គន្លឹះទាំង ៨ ដើម្បីធ្វើការប្រកបដោយភាពឆ្លាតវៃ

តើលោកអ្នកដឹងទេថា ហេតុអ្វីបានជាបុគ្គលមួយចំនួនទទួលបានជោគជ័យ ខណៈពេលដែលមនុស្សភាគច្រើនផ្សេងទៀតទទួលរងបរាជ័យ ហើយមិនអាចធ្វើអ្វីសមតាមបំណងរបស់ខ្លួន? ជាទូទៅ ភាពជោគជ័យនៃបុគ្គលណាម្នាក់ រមែងកើតឡើងពីកត្តារួមផ្សំជាច្រើន ដែលក្នុងនោះរួមបញ្ចូលទាំងភាពឆ្លាតវៃរបស់ពួកគេផងដែរ។ 

ភាពឆ្លាតវៃ ជាលក្ខណៈពិសេសដែលធ្វើឱ្យបុគ្គលណាម្នាក់ខុសពីមនុស្សដទៃទៀត និងអាចបំពេញការងារផ្សេងៗបានយ៉ាងមានប្រសិទ្ធភាព។ 

កាល​ពីមុន មនុស្សម្នាក់ៗតែងមានផ្នត់គំនិតថា ដើម្បីសម្រេចបានជោគជ័យក្នុងការធ្វើអ្វីមួយ យើងត្រូវតែខិតខំប្រឹងប្រែង។ ដោយឡែក ក្នុងពេលបច្ចុប្បន្ន ដោយសារតែការខិតខំត្រូវចំណាយពេលវេលានិងកម្លាំងអស់ច្រើន មនុស្សមួយចំនួនចាប់ផ្ដើមឲ្យដំបូន្មានថា “កុំខំ! ធ្វើអីក៏ដោយ ឲ្យចេះឆ្លាត!”​ ប៉ុន្ដែពួកគេមិនបានប្រាប់នោះទេថា តើការធ្វើការដោយភាពឆ្លាតវៃនោះគឺមានលក្ខណៈបែបណា? ធ្វើបែបណាទើបគេហៅថាឆ្លាតនោះ? ខាងក្រោមនេះជាគន្លឹះទាំង ៨ ដែលអាចជួយអ្នកបាន៖

១. គ្រប់គ្រងពេលវេលា

ធ្វើបែបណាទើបហៅថាគ្រប់គ្រងពេលវេលាបានល្អ? អ្នកត្រូវកំណត់អាទិភាពនៃកិច្ចការរបស់អ្នក ថាតើការងារណាដែលសំខាន់និងបន្ទាន់ជាងគេ។ ចូរកុំព្យាយាមធ្វើកិច្ចការច្រើនក្នុងពេលតែមួយ។ អ្នកត្រូវចេះសន្មត់ថា ការងារមួយចំណាយពេលប្រហែលប៉ុន្មាន ហើយអ្នកត្រូវបញ្ចប់ការងារមួយនេះត្រឹមពេលណា។

២. ប្រើប្រាស់បច្ចេកវិទ្យាជំនួយ

ពេលណាដែលបច្ចេកវិទ្យាអាចជួយអ្នកបាន អ្នកគួរតែប្រើវាដើម្បីកាត់បន្ថយការចំណាយពេលវេលានិងកម្លាំងកាយរបស់អ្នក។ ឧទារហណ៍ អ្នកអាចប្រើប្រាស់កុំព្យូទ័រក្នុងការស្រាវជា្រវរកឯកសារ ប្រើប្រាស់ទូរស័ព្ទក្នុងការទំនាក់ទំនងរឺបង្កើតបញ្ជីការងារដែលត្រូវធ្វើជាដើម។

៣. មានរបៀបរៀបរយ

មនុស្សដែលមានផលិតភាពខ្ពស់ច្រើន​​ ជាមនុស្សដែលចេះរៀបចំឲ្យមានលំដាប់លំដោយត្រឹមត្រូវ។ បើទោះបីជាការរៀបចំ ដូចជាឯកសារ រឺសៀវភៅ អាចចំណាយពេលជាងការទុកដាក់គ្មានសណ្ដាប់ធ្នាប់ក៏ពិតមែន ប៉ុន្ដែវាអាចជួយសន្សំពេលវេលាបានយ៉ាងច្រើននៅពេលដែលអ្នកត្រូវការរកឯកសារទាំងនោះ ហើយសណ្ដាប់ធ្នាប់ល្អក៏អាចនាំឲ្យអ្នកមានអារម្មណ៍ក្នុងការធ្វើការងារផ្សេងៗផងដែរ។

៤. សម្រាកបន្ដិចឲ្យបានញឹកញាប់

សូម្បីតែមនុស្សដែលរវល់បំផុតក៏ត្រូវការពេលសម្រាកខ្លះដែរ។ ចំណាយពេល ៥ ទៅ ១០ នាទី ដើរចេញពីតុ ពត់ដៃពត់ជើង ទៅនិយាយជាមួយមិត្តភក្ដិ ទៅញ៉ាំទឹក ទៅញ៉ាំផ្លែឈើ រឺធ្វើអ្វីផ្សេងៗទៀតតាមដែលអ្នកចង់។ វានឹងជួយបន្ធូរភាពតានតឹងរបស់អ្នកនិងធ្វើឲ្យអ្នកអាចធ្វើការកិច្ចការអ្វីមួយយ៉ាងមានប្រសិទ្ធភាពផងដែរ។

៥. បដិសេធការងារមិនសំខាន់

ពាក្យថា “ទេ” គឺជាពាក្យមួយដែលពិបាកនឹងនិយាយចេញសម្រាប់មនុស្សមួយចំនួន។ ពួកគេតែងតែយល់ព្រមក្នុងការធ្វើអ្វីគ្រប់យ៉ាង ប៉ុន្ដែបើប្រសិនបើអ្វីដែលអ្នកធ្វើនោះមិនមែនជាចំណង់ចំណូលចិត្ត រឺអាទិភាពរបស់អ្នកទេ ចូរបដិសេធនឹងសំណើនោះ។

៦. ប្រគល់ការងារឲ្យអ្នកដទៃ

នេះមិនមែនមានន័យថា អ្នកកំពុងតែធ្វើបាបពួកគេនោះទេ ប៉ុន្ដែវាជាឪកាសដែលអ្នកដទៃអាចរៀនពីការងារនោះបាន។ ដូច្នេះហើយ អ្នកមិនគួរស្រវាចាប់យកកិច្ចការទាំងអស់មកធ្វើខ្លួនឯងនោះទេ។ ចូរបែងចែកវាឲ្យទៅមិត្តរួមការងាររបស់អ្នក ដើម្បីភាពល្អប្រសើរទាំងសងងខាង។

៧. កុំទាមទារភាពល្អឥតខ្ចោះ

វាជារឿងកម្រដែលយើងធ្វើអ្វីមួួយបានល្អឥតខ្ចោះ ហើយវាក៏មិនមែនជារឿងចាំបាច់អីនោះដែរ។ ការទាមទារភាពល្អឥតខ្ចោះនេះអាចបណ្ដាលឲ្យអ្នកមានទំនាក់ទំនងមិនល្អជាមួយអ្នករួមការងាររឺសមាជិកក្រុម មានការពន្យាពេល មានផលិតភាពទាប ហើយក៏អាចនាំមកនូវភាពតានតឹងនិងការបាក់ទឹកចិត្តផងដែរ។ 

៨. ដឹងពេលត្រូវសុំជំនួយ

មិនថាមនុស្សឆ្លាតពូកែប៉ុណ្ណានោះទេ អ្នកអាចនឹងជួបការងារពិបាកដែលធ្វើឲ្យអ្នកធុញថប់ជាខ្លាំង។ ឈប់ព្យាយាមធ្វើជាវីរៈនារី ឬ វីរៈបុរសទៀត ហើយកុំសម្ងំរងទុក្ខម្នាក់ឯង។ សុំជំនួយពីប្រធានរបស់អ្នកនៅកន្លែងធ្វើការ ឬលោកគ្រូអ្នកគ្រូ បើអ្នកជាសិស្ស។

សម្រួលពី៖ Lifehack


អត្ថបទទាក់ទង

បុគ្គលិកលក្ខណៈទាំង ១០ របស់មនុស្សឆ្លាតវៃ​

 

Leave a Reply

Your email address will not be published.