វិធីសាស្រ្តចំនួន ៤ ដែលជួយឲ្យអ្នករៀនអ្វីក៏ឆាប់ចងចាំបានលឿន ហើយយល់ជាក់ច្បាស់
ការរៀនសូត្រនៅអ្វីដែលថ្មី ជឿថាសម្រាប់មនុស្សមួយចំនួន គឺពិតជាពិបាកខ្លាំងណាស់ ដោយពួកគេឆាប់ភ្លេច ហើយបើចងចាំ គឺចាំតែមួយភ្លែតហ្នឹងឯង។ ភាពទន់ខ្សោយនៃការចងចាំមួយនេះហើយ នាំឲ្យពួកគេដល់ថ្នាក់ពេលខ្លះខ្ជិលនឹងចង់ចាប់យកអ្វីដែលថ្មី ព្រោះគិតថាខួរក្បាលខ្លួនឯងមិនល្អ ហើយក៏នាំឲ្យឱកាសល្អៗបាត់បង់ទៅជារឿយៗ។
តាមការណែនាំពីអ្នកជំនាញជាច្រើន បានណែនាំវិធីសាស្រ្តចំនួន៤ ដែលជួយឲ្យអ្នករៀនអ្វីក៏ឆាប់ចងចាំបានលឿន ហើយយល់ជាក់ច្បាស់៖
១. អនុវត្តនូវទ្រឹស្តីដែលបានរៀន
ការរៀនទ្រឹស្តី នាំឲ្យយើងជោគជ័យបានតែ ៣០% ទេ ហើយ ៧០% ផ្សេងទៀត គឺលើការអនុវត្ត។ ឧទាហរណ៍៖ អ្នករៀនភាសាអង់គ្លេសនៅឃ្លាណាមួយ ចូរអ្នកយកឃ្លានោះទៅអនុវត្តក្នុងការប្រើប្រាស់ផ្ទាល់ជាមួយជនបរទេស ឬ មិត្តភ័ក្ដិ ប្រសិនអ្នកអាចប្រើវាបាន វាបន្ថែមទាំងការចងចាំ ហើយស្មើនឹងអ្នកបានយល់ពីវាថែមទៀត។ ត្រង់ផ្នែកណាដែលមិនច្បាស់ ឬ មិនយល់ត្រូវត្រឡប់ទៅរៀនមើលវាម្តងទៀតដើម្បីយល់ឲ្យកាន់តែច្បាស់ ចូរកុំរំលង ហើយទុកចោលឲ្យសោះ។
២. ឆ្លៀតពេលរំឭកនូវអ្វីដែលបានរៀន
នេះមានន័យថា អាចថាពេលទំនេរនៅកន្លែងស្ងប់ស្ងាត់ណាមួយ ឬ មុនពេលចូលគេង ចូរអ្នករំឭកឡើងវិញក្នុងខួរក្បាល ថាតើអ្នកបានរៀនសូត្រអ្វីខ្លះ អ្នកទទួលបានចំណេះដឹងថ្មីអ្វីខ្លះ? តាមការណែនាំពីសាស្រ្តាចារ្យនៅសកលវិទ្យាល័យ ហាវើដ (Havard University) លោក ហ្វ្រែនសេស្កា ហ្គីណូ (Francesca Gino) បានឲ្យដឹងថា បុគ្គលិករបស់លោកភាគច្រើនក្រោយពីទម្លាប់ធ្វើបែប ១៥ នាទីមុនចូលគេង គឺពួកគេមានការចងចាំល្អជាងអ្នកដែលមិនបានធ្វើសោះ។
៣. អនុវត្តអ្វីដែលបានរៀនសារឡើងវិញ
វាជាចំណុចសាមញ្ញមួយដែលអ្នកមិនគួររំលង កុំឲ្យរៀនហើយគិតថាខ្លួនឯងចាំ និងយកវាទៅទុកចោលនោះ។ ដើម្បីឲ្យប្រព័ន្ធសរសៃប្រសាទចងចាំបានល្អ យើងត្រូវយកវាមកអនុវត្ត ឬ ទន្ទេញវាម្តងទៀត ជាប់គ្នាប៉ុន្មានថ្ងៃបន្ទាប់ក្រោយពីបានរៀន មិនថាតែរៀនមុខជំនាញ ឬ វគ្គខ្លីអ្វីនោះទេ។
៤. ក្បាច់ Learning Transfer របស់ Elon Musk
មហាសេដ្ឋីអាមេរិក អ៊ីឡុន ម៉ាសក៍ (Elon Musk) គឺរៀនមិនចេះឈប់នោះទេ ហើយក្បាច់មួយដែលនាំឲ្យលោករៀនឆាប់យល់ ឆាប់ចាំ ឆាប់ចេះ គឺឲ្យឈ្មោះថា Learning Transfer។
មិននិយាយអ្វីស៊ីជម្រៅនោះទេ ត្រឹមឧទាហរណ៍សាមញ្ញមួយ ដូចអ្នកកំពុងរៀនភាសាអង់គ្លេស ហើយអ្នកចង់ចេះភាសាអង់គ្លេសហ្នឹងឲ្យកាន់តែច្បាស់ និងចង់ដឹងថាខ្លួនឯងអនុវត្តបានដល់កម្រិតណា អ៊ីចឹងទៅចាប់ថ្នាក់សិក្សាជំនាញមួយផ្សេងទៀតដែលអ្នកស្រលាញ់ អាចថាថ្នាក់រៀនធ្វើម្ហូប ប៉ុន្តែរៀនជាមួយគ្រូជនជាតិបរទេស ដែលប្រើប្រាស់ភាសាអង់គ្លេស ហើយនៅពេលតែមួយនោះ ភាសាអង់គ្លេសរបស់អ្នកក៏ទទួលបានការពង្រឹង ហើយជំនាញបន្ទាប់បន្សំនៃការធ្វើម្ហូបក៏កាន់តែចេះច្រើនជាងមុនថែមទៀត។
អត្ថបទទាក់ទង
តើបុគ្គលដែលរវល់ច្រើន និងបុគ្គលដែលមានផលិតភាពខ្ពស់ខុសគ្នាដូចម្តេច?