គន្លឹះ​សំខាន់ៗចំនួន ៥ ​នេះ​ដើម្បី​អភិវឌ្ឍ​ជំនាញ​ស្តាប់

ការស្តាប់ គឺជាសិល្បៈពេលដែលអ្នកធ្វើវានឹងផ្តល់មកវិញនូវផលប្រយោជន៍ដ៏ច្រើន សន្ធឹកសន្ធាបមិនអាចគណនាបាន។ គោលដៅនៃការស្តាប់ដ៏ល្អ គឺអាចធ្វើឲ្យសម្រេចបានការទំនាក់ទំនងតាមរបៀបឈ្នះ-ឈ្នះ។

ការសិក្សា​ស្រាវជ្រាវ​បង្ហាញថា​មានតែ​មនុស្ស ១០​% ប៉ុណ្ណោះ​ ដែល​ចេះ​ស្តាប់​យ៉ាង​យកចិត្ត​ទុកដាក់​។ ជាទូទៅ​ មនុស្សយើង​ស្តាប់​អ្នកដទៃ​និយាយ​បណ្តើរ​គិត​រឿង​ផ្សេងទៀត​បណ្តើរ​។ លោក Stephen​ Covey​ បាន​សរសេរ​នៅក្នុង​សៀវភៅ​ The​ 7 Habits​ of​ Highly​ Effective​ People​ ថា​ មនុស្ស​ភាគច្រើន​មិន​ស្តាប់​ដើម្បី​យល់​ទេ​ គេ​ស្តាប់​ដើម្បី​ឆ្លើយតប​។

នៅក្នុង​ការ​ស្ទង់​យោបល់​មួយ​របស់​ក្រុមហ៊ុន​ Bain​ &​; Company​ គេ​បាន​សួរ​បុគ្គលិក ២០០០ នាក់​ ឱ្យ​ដាក់​ចំណាត់ថ្នាក់​លក្ខណ​សម្បត្តិ​ភាពជា​អ្នក​ដឹក​នាំ​ផ្សេង​ៗគ្នា​ចំនួន ៣៣ ចំណុច​។ ភាគច្រើន​នៃ​អ្នកចូលរួម​ក្នុង​ការ​ស្ទង់​យោបល់​នោះ​ជ្រើសរើស​ការ​ផ្តោត​ចិត្ត​ គឺ​សមត្ថភាព​នៃ​ការ​នៅក្នុង​ពេល​បច្ចុប្បន្ន​ជា​លក្ខណៈ​សំខាន់​ជាងគេ​។ ការ​ធ្វើ​ចិត្ត​ឱ្យ​នៅក្នុង​ពេល​បច្ចុប្បន្ន​ និង​រក្សា​ភាព​ស្ងប់ស្ងៀម​ ហើយ​ផ្តោត​ចិត្ត​ស្តាប់​អ្នកដទៃ​និយាយ​ ជា​កាយវិការ​បង្ហាញ​ការគោរព​ដល់​អ្នកដទៃ​។

ក្នុងនាម​ជា​មេដឹកនាំ​ ចាំបាច់​ណាស់​ដែល​លោកអ្នក​ត្រូវ​ធ្វើ​ឱ្យ​បា្រ​កដ​ថា​សំឡេង​ទាំងអស់​នៅក្នុង​ក្រុមការងារ​ទទួល​បានការ​យកចិត្ត​ទុកដាក់​ ជាពិសេស​ត្រូវ​ព្យាយាម​ស្តាប់​មនុស្ស​ដែល​ស្ងប់ស្ងាត់​។ មនុស្សយើង​ច្រើនតែ​ឱ្យ​តម្លៃ​ការ​និយាយ​ច្រើនជាង​ការ​ស្តាប់​ ជាពិសេស​នៅក្នុងចំណោម​មេដឹកនាំ​ និង​ស្ថាបនិក​ក្រុមហ៊ុន​។ យើង​កោតសរសើរ​មនុស្ស​ដែល​មាន​វោហារ​សាស្រ្ត​ និង​បង្ហាញ​គំនិត​ច្បាស់លាស់​។ ប៉ុន្តែ​ការ​ស្តាប់​ក៏​ជាកំពូល​ឥទ្ធិពល​មួយ​ដែរ​ វា​ជួយ​លោកអ្នក​ឱ្យ​ទទួល​បាន​ទស្សនៈ​ថ្មី​ៗ ស្តាប់​ដឹង​អ្វី​ដែលគេ​មិនបាន​និយាយ​ និង​រៀន​អំពីអ្វី​ដែល​លោកអ្នក​មិនដឹង​។

យោង​តាម​ការសិក្សា​របស់​ក្រុម​អ្នកជំនាញ​ លោកអ្នក​អាច​ប្រើប្រាស់​គន្លឹះ​មួយចំនួន​ខាងក្រោម​នេះ​ដើម្បី​អភិវឌ្ឍ​ជំនាញ​ស្តាប់​៖

១. ស្តាប់​ពាក្យ​ដែលគេ​មិន​និយាយ​

អត្ថន័យ​ និង​ខ្លឹមសារ ៨០​% ភាគរយ ​នៃ​ការសន្ទនា​ ផ្លាស់​ប្តូរ​គ្នា​ដោយ​មិន​មាន​ពាក្យ​សម្តី​ទេ​។ ក្នុង​ពេល​ដែល​លោកអ្នក​ស្តាប់​គេ​និយាយ​ សូម​សម្គាល់​មើល​កាយវិការ​ ទឹកមុខ​ ឥរិយាបថ​ និង​សូម្បីតែ​ចង្វាក់​ដង្ហើម​។ សូមកុំ​ខ្លាច​ក្នុង​ការ​សួរ​សំណួរ​ដែល​ទាក់ទង​នឹង​កាយវិការ​ទាំងអស់​នេះ​ដើម្បី​យល់ដឹង​បន្ថែម​ទៀត​។

២. សួរ​សំណួរ​បើកទូលាយ​

បើ​លោកអ្នក​មើល​មនុស្ស​ពូកែ​សម្ភាសន៍​ដូចជា​លោកស្រី អូប្រា វីនហ្វ្រេយ៍ (Oprah​ Winfrey) លោកស្រី​ បាបារ៉ា វ៉លធឺស៍ (Barbara​ Walters)​ លោក​ ដេវីដ ហ្វ្រសត៍ (David​ Frost)​ ឬលោក​ ឡារី ឃីង (Larry​ King​) ជាដើម​ លោកអ្នក​នឹង​កត់សម្គាល់​ឃើញថា​ សំណួរ​ដែលគេ​សួរ​មិន​អាច​ឆ្លើយ​បាន​ត្រឹមតែ​មែន​ឬមិន​មែនទេ​។ ការ​សួរ​នរណា​ម្នាក់​ថា​ “តើ​អ្នក​គិត​យ៉ាងណា​ចំពោះ​គម្រោង​មួយ​នេះ​?” នឹង​នាំ​ឱ្យ​ទទួល​បាន​ចម្លើយ​យ៉ាង​ក្បោះក្បាយ​ជាង​ការ​សួរ​ថា​ “តើ​អ្នកចូលចិត្ត​ធ្វើការ​ក្នុង​គម្រោង​នេះ​ទេ​?”។

៣. ផ្តល់​ការ​យកចិត្ត​ទុកដាក់​

ការ​ស្តាប់​អ្នកដទៃ​និយាយ​ដោយ​សម្លឹង​មើល​ចំ​ភ្នែក​គេ ​ជា​ការ​បង្ហាញ​ការគោរព​ និង​ជំនឿ​ចិត្ត​។ ក្នុង​ពេល​ជាមួយគ្នា​ សូមកុំ​ភ្លេច​បិទ​ឧបករណ៍​បច្ចេកវិទ្យា​ទាំងអស់​របស់​លោកអ្នក​ដែល​អាច​នឹង​បង្ក​សំឡេង​រំខាន​។ លោកអ្នក​ត្រូវ​ផ្តល់​ការ​យកចិត្ត​ទុកដាក់​ទាំងស្រុង​ដល់​មនុស្ស​ដែល​កំពុងតែ​និយាយ​ជាមួយ​លោកអ្នក​។

៤. កុំ​និយាយកាត់​

សូមទុក​ពេល​ឱ្យដៃ​គូសន្ទនា​របស់​លោកអ្នក​និយាយ​ចប់​ ដោយ​មិន​មានហេតុ​ផល​ណាមួយ​ត្រូវ​និយាយកាត់​គេ​ទេ​។ សូមកុំ​គិតរក​ពាក្យឆ្លើយ​តប​រហូតដល់​ដល់​គេ​និយាយ​ចប់​រួចរាល់​។ ការ​ទុកចន្លោះ​ពេលខ្លះ​ដើម្បី​ពិចារណា​ក្នុង​ពេល​កំពុងតែ​សន្ទនា​ជា​រឿង​ល្អ​ ហើយ​អាច​ជា​ក្បួន​សន្ទនា​ដែល​មាន​ភាព​ថ្លៃថ្នូរ​ទៀតផង​។

៥. មើល​សមាមាត្រ​របស់​លោកអ្នក​

ទម្លាប់​ល្អ​មួយ​ដែល​គួរតែ​បង្កើត​ឱ្យ​មាន ​គឺ​ការ​សម្គាល់​មើល​បរិមាណ​នៃ​ការ​ស្តាប់​ និង​បរិមាណ​នៃ​ការ​និយាយ​នៅក្នុង​សន្ទនា​មួយ​។ លោក​ ស្កត អេប្លីន (Scott​ Eblin)​ អ្នកនិពន្ធ​សៀវភៅ​ Overworked​ and​ Overwhelmed​: The​ Mindfulness​ Alternative​ ណែនាំ​ថាស​មា​មាត្រ​ដែល​ល្អ​គឺ ២​:១ ចំណែក​អ្នកខ្លះ​ទៀត​ណែនាំ​ឱ្យ​ប្រើ​រូបមន្ត ៨០​/២០​។ ទោះជា​ប្រើ​ក្បួន​ណាក៏ដោយ​ ក៏​លោកអ្នក​ត្រូវ​ធ្វើ​ឱ្យ​ប្រាកដ​ថា​ស្តាប់​ឱ្យ​ច្រើន​ជា​និយាយ​ជានិច្ច​។  ​

មនុស្ស​ពូកែ​ស្តាប់ ​រៀន​ឆាប់​ចេះ​ណាស់​ ធ្វើការ​ក៏បាន​ល្អ​ក្នុង​ក្រុមការងារ​ ហើយ​ជា​មនុស្ស​ដែល​ជួយ​ពង្រឹង​វប្បធម៌​ល្អ​នៅក្នុង​ស្ថាប័ន​ការងារ​ទៀតផង​។ គេ​ក៏​មាន​ទំនាក់ទំនង​ល្អជា​មួយ​អតិថិជន​ដែរ​។ បើ​លោកអ្នក​ជួលមនុស្ស​មក​ធ្វើការ​ សូម​សម្គាល់​មើល​មនុស្ស​ដែល​ពូកែ​ស្តាប់​ និង​ពូកែ​ចាប់​កាយវិការ​ក្នុង​ពេល​សន្ទនា​។

ប្រភព​យោង៖ Entrepreneur​


អត្ថបទទាក់ទង

៥ ជំហានសំខាន់ៗ ដើម្បីធ្វើឲ្យការសន្ទនាមានប្រសិទ្ធភាពខ្ពស់

 

Leave a Reply

Your email address will not be published. Required fields are marked *