គន្លឹះចំនួន ៣ ដែលអ្នកគ្រប់គ្រងអាជីវកម្មអាចបញ្ចេញភាពលេចធ្លោក្នុងទីផ្សារប្រកួតប្រជែង
ការប្រកួតប្រជែង ក្នុងន័យសេដ្ឋកិច្ច គឺជាការប្រកួតប្រជែងគ្នាក្នុងការស្វែងរកទីផ្សារ វត្ថុធាតុដើម ឱកាសសម្រាប់ការបណ្តាក់ទុន ឬការរកប្រាក់ចំណេញឱ្យបានច្រើនជាអតិបរមា។ នៅក្នុងទីផ្សារសេរីសព្វថ្ងៃ មានក្រុមហ៊ុនជាច្រើន កំពុងតែមានការប្រកួតប្រជែងលើវិស័យផ្សេងៗ ដូចជា ឧស្សាហកម្មរថយន្ត ឧស្សាហកម្មអេឡិចត្រូនិច និងឧស្សាហកម្មសម្លៀកបំពាក់ជាដើម។ ការធ្វើបែបនេះ គឺដើម្បីប្រមូលអតិថិជន។ ទោះជាមិនចង់ធ្វើការប្រកួតប្រជែង ក៏ក្រុមហ៊ុនត្រូវពង្រឹងជំហរឱ្យជាប់ ដើម្បីទប់ទល់នៅក្នុងវិស័យឧស្សាហកម្មនេះផងដែរ។
សព្វថ្ងៃនេះ គ្រប់ពាណិជ្ជកម្មរបស់សហគ្រិន ពិតជាពិបាកឈរឱ្យលេចធ្លោជាងគេណាស់។ ការប្រកួតប្រជែងយ៉ាងខ្លាំងក្លា បាននាំទៅអ្នកប្រើប្រាស់ទៅរកការរំពឹងកាន់តែខ្ពស់។ ជាទូទៅ ការត្រឹមតែផ្តល់ជូនផលិតផលដែលមានគុណភាពលើកម្រិតធម្មតាបន្តិច មិនអាចយកឈ្នះគេបានទេ។ ម្ចាស់អាជីវកម្ម ត្រូវតែច្រានចោលគំនិតគ្រោះថ្នាក់ដែលថាភាពលេចធ្លោស្ថិតនៅត្រង់ដំណើរការមានតែមួយ ការវេចខ្ចប់ ការដឹកជញ្ជូន ការធ្វើទីផ្សារ ។ល។ តាមការពិត ភាពលេចធ្លោ ស្ថិតនៅត្រង់អ្វីដែលអតិថិជនទទួលបានពីផលិតផល ទោះជាតាមរយៈការប្រើប្រាស់កាន់តែអស្ចារ្យ ផលិតផលកាន់តែល្អ តម្លៃកាន់តែទាប និងអត្ថប្រយោជន៍ស្រដៀងនេះជាច្រើនទៀត។
ដូចកំពូលអ្នកជំនាញខាងគ្រប់គ្រង លោក ភីតថឺ ដ្រាក់ឃឺ (Peter Drucker) ធ្លាប់និយាយថា អតិថិជនចាយលុយតែលើអ្វីដែលមានប្រយោជន៍សម្រាប់គេ និងផ្តល់គុណតម្លៃដល់គេទេ។ គ្មានអ្វីផ្សេងទៀតដែលបង្កើតគុណភាពទេ។ ប្រយោជន៍នៃការប្រកួតប្រជែង គឺការងប់ងុលរបស់អតិថិជន ការផ្តល់ជូនអត្ថប្រយោជន៍ដែលធ្វើឱ្យអ្នកប្រើប្រាស់សប្បាយចិត្ត និងលើកទឹកចិត្តគេឱ្យបញ្ជាទិញម្តងហើយម្តងទៀត។ ខាងក្រោមនេះ ជាគន្លឹះមួយចំនួនដែលម្ចាស់ពាណិជ្ជកម្មគួរតែចងចាំទុកនៅពេលប្រកួតប្រជែង៖
១. អ្នកប្រើប្រាស់រំពឹងចង់បានល្បឿន ហើយម្ចាស់ពាណិជ្ជកម្មជាអ្នកផ្តល់ឱ្យ
ល្បឿងន លែងមានន័យដូចពីមុនទៀតហើយ។ មនុស្សលែងភ្ញាក់ផ្អើលនៅពេលក្រុមហ៊ុន Apple Google និង Amazon បំពុលពួកគេដោយឧបករណ៍ និងសេវាកម្មអស្ចារ្យយ៉ាងទាន់ចិត្តទៀតហើយ។ សព្វថ្ងៃនេះ ល្បឿន មានន័យថាជាការដោះដូរភ្លាមៗ សេវាកម្មអតិថិជនភ្លាមៗ និងការដឹកជញ្ជូនក្នុងពេលត្រឹមតែមួយថ្ងៃ ឬក្នុងថ្ងៃជាមួយគ្នាតែម្តង។ នៅក្នុងឧស្សាហកម្មអាហារ ល្បឿនក៏ជារឿងសំខាន់ដែរ។ ការសិក្សាជាច្រើនបានបង្ហាញថា អ្នកទទួលទានខឹងខ្លាំង ប្រសិនបើគេត្រូវរង់ចាំអាហារលើសពី ២០ នាទី។
ល្បឿន និងគុណភាព ជាហេតុផលដែលធ្វើឱ្យផលិតផល Instant Pot លក់ដាច់ជាងគេបំផុតនៅក្នុងក្រុមហ៊ុន Amazon ។ កាលពីពេលថ្មីៗនេះ លោក រូបឺត វ៉ាង (Robert Wang) បានគិតទុកថាឆ្នាំងចម្អិតអាហារបានច្រើនរបៀបដែលអាចចម្អិនបានរហ័ស នឹងក្លាយជាតម្រូវការរបស់មេផ្ទះ និងអ្នកមានវិជ្ជាជីវៈខាងចម្អិនអាហារ។ ដើម្បីបន្តរក្សាជោគជ័យ លោក វ៉ាង បានប្រើប្រាស់គោលការណ៍របស់លោក ដ្រាក់ឃឺ គឺអានគ្រប់មតិយោបល់អវិជ្ជមានទាំងអស់អំពីផលិតផល និងប្រឹងប្រែងកែច្នៃតម្រូវចិត្តអតិថិជន។
២. មិនអាចមើលស្រាលសារៈសំខាន់នៃគុណភាព
លោក ភីតថឺ ដ្រាក់ឃឺ (Peter Drucker) និយាយថា គុណភាពគួរតែឆ្លុះបញ្ចាំងមើលពីអតិថិជនមកវិញ មិនមើលតាមគំនិតរបស់អ្នកផ្គត់ផ្គង់ទេ។ កាន់តែពិសេសជាងនេះទៅទៀតគឺវាគួរតែឆ្លើយតប ឬប្រសើរជាងការរំពឹងទុករបស់អ្នកទិញ ទាំងក្នុងផ្នែកទំនុកចិត្ត សុវត្ថិភាព ប្រសិទ្ធភាព បទពិសោធ និងសេវាអតិថិជន។ ឧទាហរណ៍មួយនៃចំណុចទាំងអស់នេះគឺការបង្ហាញផលិតផល Cybertruck របស់ក្រុមហ៊ុន Tesla។ នៅក្នុងការដាក់តាំងបង្ហាញកាលពីឆ្នាំ២០១៩ ក្រុមហ៊ុនទទួលបានការវាយតម្លៃខ្ពស់ជាច្រើនពីក្រុមអ្នកជំនាញខាងរថយន្ត ហើយក្នុងពេលមិនដល់មួយសប្តាហ៍ផង ក្រុមហ៊ុនទទួលបានការបញ្ជាទិញជាមុនប្រហែល២៥ម៉ឺនគ្រឿង។ បើទោះជាក្រុមហ៊ុនភាគច្រើនមិនមានទស្សនវិស័យធំ ធនធានច្រើន និងការរចនាដូចលោក អ៊ីឡុន ម៉ាសក៍ (Elon Musk) ក៏ក្រុមហ៊ុន Tesla អាចក្លាយជាប្រភពនៃកម្លាំងចិត្តសម្រាប់សហគ្រិនដែលព្យាយាមចង់បានផលិតផលដែលមានគុណភាពខ្ពស់ និងអតិថិជនដែលគាំទ្រយូរអង្វែងដែរ។
៣. រឿងឯកជនកំពុងតែក្លាយជាក្តីបារម្ភសម្រាប់អ្នកទិញគ្រប់ទីកន្លែង
ការបកអាក្រាតអំពីរបៀបប្រមូលទិន្នន័យរបស់ក្រុមហ៊ុន Google និង Facebook កំពុងតែធ្វើឱ្យមនុស្សបារម្ភចំពោះការប្រើប្រាស់ព័ត៌មានផ្ទាល់ខ្លួន។ ច្បាប់ដែលកំណត់ទិន្នន័យផ្ទាល់ខ្លួនជាទ្រព្យសម្បត្តិឯកជន កំពុងតែជាប់គាំងក្នុងសភា ប៉ុន្តែក្រុមហ៊ុនបច្ចេកវិទ្យាមិនគួររង់ចាំច្បាប់នេះទេ ដោយសារគេអាចទទួលបានការទុកចិត្តពីអ្នកប្រើប្រាស់តាមរយៈគោលនយោបាយរក្សាការសម្ងាត់ផ្ទាល់ខ្លួន។
បើគ្មានការលក់ជាបន្តបន្ទាប់ទេ ពាណិជ្ជកម្មនឹងដួលរលំបន្តិចម្តងៗ ហើយអតិថិជនដែលសប្បាយចិត្តជាហេតុផលតែមួយគត់ដែលរុញច្រានឱ្យមានការលក់កើនឡើង។ ហេតុដូច្នេះហើយបានជាចាំបាច់ម្ចាស់ពាណិជ្ជកម្មត្រូវចងចាំថា គុណភាព ល្បឿន និងការសម្ងាត់ អាចធ្វើឱ្យពាណិជ្ជកម្មមួយឈរជើងបានយូរអង្វែង និងរីកចម្រើនក្នុងការប្រកួតប្រជែងសព្វថ្ងៃនេះ។
អត្ថបទទាក់ទង
៤ ជំហាន ក្នុងការអនុវត្តផែនការយុទ្ឋសាស្រ្ត ដើម្បីដើរឲ្យទាន់សភាពការណ៍