កំហុសទូទៅទាំង ៧ ដែលអ្នកដឹកនាំវ័យក្មេងតែងតែធ្វើ ប៉ុន្តែមិនត្រូវធ្វើ

កំហុស នាមសព្ទ សេចក្តីខុស ។ ភាពជា​អ្នកដឹកនាំ គឺ​សំដៅលើ​បុគ្គល​ដែលមាន​ឥទ្ធិពល​ក្នុងការ​គ្រប់គ្រង និង​ចាត់ចែង​កិច្ចការ ព្រមទាំង​បង្កើត​យុទ្ធសាស្ត្រ ដើម្បី​ឲ្យ​អ្នកក្រោមបង្គាប់​អនុត្ត​ន៍​តាម​ប្រកបដោយ​ប្រសិទ្ធ​ផល និង​ប្រសិទ្ធភាព​នៃ​ការងារ។

ពាក្យចាស់​តែង​ពោលថា កំហុស​ច្រើនតែ​ផ្តល់​នូវ​ឱកាស​សិក្សា​យ៉ាង​អស្ចារ្យ​សម្រាប់​អ្នក​ដែល​បាន​សាង​វា​ហើយ​។ ទោះបីជា​យ៉ាងណា​ក៏ដោយ យក​ល្អ​គួរតែ​កុំ​ធ្វើឲ្យ​មាន​កំហុស​ជា​លើកដំបូង​អី​!

កាលពី ៧ ឆ្នាំមុន ចំនួនក្មេងៗវ័យជំទង់ក្នុងសហសវត្សរ៍ (Millennials) បានកើនឡើងហួស ចំនួនមនុស្សវ័យកណ្តាល (Gen Xers) ហើយពួកគេបានក្លាយទៅជាក្រុមការងារទោលមួយដែលធំជាងគេបង្អស់នៅក្នុងសហរដ្ឋអាម៉េរិក នេះបើយោងតាមការសិក្សាស្រាវជ្រាវមួយដែលបានធ្វើឡើងដោយ PEW Research។ នេះមានន័យថាមានមនុស្សវ័យក្មេងកាន់តែច្រើននឹងស្រូបយកតំណែង តួនាទីក្នុងថ្នាក់ដឹកនាំ និងគ្រប់គ្រង។ ខណៈពេលដែលពួកគេនឹងចូលទៅកាន់តំណែង និងតួនាទីទាំងនោះ ពួកគេអាចនឹងប្រព្រឹត្តកំហុសដំបូងរបស់ពួកគេដូចនឹងអ្វីដែលអ្នកដឹកនាំថ្មីដទៃទៀតតែងតែប្រព្រឹត្ត ដែលវាបានក្លាយទៅជាប្រពៃណីទៅហើយ។

បុគ្គលិកលក្ខណៈដែលសំខាន់បំផុតក្នុងការក្លាយខ្លួនជាអ្នកដឹកនាំនោះ គឺការបើកចិត្តឲ្យទូលាយ។ អ្នកដឹកនាំអាជីវកម្មដែលមានចរិតក្រអើតក្រទម អាចឈានដល់ត្រឹមតែកម្រិតមួយតែប៉ុណ្ណោះ គឺនៅពេលដែលពួកគេគ្មានសមត្ថភាពក្នុងការទទួលយកមតិត្រឡប់ពីអ្នកដទៃ ឬគិតយកតែគំនិតខ្លួនឯងជាធំ។ ខណៈពេលដែលជួយបង្កើនល្បឿនការងារឲ្យកាន់តែលឿន ពួកគេនឹងមិនស្តាប់ពាក្យទូន្មានល្អៗដែលអ្នកដឹកនាំចិត្តទូលាយតែងតែប្រើដើម្បីបម្រើសមាជិកក្នុងក្រុមការងាររបស់គេឲ្យបានប្រសើរនោះទេ។

ក្នុងនាមជាអ្នកដឹកនាំថ្មីម្នាក់ អ្នកត្រូវចាប់ផ្តើមធ្វើការគិតពិចារណាដើម្បីវាយតម្លៃភាពខ្លាំងរបស់អ្នក ថាតើកន្លែងណាដែលអ្នកត្រូវការការអភិវឌ្ឍបន្ថែម និងថាតើអ្នកត្រូវធ្វើដូចម្តេចខ្លះដើម្បីចៀសវាងបង្កើតកំហុសតិចតួចថ្មី។

១. ការមើលមិនដឹងថាការបណ្តុះបណ្តាលបុគ្គលិក គឺជាទំនួលខុសត្រូវបន្តមួយ

វាពិតជាគួរឲ្យចាប់អារម្មណ៍ក្នុងការដែលគិតថាការបណ្តុះបណ្តាលបុគ្គលិកគឺគ្រាន់តែជារយៈពេលខ្លីមួយ ពី ២ ទៅ ៣ សប្តាហ៍ ដែលអ្នកជួលអ្នកបណ្តុះបណ្តាលមកពីខាងក្រៅធ្វើការហ្វឹកហ្វាត់ ដើម្បីពន្លឿនការងារឲ្យកាន់តែលឿនតាមដែលអាចធ្វើបាន។ ប៉ុន្តែការពិតនោះគឺ ២-៣ សប្តាហ៍ដំបូងនៃវគ្គបណ្តុះបណ្តាល គឺគ្រាន់តែជាការរំលឹកនូវព័ត៌មានមូលដ្ឋានសាមញ្ញៗ ដែលបុគ្គលិកនឹងត្រូវការដឹងដើម្បីទទួលបានភាពជោគជ័យប៉ុណ្ណោះ។

ការបណ្តុះបណ្តាលបុគ្គលិកគឺ ត្រូវតែជាដំណើរការបន្តមួយតាមរយៈ ការដែលអ្នកអាចផ្តល់មតិត្រឡប់ត្រង់ៗទៅកាន់សមាជិកនៅក្នុងក្រុមរបស់អ្នក ហើយផ្តល់នូវឱកាសថ្មីៗទៅកាន់បុគ្គលិកក្នុងការអភិវឌ្ឍខ្លួនគាត់ឲ្យកាន់តែមានជំនាញ។

ជាកាពិតណាស់ ការបណ្តុះបណ្តាលបុគ្គលិកដំបូងគឺ ជាផ្នែកមួយដ៏សំខាន់ក្នុងការធ្វើឲ្យស្ថាប័នរបស់អ្នកឈានទៅរកភាពជោគជ័យ។ ប៉ុន្តែវគ្គបណ្តុះបណ្តាលមិនអាចបញ្ចប់នៅត្រឹមនោះបានទេ។ ផ្ទុយមកវិញ អ្នកត្រូវត្រឡប់ទៅមើលទំព័រមួយនៃសៀវភៅរបស់ AT&T ។ អង្គការ/ស្ថាប័ននៅបន្តបណ្តុះបណ្តាលបុគ្គលិកដើម្បីធានាថាពួកគាត់មានជំនាញដែលក្រុមហ៊ុនកំពុងតែត្រូវការដើម្បីទទួលបានភាពជោគជ័យ ក្នុងពិភពលោកដែលកំពុងតែមានភាពផ្លាស់ប្តូរមួយនេះ។

២. កំណត់អ្នកកាន់តួនាទី B ឬ C ដើម្បីមកបំពេញតំណែងឲ្យបានឆាប់រហ័ស

ការជួលបុគ្គលិកគឺ ជាទំនួលខុសត្រូវមួយដ៏សំខាន់បំផុតសម្រាប់អ្នកដឹកនាំអាជីវកម្មទាំងឡាយ។ ស្វែងរកមនុស្សដែលឆ្លាត និងជួយពួកគេឲ្យចេះទំនាក់ទំនងជាមួយអ្នកដទៃដើម្បីដោះស្រាយបញ្ហាចម្បងណាមួយ គឺជាអ្វីដែលបែងចែកភាពខុសគ្នារវាងអ្នកដឹកនាំអាជីវកម្មម្នាក់ និង បុគ្គលរួមចំណែកដ៏មានទេពកោសល្យម្នាក់។

ហេតុនេះហើយ កំហុសដ៏ធ្ងន់ធ្ងរបំផុតដែលអ្នកដឹកនាំវ័យក្មេងអាចនឹងបង្ករគឺការកំណត់យកបេក្ខជនដែលខ្វះទេពកោសល្យមកបំពេញតំណែងឲ្យទាន់ពេលវេលា។ អ្នកមិនត្រូវធ្វើខុសដោយការកំណត់យកទេពកោសល្យរបស់បុគ្គលណាម្នាក់មកគ្រាន់តែបង្គ្រប់ថ្ងៃផុតកំណត់នៃការប្រកាសរកបុគ្គលិកនោះទេ។ ផ្ទុយមកវិញ អ្នកត្រូវធ្វើការជាមួយនឹងក្រុមការងារផ្នែកធនធានមនុស្ស ឬ ជនទីបីដែលជាអ្នកជ្រើសរើសបុគ្គលិកដើម្បីទទួលបាននូវផ្លែផ្កាជាទីគាប់ចិត្ត។

ក្នុងរយៈពេលវែង ការរង់ចាំដើម្បីស្វែងរកបុគ្គលិកដ៏ត្រឹមត្រូវម្នាក់រយៈពេល ២ ទៅ ៣ សប្តាហ៍ ឬ ២ ទៅ ៣ ខែ នឹងធ្វើឲ្យអ្នកងាយស្រួលនឹងទទួលបានភាពជោគជ័យ និង ជួយស្ថាប័នរបស់អ្នកឲ្យជួបបទពិសោធន៍អាចដោះស្រាយបញ្ហាប្រឈមដែលមើលទៅហាក់ដូចជាមិនអាចដោះស្រាយបាន។

៣. ការព្រងើយកន្តើយក្នុងការប្រគល់ការងារដែលលំបាកៗឲ្យបុគ្គលិកធ្វើ

អ្នកដឹកនាំដែលខ្វះបទពិសោធន៍ តែងតែចូលចិត្តគ្រប់គ្រងលើគម្រោងទាំងមូលដែលពួកគេតែងតែមានអារម្មណ៍ថាវាមានលក្ខណៈស្មុគស្មាញសម្រាប់ក្រុមការងាររបស់គេក្នុងការរៀបចំ។ ខណៈពេលមានការយល់ដឹងអំពីភាពខ្លាំង និង ភាពខ្សោយរបស់អ្នកនៅក្នុងក្រុមជាកត្តាសំខាន់មួយ តែវារឹតតែសំខាន់ថែមទៀតនៅពេលដែលអ្នកប្រគល់ឱកាសឲ្យបុគ្គលិករបស់អ្នកទទួលបានការរីកចម្រើនលូតលាស់ទៅមុខតាមរយៈការកំណត់ប្រគល់ការងារដែលមានលក្ខណៈពិបាកជាងសព្វដងឲ្យពួកគេធ្វើ។

កំណត់ ឬ ចាត់តាំងកិច្ចការងារទាំងនេះដោយដឹងជាស្រេចថាអ្នកចាំបាច់ត្រូវយកចិត្តទុកដាក់ក្នុងការរៀបចំកិច្ចការទាំងនេះនៅរាល់ជំហាននីមួយៗ។ លើសពីនេះអ្នកមិនត្រូវរារែកក្នុងការចែករំលែកនូវមតិយោបល់ជាមួយនឹងប្រធានក្រុមកិច្ចការនោះទេ ព្រោះដើម្បីធានាថាពួកគេបានរៀនសូត្រពីកំហុសដែលគេបានធ្វើ។

៤. ការមិនយល់ពីសារៈសំខាន់នៃការគ្រប់គ្រងគម្រោងបែបមជ្ឈការ

ការងារជាអ្នកដឹកនាំអាជីវកម្មម្នាក់ គឺធ្វើយ៉ាងណាអាចអូសទាញមនុស្សដែលមានសមត្ថភាពមកប្រមូលផ្តុំ ដើម្បីជួយដោះស្រាយបញ្ហាលំបាក។ ជាជាងគ្រាន់តែជាបុគ្គលរួមចំណែកក្នុងស្ថាប័ន ហើយទំនួលខុសត្រូវដ៏ធំបំផុតរបស់អ្នក គឺការសម្របសម្រួល។ ដើម្បីធ្វើវាឲ្យមានភាពងាយស្រួលសម្រាប់ក្រុមការងាររបស់អ្នកអាចធ្វើការរួមគ្នា អ្នកនឹងត្រូវបន្ថែមឱកាសមួយចំនួនដែលសមាជិកក្រុមរបស់អ្នកនឹងអាចធ្វើការដោះស្រាយបានប្រកបដោយគំនិតច្នៃប្រតិដ្ឋ។

ដើម្បីជួយសម្រួលដល់ការទំនាក់ទំនងឆ្លងក្រុម និងដើម្បីស្វែងយល់ឲ្យកាន់តែប្រសើរអំពីកិច្ចការដែលសមាជិកក្រុមរបស់អ្នកកំពុងតែធ្វើ អ្នកអាចទទូចឲ្យក្រុមការងាររបស់អ្នកអនុវត្តដំណើររំហូរការងារ ដែលមានលក្ខណៈមជ្ឈការដើម្បីធ្វើការគ្រប់គ្រងគម្រោងការងារទាំងមូលបានរលូន។ យ៉ាងណាមិញ អ្នកត្រូវទទួលស្គាល់ថាពុំមានឧបករណ៍សញ្ញាណាមួយ ដែលប្រើសម្រាប់ដោះស្រាយបញ្ហាការទំនាក់ទំនងក្នុងក្រុមឡើយ បើទោះបីជាមានជំនួយពីឧបករណ៍គ្រប់គ្រងគម្រោងដូចជា Trello, Asana និង Jira ក៏ដោយ។

អ្វីដែលជាកត្តាចម្បងបំផុតទៀតនោះ គឺអ្នកប្រើប្រាស់ប្រព័ន្ធដែលអាចធ្វើឲ្យបុគ្គលិករបស់អ្នករក្សាការធ្វើគម្រោងបច្ចុប្បន្នភាពរបស់ពួកគេប្រកបដោយតម្លាភាព។ ការធ្វើបែបនេះ នឹងជួយដល់ការប្រាស្រ័យទំនាក់ទំនងក្នុងក្រុមការងារបានល្អ។

៥. មិនធ្វើផែនការសម្រាប់ការអភិវឌ្ឍបុគ្គលិក និងការផ្តល់រង្វាន់លើកទឹកចិត្ត

ការសិក្សាមួយដែលបានធ្វើឡើងដោយលោក Glassdoor បានរកឃើញថាក្នុងចំណោមបុគ្គលិក ដែលនិយាយថាពួកគេកំពុងពិចារណាការចាកចេញពីការងាររបស់គេបច្ចុប្បន្ន ៤៥% បានលើកឡើងថាប្រាក់បៀវត្សរ៍ប្រចាំខែ គឺជាកត្តាជម្រុញទឹកចិត្តធំជាងគេក្នុងការចាកចេញពីក្រុមហ៊ុនបច្ចុប្បន្ន។ ការសិក្សាដោយឡែកមួយទៀតបានរកឃើញថា ប្រហែលជា ៧៥% នៃបុគ្គលិកទាំងអស់ចាកចេញពីកន្លែងការងាររបស់គេនៅពេលកំពុងត្រូវបានផ្លាស់ប្តូរតួនាទី។ យើងអាចសន្និដ្ឋានបានថា ឧទាហរណ៍ទាំងនេះ គឺជាកត្តាដែលបុគ្គលិកគាត់ចាកចេញដើម្បីទទួលបាននូវតំណែង ឬប្រាក់បៀវត្សរ៍ខ្ពស់ជាងនេះ។

ការជួលបុគ្គលិកដែលជំនាញម្នាក់ គឺមានប្រសិទ្ធិភាពតែនៅពេលដែលអ្នកចេះរក្សាពួកគេឲ្យនៅស្ថាប័នរបស់អ្នកបានប៉ុណ្ណោះ។ ដើម្បីធានាថាបុគ្គលិកទាំងនោះមានអារម្មណ៍ថាពួកគាត់ត្រូវបានគេគោរព ឲ្យតម្លៃ និងបន្តជំរុញទឹកចិត្ត អ្នកត្រូវបង្កើតផែនការជារង្វាន់លើកទឹកចិត្ត និងការអភិវឌ្ឍបុគ្គលិក។ វាជាផែនការដ៏ឆ្លាតវៃមួយក្នុងការរៀបចំគម្រោងនេះឲ្យបានមុន ព្រោះអ្នកមិនចាំបាច់ចែករំលែកព័ត៌មាននេះជាមួយបុគ្គលិកដោយផ្ទាល់នោះទេ។

៦. ការព្រងើយកន្តើយចំពោះការអភិវឌ្ឍផ្ទាល់ខ្លួន

ក្នុងនាមជាអ្នកដឹកនាំវ័យក្មេង វាមានការលំបាកក្នុងការស្វែងរកពេលវេលាសម្រាប់វិនិយោគលើការអភិវឌ្ឍជំនាញ និងអាជីពរបស់អ្នក។ យ៉ាងណាមិញ ការអភិវឌ្ឍខ្លួនឯងនឹងជួយឲ្យអ្នកក្លាយជាអ្នកដឹកនាំប្រសើរជាងនេះ និងជួយអ្នកឲ្យប្រកបការងារបានកាន់តែស្ទាត់ជំនាញ។ អ្នកគួរស្វែងរកពេលវេលាដើម្បីរៀនជំនាញថ្មីៗ មិនថាជាជំនាញទន់ (ជំនាញចរចារ និងវត្តមានអ្នកគ្រប់គ្រង) ឬជំនាញរឹង (សិក្សាអំពីទិន្នន័យបែបវិទ្យាសាស្រ្ត)។

អ្នកត្រូវកំណត់គោលដៅអភិវឌ្ឍន៍ខ្លួនឯងឲ្យបានច្បាស់លាស់ និងចែករំលែកនូវគោលដៅនោះជាមួយអ្នកគ្រប់គ្រងរបស់អ្នក។ ប្រសិនបើអ្នកគ្រប់គ្រងរបស់អ្នកជាមនុស្សល្អ គាត់នឹងរីករាយដែលដឹងថាអ្នកមានការជំរុញចិត្តឲ្យបន្តលូតលាស់ក្នុងការងារ ហើយពួកគាត់គួរតែធ្វើការជាមួយអ្នកដើម្បីធ្វើផែនការអភិវឌ្ឍមួយ។

៧. ការរំពឹងទុកថាតុល្យភាពការងារ និងជីវិតនឹងមិនប្រែប្រួល ខណៈពេលដែលការងារវិវត្តទៅមុខ

ខណៈពេលដែលអ្នកមាននូវទំនួលខុសត្រូវថ្មីៗកាន់តែច្រើនក្នុងស្ថាប័នរបស់អ្នក នោះអ្នកនឹងចាំបាច់ត្រូវធ្វើការបន្ថែមកាន់តែច្រើន។ វាគឺងាយស្រួលយល់ដូចនេះឯង។ អ្នកមិនត្រូវរំពឹងថាតុល្យភាពការងារ និងជីវិតដែលអ្នកបានបង្កើតឡើងក្នុងនាមជាអ្នកចូលរួមម្មាក់ នឹងរក្សានៅសភាពដដែលនោះទេ ពីព្រោះនឹងមានមនុស្សផ្សេងៗនឹងរាយការណ៍ផ្ទាល់មកអ្នក។

ស្របពេលដែលអ្នកនៅអាចមានពេលវេលាផ្តាច់ខ្លួនចេញពីការងារខ្លះ អ្នកត្រូវកំណត់ការរំពឹងទុកដែលអាចនឹងកើតឡើងសម្រាប់ខ្លួនឯង។ បើទោះបីជាអ្នកព្យាយាមលម្អិតការងាររបស់អ្នក ដើម្បីបង្កើនប្រសិទ្ធិភាពយ៉ាងណាក៏ដោយ ធ្វើជាអ្នកដឹកនាំល្អម្នាក់ គឺមានន័យថាអ្នកមានពេលវេលាគ្រប់គ្រាន់សម្រាប់បុគ្គលិករបស់អ្នក។ អ្នកត្រូវបង្កើតដែនកំណត់មួយដែលអាចបត់បែនបាន ហើយផ្តល់ឲ្យអ្នកនូវពេលវេលាក្នុងការប្រមូលថាមពលមកវិញ ខណៈពេលដែលអ្នកស្ថិតក្នុងតួនាទីមួយដែលត្រូវធ្វើការឆ្លើយតបចំពោះតម្រូវការរបស់ក្រុមការងារអ្នកនៅពេលដែលពួកគេដើរតួនាទីយ៉ាងសំខាន់។

ក្នុងនាមជាអ្នកដឹកនាំអាជីវកម្មក្មេងម្នាក់ អ្នកនឹងឃើញអនាគតដ៏ត្រចះត្រចង់នៅពីចំពោះមុខរបស់អ្នក។ រឿងដែលអ្នកនឹងត្រូវរៀនសូត្រក្នុងរយៈពេលប៉ុន្មានឆ្នាំបន្ទាប់ នឹងជួយកំណត់ជំនាញនាអនាគតរបស់អ្នក។ ចាប់យកដំណើរផ្សងព្រេង ហើយធ្វើឲ្យក្លាយជាចំណុចមួយដែលអ្នកនឹងយកគន្លឹះដែលបានរៀនសូត្រនៅទីនេះមកអនុវត្តក្នុងវិជ្ជាជីវៈជីវិតរបស់អ្នក។

ប្រភព៖ Entrepreneur


អត្ថបទទាក់ទង

ដំណើរការទាំង ៩ ជំហាន ដើម្បីធ្វើប្រតិភូកម្មការងារប្រកបដោយប្រសិទ្ធភាព

Leave a Reply

Your email address will not be published.