ជំនឿខុសឆ្ពងចំនួន ១០ ទាក់ទងនឹងនាយកប្រតិបត្តិជោគជ័យ
កន្លងមកយើងតែងសង្កេតឃើញថា មានអត្ថបទជាច្រើនដែលចុះផ្សាយពីនាយកប្រតិបត្តិ និងអ្នកដឹកនាំដែលទទួលបាននូវភាពជោគជ័យជាច្រើន នៅតាមបណ្ដាញផ្សព្វផ្សាយនានា។ ហើយមានអត្ថបទមួយចំនួនតូចដែលបានបញ្ជាក់ថា ដើម្បីទទួលបាននូវភាពជោគជ័យដូចជាមនុស្សទាំងអស់នោះ ទាមទារឲ្យមនុស្សម្នាក់ត្រូវមានបុគ្គលិកលក្ខណៈអស្ចារ្យមួយចំនួនជាដើម ។ល។ មានចំណុចខ្លះ គឺអាចនិយាយបានថាត្រឹមត្រូវ ក៏ប៉ុន្តែក៏នៅមានចំណុចមួយចំនួន ដែលមិនជាមិនត្រឹមត្រូវទាល់តែសោះ។ ខាងក្រោមនេះ គឹជាជំនឿចាស់គម្រិល និងខុសស្រឡះ ១០ ចំណុច ទាក់ទងនឹងភាពជាអ្នកដឹកនាំដ៏អស្ចារ្យម្នាក់៖
ជំនឿខុសឆ្ពងទី១៖ ពួកជាមនុស្សដែលរួសរាយរាក់ទាក់ (They’re extroverted leaders.)
អ្នកត្រូវដឹងថាសព្វថ្ងៃនេះ គឺយើងកំពុងរស់នៅក្នុងយុគសម័យ ដែលពោរពេញទៅដោយមនុស្សស្រគត់ស្រគំ និងមនុស្សដែលមិនសូវចេះនិយាយស្ដីច្រើន។ ហើយអ្នកគប្បីត្រូវដឹងថា មានមនុស្សដែលជោគជ័យ និងមហាសេដ្ឋីជាច្រើន សុទ្ធតែជាមនុស្សដែលស្រគត់ស្រគំ តួយ៉ាងមានដូចជាលោក ប៊ីល ហ្គេតស៍ (Bill Gates) លោក ឡារី ផេក (Larry Page) លោក វ៉ារិន ប៊ូហ្វេ (Warren Buffet) និងលោក ឆាលស៍ ស្វេប (Charles Schwab) ជាដើម។ ដូច្នេះ ចំណុចដែលបានលើកឡើងថា អ្នកដឹកនាំដែលអស្ចារ្យ គប្បីមានអត្តចរិតរួសរាយមកពីកំណើតនោះ គឺពិតជាចំណុចដែលខុសស្រឡះ ហើយគ្រាន់តែជាជំនឿបែបចាស់គម្រិលប៉ុណ្ណោះ។
ជំនឿខុសឆ្ពងទី២៖ ពួកគេជាមនុស្សដែលមានសំណាង ឬត្រូវបានជួយជ្រោមជ្រែងពីក្រុមគ្រួសារ ។ល។ (They’re privileged.)
អ្នកដឹកនាំ ក៏ដូចជានាយកប្រតិបត្តិជាច្រើន មិនមែនសុទ្ធតែមានសំណាងធ្លាក់មកពីលើមេឃ ហើយទទួលបានតំណែងកំពូលមួយនេះនោះទេ។ ប៉ុន្តែនាយកប្រតិបត្តិភាគច្រើន គឺខិតខំប្រឹងប្រែងធ្វើការស្ទើរតែស្មើរនឹងរាប់រយដងនៃមនុស្សទូទៅ មុនពេលដែលពួកគេទទួលបាននូវលទ្ធផលល្អដូចសព្វថ្ងៃនេះ។ ហើយបើសិនជានិយាយទៅ គឺពិតជាមានមនុស្សជោគជ័យមួយភាគតូចខ្លះពិតមែន ដែលមានអត្ថប្រយោជន៍ ច្រើនជាងគេបន្តិច ពីព្រោះកើតមកក្នុងគ្រួសារដែលមានទ្រព្យសម្បត្តិ និងគំនិតជោគជ័យរួចមកហើយ ក៏ប៉ុន្តែអ្នកត្រូវដឹងថា មានតិចតួចតែប៉ុណ្ណោះ ហើយបើសិនជាពួកគេមិនមែនជាមនុស្សដែលពូកែទេ ទោះទ្រព្យសម្បត្តិច្រើនប៉ុណ្ណាក៏ដោយ ក៏គង់តែរលាយដូចគ្នា ប៉ុន្តែដោយសារសមត្ថភាពដែលពួកគេមាន ទើបពួកគេនៅតែអាចរក្សាភាពជាអ្នកដឹកនាំ និងជាមនុស្សជោគជ័យរបស់ពួកគេបាន។
ជំនឿខុសឆ្ពងទី៣៖ ពួកគេជាមនុស្សដែលពូកែនៅក្នុងការបង្កើតទំនាក់ទំនង (They’re social networkers.)
នាយកប្រតិបត្តិភាគច្រើនបំផុត ដែលកំពុងធ្វើការនៅក្នុងក្រុមហ៊ុនកំពូលៗនានា គឺពិតជាមិនសូវចូលចិត្តចំណាយពេលក្នុងការប្រើប្រាស់ ឬមានវត្តមាននៅលើបណ្ដាញសង្គមប៉ុន្មាននោះទេ ហើយប្រសិនបើមានអ្នកខ្លះប្រើប្រាស់បណ្ដាញសង្គម ក៏ពួកគេមិនសូវជា Post ឬ Tweet ច្រើនណាស់ណាដែរ (នេះបើយោងទៅតាមរបាយការណ៍នានាដែលទទួលបាន)។ អ្វីដែលសំខាន់ជាងនេះទៅទៀតនោះ គឺនាយកប្រតិបត្តិភាគច្រើន គឺពិតជាមានភាពមមាញឹកខ្លាំង នៅក្នុងការដំណើរការក្រុមហ៊ុនរបស់ពួកគេ ហើយពួកគេពិតជាមិនអាចចំណាយពេលបានច្រើន នៅក្នុងការប្រើប្រាស់បណ្ដាញសង្គមឡើយ។
ជំនឿខុសឆ្ពងទី៤៖ ពួកគេជាមនុស្សដែលចង់រផ្សព្វផ្សាយពីខ្លួនឯង (They covet their personal brand.)
នៅពេលដែលមានការលើឡើងពីចំណុចមួយនេះ ដែលថានាយកប្រតិបត្តិមិនមែនជាមនុស្សដែលចង់ផ្សព្វផ្សាយពីម៉ាក ឬពីខ្លួនឯងនោះ តែងតែមានមនុស្សជាច្រើនបានធ្វើការលើកឡើងពីមហាសេដ្ឋី ម៉ាក ខ្យូបេន (Mark Cuban) និងប្រធានាធិបតីអាមេរិកលោក ដូណាល់ ត្រាំ (Donald Trump)។ ក៏ប៉ុន្តែអ្នកត្រូវដឹងថា ក្រោយពេលដែលអ្នកទទួលបាននូវទ្រព្យសម្បត្តិ រហូតដល់រាប់ពាន់លានដុល្លាហើយនោះ អ្នកអាចធ្វើការផ្សព្វផ្សាយពីខ្លួនឯងតាមដែលអ្នកចង់ ក៏ប៉ុន្តែប្រសិនបើអ្នកមិនទាន់ជោគជ័យបែបនេះនោះទេ អ្នកមិនអាចធ្វើតាមពួកគេបានឡើយ ហើយការដែលលើកឡើងថា អ្នកជោគជ័យចូលចិត្តផ្សព្វផ្សាយពីខ្លួនឯងនោះ គឺពិតជាការយល់ខុសធ្ងន់ធ្ងរបំផុត។
ជំនឿខុសឆ្ពងទី៥៖ ពួកគេជាអ្នកជំនាញទូទៅ (They’re generalists.)
សហគ្រិនដែលជោគជ័យភាគច្រើន គឺជាមនុស្សដែលពូកែក្នុងផ្នែកណាមួយលើសអ្នកដទៃ។ ជាឧទាហរណ៍លោក ម៉ាក ហ្សាក់ឃឺប៊ឺគ (Mark Zuckerberg) និងលោក ប៊ីល ហ្គេត (Bill Gates) គឺជាអ្នកសរសេរកូដដែលលេចធ្លោ។ លោក វ៉ារិន ប៊ូហ្វេ (Warren Buffet) និងលោក ឆាលស៍ ស្វេប (Charles Schwab) គឺជាអ្នកឯកទេសខាងវិស័យហិរញ្ញវត្ថុដ៏អស្ចារ្យជាដើម ។ល។
ជំនឿខុសឆ្ពងទី៦៖ ពួកគេមានកម្រិតភាពឆ្លាតវៃផ្នែកផ្លូវអារម្មណ៍ខ្ពស់ (They have high EQs.)
បើទោះជាកម្រិតនៃភាពឆ្លាតវៃផ្នែកផ្លូវអារម្មណ៍ ត្រូវបានគេទទួលស្គាល់ថា គឺជាផ្នែកមួយរបស់មនុស្សដែលជោគជ័យក៏ដោយ ក៏ប៉ុន្តែបើមនុស្សម្នាក់ដែលមានកម្រិត EQ ទាបក៏មិនប្រាកដថាមនុស្សម្នាក់នោះមិនអាចទទួលបាននូវភាពជោគជ័យនោះដែរ។
ជំនឿខុសឆ្ពងទី៧៖ ពួកគេជាអានសៀវភៅសេដ្ឋកិច្ច និងពាណិជ្ចកម្មច្រើន (They read loads of business books.)
យើងគ្រប់គ្នាបានដឹងហើយថា មនុស្សដែលជោគជ័យ គឺជាមនុស្សដែលចូលចិត្ត និងងប់ងល់ជាមួយនឹងការអានសៀវភៅ។ នៅក្នុងការជ្រើសរើសសៀវភៅដើម្បីអាន អ្នកជោគជ័យ គឺដូចគ្នាទៅនឹងមនុស្សទូទៅធម្មតាដែរ ពួកគេអានសៀវភៅដែលពួកគេចង់អាន ហើយចូលចិត្ត មានដូចជាអក្សរសាស្ដ្រ វិទ្យាសាស្ដ្រ ទស្សនវិទ្យា និងសៀវភៅគ្រប់មុខជំនាញ ហើយមិនមែនតែសៀវភៅសេដ្ឋកិច្ចតែមួយមុខនោះទេ។
ជំនឿខុសឆ្ពងទី៨៖ ពួកគេជាមនុស្សដែលតែងតែគិតវិជ្ជមាន (They’re positive thinkers.)
មនុស្សណាក៏ដោយក៏ចេះគិតពីចំណុចវិជ្ជមាន ហើយនិងអវិជ្ចមានដែរ ក៏ប៉ុន្តែអ្វីដែលមនុស្សជោគជ័យចូលចិត្តធ្វើ នៅពេលដែលពួកគេដឹងថាខ្លួនឯងត្រូវបានគំនិតអវិជ្ជមានកំពុងតែគ្របដណ្ដប់ហើយនោះ ពួកគេនឹងព្យាយាមឈប់គិតពីចំណុចអវិជ្ជមានទាំងនោះ ហើយប្រឹងប្រែងធ្វើកិច្ចការងារ និងជឿជាក់មកលើខ្លួនឯងខ្ពស់ ដែលទាំងនេះហើយនឹងអាចធ្វើអោយពួកគេ អាចមានលទ្ធភាព ធ្វើការសម្រេចចិត្តប្រកបដោយភាពឆ្លាតវៃ។
ជំនឿខុសឆ្ពងទី៩៖ ទម្លាប់ផ្ទាល់ខ្លួនរបស់ពួកគេ ធ្វើឲ្យមានការខុសប្លែក (Their personal habits make a big difference.)
សម្រាប់ចំណុចមួយនេះ គឺទម្លាប់ផ្ទាល់ខ្លួនប្រចាំថ្ងៃ មិនមែនជាអ្វីដែលធ្វើឲ្យមនុស្សម្នាក់ជោគជ័យនោះទេ ក៏ប៉ុន្តែការចេះបែងចែកពេលវេលា ធ្វើកិច្ចការណាដែលសំខាន់ និងមានប្រយោជន៍មុន ទើបជារឿងដែលធ្វើអោយមនុស្សម្នាក់ជោគជ័យទៅបាន។
ជំនឿខុសឆ្ពងទី១០៖ ពួកគេជាមនុស្សដែលពូកែនៅក្នុងការប្រាស្រ័យទាក់ទង (They’re awesome communicators.)
មាននាយកប្រតិបត្តិខ្លះ មិនចូលចិត្ត និយាយច្រើន ឆ្លើយសំណួរ ឬផ្ដល់បទសម្ភាសន៍ទៅដល់អ្នកសារពត៌មាននោះទេ ហើយក៏មាននាយកប្រតិបត្តិខ្លះក៏ចូលចិត្ត និងពូកែនិយាយផងដែរ។ នេះបានបញ្ជាក់ថា ទោះជាអ្នកជាមនុស្សដែលពូកែនិយាយ ឬមិនពូកែនិយាយក៏ដោយ អ្នកនៅតែអាចជោគជ័យបាន វាអាស្រ័យទៅលើរបៀបរបបនៅក្នុងការប្រាស្រ័យទាក់ទងរបស់អ្នកជាមួយនឹងអ្នកដទៃប៉ុណ្ណោះ។
សម្រួលពី៖ Steve Tobak, 10 Myths About Successful CEOs, Entrepreneur
អត្ថបទទាក់ទង
តើ CEO ដែលជោគជ័យមានយុទ្ធសាស្រ្តអ្វីខ្លះក្នុងការគ្រប់គ្រងពេលវេលា?