៣ ជំហ៊ាន ដើម្បីកែប្រែទស្សនវិស័យផ្ទាល់ខ្លួនឲ្យក្លាយជាការពិត

ការបង្កើតទស្សនវិស័យសម្រាប់ជីវិត ផ្តល់នូវទិសដៅ ដើម្បីធ្វើដំណើរទៅមុខ។ គោលដៅវែងឆ្ងាយដែលកើតចេញពីការបង្កើតទស្សនវិស័យជីវិត អាចផ្តល់ភាពច្បាស់លាស់ និងជួយលោកអ្នកឱ្យមើលឃើញកន្លែងដែលត្រូវទៅ។ ជាលទ្ធផល លោកអ្នកអាចងាយស្រួលគ្រប់គ្រងស្ថានការណ៍ដែលកើតឡើងក្នុងជីវិត។

តើ​មាន​រឿង​អ្វី​ខ្លះ​ទៅ​ដែល​អ្នក​គិត​ថា ​ជា​រឿង​ដែល​អស្ចារ្យ​បំផុត​ ហើយ​តែង​តែ​ចង់​ធ្វើ​វា​ ប៉ុន្តែ​មិន​ដែល​បាន​ធ្វើ​សោះ​នោះ? ​”ហេតុ​អ្វី​បាន​ជាអ្នកមិន​ព្រម​ចាប់​ផ្ដើម​ធ្វើ​វា​ទៅ?”។ ​ប្រសិន​បើអ្នកមាន​បំណង​ពិត​ប្រាកដ​ ​នៅ​ក្នុង​ការ​កែប្រែ​សុបិន្ដ​របស់​ខ្លួន​ដែល​ធ្លាប់​មាន​ជាយូរ​នោះ​ ឲ្យ​ក្លាយ​ទៅ​ជា​ការ​ពិត ខាងក្រោមនេះជា​ចំណុច​សំខាន់ៗ​ ៣ ​ដែល​នឹង​ជួយ​ឲ្យ​ទស្សនៈ​វិស័យ​របស់​ខ្លួន​ក្លាយ​ទៅ​ជា​សកម្មភាព​បាន​៖

១. ស្គាល់​ច្បាស់​ពី​គោល​ដៅ​របស់​ខ្លួន

អ្វី​ៗ​ត្រូវ​ចាប់​ផ្ដើម​ពី​ប្រយោគ​មួយ​ឃ្លា​នេះ​ឯង​នោះ​គឺ៖ “អ្នក​ត្រូវ​តែ​ជឿជាក់​ និង​មើល​ឃើញ​ពី​គោល​ដៅ​របស់​ខ្លួន​ឲ្យ​បាន​ច្បាស់”។ ប្រសិន​បើ​លទ្ធផល​ចុង​ក្រោយ​ ហាក់​មាន​ភាព​ស្រពិច​ស្រពិល សម្រាប់​អ្នក​ដោយ​ប្រការ​ណា​មួយ​ក្ដី នោះ​អ្នក​នឹង​មាន​ការ​លំបាក​នៅ​ក្នុង​ការ​សម្រេច​គោល​ដៅ​ទាំង​នោះ។ មនុស្ស​ភាគ​ច្រើន​ ជារឿយ​ៗ​ តែង​តែ​គិត​ថា វា​គ្មាន​សារៈសំខាន់ ហើយ​មិន​បាន​ចំណាយ​ពេល​វេលា​ឲ្យ​បាន​គ្រប់​គ្រាន់​ នៅ​ក្នុង​ការ​កំណត់​នូវគោល​ដៅ ក៏​ដូច​ជា​ធ្វើ​ការ​កំណត់​និយម​ន័យ​នៃ​ភាព​ជោគជ័យ​សម្រាប់​ខ្លួន​ឯង​នោះ​ទេ។

មនុស្ស​ម្នាក់​ៗ​ គឺមាន​វិធី​ពីរ​យ៉ាង​នៅ​ក្នុង​ការ​រៀប​ចំ​ផ្លូវ​ចិត្ត​របស់​ខ្លួន​ ពេល​ដែល​ពួក​គេ​ជួប​ប្រទះ​នូវ​បញ្ហា​ណា​មួយ។ ជា​ឧទាហរណ៍​ ប្រសិន​បើ​អ្នក​មាន​បំណង​ចង់​ឡើង​ទៅ​លើ​ កំពូល​ភ្នំ​ដ៏​សែន​ខ្ពស់​មួយ អ្នក​អាច​គិត​ ហើយ​សួរ​ខ្លួន​ឯង​បាន​នូវ​ចំណុច​ទាំង​ពីរ​ខាង​ក្រោម​នេះ៖

  • ទីមួយ៖ អ្នក​គិត​ថា​ខ្លួន​ឯង​ឈរ​នៅ​ត្រឹម​ជើង​ភ្នំ ហើយ​សម្លឹងទៅ​កាន់​កំពូល​ភ្នំ។​ ​បែប​នេះ​ អ្នក​នឹង​មិន​អាច​មើល​ឃើញ​កំពូល​ភ្នំ​បាន​នោះ​ទេ ពី​ព្រោះ​នៅ​ត្រឹម​ពាក់​កណ្ដាល​ផ្លូវ​ទៅ​កាន់​កំពូល​ភ្នំ​ គឺ​មាន​អ័ព្ទ និង​ព្រៃ​ឈើ​ជាច្រើន​ ដែល​នឹង​ធ្វើ​ឲ្យអ្នក​ពិបាក​ក្នុង​ការ​ស្វែង​រក​ផ្លូវ​ឡើង​ទៅ​ខាង​លើ។ ឬ​អ្នក​អាច​គិត​ម៉្យាង​ទៀត…
  • ទី​ពីរ៖ អ្នក​គិត​ថា​ ខ្លួន​ឯង​បាន​ឡើង​មក​ដល់​ ព្រម​ទាំង​ឈរ​នៅ​លើ​កំពូល​ភ្នំ​រួច​ទៅ​ហើយ។ បែប​នេះ ​អ្នក​អាច​សម្លឹង​មើល​ទៅ​ខាង​ក្រោម ហើយ​ចាប់​ផ្ដើម​សួរ​ខ្លួន​ឯង​ថា “តើ​អ្នក​បាន​ឆ្លង​កាត់​ឧបសគ្គ និង​បាន​ដើរ​ប៉ុន្មាន​ជំហាន​ទើប​អាច​មក​ដល់​ទី​នេះ​បាន?”

ឆ្លង​តាម​ឧទាហរណ៍​ខាង​លើ​នេះ អាច​ឲ្យ​យើង​មើល​ឃើញ​បាន​ថា​ ប្រសិន​បើ​យើង​ជ្រើស​រើស​គិត​តាម​របៀប​ទី​មួយ​ នោះ​យើង​នឹង​មិន​អាច​មើល​ឃើញ​ពី​គោល​ដៅ​របស់​យើង​បាន​ច្បាស់​លាស់​នោះ​ទេ មិន​តែ​ប៉ុណ្ណោះ​វា​ថែម​ទាំង​ធ្វើ​ឲ្យ​យើង​បែរ​ជា​មើល​ឃើញ​ពី​ឧបសគ្គ​យ៉ាង​ច្រើន​ទៅ​វិញ។ ក៏​ប៉ុន្តែ​ប្រសិន​បើ​យើង​ជ្រើស​រើស​គិត​តាម​របៀប​ទី​ពីរ​វិញ (ហើយ​គិត​ថា​ខ្លួន​ឯង​ បាន​ទទួល​ជោគជ័យ​ដែល​ខ្លួន​ចង់​បាន​រួច​ទៅ​ហើយ) នោះ​នឹង​ធ្វើ​ឲ្យយើង​កាន់​តែ​ជឿជាក់​ កាន់​តែ​មើល​ឃើញ​ពី​គោល​ដៅ​របស់​ខ្លួន​បាន​យ៉ាង​ច្បាស់ ហើយ​អាច​ធ្វើ​ឲ្យ​យើង​មាន​លទ្ធភាព​រៀប​ចំ​ខ្លួន​ ក៏​ដូច​ជា​មើល​ឃើញ​ពី​គម្រោង​ការ ឬ​សកម្មភាព​នានា​ដែល​យើង​ត្រូវ​ធ្វើ​ ដើម្បី​សម្រេច​គោល​ដៅ​នោះ​ឲ្យ​បាន វា​ប្រៀប​បី​ដូច​ជា​សំណួរ​ដែល​យើង​បាន​សួរ​ខ្លួន​ឯង ពី​ចំនួន​ជំហាន​ដែល​យើង​បាន​ដើរ​ឡើង​លើ​កំពូល​ភ្នំ​យ៉ាង​ដូច្នោះ​ដែរ​។

២. ជឿជាក់​លើ​គោល​ដៅ​ និង​ក្ដី​សុបិន្ដ​របស់​ខ្លួន​យ៉ាង​ងប់​ងល់

ការ​ជឿជាក់​យ៉ាង​ងប់​ងល់ និង​ខ្លាំងក្លា ទៅ​លើ​ក្ដី​សុបិន្ដ​ ព្រម​ទាំង​គោល​ដៅ​របស់​ខ្លួន នឹង​ធ្វើ​ឲ្យ​អ្នក​ទទួល​បាន​នូវ​គោល​បំណងពិត​ប្រាកដ មាន​ការលះបង់ ទទួល​បាន​នូវ​ទិសដៅ​ច្បាស់​លាស់ និងភាពអំណត់​អត់​ធ្មត់​ ដើម្បី​សម្រេច​វាឲ្យ​ទាល់​តែ​បាន។

៣. ដេញ​តាម​គោល​ដៅ​ទាំង​នោះ​យ៉ាង​ក្លៀវ​ក្លា

ទស្សនៈ​វិស័យ នឹង​ផ្ដល់​ជា​រូប​ភាព​ស្រមើ​ស្រមៃ ហើយ​មហិច្ឆតា ​ជា​អ្នក​បញ្ឆេះ​នូវ​គោល​បំណង​ ប៉ុន្តែ​មាន​តែ​សកម្មភាព​តែ​មួយ​មុខ​ប៉ុណ្ណោះ ដែល​អាច​ធ្វើ​ឲ្យ​អ្នក​សម្រេច​បាន​នូវ​គោល​ដៅ​ដែល​ស្ថិត​នៅ​ក្នុង​ក្ដី​ស្រមៃ​របស់​អ្នក​បាន។

ដំណឹង​ល្អ​នោះ​គឺ៖ នៅ​ពេល​ដែល​អ្នក​មាន​ទស្សនៈ​វិស័យ​ច្បាស់​លាស់ ហើយ​អ្នក​មាន​ការ​ជឿជាក់​ទៅ​លើ​វា នៅ​ពេល​នោះ​សកម្មភាព​ដែល​អ្នក​ធ្វើ​ នឹង​ក្លាយ​ទៅ​ជា​ចំណង់​ចំណូល​ចិត្ត​ និង​ការ​កំសាន្ដ​ទៅ​វិញ​ ហើយ​មិន​មែន​ជា​ការ​បំពេញ​ការ​ងារ​នោះ​ទេ។

សម្រាប់ចុង​បញ្ចប់​នេះ​ យើងមាន​សំណួរ​មួយចំនួន​ដែល​ចង់​សួរ​អ្នក៖

  • តើ​អ្នក​មាន​ទស្សនៈ​វិស័យ ឬ​ក្ដី​សុបិន្ដ​បែប​ណា?
  • ហើយ​អ្វី​ដែល​ជា​មូល​ហេតុ​ដែល​មិន​អាច​ធ្វើ​ឲ្យអ្នក​សម្រេច​ចិត្ត​ធ្វើ​វា?
  • ហើយ​ប្រសិន​បើ​អ្នកអាច​ធ្វើ​វា​បាន តើ​អ្នក​នឹង​ទទួល​បាន​អ្វី?

សូម​​ឆ្លើយ​សំណួរ​ទាំង​អស់​នេះ​ឲ្យចេញ ពេល​នោះ​អ្នក​ពិត​ជា​អាច​ស្គាល់​ និង​កាន់​តែ​មាន​ជំនឿ​ចិត្ត​ចំពោះ​ខ្លួន​ឯង​ថែម​ទៀត ហើយ​មិន​ត្រឹម​តែ​ប៉ុណ្ណោះ វា​គឺ​ពិត​ជា​អាច​ កែប្រែ​ក្ដី​សុបិន្ត​របស់​ប្រិយ​មិត្ត​ អោយ​ក្លាយ​មក​ជា​ការ​ពិត​ បាន​យ៉ាង​ពិត​ប្រាកដ។


អត្ថបទទាក់ទង

ហេតុផលសំខាន់ៗចំនួន ៣ ដែលបញ្ជាក់អំពីសារៈសំខាន់នៃទស្សនវិស័យក្នុងជីវិត

 

Leave a Reply

Your email address will not be published.