វីធីសាស្រ្ត ៨ យ៉ាង ដើម្បីបង្កើនភាពជឿជាក់របស់អ្នក

មនុស្ស​ដែល​ជោគជ័យ​នៅក្នុង​ជីវិត គឺ​សុទ្ធតែ​កើត​មកពី​សកម្មភាព​ប្រចាំថ្ងៃ ដែល​ពួកគេ​ខំតស៊ូ​ប្រឹងប្រែង និង​ព្យាយាម​នាពេល​កន្លងមក និង​នៅពេល​បច្ចុប្បន្ន។ ពួកគេ​ខំតស៊ូ និង​ព្យាយាម​យ៉ាង​ដូច្នេះ ព្រោះ​ពួកគេម្នាក់ៗមាន​ជំនឿ​លើ​ខ្លួនឯង​ថា ការជឿជាក់​លើ​ខ្លួនឯង គឺជា​កម្លាំងចិត្ត​ដ៏​មាន​ប្រសិទ្ធភាព​បំផុត​សម្រាប់​ទម្លុះ​រនាំង​ជីវិត ដែល​តែងតែ​រារាំង​ពួកគេ មិន​ឲ្យ​ឈានទៅដល់​ភាពជោគជ័យ និង​មិនអាច​សម្រេច​គោលដៅ​នៅក្នុង​ជីវិត​បាន។ នេះ​មានន័យថា ដរាបណា​អ្នក​នៅមាន​ជំនឿ​លើ​ខ្លួនឯង នោះ​ក្តីសង្ឃឹម​សម្រាប់​ភាពជោគជ័យ​នៅតែមាន​ជានិច្ច។

បុគ្គលជោគជ័យ តែងតែបង្ហាញពីភាពជឿជាក់របស់ខ្លួន។ វាច្បាស់ណាស់ថាពួកគេជឿជាក់លើខ្លួនឯង និងអ្វីដែលពួកគេកំពុងធ្វើ។ ផ្ទុយទៅវិញ វាមិនមែនជាជោគជ័យរបស់ពួកគេទេដែលធ្វើឲ្យពួកគេភាពជឿជាក់។ ភាពជឿជាក់ គឺកើតមុនដំបូងគេ។

សូមគិតអំពីវាបន្តិច៖

  • ១. ភាពមានមន្ទិលបណ្តុះ​ភាពមន្ទិល

តើឲ្យមនុស្សរាល់គ្នាជឿជាក់លើអ្នក គំនិតរបស់អ្នក ឬក៏សមត្ថភាពរបស់អ្នកយ៉ាងម៉េច បើអ្នកមិន​បានជឿលើពួកវាខ្លួនឯងនោះ?

  • ២. វាត្រូវការភាពជឿជាក់ដើម្បីឈានទៅកាន់បញ្ហាប្រឈមថ្មី

បុគ្គលដែលមានភាពភ័យខ្លាចនិងគ្មានសុវត្ថិភាពងាយនឹង​ស្ថិតនៅក្នុងតំបន់សុខស្រួល (comfort zone) របស់ខ្លួន។ ប៉ុន្តែ​តំបន់​​សុខស្រួលកម្រនឹងពង្រឹកដែនដោយខ្លួនឯងណាស់។ អាស្រ័យហេតុនេះហើយ បុគ្គលដែលខ្វះភាពជឿជាក់ជាប់នៅក្នុងការងារដែល​គ្មាន​ការ​រីកចម្រើន និងបណ្តោយឲ្យឳកាសគន្លងផុតទៅដោយមិនដឹងខ្លួន។

  • ៣. បុគ្គលគ្មានភាពជឿជាក់ តែងតែស្ថិតនៅក្រោមការត្រួតត្រានៃស្ថានភាពខាងក្រៅ

បុគ្គលជោគជ័យមិនត្រូវបានរារាំងដោយឧបសគ្គ ដែលជាវិធីដែលពួកគេងើបឈរឡើងតាំងពីដំបូង។

គ្មានអ្នកណាម្នាក់ រារាំងអ្នកពីអ្វីដែលអ្នកចង់សម្រេចបានក្រៅពីខ្លួនអ្នកនោះទេ។ ដល់ពេលបំបាត់រនាំងនៃមន្ទិលសង្ស័យលើខ្លួនឯង​ហើយ។

ភាពជឿជាក់ ជាមូលដ្ឋានដ៏សំខាន់នៅក្នុងអជីពជោគជ័យ​ ហើយការទទួលយកវាពេញលេញនឹងនាំអ្នកទៅកាន់កន្លែងដែល​អ្នកមិន​ដែល​​គិត​​ថាអាច​​ទៅរួច។ ជាមួយនឹង​ការណែនាំដ៏ត្រឹមត្រូវនិងកិច្ចការប្រឹងប្រែង មនុស្សគ្រប់គ្នាអាចមានភាពជឿជាក់ជាងមុន។ នៅពេលអ្នក​ឆ្លង​កាត់ចំនុចមួយបាន អ្នកនឹងទទួលអារម្មណ៍ពីវាពីខាងក្នុងខ្លួនអ្នក។

នេះជាយុទ្ធសាស្ត្រទាំង៨ ដើម្បីឲ្យអ្នកឈានដល់ទៅនោះ៖

១. មើលមកកាន់ខ្លួនឯងដោយភាពស្មោះត្រង់

លោក ចន្នី យូនីតាស (Johnny Unitas) កីឡាករបាល់អោបដ៏ល្បីរបស់អាមេរិកបាននិយាយថា “មានភាពខុសប្លែកគ្នាពីអំនួត និងភាពជឿ​ជាក់”។ អំនួត គឺការអួតអំពីខ្លួនឯង។ ភាពជឿជាក់ មានន័យថា អ្នកជឿថាអ្នកអាចធ្វើកិច្ចការបាន។ និយាយម្យ៉ាងទៀត ភាពជឿជាក់ទទួល​បានតាមរយៈកិច្ចប្រឹងប្រែងធ្វើ​ការ ​ហើយ​បុគ្គលជោគជ័យយល់ដឹងពីខ្លួនឯង។ នៅពេលភាពជឿជាក់របស់អ្នក កើនលើសពីសមត្ថភាពរប​ស់អ្នក អ្នកបាន​ឆ្លងកាត់ខ្សែបន្ទាត់ចូលដល់ភាពក្រអឺតក្រទម។ អ្នកត្រូវដឹងពីភាពខុសប្លែកគ្នានេះ។

ភាពជឿជាក់ពិតប្រាកដ ស្ថិតនៅក្នុង​ភាពពិតប្រាកដ។ ដើម្បីបណ្តុះភាពជឿជាក់ វាមានសារៈសំខាន់ ដើម្បីធ្វើការវាយតម្លៃដោយ​ស្មោះត្រង់ និងត្រឹមត្រូវលើសមត្ថភាពរបស់ខ្លួនដោយខ្លួនឯង។ បើមានចំនុចខ្សោយណាមួយនៅក្នុងជំនាញរបស់ខ្លួន អ្នកគួររៀបចំផែនការ​ ដើម្បីពង្រឹងជំនាញទាំងនេះ ហើយស្វែងរកវិធី ដើម្បីធ្វើឲ្យមានផលប៉ះពាល់អវិជ្ជមានតិចបំផុត។ ការមិនអើពើនឹងចំណុចខ្សោយរបស់ខ្លួន ឬធ្វើ​ពុតថាវាជាចំណុចខ្លាំងនោះ នឹងមិនធ្វើឲ្យវាបាត់ទៅវិញទេ។ ស្រដៀងគ្នានេះដែរ ការយល់ដឹងពីចំណុចខ្លាំងរបស់ខ្លួនច្បាស់នោះ នឹងធ្វើឲ្យ​អ្នកបំ​បាត់ចោលមតិឆ្លើយតបដែលគ្មានមូលដ្ឋានមួយចំនួន និងការិះគន់ដែលអ្នកអាចមាននៅក្នុងបរិស្ថានការងារដែលមានភាពមមាញឹក និង​ប្រកួត​ប្រ​ជែង។ វិធានការនេះ នឹង​បង្កើនភាពជឿជាក់។

២. និយាយថា​ “ទេ”

ការស្រាវជ្រាវ ធ្វើឡើងនៅសាកលវិទ្យាល័យ កាលីហ្វ័រញ៉ា (University of California) ក្នុងទីក្រុង សាន ហ្វ្រានស៊ីស្កូ (San Francisco) បង្ហាញថា បើអ្នកកាន់តែពិបាកនិយាយថា ​”ទេ” អ្នកកាន់តែអាចមានស្ត្រេស ភាពអស់កម្លាំង និង​បាក់ទឹកចិត្ត ដែល​ទាំងអស់នេះធ្វើឲ្យអ្ន​កបាត់បង់ភាពជឿជាក់។ បុគ្គលមាន​ភាព​ជឿជាក់ដឹងថាការនិយាយថា​ “ទេ” គឺជារឿងធម្មតា ហើយពួកគេមាន​ទំនុកចិត្តខ្លួនឯងក្នុង​ការបញ្ជាក់ថា “ទេ” បានយ៉ាងច្បាស់។ នៅពេល​​វាដល់ពេលនិយាយថា “ទេ” បុគ្គលមានភាពជឿជាក់ជៀសវាងនូវឃ្លាថា “ខ្ញុំមិនគិតថាខ្ញុំអាច” ឬ “ខ្ញុំមិនច្បាស់”។ ពួកគេនិយាយថា “ទេ” ដោយមានភាពជឿជាក់ ពីព្រោះពួកគេដឹងថាការនិយាយថា “ទេ” ទៅកាន់ការប្តេជ្ញាថ្មី គោរពតាមការប្តេជ្ញាដែលមានស្រាប់រ​បស់ខ្លួន ហើយនឹង​ផ្តល់ឲ្យពួកគេនូវឱកាសដើម្បីបំពេញពួកវាយ៉ាងជោគជ័យ។

៣. រក្សាទំនាក់ទំនងល្អជាមួយចៅហ្វាយអ្នកវិញ

ទំនាក់ទំនង មានបញ្ហាជាមួយចៅហ្វាយនាយ អាចបំផ្លាញសូម្បីតែភាពជឿជាក់របស់បុគ្គលមានទេពកោសល្យបំផុត។ វាពិបាកដើម្បី​មានភាពជឿជាក់នៅពេលចៅហ្វាយរបស់អ្នក ចេះតែរិះគន់អ្នក ឬចាត់ទុកការរួមចំណែករបស់អ្នកថាមិនសូវសំខាន់។ អ្នកគួរព្យាយាមកំណត់កន្លែង​ណាដែលទំនាក់ទំនងមានបញ្ហា និងសម្រេចចិត្តថាតើមានអ្វីដែលអ្នកអាចធ្វើបាន ដើម្បីឲ្យទំនាក់ទំនងត្រឡប់មកសភាពដើមវិញឬយ៉ាងណា។ បើទំនាក់ទំនងពិតជាមិនអាចស្រោចស្រង់បាន វាអាចជាពេលដែលត្រូវបន្តទៅអ្វីមួយផ្សេងពីនេះ។

៤. ស្វែងរកជោគជ័យតូចៗ

បុគ្គលមានភាពជឿជាក់ ចូលចិត្តផ្ទញ់ខ្លួនឯង និងការប្រកួតប្រជែង សូម្បីនៅពេលកិច្ចប្រឹងប្រែងរបស់ពួកគេទទួលបានជោគជ័យ​តូច​តាចក៏ដោយ។ ភាពជោគជ័យតូចតាច បង្កើន​សសៃប្រសាទសម្រាប់ទទួលអ័រម៉ូនមនុស្សប្រុស (androgen receptors) នៅក្នុងផ្នែក​នានានៃ​ខួរ​ក្បាលដែលមានមុខងារផ្តល់រង្វាន់ និងការលើកទឹកចិត្ត។ ការកើនឡើងនេះ បង្កើនឥទ្ធិពលនៃអ័រម៉ូន testosterone សម្រាប់​មនុស្ស​​ប្រុស ដែលបង្កើនភាពជឿជាក់របស់អ្នក និងភាពស្រេកឃ្លានក្នុងការដោះស្រាយបញ្ហាប្រឈមនាពេលអនាគត។ នៅពេលអ្នកទទួល​បាន​​ភាព​ជោគជ័យ​តូចតាចបន្តបន្ទាប់គ្នា កម្លាំងជំរុញភាពជឿជាក់របស់អ្នកអាចមានរយៈពេលជាច្រើនខែ។

៥. ស្វែងរកអ្នកណែនាំ

គ្មានអ្វីបង្កើនភាពជឿជាក់ ដូចបុគ្គលមានទេពកោសល្យ និងបទពិសោធន៍ បង្ហាញផ្លូវដល់អ្នក ហើយ​អង្អែលខ្នងរបស់អ្នកសម្រាប់​ការ​ងារដែលធ្វើបានយ៉ាងល្អនោះទេ។ អ្នកណែនាំល្អ អាចធ្វើជាកញ្ចក់ ដោយផ្តល់ឲ្យអ្នកនូវទស្សនៈដែលអ្នកត្រូវការ ដើម្បីជឿលើខ្លួនឯង។ ចំណេះដឹង បណ្តុះ​ភាពជឿជាក់ ដោយសារ​ការដឹងពីចំណុចដែលអ្នកឈរ ជួយអ្នកផ្តោតលើថាមពលរបស់អ្នកកាន់តែប្រសើ។ ក្រៅពីនេះ អ្នក​ណែនាំ អាចជួយអប់រំអ្នកលើដំណើរការវប្បធម៌ផ្ទៃក្នុងខ្លះៗនៃអង្គភាពរបស់អ្នក។ ការដឹងពីវិធីនៃរបៀបដែលត្រូវធ្វើកិច្ចការនៅកន្លែងការងារ ជា​ការ​ជំរុញភាពជឿជាក់ដ៏អស្ចារ្យ។

៦.​ បង្កើតកាលវិភាគហាត់ប្រាណ

ការសិក្សាដែលធ្វើឡើងនៅវិទ្យាស្ថានស្រាវជ្រាវ Eastern Ontario Research Institute បានរកឃើញថា បុគ្គលដែលហាត់ប្រាណពីរដងក្នុងសប្តាហ៍រយៈ​ពេលដប់សប្តាហ៍ ទទួលអារម្មណ៍ថា ខ្លួនឯងកាន់តែមានសមត្ថភាពខាងសង្គម ខាងការសិក្សា​ និងខាងអត្តពល។ ពួកគេបានចាត់ចំណាត់​ថ្នាក់​រូបរាងកាយ និង​គោរពខ្លួនឯងខ្ពស់។ សំខាន់បំផុតនោះ ក្រៅពីការផ្លាស់ប្តូររូបរាងនៅក្នុងខ្លួនដែលជួយបង្កើនភាពជឿជាក់នោះ វាជាភាពវិជ្ជ​មានភ្លាមៗដែលជំរុញដោយសារធាតុ endorphin ពីការហាត់ប្រាណដែលធ្វើឲ្យមានភាពខុសប្លែកគ្នាទាំងស្រុង។ អ្នកគួររៀបចំកាលវិភាគ​ហាត់ប្រាណរបស់អ្ន​ក ដើម្បីឲ្យប្រាកដថា វានឹងកើតឡើង និងភាពជឿជាក់របស់អ្នកនៅតែខ្ពស់។

៧. ស្លៀកសំលៀកបំពាក់ដើម្បីភាពជោគជ័យ

ទោះចង់មិនចង់ក៏ដោយ របៀបដែលអ្នកស្លៀកពាក់ មាន​ឥទ្ធិពលយ៉ាងខ្លាំងលើរបៀបដែលមនុស្សនានាមើលឃើញអ្នក។​ វត្ថុ ដូច​ជា​ពណ៌ ការរៀបចំខ្លួន និងបែបផែននៃសម្លៀកបំពាក់ដែល​យើងពាក់ និងសូម្បីតែប្រដាប់ប្រដារបស់យើង អាចឲ្យអ្នកដទៃដឹងពីយើង។ ប៉ុន្តែ​របៀបដែលស្លៀកពាក់ ក៏មានឥទ្ធិពលពីរបៀបដែលយើងមើលឃើញខ្លួនឯងដែរ។ ការសិក្សាបានបង្ហាញថា មនុស្សនិយាយខុសៗគ្នា នៅពេល​ពួក​​គេស្លៀពាក់ផ្លូវការ ប្រៀបធៀបទៅនឹងពេលពួកគេស្លៀកពាក់ធម្មតា។ ដើម្បីជម្រុញភាពជឿជាក់របស់អ្នក ចូរ​ស្លៀកពាក់ឲ្យបានសមសួន។ អ្នកគួរ​ជ្រើសរើសសម្លៀកបំពាក់ដែលឆ្លុះបញ្ចាំងពីអ្នក និងរូបភាពដែលអ្នកចង់បញ្ចេញ​ ទោះបីជាវាមានន័យថាចំណាយពេលច្រើនជាងមុននៅ​ផ្សារ និងពេលច្រើនជាងមុនក្នុងការរៀបចំខ្លួនពេលព្រឹកក៏ដោយ។

៨. ចេះការពារខ្លួន ប៉ុន្តែមិនមែនប្រើកម្លាំងបាយនោះទេ

ការប្រើកម្លាំងបាយ មិនមែនជាភាពជឿជាក់នោះទេ។ ផ្ទុយទៅវិញ វាជាការគំរាមកំហែង។ នៅពេលអ្នកមានអារម្មណ៍គ្មានសុវត្ថិភាព វាងាយធ្លាក់ចូលទៅក្នុងការប្រើកម្លាំងបាយដោយទាំងខ្លួន​ឯងគ្មានចេតនា។ ចូរហ្វឹកហាត់ការពារខ្លួនឯង ដោយមិនចាំបាច់ប្រើកម្លាំងបាយ​។ ទាល់តែអ្នករៀនពីរបៀបគ្រប់គ្រងភាពគ្មានសុវត្ថិភាពរបស់ខ្លួន ទើបអ្នក​អាចសម្រេចជោគជ័យបាន ហើយវានឹងបង្កើនភាពជឿជាក់របស់អ្នក។

សរុបសេចក្តីមក ភាពជឿជាក់របស់អ្នក គឺខ្លួនរបស់អ្នកជាអ្នកបង្កើន ឬបន្ថយ។ ភាពជឿជាក់ គឺផ្អែកលើភាពពិតប្រាកដ។ វាជា​ចំណេះ​ដឹងមិនប្រែប្រួលដែលទៅហួសពី “ការសង្ឃឹមចង់បានភាពប្រសើរ”។ វាធានាថា អ្នកនឹងសម្រេចកិច្ចការបាន។ នោះហើយជាអំណាច​នៃភាពជឿជាក់ពិតប្រាកដ។

សម្រួលពី៖ 8 Ways to Boost Your Confidence By Travis Bradberry, Entrepreneur


អត្ថបទទាក់ទង

អនុវត្តវិធី៥យ៉ាងនេះ ដើម្បីបង្កើតភាពជឿជាក់ប្រកបដោយអនុភាព

Leave a Reply

Your email address will not be published.