៣ ចំណុចសំខាន់ៗ ដើម្បីដឹកនាំអង្គប្រជុំមិនឲ្យខាតពេលវេលា និងធុញទ្រាន់
នៅក្នុងកិច្ចការអាជីវកម្មក្តី សិក្សាក្តី និងការស្រាវជ្រាវផ្សេងៗក្តី រមែងត្រូវមានកិច្ចពិភាក្សាមួយរបស់ខ្លួនដើម្បីស្រាវជ្រាវ ស្វែងរកយុទ្ធសាស្ត្រ ឬដំណោះស្រាយនានាសម្រាប់អនុវត្តឲ្យមានប្រសិទ្ធភាព។ ប៉ុន្តែការប្រជុំទាំងអស់ មិនមែនសុទ្ធតែទទួលបានផ្លែផ្កាទាំងអស់នោះទេ ពោលគឺវាមានកត្តាជាច្រើន ដូចជាប្រជុំបានលទ្ធផលហើយ តែកង្វះប្រសិទ្ធភាពក្នុងការអនុវត្ត។ មានការប្រជុំខ្លះទៀត បានដំណើរការមិនចប់ចុងចប់ដើម គ្មានអ្វីជាដុំកំភួនសោះ ដែលនេះនាំតែខាតពេលឥតប្រយោជន៍។
ខាងក្រោមនេះជាដំណើរការនៃការប្រជុំប្រកបដោយប្រសិទ្ធភាពដែលអ្នកអាចរៀនបាន៖
១. បង្កើតរបៀបវារៈ
ចូរលើកទឹកចិត្តឲ្យអ្នករាល់គ្នា រៀបចំឲ្យបានរួចរាល់មុននឹងចូលរួមប្រជុំ ជៀសវាងការមកដល់ទាំងប្រញាប់ប្រញាល់ ដោយមិនដឹងថានឹងត្រូវនិយាយពីអ្វី។ ការប្រជុំនឹងគ្មានប្រសិទ្ធភាពទេ ប្រសិននិយាយម្នាក់ឯង ហើយអ្នកចូលរួមទាំងអស់ត្រូវព្រមស្តាប់។
សូមចាប់ផ្តើមរៀនបង្កើតរបៀបវារៈ និងស្មារតីប្រជុំរួមគ្នា ដែលអាចមើលឃើញផលពិតៗ និងកែសម្រួលលើភាពខ្វះចន្លោះការងារ ដោយផ្តល់ឲ្យអ្នកចូលរួមទាំងអស់នូវឱកាសស្មើគ្នាផងដែរក្នុងការផ្តល់យោបល់។
២. កុំឲ្យការប្រជុំទៅជាបញ្ហាសងសឹកទំនាស់បុគ្គល
ចូរធ្វើឲ្យការប្រជុំ ក្លាយជាវេទិកាដែលមនុស្សជួបជុំគ្នា សប្បាយចិត្ត និងការដែលអាចពិភាក្សាអំពីគំនិតធ្វើការ ការសម្រេចចិត្ត និងការស្ដាប់មតិ មិនមែនជាការធ្វើឲ្យអាម៉ាស់ឡើយ។ ការប្រជុំ គឺជាកន្លែងដែលបង្កើតវប្បធម៌បញ្ចេញមតិ បង្កើតការច្នៃប្រតិដ្ឋ និងដើម្បីរីកចម្រើន។
ការអនុវត្តដ៏សំខាន់បំផុត គឺបោះជំហានចូលចំប្រធានបទ កុំនិយាយបង្វែរ ហើយក៏កុំអនុញ្ញាត្តិឲ្យមានការវាយប្រហារគ្នាដោយរឿងផ្សេងផងដែរ។ នៅពេលមានបុគ្គលម្នាក់ ឬពីរនាក់ដែលចាប់ផ្តើមត្រួតត្រាការសន្ទនា ចូររកវិធីទាញអ្នកផ្សេងឲ្យមានឱកាសនិយាយ។
តាមរយៈគំនិតនេះ មេដឹកនាំ អាចធ្វើជាដើរជុំវិញបន្ទប់ ហើយសួរទៅកាន់សមាជិកក្រុមដែលស្ងាត់ស្ងៀម ថាពួកគេមានអ្វីនិយាយដែរ?
ប្រយ័ត្នចំពោះការរំខាន។ ប្រសិនបើនរណាម្នាក់ ត្រូវបានគេកាត់ផ្តាច់កណ្តាលទី សូមផ្តល់ការគ្របដណ្តប់ជួយវិញ ដោយនិយាយថា “សូមឲ្យគាត់និយាយចប់សិន”។ ត្រូវចេះជំរុញបរិយាកាសស្វាគមន៍អ្នកមិនសូវពូកែនិយាយ ដោយលើកឡើងថា រាល់ទស្សនៈរបស់មនុស្សគ្រប់គ្នា គឺសំខាន់ ហើយមិនដែលខុសនោះទេ ទោះបីពេលខ្លះ ពួកគេមើលទៅសួរដូចជាឆោតយ៉ាងណាក៏ដោយ ក៏មានប្រយោជន៍ម្យ៉ាងសម្រាប់អង្គភាពដែរ។
៣. គោរពពេលវេលាមធ្យ័ត
នៅក្នុងសៀវភៅ “សិល្បៈនៃការគ្រប់គ្រង” របស់លោក Andy Grove អះអាងថា ការខ្ជះខ្ជាយពេលវេលារបស់និយោជិត គឺស្មើនឹងការលួចរបស់អ្វីមួយពីក្រុមហ៊ុន។ នេះអាចស្តាប់ទៅពិបាកបន្តិចមែន ប៉ុន្តែជាការពិត រាល់ការប្រមូលផ្តុំនិយោជិតនៅក្នុងបន្ទប់តែមួយ តំណាងឲ្យការចំណាយពេលវេលា ដូច្នេះបើធ្វើឲ្យគ្មានប្រយោជន៍ គឺជាការខាតបង់ដែលប៉ះពាល់ដល់ផលិតភាពក្រុមហ៊ុន។
លោក Grove មានប្រសាសន៍ថា “ការមិនអនុញ្ញាតឲ្យបុគ្គលិកណាម្នាក់ លួចបានសម្ភារៈការិយាល័យ ឬលុយ ឬពេលវេលា ក៏មិនគួរឲ្យមាននរណាម្នាក់មកអង្គុយស្រម៉ុកដកដង្ហើមចោលក្នុងពេលប្រជុំដែរ!”
ចុងបញ្ចប់ ការប្រជុំត្រូវគោរពតាមពេលវេលាកំណត់ សូម្បីតែការនិយាយ កុំឲ្យអូសបន្លាយពេក ប្រាសចាកប្រធានបទពេក និងត្រូវមានមេដឹកនាំអង្គប្រជុំដែលពូកែសម្របសម្រួលផងដែរ។
ជារួមមក ការដឹកនាំអង្គប្រជុំថ្ងៃដំបូង មនុស្សជាច្រើនគិតអំពីរបៀបរៀបចំខ្លួន និងមាតិកាដែលត្រូវនិយាយ ប៉ុន្តែរឿងសំខាន់ និងវៃឆ្លាត គឺគួរតែរំពៃរកនឹកឡើងវិញ អំពីការប្រជុំមិនល្អទាំងអស់ដែលយើងធ្លាប់ជួប និងមានអារម្មណ៍ធុញកាលនៅជាកូនចៅគេ។ ពេលរកឃើញហើយកាលណា សូមព្យាយាមជៀសវាង និងកុំត្រាប់ធ្វើដូចមេដឹកនាំអង្គប្រជុំពីមុននោះ ហើយអនុវត្តនូវវិធីសាស្រ្តខាងលើនេះ ដើម្បីដឹកនាំការប្រជុំប្រកបដោយប្រសិទ្ឋភាព។
“សម្របស្រួល សម្រួលធ្វើឲ្យស្រប សម្របធ្វើឲ្យស្រួល” “សម្រួលសម្រេច សម្រួលធ្វើឲ្យស្រេច សម្រេចធ្វើឲ្យស្រួល“
អត្ថបទទាក់ទង
បច្ចេកទេសប្រជុំ ៦ចំណុច ប្រកបដោយប្រសិទ្ឋិភាព ពីលោក ស្ទីវ ចបស៍