ជម្រើសសំខាន់ៗ ៥យ៉ាង ដើម្បីឆ្ពោះទៅកាន់ជីវិតសម្បូរទៅដោយទ្រព្យសម្បត្តិស្ដុកស្ដម្ភ
កាលបើមានលាភ ឬទ្រព្យសម្បត្តិយើងអាចធ្វើអ្វីៗដែលទាក់ទងទៅនឹងការចំណាយធនធានបានដោយងាយស្រួល។ ការចំណាយធនធានផ្សេងៗនោះមានដូចជា៖
- ចិញ្ចឹមជីវិតខ្លួនឯង មាតាបិតា បុត្រ ភរិយា ឬកម្មករដែលនៅជាមួយខ្លួន
- ចាយទ្រព្យដើម្បីការពារទ្រព្យ គឺចាយដោយការវៃឆ្លាត ដើម្បីដោះខ្លួនឯងឲ្យរួចពីសេចក្តីអន្តរាយផ្សេងៗ ដូចជាអន្តរាយព្រោះភ្លើងព្រោះទឹក ឬក៏អន្តរាយព្រោះចោរជាដើម
- ចាត់ចែងសម្រាប់ជួយសង្រ្គោះញាតិ និងទុកសម្រាប់ទទួលភ្ញៀវដែលមកពីចម្ងាយ… (សំដៅដល់ពលី ៥ យ៉ាង មានពលីញាតិជាដើម)
- ចាត់ចែងបរិច្ចាគធ្វើទាន ដល់សមណព្រាហ្មណ៍ អ្នកមានសីលជាទីស្រឡាញ់។
លាភ ឬទ្រព្យសម្បត្តិ អាចប្រើប្រាស់ឲ្យបានជាប្រយោជន៍ច្រើនយ៉ាងទៀត ដែលទាក់ទងទៅនឹងការចំណាយធនធាន ដូចជាការបង់ថ្លៃសាលាជាដើម។
លោក ប្រាយអេន ត្រេស៊ី (Brian Tracy) គឺជាអ្នកជំនាញផ្នែកអភិវឌ្ឍន៍ការគិត និងជាអ្នកនិពន្ធអាមេរិក បានបង្ហាញពីជម្រើសសំខាន់ៗ ៥ យ៉ាង ដើម្បីឆ្ពោះទៅកាន់ជីវិតសម្បូរទៅដោយទ្រព្យសម្បត្តិស្ដុកស្ដម្ភ។
១. ជម្រើសទី១
ត្រូវប្រឡូកក្នុងវិស័យជំនួញ ឬក្លាយជាសហគ្រិនម្នាក់។ មានវិស័យច្រើនណាស់សម្រាប់ទាំងផ្នែកអចលនទ្រព្យ កសិកម្ម និងទេសចរណ៍ជាច្រើនដែលសុទ្ធតែអាចបង្កើតឱកាសជាច្រើនដល់អ្នក ដូច្នេះត្រូវជ្រើសរើសយកផ្នែកណាមួយ ហើយធ្វើជំនួញឥឡូវនេះ។
២. ជម្រើសទី២
ក្លាយជាអ្នកជំនាញ ឬអ្នកគ្រប់គ្រងតំណែងខ្ពស់ៗប្រចាំក្រុមហ៊ុនធំៗ។ បើចង់ឲ្យជីវិតជោគជ័យ និងមានប្រាក់ច្រើនក្នុងការរស់នៅក្នុងជីវិតដ៏សម្បូរបែបនោះ គឺត្រូវតែក្លាយជាអ្នកគ្រប់គ្រងថ្នាក់កំពូលៗរបស់ក្រុមហ៊ុន មិនមែនបុគ្គលតូចតាចនោះទេ។
៣. ជម្រើសទី៣
ត្រូវសិក្សាឲ្យបានខ្ពស់លើជំនាញសំខាន់ៗដូចជា វេជ្ជបណ្ឌិត ច្បាប់ ឬ វិស្វកម្ម។ ប៉ុន្តែអ្នកត្រូវតែដាក់ចិត្តក្នុងការខិតខំរៀនសូត្រ និងចំណាយពេលវេលាច្រើន ដើម្បីក្លាយជាមនុស្សដ៏ជំនាញម្នាក់លើផ្នែកណាមួយ។ អ្នកដែលមានជំនាញទាំងនេះ សុទ្ធតែទទួលបានប្រាក់ខែខ្ពស់ៗ ដែលធ្វើឲ្យជីវភាពមានលក្ខណៈល្អប្រសើរជាងអ្នកដទៃ។
៤. ជម្រើសទី៤
ត្រូវធ្វើការក្នុងជំនាញផ្នែកលក់។ អ្នកដែលមានជំនាញផ្នែកលក់ គឺសុទ្ធតែជាមនុស្សមានឱកាសខ្ពស់ក្នុងការក្លាយជាអ្នកមាន ព្រោះមហាសេដ្ឋីជាច្រើនសុទ្ធតែចាប់ផ្ដើមពីជំនាញផ្នែកលក់។ បើអ្នកមិនអភិវឌ្ឍខ្លួនឲ្យក្លាយជាអ្នករកស៊ីទេ ការធ្វើត្រឹមជាអ្នកលក់ ក៏ជួយឲ្យអ្នករកលុយបានច្រើនមិនធម្មតាដែរ ព្រោះបើអ្នកពូកែ គឺ៖
- ទី១ បានប្រាក់ខែខ្ពស់ និង
- ទី២ ទទួលបានកម្រៃជើងសាច្រើនពីក្រុមហ៊ុន។
៥. ជម្រើសទី៥
លេងផ្សារភាគហ៊ុន ក្លាយជាអ្នកសិល្បៈ និងលេងឆ្នោត។ បើតាមលោក ប្រាយអេន ត្រេស៊ី ឱកាសជោគជ័យក្នុងផ្នែកទាំងនេះ គឺមានកម្រិតតិចតួចប៉ុណ្ណោះ ប៉ុន្តែបើជោគជ័យវិញ គឺប្រាកដជាក្លាយជាអ្នកមានមិនខាន។
អត្ថបទទាក់ទង