គន្លឹះសំខាន់ៗចំនួន ១០ ដើម្បីនិយាយជាសាធារណៈឲ្យបានល្អ និងមានគេចាប់អារម្មណ៍ច្រើន
ការនិយាយជាសាធារណៈ គឺជាមធ្យោបាយដ៏ល្អមួយក្នុងការកសាងការអភិវឌ្ឍផ្ទាល់ខ្លួនលើកម្រិតជាច្រើន ពីព្រោះការកែលម្អជំនាញទំនាក់ទំនងមានប្រយោជន៍ស្ទើរតែគ្រប់វិស័យនៃជីវិត។
- បង្កើនការនិយាយឲ្យកាន់តែប្រសើរ
- បង្កើនទំនុកចិត្តក្នុងការនិយាយ
- បង្កើនការត្រិះរិះពិចារណាស៊ីជម្រៅ
- បង្កើនការអភិវឌ្ឍផ្ទាល់ខ្លួន
- បង្កើនបន្ថែមនូវជំនាញទំនាក់ទំនង
- បង្កើនការទំនាក់ទំនងសង្គមថ្មី
- បង្កើនការពេញចិត្តផ្ទាល់ខ្លួន
- បង្កើនពង្រីកបណ្តាញជំនាញវោហារស័ព្ទរបស់អ្នក
- បង្កើនជំនាញភាពជាអ្នកដឹកនាំ
- បង្កើនភាពរឹងមាំផ្លូវចិត្តក្នុងការនិយាយជាសាធារណ:
អត្ថប្រយោជន៍នៃការនិយាយជាសាធារណៈទាំងនេះ ធ្វើឱ្យអ្នកចេញពីតំបន់សុខស្រួលរបស់អ្នក និងផ្តល់នូវសុន្ទរកថាពិតជាមានតម្លៃ។ អ្នកនឹងមានការភ័យខ្លាចពីរបីដងដំបូងដែលអ្នកនិយាយ ទោះបីជាយ៉ាងណាក៏ដោយអ្នកនឹងរៀនរីករាយនឹងបទពិសោធន៍។
ទោះជាយ៉ាង ការនិយាយជាសាធារណៈ គឺជាបញ្ហាមួយដែលយុវជនភាគច្រើនបានជួបប្រទះ ហើយអ្នកខ្លះមិនទាំងហ៊ានឈរលើឆាកនៅចំពោះមុខអ្នកស្ដាប់ជាច្រើននាក់ទៀតផង។ ដើម្បីកែលម្អនូវចំណុចខ្វះខាតទាំងនេះ អ្នកអាចសាកល្បងអនុវត្តវិធីសាស្ត្រមួយចំនួនដូចខាងក្រោម៖
១. ត្រៀមខ្លួន និងអនុវត្តជាប្រចាំ
ពិតណាស់ គ្មានអ្វីដែលល្អជាងការត្រៀមខ្លួនជាមុនឲ្យបានល្អនោះទេ។ ការកត់ត្រានូវពាក្យ ឬឃ្លាសំខាន់ៗ នឹងជួយដល់អ្នកក្នុងការនិយាយជាសាធារណៈប្រកបដោយភាពត្រឹមត្រូវ និងច្បាស់លាស់។ បន្ទាប់មក អ្នកអាចអនុវត្តការនិយាយម្នាក់ឯងនៅពីមុខកញ្ចក់ ពីមុខកាមេរ៉ា ឬឲ្យមិត្តភក្តិជួយស្ដាប់ ដើម្បីឲ្យយោបល់ជាដើម។
២. ស្គាល់ពីអ្នកស្ដាប់
អំឡុងពេលនៃការនិយាយ អ្នកត្រូវផ្ដោតអារម្មណ៍សំខាន់ទៅកាន់អ្នកស្ដាប់ជាជាងខ្លួនឯង។ ស្គាល់ពីកម្រិតនៃការចេះដឹងរបស់ពួកគេ ដូចនេះអ្នកនឹងមានភាពងាយស្រួលក្នុងការជ្រើសរើសពាក្យ និងភាសានៃការនិយាយ ដើម្បីឲ្យមានលក្ខណៈស៊ីគ្នា។
៣. លើកឡើងពីគោលបំណង
អ្នកគួរព្រាងទុកនូវប្រធានបទដែលអ្នកនឹងត្រូវនិយាយ ប្រាប់ពីគោលបំណងទូទៅ គោលបំណងជាក់លាក់ និងចំណុចសំខាន់ៗមួយចំនួនដែលត្រូវលើកឡើង។ ជាពិសេស ត្រូវធ្វើយ៉ាងណាឲ្យអ្នកស្ដាប់អាចចាប់អារម្មណ៍ទៅលើអ្នកបានក្នុងពេល ៣០វិនាទី ដំបូងនៃការថ្លែង។
៤. ស្ដាប់ការឲ្យយោបល់ពីអ្នកដទៃ
អ្នកត្រូវចេះស្ដាប់យោបល់ពីអ្នកដទៃ ហើយព្យាយាមកែលម្អខ្លួនឲ្យមានភាពប្រសើរឡើង។ ត្រូវចេះបត់បែនតាមស្ថានការតាមរយៈការវាស់ស្ទង់ពីទឹកចិត្តរបស់អ្នកស្ដាប់ចំពោះខ្លួនអ្នក។
៥. ធ្វើតាមធម្មជាតិរបស់ខ្លួន
អ្នកត្រូវនិយាយតាមរបៀបខ្លួនឯង ស្ទីលខ្លួនឯង ដោយមានទំនុកចិត្ត។ ការធ្វើបែបនេះ នឹងនាំឲ្យអ្នកស្ដាប់អាចជឿជាក់ ហើយផ្ដល់តម្លៃដល់រូបអ្នកជាមិនខាន។
៦. ប្រើភាសាដែលមានឥទ្ធិពល
អំឡុងពេលនៃការនិយាយ អ្នកអាចលាយបញ្ចូលនូវពាក្យកំប្លែងមួយចំនួនដើម្បីបង្កភាពរីករាយ កុំឲ្យធុញ។ មិនតែប៉ុណ្ណោះ អ្នកអាចនិទានរឿងផ្ទាល់ខ្លួនល្អៗ ដើម្បីជាការអូសទាញអារម្មណ៍របស់អ្នកស្ដាប់ឲ្យស្លុងតាមអ្នកជានិច្ច។
៧. កុំនិយាយតាមរបៀបអាន
អ្នកគួរចេះកត់ទុកនូវចំណុចសំខាន់ៗដែលអ្នកនឹងត្រូវនិយាយ ប៉ុន្តែមិនត្រូវអាននោះឡើយ។ ជាការប្រសើរ គឺត្រូវព្យាយាមប្រើក្រសែភ្នែកជាប់ជាមួយនឹងអ្នកស្ដាប់នៅពីខាងមុខរបស់អ្នក។ តែបើក្នុងករណីដែលខានមិនបាន អ្នកអាចអានបានខ្លះៗ ប៉ុន្តែកុំពឹងលើវាទាំងស្រុងពេក។
៨. ប្រើការលើកដាក់សំឡេង និងកាយវិការ
ការលើកដាក់សំឡេង និងប្រើកាយវិការជំនួយ គឺជាសារដ៏មានឥទ្ធិពលមួយ សម្រាប់ឲ្យអ្នកស្ដាប់ងាយតាមដាននូវចំណុចសំខាន់ៗដែលអ្នកចង់ប្រាប់ទៅកាន់ពួកគេ។
៩. បញ្ចប់ការនិយាយសង្ខេបអត្ថន័យ
មុននឹងបញ្ចប់ការនិយាយជាសាធារណរបស់អ្នក អ្វីដែលល្អ គឺអ្នកគួរតែសង្ខេបនូវអត្ថន័យជារួមមួយ និងសម្រង់ពាក្យល្អៗរបស់អ្នក សម្រាប់ផ្ដល់ឱកាសឲ្យអ្នកស្ដាប់អាចចងចាំនៅនាទីចុងក្រោយ។
១០. ប្រើឧបករណ៍បញ្ចាំង
ការប្រើប្រាស់ឧបករណ៍ជំនួយដើម្បីបញ្ចាំងនូវព័ត៌មានមួយចំនួនបន្ថែមក៏មានសារប្រយោជន៍ផងដែរ។ ឧបករណ៍ទាំងនោះមានដូចជា LCD Projector, Smart TV, Computer, VCD Player ជាដើម។
អត្ថបទទាក់ទង