កំហុសទូទៅចំនួន ៦ ក្នុងអាជីពដែលអ្នកគួរចៀសឲ្យផុត
កំហុស (នាមសព្ទ) សេចក្តីខុស។ កំហុសមានពីរ៖
១. កំហុសកើតចេញពីចេតនាអាក្រក់ ដូចជា កាប់សម្លាប់ លួច ឆក់ប្លន់ បោកប្រាស ជាដើម ទាំងនេះជាកំហុសដែលត្រូវវៀរចាក។
២. កំហុសកើតចេញពីចេតនាល្អ ដូចជា៖
- ពេលសិក្សារៀនសូត្រ ធ្វើលំហាត់ មានការភ្លាំងភ្លាត់
- ពេលរៀនជិះកង់ តែងភ្លាត់ដួលជាញឹកញាប់
- ពេលដកពិសោធន៍ការងារ តែងតែមានកង្វះខាតអ្វីម្យ៉ាង
- ពេលរៀននិយាយភាសាអ្វីមួយ តែងខុសវេយ្យាករណ៍ ឬឃ្លោងឃ្លាដ៏ច្រើន ជាដើម។
កំហុសទីពីរនេះ អ្នកត្រូវតែក្លាហានហ៊ានធ្វើនិងហ៊ានទទួល ទើបធ្វើឲ្យអ្នករីកចម្រើន។
មនុស្សម្នាក់ៗមិនដូចគ្នាទេ ប៉ុន្តែកំហុសដែលមនុស្សធ្វើមិនសូវខុសគ្នាប៉ុន្មានទេ។ លោកអ្នកប្រហែលធ្លាប់គិតអំពីកិច្ចការដែលលោកអ្នកគួរតែធ្វើដើម្បីអភិវឌ្ឍអាជីពឱ្យកាន់តែប្រសើរ។ ប៉ុន្តែក្នុងពេលជាមួយគ្នា រឿងសំខាន់មួយទៀតដែលត្រូវពិចារណាគឺរឿងដែលលោកអ្នកមិនគួរធ្វើ។
មនុស្សយើងទាំងអស់សុទ្ធតែបង្កើតកំហុសនៅក្នុងការងារក្នុងពេលណាមួយមិនខាន។ ទោះជាយ៉ាងណា ការបង្កើតកំហុសដដែលៗនឹងធ្វើឱ្យលោកអ្នកបាត់បង់គុណភាពនៃការរីករាយចំពោះការងារនិងជីវិតទាំងមូល។ ដំណឹងល្អគឺថា ភាគច្រើននៃកំហុសដដែលៗទាំងនេះងាយនឹងជៀសផុតណាស់។ ខាងក្រោមនេះ ជាកំហុសទូទៅក្នុងអាជីព និងរបៀបដែលលោកអ្នកអាចជៀសវាងបាន៖
១. ខ្លាចការបង្កើតបណ្តាញទំនាក់ទំនង
ការរីកចម្រើនក្នុងអាជីពស្ថិតនៅលើមនុស្សណាខ្លះដែលលោកអ្នកស្គាល់។ ដូច្នេះហើយ ហេតុអ្វីបានជាមនុស្សធ្វើការវិជ្ជាជីវៈជាច្រើនឈប់បង្កើតបណ្តាញទំនាក់ទំនង? មនុស្សធ្វើការវិជ្ជាជីវៈជាច្រើនបោះបង់ការបង្កើតបណ្តាញទំនាក់ទំនងក្រោយពេលគេសម្គាល់ឃើញថាគ្មានបានទទួលប្រយោជន៍ភ្លាមៗពីទំនាក់ទំនង។ ទោះជាយ៉ាងណា បើគ្មានទំនាក់ទំនងទេ មានមនុស្សតិចនាក់ណាស់ដែលគិតដល់លោកអ្នកនៅពេលឱកាសកើតឡើង។ បន្តិចម្តងៗ ឱកាសនឹងរីកស្ងួត។ ទោះជាយ៉ាងលោកអ្នកដើរដល់ចំណុចណានៃអាជីពក៏ដោយ ក៏លោកអ្នកគួរតែបន្តស្វែងរកនិងរក្សាទំនាក់ទំនងវិជ្ជាជីវៈជានិច្ចដែរ។
២. បោះបង់ចោលការរៀនសូត្រ
ដូចគ្នានឹងអ្នកមានវិជ្ជាជីវៈជាច្រើនដែលបោះបង់ចោលការបង្កើតបណ្តាញទំនាក់ទំនង មនុស្សជាច្រើនខ្ជិលរៀនអំពីការអភិវឌ្ឍអាជីពរបស់ខ្លួនឯង។ គឺពេលដែលលោកអ្នកឈប់រៀននេះហើយដែលលោកអ្នកចាប់ផ្តើមធ្វើឱ្យគាំងដំណើររីកចម្រើនក្នុងអាជីព។ បើលោកអ្នកឈប់រៀនយូរទៅ លោកអ្នកនឹងក្លាយទៅជាមនុស្សដែលដើរលែងទាន់សម័យកាលដែលផ្លាស់ប្តូរជានិច្ច។ បង្កើតគំនិតចង់ចេះចង់ដឹងរឿងគ្រប់យ៉ាងជុំវិញខ្លួន ហើយបន្តរៀនអំពីវិស័យការងាររបស់លោកអ្នកគ្រប់ពេល។
៣. បង្កើតកំហុសដដែលៗ
នៅក្នុងកម្រិតមួយ កំហុសជារឿងដែលជៀសមិនរួច។ មនុស្សតិចនាក់ណាស់ដែលឈានទៅដល់កម្រិតវិជ្ជាជីវៈកាន់តែខ្ពស់ដោយមិនបានបង្កើតកំហុស។ ការបង្កើតកំហុសក្នុងដំណើររីកចម្រើនមិនមែនជារឿងអាក្រក់ទេ បើលោកអ្នកអាចរៀនពីកំហុសរបស់ខ្លួនឯង។ បើលោកអ្នកមិនរៀនពីកំហុសរបស់ខ្លួនឯងទេ ជីវិតអាជីពរបស់លោកអ្នកនឹងមិនអាចរីកចម្រើនបានទេ ហើយលោកអ្នកនឹងបង្កើតកំហុសដដែលៗ។ តើលោកអ្នកអាចជៀសផុតពីបញ្ហានេះបានដោយរបៀបណា? គឺរៀនពីកំហុសរបស់ខ្លួនឯង។ បើលោកអ្នកអាចទទួលស្គាល់កំហុសហើយ សូមរៀនពីកំហុសនោះផង ហើយជៀសវាងនៅពេលអនាគត។
៤. មិនសុំប្រាក់ខែឱ្យច្រើនដូចការចង់បាន
លោកអ្នកប្រហែលពិបាកនិយាយសុំប្រាក់ខែក្នុងកម្រិតដែលសមនឹងតម្លៃពលកម្មឬជំនាញរបស់លោកអ្នកណាស់។ មនុស្សជាច្រើនបង្ខំចិត្តទទួលយកប្រាក់ខែដែលទាបជាងសមត្ថភាពរបស់ខ្លួនឯង ដោយរំពឹងថាថ្ងៃណាមួយនឹងមានការមើលឃើញហើយទទួលបានការតម្លើងយ៉ាងសក្តិសម។ ទោះជាយ៉ាងណា នេះជាកំហុសដ៏ធំមួយដែលលោកអ្នកមិនគួរបណ្តោយឱ្យកើតឡើងទេ។ បើលោកអ្នកទទួលបានប្រាក់ខែមិនសក្តិសម លោកអ្នកនឹងបាក់ទឹកចិត្តមិនចង់ធ្វើការឱ្យអស់ពីសមត្ថភាពទេ។
៥. ធ្វើការហួសពេលកំណត់
អ្នកនិពន្ធDouglas Adam ធ្លាប់និយាយថា «ខ្ញុំចូលចិត្តពេលកំណត់ណាស់។ ហើយខ្ញុំចូលចិត្តស្តាប់សំឡេងហោះរំលងនៃពេលកំណត់នោះ។» បើទោះជាលោកអ្នកអាចភ្ជាប់ទំនាក់ទំនងទៅនឹងបទពិសោធន៍បែបនេះ ក៏លោកអ្នកដឹងដែរថាលោកអ្នកកំពុងតែបណ្តោយឱ្យឱកាសរំលងទៅដែរ។ ការធ្វើខ្លួនឱ្យគេទុកចិត្តបានក៏មានសារៈសំខាន់ដូចគុណភាពនៃការងារដែលលោកអ្នកធ្វើដែរ។ បើលោកអ្នកធ្វើការមិនទាន់ពេលកំណត់ញឹកញាប់ លោកអ្នកនឹងបង្កើតកេរ្តិ៍ឈ្មោះមិនល្អទេ ហើយកេរ្តិ៍ឈ្មោះអាក្រក់គ្មានជួយអ្វីបានក្នុងការអភិវឌ្ឍអាជីពរបស់លោកអ្នកទេ។ ដើម្បីជៀសវាងកំហុសបែបនេះ លោកអ្នកត្រូវមានទាំងភាពស្មោះត្រង់និងភាពក្លាហានពេលទទួលយកគម្រោងអ្វីមួយមកធ្វើ។ កុំត្រឹមតែធ្វើជាមនុស្សព្រមទទួលយកកិច្ចការគ្រប់បែបយ៉ាងដែលលើសពីសមត្ថភាព។
៦. ធ្វើការគ្រប់ពេល
មនុស្សជាច្រើនមានបញ្ហាភ័ន្តច្រឡំថាការធ្វើកិច្ចការច្រើននាំឱ្យអ្នកដទៃមើលឃើញថាជាមនុស្សមានផលិតភាពខ្ពស់ ហើយការយកពេលសម្រាកពីការងារជាសញ្ញានៃភាពទន់ខ្សោយ។ បើលោកអ្នកធ្វើការច្រើនពេក លោកអ្នកនឹងបាក់កម្លាំងនៅពេលណាមួយ។ ការងារដែលលោកអ្នកធ្វើក៏គ្មានប្រសិទ្ធភាព ហើយលោកអ្នកក៏គ្មានតុល្យភាពល្អរវាងការងារនិងជីវិតទេ។ ដើម្បីទទួលបានលទ្ធផលល្អ លោកអ្នកត្រូវចេះកំណត់ពេលសម្រាកជាអាទិភាពមួយ។
អត្ថបទទាក់ទង