តើ​ការ​តាន​តឹង​ចិត្ត​គឺជា​អ្វី?

ការ​តាន​តឹង​ចិត្ត ​គឺ​ជា​ការ​ប្រែប្រួល ឬ​ប្រតិកម្ម​នៃ​អារម្មណ៍ដែល​កើត​មាន​នៅ​ពេល​បុគ្គល​ជួប​ប្រទះ​ហេតុ​ការណ៍ ឬក៏​បញ្ហា​លំបាក​ផ្សេងៗ​ក្នុង​ជីវិត​រស់​នៅ​ដែល​ត្រូវ​ប្រឈម​មុខ​ដោះ​ស្រាយ។ ព្រឹត្តិការណ៍​ជីវិត បណ្ដាល​ឲ្យ​មនុ​ស្សមានភាព​តានតឹង​ផ្លូវចិត្ត​។ មនុស្ស​មានប្រតិកម្ម​ផ្សេងៗ​ពីគ្នា ទៅនឹង​ព្រឹត្តិការណ៍​ជីវិត​ដូចគ្នា ហើយ​មនុស្ស​ខ្លះ​ទទួលរង​ការឈឺចាប់​ផ្លូវចិត្ត​ច្រើនជាង​អ្នកដទៃ​។

ចិត្តគឺជាការជួបពិសោធន៍អត្តនោម័តផ្ទាល់ខ្លួននៃបុគ្គលម្នាក់ៗចំពោះអ្វីមួយដែលតែងតែប្រែប្រួលជានិច្ចពីខណៈពេលមួយទៅខណៈពេលមួយទៀត។

ទស្សនៈនៃ “ចិត្ត” គឺពិបាកយល់ ហើយនៅក្នុងភាសាផ្សេងៗគេយល់ឃើញផ្សេងៗគ្នាផងដែរ។ ពាក្យថាចិត្តនៅក្នុងព្រះពុទ្ធសាសនា ជាភាសាសំស្រ្កឹតគឺចិត្តៈ (ចិតតាក់) ហើយពាក្យនេះមានអត្ថន័យទូលំទូលាយច្រើនបែបច្រើនយ៉ាងណាស់។ វារាប់បញ្ចូលទាំងចក្វាយតនៈផង ទាំងពាក្យសំដីផង ទាំងទស្សនៈអរូបីផង ទាំងអារម្មណ៍ផង ទាំងអារម្មណ៍នៃសេចក្តីសុខ និងអារម្មណ៍នៃសេចក្តីទុក្ខផង ទាំងការយកចិត្តទុកដាក់ផង ទាំងការភាវនា និងទាំងបញ្ញាផងដែរ ហើយក៏នៅមានច្រើនទៀតដែរ។ នៅពេលណាដែលព្រះពុទ្ធសាសនានិយាយអំពីចិត្ត នោះគឺគេសំដៅទៅលើរាល់ប្រភេទនៃសកម្មភាពផ្លូវចិត្តទាំងនោះ។

បុព្វ​ហេតានស​ការ​តាន​តឹង​ចិត្ត

មូលហេតុ​នៃ​ភាព​តានតឹង​ផ្លូវចិត្ត​របស់​មនុស្ស មាន​ពីរ​ គឺមូលហេតុ​ខាងក្រៅ និង​ខាងក្នុង​។ មូលហេតុ​ខាងក្រៅនៃ​ភាព​តានតឹង​ផ្លូវចិត្ត បណ្ដាលមកពី​បញ្ហា​ទាក់ទង​នឹង​សង្គម ការធ្វើទំនាក់ទំនង ការងារ សង្គម​បរិយាកាស និង​ជំងឺ​ផ្លូវកាយ​ជាដើម​។ មូលហេតុ​ខាងក្នុង បណ្ដាលមកពី​វិធី​​គិតរបស់​បុគ្គល និង​មាន​អារម្មណ៍​ដូចជា ការទិតៀន​ខ្លួនឯង ភាពមិនច្បាស់លាស់ ឬ​ព្រួយបារម្ភ​មានគំនិត​អវិជ្ជមាន សុ​ក្រិត​និយម ការ​ឲ្យ​តម្លៃ​ខ្លួនឯង​ទាប​។

ក្នុង​ការ​រស់​នៅ​ប្រចាំ​ថ្ងៃ ជា​ទូទៅ​យើង​តែង​តែ​ជួប​ប្រទះ​បញ្ហា​ជា​ច្រើន​ដែល​ជា​បុព្វ​ហេតុ​ធ្វើ​ឲ្យ​យើង​តាន​តឹង​ចិត្ត​ដូច​ជា ទំនាស់​ក្នុង​គ្រួសារ ជីវភាព​ក្រលំបាក បន្ទុក​ការងារ​ច្រើន​ហួស​ពេក ការ​មិន​យល់​ចិត្ត​គ្នាការ​មិន​ចុះ​សម្រុង​ក្នុង​ការងារ ការ​បំពេញ​ការងារ​ពុំ​បាន​ជោគ​ជ័យ ការ​គិត​ព្រួយ​ចំពោះ​ហេតុ​ការណ៍​ក្នុង​អនាគត និង​ជំងឺ​រ៉ាំរ៉ៃ​ប្រចាំ​កាយ​ជា​ដើម។

ចំពោះ​យុវជន​ដែល​កំពុង​តែ​ស្ថិត​ក្នុង​វ័យ​សិក្សា ជាទូទៅ គេ​អាច​មាន​អារម្មណ៍​តាន​តឹង​នៅ​ពេល​ជិត​ប្រឡង កំពុង​ប្រឡង ដឹង​ថា​ប្រឡង​ធ្លាក់ ពេល​មិន​ចុះ​សម្រុង​ជា​មួយ​មិត្តភក្តិ ជា​មួយ​គូស្នេហ៍ ជា​មួយ​គ្រួសារ ពេល​ទទួល​ការ​ស្ដីបន្ទោស​ពី​អាណាព្យាបាល ឬ​ពី​គ្រូ​ប្រចាំថ្នាក់ ពេល​ឪពុកម្ដាយ ​ឬ​បងប្អូនឈ្លោះទាស់​ទែង​បែក​បាក់​គ្នា ពេល​ឪពុកម្ដាយ អាណាព្យាបាល ឬសមាជិក​ក្នុង​គ្រួសារ​សេព​គ្រឿង​ញៀន​រហូត​បាត់ ហើយ​បាត់​បង់​ស្មារតី ហើយ​បង្ក​បញ្ហា​អវិជ្ជមាន​ផ្សេងៗ​ក្នុង​គ្រួសារ ពេល​ស្ថិត​នៅ​ក្នុង​ស្ថាន​ភាព​ទីទាល់​ក្រ ខ្វះ​ខាត​ប្រាក់​កាស​ក្នុង​ការ​រៀន​សូត្រ ភាព​អត់​ការងារ​ធ្វើ​រួម​នឹង​បញ្ហា​ផ្សេងៗ​ជា​ច្រើន​ទៀត។

អាការៈ​នៅពេល​មាន​ការ​តានតឹង​ចិត្ត

  • ​អាការៈ​ផ្នែក​អារម្មណ៍ និង​ចិត្ត៖ នៅក្នុង​ពេល​ដែល​យើង​ប្រឈមមុខ​នឹង​បញ្ហា​ស្មុគស្មាញ​ដែល​បង្ក​ឲ្យ​មាន​ការ​តាន​តឹងចិត្ត អារម្មណ៍​របស់​យើង​មាន​ការ​ប្រែប្រួល​ដែល​ងាយ​នឹង​ធ្វើ​ឲ្យ​យើង​មួម៉ៅ ឆេវឆាវ ឆាប់​ខឹង​ច្រឡោត នឿយ​ណាយ​ធុញ​ថប់​ក្នុង​អារម្មណ៍ ភ្លេច​ភ្លាំង​ច្រើន ខ្វល់ខ្វាយ​គិត​ព្រួយ​ច្រើន ពិបាក​ផ្ទង់​អារម្មណ៍​ក្នុង​ការ​បំពេញ​ការងារ​ស្រងូតស្រងាត់។ អាការៈ​ឆាប់​ខឹង​ច្រឡោត​ជា​រឿយៗ​ជំរុញ​ឲ្យ​អ្នក​តាន​តឹង​ចិត្ត​បង្កើត​អំពើ​ហិង្សា។
  • អាការៈ​ផ្នែក​រាង​កាយ៖ អស់​កម្លាំង ឈឺក្បាល ចុករោយសាច់ដុំ បរិភោគ​អាហារ​មិន​បាន ទទួល​ទាន​ដំណេក​មិន​លក់ ណែន​ទ្រូង ដង្ហើម​ផុតៗ ឆ្អល់​ពោះ គ្មាន​អារម្មណ៍​ផ្នែក​ផ្លូវ​ភេទ ចំពោះ​ស្ត្រី​អាច​មាន​រដូវ​ពុំ​ទៀងទាត់។
  • អាការៈ​នៃ​អាកប្បកិរិយា​៖ រសាប់រសល់ មិនរួសរាយ​រាក់​ទាក់ អសកម្មក្នុងការ​បំពេញ​ការងារ​ផ្សេងៗ ងាយ​មាន​ទំនាស់​ជា​មួយ​គេ​ឯង។ បុគ្គល​ខ្លះ​គិត​ខុស​ក៏​យក​បារី ស្រា គ្រឿងញៀន​ផ្សេងៗ​ធ្វើ​ជា​មធ្យោបាយ​បំបាត់​ភាព​តានតឹង។

មធ្យោបាយ​បំបាត់​ការ​តានតឹង​ចិត្ត

នៅ​ពេល​ដែល​យើង​មាន​អារម្មណ៍​តានតឹង និង​ស្មុគស្មាញ​ក្នុង​ចិត្ត យើង​ត្រូវ​ខិតខំ​ពង្រឹង​ផ្លូវ​ចិត្ត​របស់​យើង​ឲ្យ​បាន​រឹង​មាំ​ជា​ប្រចាំ ហើយ​គប្បី​រកវិធី​ដោះស្រាយ ដើម្បី​ឲ្យ​ការ​រស់​នៅ​របស់​យើង​ប្រកប​ដោយ​ស្ថាន​ភាព​ល្អ​ប្រសើរ។ មធ្យោបាយ​បំបាត់​ការ​តានតឹង​ផ្លូវ​ចិត្ត​មាន​ច្រើន​បែប​យ៉ាង​ប៉ុន្តែ​យើង​អាច​អនុវត្ត​វិធី​ងាយៗ​មួយ​ចំនួន​ដូច​ជា

  • រក​វិធី​ដោះស្រាយ​ល្អៗ បណ្ដុះ​គំនិត​សុទិដ្ឋិនិយម​ប្រកប​ដោយ​ទស្សនវិជ្ជមាន ព្រម​ទាំង​មាន​ក្ដីសង្ឃឹម​ជានិច្ច​ចំពោះ​អនាគត។
  • ទទួល​ទាន​អាហារ​ឲ្យ​ទៀង​ទាត់​ពេល​វេលា សម្រាកឲ្យ​គ្រាប់​គ្រាន់ និង​ធ្វើ​កិច្ច​ការ​កម្សាន្ត​សប្បាយ​ផ្សេងៗ​ដែល​យើង​ចូលចិត្ត​ដូច​ជា ការ​ថែ​សួន ថែច្បារ​ដំណាំ ថែ​សត្វ​ចិញ្ចឹម ឬ​ធ្វើ​កិច្ចការ​ផ្ទះផ្សេងៗ​ ។ល។
  • ជួប​សំណេះសំណាល​ជាមួយ​មិត្តភក្ដិ ឬ​អ្នក​ដែល​ជិតស្និត​បំផុត ដើម្បីនិយាយ​ពី​អារម្មណ៍​មួហ្មង​ទាំង​អស់​ប្រាប់​គ្នា​ទៅ​វិញ​ទៅ​មក។
  • ​ពិគ្រោះ​បញ្ហា​ជា​មួយ​អ្នក​ដែល​យើង​ទុកចិត្ត​និង​រាប់​អាន​បំផុត ដើម្បី​ឲ្យ​គេ​ជួយ​ផ្ដល់​កម្លាំង​ចិត្ត​ក្នុង​ការ​ដោះ​ស្រាយ​បញ្ហា​ដែល​យើង​ជួប​ប្រទះ។
  • ស្ដាប់​ឱវាទ​ចាស់​ព្រឹទ្ធាចារ្យ ឬ​ព្រះសង្ឃ។
  • ​លេង​កីឡា ស្ដាប់​ភ្លេង ទស្សនាភាពយន្ត រឿងកំប្លែង ការ​ប្រគំតន្ត្រី ដើរ​កម្សាន្ត​លំហែកាយ ឬ​ចូល​រួម​ការងារ​សង្គម​ផ្សេងៗ។
  • ​សម្រាក​មួយ​រយៈ​ពី​ការ​សិក្សា ឬ​ការងារ ហើយ​ចាប់​ផ្ដើម​ឡើង​វិញ។
  • ​ព្យាយាម​ធ្វើ​លំហាត់​ចិត្ត​កាយ និង សមាធិ ដែល​ជាធម្យោបាយ​ហាត់​រៀន​គ្រប់គ្រង​អារម្មណ៍ និង​ហាត់​ពត់​ចិត្ត​ឲ្យ​មាន​ភាព​រឹងមាំ។
  • ប្រតិបត្តិ​តាម​ជំនឿ​សាសនា​ដូច​ជា​ការ​បន់ស្រន់ សែន​ព្រេន​ជាដើម ប្រសិន​បើ​យើង​មាន​ជំនឿ។

សម្រួលពី

  • Study Buddhism
  • សៀវភៅ យុវជន​ និង​ការ​ថែទាំ​សុខភាពផ្លូវ​ចិត្ត

អត្ថបទទាក់ទង

រឿងខ្លី៖ វិធីធ្វើឱ្យខ្លួនឯងសប្បាយចិត្ត

 

Leave a Reply

Your email address will not be published. Required fields are marked *