កត្តាសំខាន់ៗចំនួន ៥ ដែលធ្វើឱ្យអ្នកក្លាយជាមេដឹកនាំទឹកមាត់សាប ប្រើបុគ្គលិកថ្នាក់ក្រោមមិនសូវបានដូចចិត្ត

អ្នកប្រហែលជាធ្លាប់ជួបមេដឹកនាំ ២ប្រភេទ ដែលម្នាក់ជាមេទឹកមាត់ប្រៃ ឬជាមេដែលនិយាយអ្វីបុគ្គលិកចង់ស្ដាប់ ចង់ធ្វើតាម និងមេទឹកមាត់សាប ជាមេដែលមានតែមុខតំណែង ប៉ុន្តែខ្វះឥទ្ធិពលដែលនិយាយស្ដីអ្វីមួយធ្វើឱ្យបុគ្គលិកមិនចង់ស្ដាប់ មិនចង់ធ្វើតាម ដែលពេលខ្វះពេលដែលប្រើបុគ្គលិកឱ្យបំពេញការងារណាមួយ គឺមានភាពពិបាកខ្លាំង ដូចអូសឬស្សីបញ្ច្រាស់ចុងអ៊ីចឹងដែរ។

តើ​និយោជិត​អាចទទួលបានអារម្មណ៍លើកទឹកចិត្តដោយរបៀបណា ប្រសិន​បើធ្វើការ​មិន​ដឹង​ថ្ងៃ​ណា​បាន​ឡើង​តួនាទី មាន​ភាព​ធុញទ្រាន់ កង្វះទំនុកចិត្ត​លើ​ការ​សម្រេចចិត្ត​របស់​អ្នក​គ្រប់គ្រង​ដែល​រារែក និង​តែងតែ​ទម្លាក់​បន្ទុក​ការងារ​ដែល​មិន​អាចគ្រប់គ្រងបាន មិនអាចកសាង​បរិយាកាស​ការងារ​ដែល​មិន​សមស្រប កង្វះ​វឌ្ឍនភាព​អាជីព​ឲ្យ​កូនចៅ មិនដែលបង្រៀន ឬ​បញ្ជូន​ទៅ​រៀន ។ល។

ខាងក្រោមនេះ គឺជាកត្តាសំខាន់ៗចំនួន ៥ ដែលធ្វើឱ្យអ្នកក្លាយជាមេដឹកនាំទឹកមាត់សាប ប្រើបុគ្គលិកថ្នាក់ក្រោមមិនសូវបានដូចចិត្ត៖

១. ប្រាប់មិនសូវច្បាស់ពីអ្វីត្រូវធ្វើ

អ្នកត្រូវច្បាស់ថាតើនៅរាល់ពេលដែលអ្នកប្រាប់ពីកិច្ចការងារដែលចង់ឱ្យថ្នាក់ក្រោមឱ្យពួកគាត់ធ្វើថាតើវាមានភាពច្បាស់លាស់ឬនៅ តើគាត់យល់ច្បាស់ពីអ្វីដែលគាត់នឹងត្រូវធ្វើហើយឬនៅជាដើម។ កំហុសរបស់មេមួយចំនួន គឺមិនបានបង្ហាញឱ្យច្បាស់ថាខ្លួនចង់បានអ្វី ហើយបុគ្គលិកម្នាក់នោះគួរធ្វើអ្វីជាដើម ដែលពេលណាបុគ្គលិកម្នាក់នោះមិនយល់ច្បាស់ពីអ្វីដែលខ្លួនត្រូវធ្វើ គាត់នឹងមិនហ៊ានធ្វើ ឬមិនចង់ធ្វើកិច្ចការងារនោះទេ។

២. ការងារនោះមិនផ្ដល់ប្រយោជន៍រួម

ចំណុចមួយដែលធ្វើឱ្យបុគ្គលិកម្នាក់នោះមិនចង់បំពេញការងារតាមអ្វីដែលមេបានប្រាប់នោះ គឺអាចដោយសារតែការងារនោះ ប្រសិនបើសម្រេចជោគជ័យហើយនោះវាមិនបានផ្ដល់ប្រយោជន៍រួមដល់ស្ថាប័នទាំងមូល តែផ្ទុយទៅវិញវាអាចផ្ដល់ប្រយោជន៍ឱ្យតែមេដែលបង្គាប់បញ្ជាតែម្នាក់ ឬតែមួយក្រុមតូចណាមួយជាដើម ដែលចំណុចទាំងនោះហើយធ្វើឱ្យវាមានភាពពិបាកបន្តិចក្នុងការប្រើឱ្យបុគ្គលិកណាម្នាក់បំពេញការងារ។​

៣. ការងារលំបាកធំលើសពីសមត្ថភាព

វាអាចដោយសារតែបញ្ហាទាក់ទងនឹងសមត្ថភាពរបស់បុគ្គលិកម្នាក់នោះ នៅស្ទើរជាងកិច្ចការងារដែលគាត់ត្រូវធ្វើ បូករួមជាមួយគាត់ជាមនុស្សដែលមិនសូវមានភាពក្លាហាន និងមិនសូវពូកែនិយាយស្ដី មិនហ៊ានសួរ ទើបបានជាធ្វើឱ្យបុគ្គលិកម្នាក់នោះមិនចង់ធ្វើការងារនោះ។ អាស្រ័យហេតុនេះ ក្នុងនាមជាមេ អ្នកត្រូវចេះប៉ាន់ស្មានទំហំការងារជាមួយនឹងសមត្ថភាពបុគ្គលិកម្នាក់នោះផង។

៤. ខ្វះការលើកទឹកចិត្ត

បុគ្គលិក គឺជាមនុស្សមានអារម្មណ៍ មានមនោសញ្ចេតនា មិនមែនជារូប៉ូតដែលគ្មានវិញ្ញាណ គ្មានអារម្មណ៍ និងគិតតែធ្វើការងារ ២៤ម៉ោង រហូតនោះទេ។ អាស្រ័យហេតុនេះហើយ ក្នុងនាមជាមេ អ្នកត្រូវចេះលើកទឹកចិត្ត ចេះពោលពាក្យសរសើរពេលបុគ្គលិកណាម្នាក់បំពេញការងារបានល្អ ឬសម្រេចគោលដៅរបស់ស្ថាប័ន។ កំហុសដ៏ធំមួយក្នុងនាមជាមេដឹកនាំ គឺពេលបុគ្គលិកធ្វើខុសចូលចិត្តស្ដីបន្ទោស ប៉ុន្តែពេលបុគ្គលិកធ្វើបានល្អ ភ្លេចពោលពាក្យសរសើរលើកទឹកចិត្ត ឬធ្វើមើលពុំឃើញ។

៥. ខ្វះភាពស្មោះត្រង់

ក្រឡេកមើលទៅសកម្មភាពពីមុន តើអ្នកធ្លាប់ប្រើបុគ្គលិកណាម្នាក់ ដើម្បីចង់តេស្តសាកល្បងសមត្ថភាព ឬគ្រាន់តែចង់ដាក់សម្ពាធដល់បុគ្គលិកម្នាក់នោះដែរឬទេ? ប្រសិនបើអ្នកធ្លាប់ធ្វើបែបនេះ នោះវាជាកំហុសឆ្គងដ៏ធំមួយដែលបុគ្គលិកអាចមើលយល់ពីចេតនារបស់អ្នក គ្រាន់តែបុគ្គលិកម្នាក់នោះមិនហ៊ានហាស្ដីចេញមកក្រៅ។ ទង្វើបែបនេះ វាធ្វើឱ្យបុគ្គលិកអាចវាយតម្លៃមេរបស់ខ្លួនថាជាមនុស្សដែលខ្វះភាពស្មោះត្រង់ ហើយរាល់ការងារដែលមេដាក់ឱ្យ គឺគ្រាន់តែចង់ដាក់សម្ពាធ ឬតេស្តសាកល្បងសមត្ថភាពរបស់គាត់តែប៉ុណ្ណោះ។ ​នៅពេលដែលបុគ្គលិកមានផ្នត់គំនិតបែបនេះហើយ នោះមានន័យថា អ្នកប្រហែលក្លាយជាមេដែលមានទឹកមាត់សាប និងមិនសូវមានឥទ្ធិពលលើបុគ្គលិកម្នាក់នោះទៀតនោះទេ។ ​ដូច្នេះ ចូររក្សាឱ្យបាននូវភាពស្មោះត្រង់ជាមួយបុគ្គលិកគ្រប់រូប និងរាល់មនុស្សជុំវិញខ្លួន ដើម្បីធ្វើឱ្យគេគោរពស្រលាញ់ និងបង្កើតឥទ្ធិពលឱ្យគេស្ដាប់តាមរាល់អ្វីដែលអ្នកនិយាយ។


អត្ថបទទាក់ទង

ទម្លាប់ដឹកនាំប្រចាំថ្ងៃ ៤ យ៉ាង ដែលនឹងមានឥទ្ធិពលវិជ្ជមានលើក្រុមរបស់អ្នក

 

Leave a Reply