អន្ទាក់ទាំង ៥ ដែលអ្នកត្រូវចៀសវាង ដើម្បីសម្រេចចិត្តឲ្យបានល្អ
ការសម្រេចចិត្ត គឺជាការជ្រើសរើសជម្រើសនៅក្នុងចំណោមជម្រើសដទៃទៀតដែលអាចនាំឱ្យអ្នកទៅសម្រេចបានជាសមិទ្ធផលអ្វីមួយ ទោះបីជាតូចឬធំក៏ដោយ។ វាជារឿងសាមញ្ញទេ ដែលមនុស្សម្នាក់ៗត្រូវប្រឈមនឹងការសម្រេចចិត្ត ក៏ប៉ុន្តែពេលខ្លះអ្នកប្រាកដជាពិបាកខ្លាំងក្នុងការសម្រេចជ្រើសយកជម្រើសដែលល្អបំផុតសម្រាប់អ្នក។ លើសពីនេះ វាកាន់តែពិបាកជាងនេះទៅទៀត នៅពេលដែលជម្រើសខ្លះមានភាពស្រដៀងគ្នាខ្លាំង ហើយអ្នកមិនចង់បាត់បង់ជម្រើសណាមួយទៀតផងនោះ។ ជាក់ស្តែង ការសម្រេចចិត្ត គឺធ្វើទៅតាមលក្ខខណ្ឌដែលបានកំណត់ ប្រសិនបើជម្រើសនោះមិនដើរស្របតាមលក្ខខណ្ឌចង់បាន អ្នកប្រាកដរំលងជម្រើសនោះចោលជាក់ជាមិនខាន។
ដើម្បីសម្រេចចិត្តបានល្អ អ្នកត្រូវចៀសវាងពីការធ្លាក់ចូលក្នុងអន្ទាក់ទាំង ៥ ខាងក្រោមនេះ៖
១. រឿងល្អឥតខ្ចោះ
គ្មានរឿងដែលល្អឥតខ្ចោះទេ មានតែផ្លូវដែលប្រសើរជាងមុនប៉ុណ្ណោះ។ ការជាប់ក្នុងអន្ទាក់នៃគំនិតល្អឥតខ្ចោះ ធ្វើឱ្យលោកអ្នកមិនអាចរីកចម្រើនទៅណាបានទេ។ សូមនៅឱ្យឆ្ងាយពីការព្យាយាមសម្រេចគោលដៅដែលខ្ពស់ហួសការពិត។ សូមធ្វើជាមនុស្សប្រាកដនិយមឱ្យបានច្រើន។ សូមអភិវឌ្ឍខ្លួនបន្តិចម្តងៗជាប្រចាំដើម្បីតាមឱ្យទាន់ការផ្លាស់ប្តូរ។
២. ការអូសបន្លាយពេលវេលា
ការសម្រេចចិត្តមិនបានល្អ មានភាពលេចធ្លោច្បាស់នៅពេលលោកអ្នកព្រងើយកន្តើយចំពោះការធ្វើកិច្ចការដែលចាំបាច់សម្រាប់កិច្ចការរបស់លោកអ្នក ជាពិសេសកិច្ចការដែលលោកអ្នកមិនចូលចិត្តធ្វើ។ គ្មានលេសដែលមិនត្រូវធ្វើកិច្ចការទាំងនោះទេ។ បើលោកអ្នកចង់តែស្រួល និងព្រងើយកន្តើយចំពោះការពិតនៃទំនួលខុសត្រូវរបស់ខ្លួនឯង លោកអ្នកនឹងមិនអាចសម្រេចចិត្តបានល្អទេ។ លោកអ្នកត្រូវតែធ្វើជាម្ចាស់ការលើកិច្ចការទាំងអស់ និងមានទំនួលខុសត្រូវចំពោះកិច្ចការទាំងនោះ។ នេះជារបៀបដែលោកអ្នកកាន់តែមានភាពវៃឆ្លាត និងពូកែសម្រេចចិត្ត។
៣. មិនទាន់ស្រេកឃ្លានដល់កម្រិត
ក្នុងពេលដែលលោកអ្នកប្តេជ្ញាចិត្តធ្វើជាអ្នកគ្រប់គ្រង អ្នកដឹកនាំ ឬសហគ្រិន លោកអ្នកត្រូវមានផ្នត់គំនិតរីកចម្រើន គឺផ្នត់គំនិតដែលគ្មានពាក្យថាគ្រប់គ្រាន់។ លោកអ្នកត្រូវតែស្រេកឃ្លាន ដោយសារលោកអ្នកមិនដឹងថាគ្រាប់ពូជនៃឱកាសមួយណានឹងរីកចម្រើនទេ។ អ្នកដឹកនាំ ត្រូររាវរកជាប្រចាំនៅក្នុងភាពមិនប្រាកដប្រជា និងស្ថានភាពដែលមិនអាចទស្សន៍ទាយទុកមុន។ ការស្រេកឃ្លាន គឺការបង្កើតឥទ្ធិពល ការបង្កើតភាពខុសគ្នា និងការស្វែងរកមធ្យោបាយបង្កើតដំណើរទៅមុខ។ ថ្ងៃណាដែលលោកអ្នកឈប់ខ្វល់ខ្វាយអំពីរឿងទាំងអស់នេះ គឺជាពេលដែលលោកអ្នកបាត់បង់ការស្រេកឃ្លានដើម្បីប្រកួតប្រជែង។ នោះក៏ជាថ្ងៃដែលលោកអ្នកចាប់ផ្តើមសម្រេចចិត្តមិនល្អដែរ។
៤. ខ្វះខាតការយកចិត្តទុកដាក់
អ្នកដឹកនាំ មិនចំណាយពេលរុករកឱ្យគ្រប់ជ្រុងជ្រោយនៃកិច្ចការដែលត្រូវធ្វើ និងរបៀបធ្វើកិច្ចការទាំងនោះជាមនុស្សដែលមិនអាចធ្វើកិច្ចការចម្រុះយ៉ាងមានប្រសិទ្ធភាព និងសម្រេចចិត្តបានត្រឹមត្រូវទេ។ ការយកចិត្តទុកដាក់លើកិច្ចការគ្រប់ជ្រុងជ្រោយតម្រូវឱ្យលោកអ្នកសួរសំណួរច្រើនណាស់ និងមិនត្រូវសន្និដ្ឋានចម្លើយទុកជាមុនទេ។ ការពូកែធ្វើកិច្ចការដែលលោកអ្នកត្រូវធ្វើ នឹងនាំឱ្យលោកអ្នកក្លាយជាមនុស្សពូកែសម្រេចចិត្ត។
៥. មិនចំណាយពេលគ្រប់គ្រាន់ចំពោះការគិត
ពេលវេលាកន្លងទៅរហ័សណាស់នៅពេលលោកអ្នកធ្វើជាសហគ្រិន ជាពិសេសនៅពេលលោកអ្នកកំពុងតែប្រឹងប្រែងឈរជើង។ សូមកុំបណ្តោយឱ្យភាពមមាញឹកនៃភាពជាអ្នកដឹកនាំកំណត់ព្រំដែនលោកអ្នកពីការដកថយពីរបីជំហានដើម្បីគិតឱ្យគ្រប់ជ្រុងជ្រោយអំពីរបៀបធ្វើកិច្ចការឱ្យបានល្អបំផុត។ នៅពេលលោកអ្នកមានវិន័យចំពោះខ្លួនឯងដើម្បីធ្វើជាអ្នកពូកែគិត វិន័យនេះមិនត្រឹមតែជួយធានាឱ្យលោកអ្នកត្រៀមខ្លួនរួចរាល់ដើម្បីជៀសផុតពីអន្ទាក់ទាំងបួនខាងលើប៉ុណ្ណោះទេ ប៉ុន្តែក៏ធ្វើឱ្យលោកអ្នកក្លាយជាមនុស្សពូកែសម្រេចចិត្តថែមទៀត។
មនុស្សជោគជ័យ រីកចម្រើនលើការផ្លាស់ប្តូរស្ថានភាពដដែលៗដើម្បីធ្វើកិច្ចការឱ្យកាន់តែប្រសើរឡើង និងជួយសម្រួលដល់ការរស់នៅ និងបន្សល់ទុកមរតកសម្រាប់សង្គម។ ដូច្នេះហើយលោកអ្នកមិនត្រូវខ្លាចបរាជ័យទេ ពីព្រោះការសម្រេចចិត្តល្អមិនមែនតែងតែធានាដល់ជោគជ័យទេ។
អត្ថបទទាក់ទង