​ឥរិយាបថ​ចំនួន ៨ ​ក្នុងចំណោម​មេដឹកនាំ​ដែល​មាន​គេ​ស្រឡាញ់​បំផុត​

ឥរិយាបថ​ (អិរ៉ិយ៉ាបត់) បា.; សំ. ( ន. ) (ឦយ៌ាបថ) ផ្លូវ​ឬ​គន្លង​នៃ​ឥរិយា គឺ​ការ​ដើរ, ឈរ, អង្គុយ, ដេក (ម. ព. ឥរិយា ផង) ។ សម្រេច​ឥរិយាបថ ប្រើ​ឥរិយាបថ ។ សម្រេច​ឥរិយាបថ​ដេក សម្រេច​ការ​ដេក (ដេក) ។ បើ​រៀង​ភ្ជាប់​ពី​ខាង​ដើម​សព្ទ​ដទៃ អ. ថ. អិរ៉ិយ៉ាប៉ៈថៈ, ដូច​ជា ឥរិយាបថចារ ការ​សម្រេច​ឬ​ប្រើ​ឥរិយាបថ។ ឥរិយាបថ​បរិវត្តន៍ ការ​ផ្លាស់​ឥរិយាបថ។ ឥរិយាបថ​បរិហារ ការ​រក្សា​ឥរិយាបថ គឺ​ការ​ចេះ​លៃ​ឥរិយាបថ​ទាំង​បួន ។ ឥរិយាបថ​រោគ រោគ​ដែល​កើត​ព្រោះ​ការ​ប្រើ​ឥរិយាបថ​ពុំ​ស្មើ មាន​អង្គុយ​ច្រើន​ពេក​ជាដើម (ហៅ វិសម​បរិហារ​ជា​ពាធ ក៏​បាន) ។ ឥរិយាបថ​វិសម​ភាព ភាវៈ​មិន​ស្មើ​នៃ​ឥរិយាបថ គឺ​ការ​ប្រើ​ឥរិយាបថ​បួន​ពុំ​ស្មើ ។ ឥរិយាបថ​សម​ភាព ការ​ប្រើ​ឥរិយាបថ​បួន​ស្មើ​ល្អ ។ ឥរិយាបថ​សម្បត្តិ ការ​បរិបូណ៌​ដោយ​ឥរិយាបថ គឺ​ឥរិយាបថ​ទាំង​បួន​សមរម្យ​មិន​ឆ្គង ។ ឥរិយាបថ​សម្បន្ន (–សំ-ប័ន) អ្នក​ដែល​មាន​ឥរិយាបថ​ទាំង​បួន​សមរម្យ (បើ​ស្ត្រី​ជា ឥរិយាបថ​សម្បន្នា អ. ថ. -ស័ម-បុ័ន-ន៉ា) ។ ។ល។ ព. កា. ឲ្យ​រក្សា​ឥរិយាបថ​ទាំង​បួន : ឥរិយាបថ​បួន គួរ​ជន​ប្រុង​ខ្លួន តាម​សុជីវ​ធម៌ ត្រឹម​ត្រូវ​ទៀងទាត់ បែប​បទ​បវរ នឹង​មាន​អំណរ មិន​នឹក​ស្តាយ​ក្រោយ ។

មេដឹកនាំ មានន័យថា អ្នកគ្រប់គ្រង ឬអ្នកដឹកនាំផ្លូវ អ្នកឈានមុខគេ ធ្វើជាគំរូគេលើគ្រប់សកម្មភាពទាំងពួងតាំងពីការដេក ដើរ ឈរ អង្គុយ និយាយ ស្តាប់ គិត ដែលយើងនិយាយថាដឹកមុខគេ។ ភាពជាអ្នកដឹកនាំសំដៅទៅលើការដឹកនាំ ទៅរកផ្លូវល្អផ្លូវដែលត្រឹមត្រូវមិនបំផ្លាញផលប្រយោជន៍ជាតិ ឬសង្គម និងមានចក្ខុវិស័យត្រឹមត្រូវ។

នៅក្នុង​ពិភព​សត្វ​មាន​សណ្តាប់​ធ្នាប់​យ៉ាង​ច្បាស់លាស់​។ ជាក់ស្តែង​ គេ​ឃើញ​មាន​រាជិនី​ឃ្មុំ​ ស្តេច​ស្វាឪ​ និង​ដៃគូ​ចចក​ឈ្មោល​ញី​ដែល​ដឹកនាំ​ហ្វូង​នី​មួយ​ៗ។ មនុស្ស​ក៏​មិន​ខុសគ្នា​ដែរ​ ហើយ​អាច​មាន​សណ្តាប់​ធ្លាប់​ដែល​ប្រសើរ​ជាង​សត្វ​ទៅទៀត​។ ប្រហែល​លោកអ្នក​ភ្ញាក់ផ្អើល​បន្តិច​ នៅពេល​ដឹង​ថា​ក្រុម​បង្កើត​ឡើង​ក្នុង​របៀប​ដែល​កុលសម្ព័ន្ធ​ និង​សង្គម​ ហើយ​ក្រុមហ៊ុន​មិនមែន​ជា​លទ្ធផល​នៃ​ប្រាជ្ញា​កម្រិតខ្ពស់​អ្វី​ទេ​ ប៉ុន្តែ​ជា​លទ្ធផល​នៃ​សភាវគតិ​ដែល​ប្រឹងប្រែង​ដើម្បី​រស់​ដូច​មនុស្ស​សម័យ​ដើម​ដែរ​។

ការ​លើកឡើង​បែបនេះ ​គឺ​ដើម្បី​បង្ហាញថា​ភាពជា​អ្នកដឹកនាំ​មិនមែន​ជា​ដំណើរការ​នៃ​គំនិត​ទេ ​ប៉ុន្តែ​ជា​ឥរិយាបថ​សភាវគតិ​ដែល​បាន​ជួយ​ឱ្យ​មនុស្សយើង​អាច​រស់នៅ​ និង​បន្ត​ពូជ​រហូតដល់​សព្វថ្ងៃ​នេះ​។ យើង​អាច​សម្គាល់​មើល​ និង​រៀន​តាម​ឥរិយាបថ​មួយចំនួន​ក្នុងចំណោម​មេដឹកនាំ​ដែល​មាន​គេ​ស្រឡាញ់​បំផុត​៖

១. ស្តាប់​

ទោះជា​រឿង​នយោបាយ​ ពាណិជ្ជកម្ម​ ឬកិច្ច​ការ​មនុស្សធម៌​ក៏ដោយ​ មេដឹកនាំ​មាន​កិច្ចការ​ច្រើនណាស់​ដែល​ត្រូវ​ធ្វើ​។ ដូច្នេះ​គេ​ត្រូវ​មាន​វិធី​សាស្រ្ត​ដើម្បី​ចម្រោះ ​និង​ផ្តោត​ចិត្ត​តែ​លើ​កិច្ចការ​ណា​ដែល​សំខាន់​ចំពោះ​គេ​។ ទោះជាយ៉ាងណា​ ជោគជ័យ​របស់​គេ​អាស្រ័យ​លើ​ការ​បើក​ចិត្តទូលាយ​ចំពោះ​ទស្សនៈ​ថ្មី​ៗ និង​ប្លែក​ៗ។ ដូច្នេះ​ បើ​គេ​ឮបុគ្គលិក​និយាយ​ គេ​នឹង​ស្តាប់​។

២. ជម្នះ​ខ្លួនឯង​

មេដឹកនាំ​ខ្លាំងពូកែ​ មិនដែល​ស្កប់ស្កល់​នឹង​ស្ថាន​ភាព​ដដែល​ៗទេ​។ គេ​អាច​នឹង​ទទួលស្គាល់​ជោគជ័យ​របស់​ក្រុមការងារ​ ជាពិសេស​បន្ទាប់ពី​ការ​ប្រឹងប្រែង​អស់​រយៈពេល​យូរអង្វែង​ ប៉ុន្តែ​គេក​ម្រ​ស្កប់ស្កល់​នឹង​ខ្លួនឯង​ណាស់​។ សមិទ្ធផល​ផ្ទាល់ខ្លួន​របស់​គេ ​មិន​ធ្វើ​ឱ្យ​គេ​រំជើបរំជួល​ចិត្ត​ទេ​ មានតែ​ការ​ប្រឹងប្រែង​ប្រជែង​បន្ទាប់​ទៀត​ប៉ុណ្ណោះ​ដែល​ធ្វើ​ឱ្យ​គេ​រីករាយ​។

៣. បង្រៀន​

លោក ធីម ខូក (Tim​ Cook)​ ជា ​CEO​ ក្រុមហ៊ុន ​Apple​ បានឱ្យ​តម្លៃ​ដល់​ជោគជ័យ​របស់​ក្រុមហ៊ុន​នេះ​ថា​ជា​លទ្ធផល​នៃ​តួនាទី​របស់​លោក​ ស្ទីវ ចបស៍ (Steve​ Jobs)​ ជា​គ្រូ​ម្នាក់​។ របៀប​ដែល​ក្រុមហ៊ុន​រីកចម្រើន​យ៉ាង​ខ្លាំង​រហូតដល់​សព្វថ្ងៃ​នេះ ​ជា​សក្ខីភាព​បញ្ជាក់​អំពី​របៀប​ដែល​លោក​ ចបស៍ បាន​បង្រៀន​ក្រុមការងារ​ឱ្យ​ស្គាល់​អំពីអ្វី​ដែល​សំខាន់​បំផុត​ ដើម្បី​គេ​អាច​បន្ត​បង្រៀន​ក្រុមការងារ​ពី​មួយ​ជំនាន់​ទៅ​មួយ​ជំនាន់​ទៀត​បាន​។

៤. មិន​ដើរតាម​គេ​

មេដឹកនាំ​ទាំងអស់​រៀន​ពី​បទពិសោធន៍​ និង​គ្រូ​បង្ហាញផ្លូវ​។ មេដឹកនាំ​ទាំងអស់​បម្រើ​ម្ចាស់ភាគហ៊ុន​ ប៉ុន្តែ​ការ​រៀន​ និង​ការបម្រើ ​មិន​ដូចគ្នានឹង​ការ​ធ្វើតាម​ទេ​។ មេដឹកនាំ​ពិតប្រាកដ ​បម្រើ ​និង​រៀន​ពី​អ្នកដទៃ​ ប៉ុន្តែ​គេ​នៅតែ​ប្រឹងប្រែង​បង្កើត​ផ្លូវ​ដើរ​ដោយខ្លួនឯង​។ គេ​មាន​របៀប​ផ្ទាល់ខ្លួន​ក្នុង​ការ​ធ្វើ​កិច្ចការ​ ហើយ​នៅពេល​ត្រូវ​សម្រេចចិត្ត​ធំដុំ​ គេ​ធ្វើ​តែ​តាម​ការវាយតម្លៃ​ផ្ទាល់ខ្លួន​របស់​គេ​តែប៉ុណ្ណោះ​។

៥. ដោះស្រាយ​បញ្ហា​ធំ​

មេដឹកនាំ​ពិតប្រាកដ​ មិន​ធ្វើ​កិច្ចការ​តូចតាច​ទេ​។ ទោះបីជា​បញ្ហា​របស់​អតិថិជន​ បញ្ហា​ក្រុ​មហ​ហ៊ុន​ ឬបញ្ហា​សង្គម​ក៏ដោយ​ ក៏​គេ​តែងតែមាន​គំនិត​ច្នៃប្រតិដ្ឋ​ដោះស្រាយ​បញ្ហា​ធំៗ​ និង​ស្មុគស្មាញ​ដែរ​។ មេដឹកនាំ​ខ្លាំងពូកែ​ ជា​មនុស្ស​ពូកែ​ដោះស្រាយ​បញ្ហា​ធំ​។

៦. លើកទឹកចិត្ត​អ្នកដទៃ​ឱ្យ​ដើរតាម​

ការ​ជជែកគ្នា​អំពី​រឿង​ភាពជា​អ្នកដឹកនាំ ​ជា​ដំណើរ​ដែល​មាន​ទី​បញ្ចប់​។ មេដឹកនាំ ​ជា​មនុស្ស​ដែល​អ្នកដទៃ​ដើរតាម​ ហើយ​ឥរិយាបថ​របស់​មេដឹកនាំ​ធ្វើ​ឱ្យ​អ្នកដទៃ​ធ្វើសកម្មភាព​។ ទោះជា​គេ​មាន​ទស្សនវិស័យ​ចំពោះ​ផលិតផល​ ក្រុមហ៊ុន​ មនុស្ស​ ឬអនាគត​ ក៏​អ្វី​ៗទាំងអស់​នេះ​លើកទឹកចិត្ត​ឱ្យ​អ្នកដទៃ​ចង់​ដើរតាម​ដែរ​។  ​

៧. មិន​ងប់​ងល់​នឹង​ខ្លួនឯង​ពេក​

មេដឹកនាំ​ជោគជ័យ​បំផុត​ តែងតែមាន​អារម្មណ៍​ជឿជាក់​លើ​ខ្លួនឯង​។ ទោះជាយ៉ាងណា​ នៅពេល​ការ​ជឿជាក់​លើ​ខ្លួនឯង​ឡើង​ដល់កម្រិត​ខ្ពស់​ពេក​រហូតដល់​មិន​អាច​ប្រែក្លាយ​គំនិត​ទៅជា​ការពិត​បាន​ ឥរិយាបថ​នេះ​ក្លាយទៅជា​ការកំណត់​ព្រំដែន​ខ្លួនឯង​ទៅវិញ​។ មេដឹកនាំ​ខ្លះ​រៀន​ពី​កំហុស​ទាំងអស់​នេះ​ ហើយ​ទទួល​បាន​ចំណេះដឹង​ និង​ការ​ចេះ​ឱនលំទោន​។ ចំណែក​មេដឹកនាំ​ខ្លះទៀត​មិនព្រម​រៀន​ ហើយក៏​មិន​អាច​ទទួល​បាន​ជោគជ័យ​ធំដុំ​ទេ​។

៨. ធ្វើ​តែ​កិច្ចការ​សំខាន់​

តាម​និយមន័យ​ មេដឹកនាំ​ជា​មនុស្ស​នៃ​លទ្ធផល​។ គេ​ទទួល​បាន​កម្លាំងចិត្ត​ពី​ទស្សនៈ​វិស័យ​របស់​គេ​ ឬបញ្ហា​ដែលគេ​ត្រូវ​ដោះស្រាយ​។ ប៉ុន្តែ​ជា​រួម ​គេ​ទទួល​បាន​កម្លាំងចិត្ត​ធំ​ពី​ប្រភព​មួយ ​គឺ​កិច្ចការ​ដែល​សំខាន់​។ គេ​ប្រឹងប្រែង​ជម្នះ​គ្រប់​ឧបសគ្គ​ទាំងអស់​ដើម្បី​ធ្វើ​ឱ្យ​បាន​ជោគជ័យ ​និង​ព្រងើយកន្តើយ​ចំពោះ​កិច្ចការ​តូចតាច​ផ្សេងៗទៀត​។

រឿង​សំខាន់​ដែល​ត្រូវ​ចងចាំ​ គឺ​មេដឹកនាំ​ខ្លាំង ​ឬខ្សោយ​អាស្រ័យ​លើ​ឥរិយាបថ​របស់​គេ​ គឺ​កិច្ចការ​ដែលគេ​ធ្វើ​ និង​កិច្ចការ​ដែលគេ​មិន​ធ្វើ​។

ប្រភពយោង​៖

  • វចនានុក្រមខ្មែរ
  • គេហទំព័រ Entrepreneur​

អត្ថបទទាក់ទង

យុទ្ធសាស្រ្តចំនួន ៣ ដើម្បីផ្តល់កម្លាំងចិត្តដល់ក្រុមការងារ

Leave a Reply

Your email address will not be published.