ទម្លាប់ចំនួន ៧ របស់មនុស្សដែលមានភាពជាអ្នកដឹកនាំពីកំណើត

ដូច្នេះ តើការធ្វើជាអ្នកដឹកនាំល្អម្នាក់មានអត្ថន័យយ៉ាងដូចម្តេច? នេះគឺជាទម្លាប់ចំនួន ៧ របស់អ្នកដឹកនាំដែលកើតមានពីកំណើត។

១. ស្តាប់ច្រើន

លោក ប៊ីល ឃ្លីនតុន (Bill Clinton) មានការសម្ងាត់ដ៏សាមញ្ញនិងគួរឲ្យភ្ញាក់ផ្អើលក្នុងការសម្រេចជោគជ័យ៖ អតីត​ប្រធានាធិបតី ផ្តោតការយកចិត្តទុកដាក់ទាំងស្រុងទៅលើមនុស្សគ្រប់រូប។សាច់រឿងខ្លីៗ​ស្តីអំពីលោក Clinton ច្រើនរាប់​មិនអស់បានណែនាំថា សមត្ថភាពក្នុងការទាក់ទាញចំណាប់អារម្មណ៍ពីអ្នក​ដទៃដ៏ល្បីល្បាញរបស់គាត់បានមកពីការផ្តោតការយកចិត្តទុកដាក់ ចំពោះមនុស្សគ្រប់រូបដែលគាត់​បានជួបហើយវាបានធ្វើឲ្យគាត់ក្លាយជាអ្នកទំនាក់ទំនង ផ្នែកនយោបាយដ៏ល្អបំផុតម្នាក់នៅក្នុង​ប្រវត្តិសាស្រ្តនាពេលថ្មីៗនេះ។

ក្នុងរយៈពេលដំបូងនៃអាជីពរបស់គាត់ Clinton ត្រូវបានទទួលស្គាល់ចំពោះផ្នែកទំនាក់ទំនងជាមួយអ្នក​ដែល​ស្ថិតនៅក្រោមការដឹកនាំរបស់គាត់ដោយសម្លឹងមើលពួកគេនៅក្នុងខ្សែភ្នែក និងស្តាប់អ្វីដែល​ពួកគេ​បាននិយាយ។ គាត់បានសម្តែងចេញមកនូវបុគ្គលិកលក្ខណៈដែលអ្នកដឹកនាំល្អមានពីធម្មជាតិ៖ ពួកគេពូកែយកចិត្តទុកដាក់ចំពោះអ្នកដទៃ ហើយទោះបីជាពួកគេរវល់យ៉ាងណា ក៏ដោយពួកគេតែងតែ​ចំណាយពេលវេលាឲ្យអ្នកដទៃ។

Clinton បានសរសេរនៅក្នុងសៀវភៅប្រវត្តិផ្ទាល់ខ្លួនរបស់គាត់ ជីវិតរបស់ខ្ញុំ ថា “ពេលមួយជីវិតរបស់ខ្ញុំខ្ញុំចាប់អារម្មណ៍ចំពោះរឿងរ៉ាវរបស់អ្នកដទៃ” “ខ្ញុំចង់ស្គាល់ពួកគេ យល់អំពីពួកគេ និងយល់ពីអារម្មណ៍​ដែលពួកគេមាន។”

២. យល់ពីអារម្មណ៍អ្នកដទៃ

អ្នកដឹកនាំដែលមានចិត្តល្អ និងយល់ចិត្តរបស់អ្នកដទៃ ដោយយកចិត្តទុកដាក់យ៉ាងពិត​ប្រាកដចំពោះអ្នកដែលធ្វើការឲ្យពួកគេ នោះគឺជាអ្នកគ្រប់គ្រងម្នាក់ក្នុងចំណោមអ្នក​គ្រប់គ្រង​ដែលជោគជ័យបំផុតដែលពួកគេបំផុសគំនិតរបស់អ្នកដទៃ និងធ្វើឲ្យអ្នកដទៃឈរនៅខាង​ពួកគេដោយខ្លួន​ឯង។ អ្នកដឹកនាំដែលបង្ហាញការយល់ចិត្ត អាចប្រាស្រ័យទាក់ទងជាមួយអ្នកដទៃ និងយល់​អំពីទស្សនៈរបស់អ្នកដទៃបានច្រើនជាងអ្នកដឹកនាំផ្សេងៗទៀត។ ត្រឡប់មកវិញ ពួកគេអាចប្រើប្រាស់​ទំនាក់ទំនងទាំងនេះ ដើម្បីគាំទ្រពួកគេនៅពេលដែលពួកគេត្រូវការការគាំទ្រទាំងនោះ។

បុគ្គលដែលជោគជ័យ មិនធ្វើការតែម្នាក់ឯងឡើយ។ ពួកយើងម្នាក់ៗ​ត្រូវការការគាំទ្រពីអ្នកដទៃដើម្បី សម្រេចបាននូវលទ្ធផលវិជ្ជមាន ដែលជំរុញពួកយើងឆ្ពោះទៅកាន់​គោលដៅរបស់ពួកយើង។ ការយល់ចិត្តយ៉ាងពិតប្រាកដ រួមបញ្ចូលគ្នារវាងការយល់ពីភាពសម​ហេតុផល​ផ្នែកអារម្មណ៍ និងផ្អែកលើភាពជាក់ស្តែង ដែលមាននៅក្នុងការសម្រេចចិត្តនីមួយៗ។

៣. ស្វែងរកបទពិសោធន៍ និងវិធីសាស្រ្តក្នុងការគិតថ្មីៗ

នៅក្នុងពិភពលោកដែលពោរពេញដោយភាពប្រកួតប្រជែង និងមានការប្រែប្រួលយ៉ាងលឿន គំនិត​ច្នៃប្រតិដ្ឋ គឺកាន់តែសំខាន់ចំពោះអ្នកដឹកនាំក្នុងការអភិវឌ្ឍខ្លួនដើម្បីធ្វើឲ្យអាជីវកម្មបន្តដំណើរការទៅមុខយ៉ាងល្អប្រសើរ។ អ្នកដឹកនាំប្រកបដោយគំនិតច្នៃប្រតិដ្ឋ គឺជា​អ្នកដឹកនាំដែលបើកចិត្តយ៉ាងទូលាយ។

ការបើកចំហរចំពោះបទពិសោធន៍ ជាបុគ្គលិកលក្ខណៈដែលមានឥទ្ធិពលមួយក្នុងចំណោម​បុគ្គលិកលក្ខណៈដែលមានឥទ្ធិពលទាំងប្រាំនៃចិត្តវិទ្យា ជាបុគ្គលិកលក្ខណៈមួយដែលកំណត់ដោយ​ភាពចង់ដឹងចង់ឮផ្នែកបញ្ញា និងការដឹកនាំយ៉ាងខ្លាំង។ ការរុករកផ្នែកចិត្តគំនិត គឺជាបុគ្គលិក​លក្ខណៈមួយដែលទាក់ទងខ្លាំងបំផុតនឹងស្នាដៃផ្នែកគំនិតច្នៃប្រតិដ្ឋ។

អ្នកដឹកនាំ ត្រូវមានចិត្តគំនិតដែលអាចបត់បែនបាន និងងាយប្រែប្រួល ដើម្បីសម្របទៅនឹងការ​ប្រែប្រួល និងបញ្ហាប្រឈមថ្មីៗដែលត្រូវបានជំរុញតាមរយៈការបើកចំហរទទួលយកទស្សនៈថ្មីៗ និង​វិធីសាស្រ្តក្នុងការចាត់ចែងការងារថ្មីៗ។

៤. ហ៊ានបរាជ័យ

សាស្រ្តាចារ្យនៅសាលា Harvard លោក រ៉ូសាបេត (Rosabeth) បានសរសេរថា “ភាពខុសគ្នារវាង​អ្នកឈ្នះ និងអ្នកចាញ់ គឺវិធីដែលពួកគេដោះស្រាយចំពោះការចាញ់។”

ការដឹកនាំល្អ គឺជាការប្រថុយនឹងភាពបរាជ័យ ហើយភាពងាយជាសះស្បើយ​យ៉ាងឆាប់រហ័ស ជួយឲ្យអ្នកដឹកនាំងើបផុតពីភាពលំបាក និងការអូសបន្លាយនៃភាពជោគជ័យ ដែលមិន​អាចគេចផុតដែលអ្នកដឹកនាំត្រូវតែប្រឈមនឹងហានិភ័យ។

ភាពបរាជ័យ អាចដំណើរការ ដោយថាមពលនៅក្នុងផ្លូវមួយនៃផ្លូវទាំងពីរនេះ៖ វាអាចជាគ្រូ​បង្រៀនអ្នក ជាកម្លាំងជំរុញដ៏អស្ចារ្យបំផុត សម្រាប់ភាពជោគជ័យនាពេលអនាគត ឬវាអាចធ្វើឲ្យអ្នក​គេចផុតពីការចួបប្រទះនឹងហានិភ័យ ដូច្នេះអ្នកនឹងសម្រេចបានអ្វីដែលអស្ចារ្យម្តងទៀត។ អ្នកដឹកនាំដ៏អស្ចារ្យ ដឹងអំពីចំណុចនេះយ៉ាងច្បាស់ ហើយពួកគេបានរៀនប្រើប្រាស់ភាពបរាជ័យ ដោយយកវាធ្វើជា “ដុំថ្មដើម្បីជាន់ឡើងទៅរកភាពជោគជ័យ”។

៥. អនុវត្តតាមគោលបំណងរបស់ខ្លួនឯង

លោក ស្ទីវ ចបស៍ (Steve Jobs) បាននិយាយថា “គុណតម្លៃស្នូលរបស់ Apple គឺយើងជឿជាក់ថា មនុស្សដែលមានចំណង់​អាចផ្លាស់ប្តូរពិភពលោក​បាន ហើយមនុស្សដែលឆ្កួតក្នុងការគិតថា ពួកគេអាច​ផ្លាស់ប្តូរ​ពិភពលោកបាន គឺជាអ្នកដែលអាចធ្វើវាបានយ៉ាងពិតប្រាកដ។”

ការមើលពីរបៀបដែល លោក Jobs លើកឡើងពីនិយោជិតរបស់គាត់ វាមិនអាចទៅរួចឡើយ ដែលយើងមិន​មានអារម្មណ៍ដឹងអំពីចំណង់ និងគោលបំណងយ៉ាងមុតមាំរបស់គាត់។ នៅក្នុងយុទ្ធនាការផ្សាយ​ពាណិជ្ជកម្ម​ដែលជាព្រឹត្តិការណ៍ដ៏សំខាន់មួយសម្រាប់មនុស្សគ្រប់រូបនៅក្នុងប្រវត្តិសាស្រ្តនេះ ​ដែល​បានសម្តែងចេញនូវកម្លាំងជំរុញ និងចំណង់ដូចគ្នានោះ Jobs បាននិយាយថា “យុទ្ធនាការនោះ ជះឥទ្ធិពល​យ៉ាងខ្លាំងចំពោះក្រុមហ៊ុន។”

គោលបំណង ជំរុញឲ្យអ្នកដឹកនាំអស្ចារ្យជាងគេបំផុតដូចជា លោក Jobs បង្កើតផលិតផលដែលពោរពេញ​ដោយអត្ថន័យ ឬសម្រេចគោលដៅដែលលើសពីប្រាក់ចំណេញរបស់ក្រុមហ៊ុន ហើយគិតថា​ក្រុមហ៊ុនមិនមែនតែជាការចំណេញប្រាក់ ឬការខាតបង់ប៉ុណ្ណោះទេ ប៉ុន្តែវាថែមទាំងជា “ដួងព្រលឹង” មួយថែមទៀតផង។ ដើម្បីធ្វើដូច្នេះបាន ពួកគេបំផុសទឹកចិត្តនិយោជិតឲ្យធ្វើការងារឲ្យ​ដល់ចំណុចសក្តានុពលខ្លាំងបំផុតដែលពួកគេមាន ដើម្បីបំពេញតាមទស្សនៈវិស័យដែលកាន់តែធំ។

៦. ចេះផ្តល់ឲ្យ

យោងតាមចិត្តវិទូនៃអង្គភាពមួយរូប គឺ អាដាម ហ្គ្រេនត៍ (Adam Grant) នៅលើពិភពលោកនេះ មានមនុស្សបីប្រភេទ៖ អ្នក​ផ្តល់ឲ្យ (បុគ្គលដែលផ្តល់អាទិភាពលើការជួយអ្នកដទៃ) អ្នកទទួលយក (បុគ្គលដែលជួយខ្លួនឯង) និង​ អ្នកផ្តល់ និងទទួលយក (បុគ្គលដែលស្វែងរកអត្ថប្រយោជន៍ស្មើៗគ្នា សម្រាប់ខ្លួនឯង និងអ្នកដទៃ)។ បន្ទាប់ពីធ្វើការអង្កេតតម្លៃនៃការសិក្សាផ្នែកចិត្តសាស្រ្តអស់រយៈពេលជាច្រើនឆ្នាំ ព្រមទាំងបាន​ធ្វើការស្រាវជ្រាវដោយខ្លួនឯង លោក Grant បានសន្និដ្ឋានថា អ្នកផ្តល់ឲ្យ គឺជាបុគ្គលដែលជោគជ័យជាងគេ​បំផុត។

Grant បាននិយាយថា “អ្នកចេះផ្តល់ឲ្យ តែងតែមើលឃើញមនុស្សនៅជុំវិញ​ខ្លួនថាជាត្បូងពេជ្រនៅក្នុងភក់ជ្រាំ ការវិនិយោគដោយវិធីនេះ នឹងអាចធ្វើមនុស្សទាំងនេះសម្រេច​បាននូវសក្តានុពលដែលអស្ចារ្យជាងអ្វីដែលពួកគេគិតថាអាចទៅរួច។”

៧. ប្រើពេលសម្រាក

អ្នកដឹកនាំអស្ចារ្យ មានគោលដៅដែលមានមហិច្ឆិតា ហើយពួកគេខិតខំប្រឹងប្រែងដើម្បីសម្រេច​គោលដៅ ប៉ុន្តែពួកគេក៏បានដឹងផងដែរថា ភាពងប់ងុលនឹងការងារ និងភាពអស់កម្លាំងចិត្ត និងកាយ មិនអាចធ្វើឲ្យពួកគេធ្វើដំណើរទៅបានកាន់តែឆ្ងាយនោះទេ ដូច្នេះពួកគេឆ្លៀតពេលសម្រាក និងបញ្ចូលថាមពលវិញ ដើម្បីបង្កើនគំនិតច្នៃប្រតិដ្ឋ និងភាពឆ្លាតវៃរបស់ពួកគេ។ សូមចំណាយពេលទៀងទាត់សម្រាប់ខ្លួនឯង មិនថាជាការធ្វើយូហ្គា (Yuga) ជារៀងរាល់ថ្ងៃ ការមិនប្រើប្រាស់ប្រព័ន្ធអេឡិចត្រូនិចរៀងរាល់ថ្ងៃសៅរ៍ ឬវិស្សមកាលពីរដងក្នុងមួយឆ្នាំ អាចធ្វើឲ្យអ្នកដឹកនាំមានភាពស្រឡះក្នុងខួរក្បាល និងត្រៀមខ្លួន​ជាស្រេចសម្រាប់ប្រឈមមុខនឹងបញ្ហាប្រឈមថ្មីៗទៀត។​

សម្រាប់អ្នកដឹកនាំមួយចំនួនដូចជាលោក Richard Branson, CEO របស់ Virgin Group  វិស្សមកាលអាច​ផ្តល់ឲ្យគាត់នូវប្រភពនៃការបំផុសគំនិតផ្នែកអាជីវកម្មដែលមិនបានរំពឹងទុកជាមុនទៀតផង។

Branson បានប្រាប់សហគ្រិនថា ៉នៅពេលដែលអ្នកធ្វើវិស្សមកាល ទម្លាប់របស់អ្នកនឹងរងការរំខាន កន្លែងដែលអ្នកនៅ និងមនុស្សថ្មី​ដែលអ្នកចួប អាចបំផុសគំនិតដោយវិធីណាមួយដែលមិនបាន​រំពឹងទុកជាមុន។” “ក្នុងនាមជាសហគ្រិន ឬអ្នកដឹកនាំអាជីវកម្ម នៅពេលដែលអ្នកត្រឡប់មកពី​វិស្សមកាលវិញ ប្រសិនបើអ្នកមិនបាននាំមកជាមួយនូវគំនិតមួយចំនួនពាក់ព័ន្ធនឹងវិធីកែប្រែអាជីវកម្ម​របស់អ្នកឲ្យកាន់តែល្អឡើងទេ នោះវាដល់ពេលហើយដែលអ្នកត្រូវពិចារណាធ្វើការផ្លាស់ប្តូរមួយ​ចំនួន។”

អត្ថបទទាក់ទង

ច្បាប់ទាំង ៤ ដែលជួយបង្កើនឥទ្ឋិពលប្រកបដោយប្រសិទ្ឋភាព