តើធ្វើយ៉ាងណាក្លាយជាសមាជិកស្នូលនៅក្នុងក្រុម?
ការងារជាក្រុមជារឿងធំ។ សមត្ថភាពការងារជាក្រុម នាំឲ្យអ្នកបរាជ័យ ឬជោគជ័យ ពេលវ័យលើសពី៤០ឆ្នាំ។ ពេលនោះអ្នកចាំបាច់ក្លាយជា ទី១ អ្នកជំនាញ (ទីប្រឹក្សា គ្រូបង្រៀនអាជីពណាមួយ ឬ អ្នកពិគ្រោះយោបល់) ទីពីរ ក្លាយជាមេដឹកនាំ (អ្នកគ្រប់គ្រង ម្ចាស់ក្រុមហ៊ុន អ្នកនាំមុខគម្រោងណាមួយ ។ល។)។ ពុំនោះទេ អ្នកនឹងក្លាយជាបុគ្គលិកដដែលដែលមានយុវវ័យក្មេងជាងមកគ្រប់គ្រងពីលើ។
ពេលធ្វើជាបុគ្គលិក លោកអ្នកតែងតែគិតថា លោកអ្នកធ្វើតែកិច្ចការណាដែលគេប្រាប់ឱ្យធ្វើប៉ុណ្ណោះ ហើយក៏មើលមិនឃើញចំណេះដឹងរបស់ខ្លួនឯងថាមានតម្លៃអ្វីដែរ។ ផ្នត់គំនិតរបស់បុគ្គលិកមិនអាចប្រជែងនឹងថ្នាក់ដឹកនាំ ឬសមាជិកក្រុមការងារផ្សេងទៀតឱ្យពង្រឹង ឬបង្កើតថ្មីក្នុងការងារទេ។ ប៉ុន្តែនៅពេលលោកអ្នកមានផ្នែកគំនិតជាមុខមាត់របស់ក្រុមហ៊ុនវិញ លោកអ្នកនឹងគិតដល់ជំនាញ និងចំណេះដឹងរបស់ខ្លួនឯង ដូចជាផលិតផល ឬសេវាកម្មដែរ។
នៅក្នុងពិភពវិជ្ជាជីវៈ លោកអ្នកត្រូវធ្វើការ និងផ្តល់ជូនជំនាញ និងបទពិសោធន៍ ដែលគ្មាននរណាផ្សេងទៀតផ្តល់ជូន។ មនុស្សដែលមានផ្នត់គំនិតធ្វើជាមុខមាត់របស់ក្រុមហ៊ុន តែងតែគិតគូរដល់ខ្លួនឯង និងក្រុមហ៊ុនគ្រប់ពេលដែលគេធ្វើការ និងប្រាស្រ័យទាក់ទងជាមួយអ្នកដទៃដើម្បីបង្កើនចំណេះដឹង។
ទាក់ទងអ្វីនឹងការងារជាក្រុម? គ្រប់អង្គការ ក្រុមហ៊ុន គម្រោង ពាណិជ្ជកម្ម នយោបាយ ទាំងអស់នេះពឹងផ្អែកលើក្រុមល្អមួយ។ សមត្ថភាពធ្វើការជាក្រុមប្រកបដោយប្រសិទ្ធភាព ក្រៅពីជួយជំរុញឲ្យស្ថាប័នឆ្ពោះទៅរកភាពជោគជ័យ ថែមទាំងនាំអ្នកណាម្នាក់ដែលជាមនុស្សសំខាន់ (Key Player) មានគុណសម្បត្ដិលេចធ្លោឆ្ពោះទៅរកតួនាទីទំាងពីរខាងលើនៅក្រោយវ័យ៤០ឆ្នាំ។
តើធ្វើយ៉ាងណាក្លាយជាសមាជិកស្នូល (Key Player)?
តាំងពីចេញធ្វើការដំបូង តូចតាចប៉ុណ្ណាក្តី មនុស្សនេះ តែងបង្ហាញការប្ដេជ្ញាចិត្តពិតប្រាកដ ធ្វើជាអ្នកលេងធំប្រចាំក្រុម ច្បាស់លាស់ចំពោះបុព្វហេតុរបស់ពួកគេ។ អ្នកលេងម្នាក់នេះ តែងចង់ឲ្យក្រុមបានល្អ អាចបរិច្ចាគពេលវេលាចាំបាច់ ធ្វើការលើសកាលវិភាគ ចូលរួមវិភាគទានទឹកចិត្ត ជួយក្រុម តាមដែលអាចធ្វើទៅបាន ហើយអ្វីដែលពួកគេចង់ឃើញ គឺឧត្ដមភាព។
មនុស្សនេះ ពូកែបត់បែន ជំនួសឲ្យការអង្គុយលេងមួយកន្លែង ពួកគេមានសភាពដូចជាកីឡាករបម្រុង ឈរមើលក្រុមលេងដោយម៉ត់ចត់ ពួកគេរកឃើញបញ្ហា ចូលរួមកំណត់ និងដោះស្រាយការប្រឈម ដោយមិនបង្ហាញសញ្ញាស្ត្រេស ឬសម្ពាធងាយឡើយ។
មនុស្សនេះ មិនពូកែលើការងារដដែលៗ ដែលគ្រាន់តែអង្គុយស្ងៀម ហើយសម្រេចកិច្ចការរបស់ខ្លួនទេ ពួកគេជាមនុស្សឆាប់ធុញ ហើយមិនដេកលក់ក្នុងជោគជ័យឡើយ។ គេតែងសាកល្បងខ្លួនឯងជាមួយរឿងពិបាកៗ ចូលរួមជាមួយអ្នកដទៃ ដរាបណាដែលមានសំណួរ ហើយចម្លើយមិនទាន់មានគេបំបែកបាន។ មិត្តរួមក្រុមដែលបានដឹង នឹងជញ្ជក់មាត់លួចស្ងើចសរសើរពីភាពភ្លឺស្វាង និងសកម្មក្លៀវក្លារបស់គេ។
មនុស្សនេះ មានភាពជឿជាក់ និងស្មារតីទទួលខុសត្រូវឲ្យអ្នកផ្សេងអាចទុកចិត្តបាន និងចេះកំណត់គោលដៅត្រឹមត្រូវ សមហេតុផល និងតថភាព។
ពួកគេជាអ្នកពូកែស្តាប់ដោយសកម្ម មានន័យថា គេតែងចំណាយពេលគិតពីទស្សនៈរបស់អ្នកផ្សេង ពិចារណាលើគំនិតរបស់មនុស្សដទៃទៀត ជាមូលហេតុដែលក្រុមចម្រុះកាន់តែមានសក្តានុពលខ្លាំងឡើងៗ ជាមួយការសម្របសម្រួលរបស់គេ។
មនុស្សនេះ កើតមកជាមួយចរិតត្រៀមខ្លួនជានិច្ចដើម្បីជួយ។ ពួកគេមានទឹកចិត្តល្អក្នុងលការចង្អុលបង្ហាញ ឬប្រាប់គន្លឹះដោយគ្មានលាក់លៀម ដើម្បីជួយសមាជិកក្រុម និងចេះអភ័យទោសមិនប្រកែប្រកាន់ ចេះធ្វើការជាមួយមនុស្សគ្រប់ប្រភេទ។
មនុស្សនេះ តែងតែមានគំនិតចង់គាំទ្រ និងផ្តល់ការគោរពដល់អ្នកដទៃ គេមិនដែលមិនចង់បិទមតិនរណាម្នាក់ពីក្នុងក្រុមទេ ឃើញអ្នកណាម្នាក់កាន់តែទន់ខ្សោយ គេកាន់តែចាប់យកមកធ្វើការជាមួយ ហើយកែប្រែ។
មនុស្សនេះ ចេះទទួលស្គាល់នៅពេលខ្លួនធ្វើខុស មិនមែនភ័យរត់ចោលកំហុស ហើយរុញទៅឲ្យអ្នកដទៃឡើយ។ មិនតែប៉ុណ្ណោះ គេក៏តែងតែជាអ្នកដោះស្រាយបញ្ហាយ៉ាងចំណាប់ផងដែរ។
មនុស្សពូកែជាច្រើន ធ្វើការធ្ងន់រហូតដល់ថ្ងៃស្លាប់ ព្រោះគេមិនចេះដោះស្រាយបញ្ហា ចេះតែឈ្ងោកមុខធ្វើការតែម្យ៉ាងប៉ុណ្ណោះ ហើយអន់ចិត្តពេលដែលមិនមានការលើកតម្កើងឲ្យធ្វើមេក្រុមបាន ឬ បានធ្វើហើយទៅមិនរួច។
អត្ថបទទាក់ទង