទេ ក្នុងការពង្រឹងចិត្តរបស់អ្នក នៅពេលដែលអ្នកប្រព្រឹត្តអាកប្បកិរិយាដែលបំផ្លាញខ្លួនឯង។ មនុស្សមួយចំនួន មានទម្លាប់មិនល្អ ហើយបញ្ចេញមកតាមរយៈអាកប្បកិរិយាអវិជ្ជមានជាទៀងទាត់ ក្នុងការនិយាយស្តី និងទង្វើរបស់ខ្លួន។ ទង្វើទាំងនោះ មើលទៅតូចតាច ដូចជាការរអ៊ូរទាំអំពីប្រធានរបស់អ្នក ចូលចិត្តនិយាយអំពីទុក្ខព្រួយ និយាយដើមអ្នកដទៃ ឬការខំប្រឹងបំពេញចិត្តអ្នកដទៃគ្រប់គ្នា ក៏ប៉ុន្តែវាកំពុងតែបំផ្លាញស្ថានភាពចិត្តអ្នកឲ្យចុះខ្សោយ។ នៅពេលអ្នកបន្តប្រតិបត្តិទម្លាប់មិនល្អទាំងនេះ វានឹងមិនជួយឲ្យចិត្តរបស់អ្នករឹងមាំទេ តែធ្វើឲ្យចិត្តអ្នកទន់ខ្សោយទៅវិញ។
នៅក្នុងមួយជីវិតអ្នក អ្នកមានពេលវេលា និងថាមពលមិនច្រើនទេ។ បើអ្នកប្រើប្រាស់វាខុស វានឹងធ្វើឲ្យចិត្តអ្នកកាន់តែខ្សោយ ហើយអ្នកកាន់តែធ្វើដំណើរចេញឆ្ងាយពីគោលដៅរបស់អ្នក។
ចូរសាងភាពខ្លាំងខាងផ្លូវចិត្តរបស់អ្នក
យើងទាំងអស់គ្នា សុទ្ធតែមានសមត្ថភាពក្នុងការពង្រឹងចិត្តរបស់យើង ប៉ុន្តែវាមិនខុសគ្នាពីការហាត់លើកសាច់ដុំរបស់យើងនោះទេ ការពង្រឹងចិត្តរបស់យើងត្រូវការការប្តេជ្ញាចិត្ត និងការតស៊ូយ៉ាងស្វិតស្វាញ។ ជាមួយនឹងការអនុវត្ត អ្នកនឹងបង្កើនសមត្ថភាពរបស់អ្នក ក្នុងការគ្រប់គ្រងការគិត គ្រប់គ្រងអារម្មណ៍ និងមានអាកប្បកិរិយាល្អ ទោះស្ថិតក្នុងស្ថានភាពណាក៏ដោយ។ ការចេះបត់បែននឹងបញ្ហាលំបាកដោយភាពអត់ធ្មត់ គឺជាគន្លឹះដ៏សំខាន់ដើម្បីឈានទៅដល់ការសម្រេចសក្តានុពលក្នុងជីវិតរបស់អ្នក។ មិនថាគោលដៅរបស់អ្នកវចង់ក្លាយជាអត្តពលិកដ៏ខ្លាំងពូកែ ឬក្លាយជាឪពុកម្តាយដែលពោរពេញដោយភាពអត់ធ្មត់សណ្តោសប្រណី ភាពខ្លាំងខាងផ្លូវចិត្ត នឹងជួយអ្នកក្នុងការសម្រេចគោលដៅជីវិត។
ប្រភព៖ Amy Morin, in the Psychology Today, “3 Secrets to Build Your Mental Strength”
អត្ថបទទាក់ទង
One thought on “អាថ៌កំបាំងចំនួន ៣ សម្រាប់ពង្រឹងភាពខ្លាំខាងផ្លូវចិត្តរបស់អ្នក”