​វិធីសាស្រ្តសាមញ្ញចំនួន ៥ ​ដែល​លោកអ្នក​អាច​រៀន​ពី​កំហុស​ និង​បរាជ័យ​ដើម្បី​ក្រោក​ដើរ​លើ​ផ្លូវ​ទៅ​រក​ជោគជ័យ

កំហុស នាមសព្ទ សេចក្តីខុស។

បរាជ័យ (ប៉ៈរ៉ាជៃ) នាមសព្ទ ( សំ. បា. បរាជយ ) ការចាញ់, ដំណើរចាញ់គេ។ ពាក្យនេះខ្មែរយើងប្រើជា កិ. ក៏មាន។ ខាងពួកយើងមានជ័យ ខាងពួកបច្ចាមិត្តបរាជ័យទៅហើយ ។ ព. ផ្ទ. ជ័យ

កំហុស និងបរាជ័យ ពិតជាបានជួយកែប្រែគុណភាពជីវិតបានពិតមែន ប្រសិនបើគេបានសិក្សារៀនសូត្រពីវាឲ្យបានត្រឹមត្រូវ។ សូមកុំបាក់ស្បាតដោយសារវាអី ព្រោះមនុស្សជោគជ័យក៏សុទ្ធតែមានពិសោធន៍ក្នុងរឿងនេះទាំងអស់។ ពេលវេលាដែលល្អបំផុត គឺការបង្កើតភាពខ្លាំងពីការលំបាក ស្វែងរកហេតុផលដើម្បីញញឹម ប្រសើរជាងស្វែងរកហេតុផលដើម្បីសម្រក់ទឹកភ្នែក!

បរាជ័យ​ ជាផ្នែក​មួយ​នៃ​ជីវិត​។ ការ​ចាត់ទុក​បរាជ័យ​ជា​ជំហាន​ទៅ​រក​ផ្លូវ​ជោគជ័យ​ នឹង​ជួយ​លោកអ្នក​ទទួល​បាន​ប្រយោជន៍​បំផុត​ពី​បទពិសោធន៍​ដ៏​ឈឺចាប់​នេះ​។ មុន​ពេល​លោកស្រី​ អារៀនណា ហាហ្វហ្វីងតុន (Arianna​ Huffington)​ បង្កើត​ក្រុមហ៊ុន​ Huffington​ Post​ ស្ថាប័ន​បោះពុម្ព ៣៦ កន្លែង ​បាន​បដិសេធ​មិនព្រម​ទទួលយក​ស្នាដៃ​របស់​លោកស្រី​ទៅបោះពុម្ពនោះទេ​។ មុន​ពេល​លោក វ៉លត៍ ឌីសនី​ (Walt​ Disney)​ បង្កើត​អាណាចក្រ​ Disneyland​ មាន​គេ​ប្រាប់​លោក​ថា​ជា​មនុស្ស​ដែល​ខ្វះ​គំនិត​ច្នៃប្រតិដ្ឋ​។ ក្រុមហ៊ុន​ទីមួយ​របស់​លោក ប៊ីល ហ្គេត​ (Bill ​ Gates​) មិន​មាន​មនុស្ស​ស្គាល់​ច្រើន​ទេ​។

គ្មាន​នរណា​ចង់​បរាជ័យ​ទេ​ ប៉ុន្តែ​សូម្បីតែ​មនុស្ស​វៃឆ្លាត​ និង​ជោគជ័យ​បំផុត​ ក៏​ត្រូវ​ប្រឈម​នឹង​បញ្ហា​នៅក្នុង​ដំណាក់កាល​ខ្លះ​នៃ​ជីវិត​ដែរ​។ ជីវិត​នេះ​ ឡើងចុះ​មិនឈប់​ទេ​។ កំហុស​ខ្លះ​ធំ​ កំហុស​ខ្លះ​តូច​។ បរាជ័យ​របស់​លោកអ្នក​គំរាមកំហែង​បំផ្លាញ​អ្វី​ៗទាំងអស់​ដែល​លោកអ្នក​ប្រឹងប្រែង​បង្កើត​ឡើង​។ ប៉ុន្តែ​ ទោះជា​ជួប​បញ្ហា​អ្វីក៏ដោយ​ មិន​ត្រូវ​ចាក់សោ​ខ្លួនឯង​ទុក​ក្នុង​ការ​សោក​ស្តាយ​ទេ​។ វិញ្ញាសា​ក្នុង​ជីវិត​របស់​លោកអ្នក ​គឺ​របៀប​ដែល​លោកអ្នក​ដោះស្រាយ​រឿង​បរាជ័យ​។ ខាងក្រោម​នេះ​ ជា​យុទ្ធ​សាស្រ្ត​សាមញ្ញ​ដែល​លោកអ្នក​អាច​រៀន​ពី​កំហុស​ និង​បរាជ័យ​ដើម្បី​ក្រោក​ដើរ​លើ​ផ្លូវ​ទៅ​រក​ជោគជ័យ​៖

១. ទទួលស្គាល់​ថា​ការ​អន់ចិត្ត​ជា​រឿង​ធម្មតា​

ទោះបី​លោកអ្នក​ធ្លាក់​ដល់​បាត​ជម្រៅ​នៃ​បញ្ហា​ ឬជួប​ឧបសគ្គ​ជាបន្តបន្ទាប់​ ក៏​ការពិត​មួយ​ដែល​លោកអ្នក​ពិបាក​ប្រកែក​បាន​គឺ​លោកអ្នក​មាន​អារម្មណ៍​អន់ចិត្ត​។ បណ្តោយ​ឱ្យ​ខ្លួន​លោកអ្នក​ទទួលយក​អារម្មណ៍​មិន​សប្បាយចិត្ត​ទាំងនោះ​ ហើយ​ស្វែងរក​មធ្យោបាយ​ផ្សេង​ៗដើម្បី​ជម្រុះ​អារម្មណ៍​អវិជ្ជមាន​ទាំងអស់​ចេញ​ ដូចជា​ស្រែក​ ហក់លោត​ រត់​ ដើរ​ក្នុង​ព្រៃ​ ឬធ្វើ​យ៉ាងណា​ឱ្យ​ចិត្ត​លោកអ្នក​ស្រឡះ​។ បន្ទាប់មក​ត្រូវ​បោះជំហាន​ទៅមុខ​ទៀត​។

២. ពិចារណា​មេរៀន​

លោកអ្នក​ត្រូវតែ​ស្មោះត្រង់​បំផុត​ចំពោះខ្លួន​ឯង​។ តើមាន​រឿង​អ្វីខ្លះ​ដែល​បាន​កើតឡើង​? តើ​លោកអ្នក​ធ្វើខុស​ត្រង់​ចំណុច​ណាខ្លះ​? ហេតុអ្វី​? រៀន​ពី​កំហុស​ដើម្បី​ជៀសវាង​បញ្ហា​កាន់តែ​ធំ​នៅ​ថ្ងៃខាងមុខ​ គឺ​ការបង្កើត​កំហុស​ដដែល​ៗ។ សូមសួរ​សំណួរ​ខ្លួនឯង​ក្រោយពេល​ជួប​បរាជ័យ​៖

  • តើ​ខ្ញុំ​បាន​ទទួល​មេរៀន​អ្វីខ្លះ​ពី​ស្ថានភាព​នេះ​?
  • តើមាន​លទ្ធផល​វិជ្ជមាន​អ្វីខ្លះ​ពី​ស្ថានភាព​នេះ​?
  • តើ​បទពិសោធន៍​នេះ​បាន​ជួយ​អ្វីខ្លះ​ឱ្យ​ខ្ញុំ​រីកចម្រើន​?

លំហាត់​នៃ​ការពិចារណា​នេះ ​នឹង​ជួយ​លោកអ្នក​ឱ្យ​មើលឃើញ​ឱកាស​ថ្មី​ៗដែល​នឹង​កើត​ចេញពី​បរាជ័យ​។

៣. ទទួលយក​បរាជ័យ​ជាផ្នែក​មួយ​នៃ​ជីវិត​

ឱបក្រសោប​បរាជ័យ​របស់​លោកអ្នក​។ កុំ​ព្យាយាម​លាក់បាំង​វា​។ បរាជ័យ​មិន​អាច​រក​ដំណោះស្រាយ​ដោយខ្លួនឯង​បានទេ​ វា​ត្រូវការ​ឱ្យ​លោកអ្នក​ដោះស្រាយ​។ ដូច្នេះ​ការ​ព្រងើយកន្តើយ​ចំពោះ​បញ្ហា​បាន​ត្រឹមតែ​រុញច្រាន​លោកអ្នក​ឱ្យ​ធ្លាក់​កាន់តែ​ជ្រៅ​ទៅ​ក្នុង​រណ្តៅ​ប៉ុណ្ណោះ​។ សូម​ចងចាំ​ថា​ កំហុស​ជាផ្នែក​ចាំបាច់​មួយ​នៃ​ការរស់នៅ​របស់​មនុស្ស​។ កំហុស​ខ្លះ​ជា​រឿង​ជៀស​មិន​រួច​ទេ​នៅពេល​លោកអ្នក​ក្រោក​ចេញពី​កន្លែង​សំងំសុខ​។ មនុស្ស​អស្ចារ្យ​ភាគច្រើន​នៅក្នុង​ប្រវត្តិ​សាស្រ្ត​សុទ្ធតែ​ឆ្លងកាត់​បរាជ័យ​យ៉ាងច្រើន​មិនចាញ់​ជោគជ័យ​ដែលគេ​ទទួល​បានទេ​។

៤. ធ្វើជា​ម្ចាស់ការ​លើ​កំហុស​

បើ​លោកអ្នក​ពិតជា​បាន​បង្ហាញ​ភាព​ស្មោះត្រង់​ចំពោះ​កំហុស​និង​បាន​រៀន​ពី​បទពិសោធន៍​មែន​ ក៏​នៅ​មាន​ភាព​ចាំបាច់​មួយទៀត​គឺ​លោកអ្នក​ត្រូវ​ធ្វើជា​ម្ចាស់ការ​នៃ​ស្ថានការណ៍​ដែល​បាន​កើតឡើង​។ ការ​ធ្វើជា​ម្ចាស់ការ​ចំពោះ​កំហុស​ជា​គន្លឹះ​ដើម្បី​បង្ហាញ​អ្នកដទៃ​ឱ្យ​ឃើញថា​លោកអ្នក​ជា​មនុស្ស​ដែល​មាន​ទំនួល​ខុសត្រូវ​និង​រស់នៅ​ដោយ​ភាព​សុចរិត​។ ស្តាប់​ទៅ​ដូចជា​ខុសទំនង​បន្តិច​ ប៉ុន្តែ​ការ​ដាក់​កំហុស​នៅ​ខាងមុខ​អាជីព​នឹង​ធ្វើ​ឱ្យ​មនុស្សដទៃ​មានទំនុក​ចិត្ត​កាន់តែ​ច្រើន​លើ​លោកអ្នក​។ មនុស្សដទៃ​ងាយ​នឹង​ទុកចិត្ត​លោកអ្នក​នៅពេល​ត្រូវការ​ឱ្យ​គេ​ជួយ​ម្តង​ទៀត​។

៥. កំណត់​និយមន័យ​ថ្មី​នៃ​បរាជ័យ​

ការកំណត់​និយមន័យ​ថ្មី​នៃ​បរាជ័យ​របស់​លោកអ្នក​អាច​ជា​ឱកាស​ដើម្បី​ផ្លាស់​ប្តូរ​គោលដៅ​និង​ជា​ការពិចារណា​ឡើងវិញ​ចំពោះ​មហិច្ឆតា​ដែល​លោកអ្នក​បាន​ទុកចោល​យូរ​មក​ហើយ​។ លោកអ្នក​ប្រហែល​នឹង​ឃើញថា​ខ្លួនឯង​កំពុងតែ​ដើរ​លើ​ផ្លូវ​ថ្មី​ដែល​កាន់តែ​រីករាយ​ជាង​មុន​ទៅទៀត​។ ពិចារណា​ស្ថានភាព​អវិជ្ជមាន​ឡើងវិញ​ដោយ​ការ​ចាត់ទុកថា​បរាជ័យ​ជា​មេរៀន​ធំ​មួយ​នៃ​ជីវិត​ ឬជា​បទពិសោធន៍​យ៉ាង​មានតម្លៃ​ដែល​លោកអ្នក​មិន​អាច​ទទួល​បាន​នៅក្នុង​របៀប​ផ្សេងទៀត​។ បរាជ័យ​បង្រៀន​លោកអ្នក​ឱ្យ​ដឹង​ថា​វិធី​សាស្រ្ត​មួយចំនួន​ប្រហែល​មិនល្អ​ទេ​សម្រាប់​ស្ថានភាព​ខ្លះ​ ប៉ុន្តែ​ប្រហែល​មាន​វិធី​សាស្រ្ត​ដែល​ប្រសើរ​ជាង​នេះ​។ គ្រប់ពេល​ដែល​លោកអ្នក​បរាជ័យ​ អារម្មណ៍​ខ្លាច​បរាជ័យ​របស់​លោកអ្នក​នឹង​បាត់បង់​ទៅ​ ហើយ​បទពិសោធន៍​នេះ​អនុញ្ញាត​ឱ្យ​លោកអ្នក​កាន់តែ​ហ៊ាន​ប្រឈម​នឹង​ការ​ប្រថុយ​ដែល​ធំជាង​នេះ​ទៀត​។ ទោះជា​លោកអ្នក​បរាជ័យ​ញឹកញាប់​កម្រិត​ណាក៏ដោយ​ ក៏​លោកអ្នក​នៅតែ​មិនមែន​ជា​មនុស្ស​បរាជ័យ​ដែរ​ ដរាបណា​លោកអ្នក​មិនព្រម​បោះបង់ចោល​ការ​ព្យាយាម​។

ប្រភព​យោង៖

  • វចនាក្រមខ្មែរ
  • Entrepreneur​

  • អត្ថបទទាក់ទង

Leave a Reply

Your email address will not be published.