ទស្សនៈ និងគំនិត ចំនួន១០ របស់ ស្ទីវ ចបដែលបំផុសភាពច្នៃប្រឌិត និងការបង្កើតថ្មី

ស្ទីវ ចប (Steve Jobs) កើត​នៅថ្ងៃទី២៤ ខែកុម្ភៈ ឆ្នាំ១៩៥៥ នៅ​ទីក្រុង​សាន់ហ្វ្រាន់ស៊ីស្កូ រដ្ឋកាលីហ្វ័រញ៉ា សហរដ្ឋ​អាមេរិក។ លោក​ត្រូវ​បាន​គេ​ស្គាល់​ជាទូទៅ​ថា​ជា​អ្នក​ជំនួញ​ដ៏​ជោគជ័យ ​មាន​លុយ​រាប់ពាន់លាន​ដុល្លារ ​ជា​អ្នក​មាន​គំនិត​ច្នៃប្រឌិតខ្ពស់ និង​នាំ​មក​​នូវ​បច្ចេកវិទ្យា​ថ្មីៗ​ជាច្រើន ដែល​ធ្វើ​ឲ្យ​មាន​ការ​ផ្លាស់ប្តូរ​ទាំងស្រុង​នូវ​របៀបរស់នៅ និង​របៀប​ទំនាក់ទំនងគ្នា​របស់​យើងស្ទើរគ្រប់គ្នា​រហូត​មក​ទល់​នឹង​សព្វថ្ងៃនេះ។

ស្ទីវ ចប ធ្លាប់​បាន​លើកឡើង​ថា ការធំដឹងក្តីឡើង នៅក្នុង​សង្កាត់​បច្ចេកវិទ្យា​ Silicon Valley​ បាន​ជះឥទ្ធិពល​យ៉ាងខ្លាំង ទៅដល់​ផ្នត់គំនិត​របស់​លោក។ វាធ្វើ​ឲ្យ​លោក​មាន​គំនិត​ដក់​ជាប់តែ​នឹង​ផ្នែក​បច្ចេកវិទ្យា ចង់​រកស៊ី​ខាង​ផ្នែក​បច្ចេកវិទ្យា ហើយ​ចង់​ក្លាយ​ជា​ផ្នែក​មួយ ក្នុង Silicon Valley​ នេះ។ ខាងក្រោមនេះ គឺជាសម្រង់ទស្សនៈ និងគំនិតទាំង១០របស់ ស្ទីវ ចប៖

១. ជួនកាល នៅពេលអ្នកបង្កើតអ្វីមួយថ្មី អ្នកនឹងមានកំហុស ហើយវាជាការប្រសើរបំផុតក្នុងការទទួល​ស្គាល់កំហុសឱ្យបានលឿន​ ហើយទៅបន្ថែមនៅលើការបង្កើតថ្មីរបស់អ្នកផ្សេងទៀត។

២. ការងាររបស់អ្នក នឹងបំពេញមួយផ្នែកធំក្នុងជីវិតរបស់អ្នក ហើយមធ្យោបាយតែមួយគត់ដើម្បីរីករាយនឹងការងារ គឺត្រូវជឿជាក់ថាការងារដែលអ្នកធ្វើជាការងារអស្ចារ្យ។

៣. ការចងចាំថា ខ្លួនយើងនឹងស្លាប់ ជាមធ្យោបាយល្អបំផុតដែលខ្ញុំប្រើដើម្បីគេចចេញពីអន្ទាក់នៃការគិតថាយើងនៅមានអ្វីទៀតដែលអាចបាត់បង់។ ពួកយើងមានតែខ្លួនទទេរសោះ ដូច្នេះគ្មានហេតុផលអ្វីដែលមិនធ្វើតាមបេះដូងរបស់ខ្លួនឯងនោះទេ។

៤. គ្មានអ្នកណាម្នាក់ចង់ស្លាប់នោះទេ ទោះបីជាអ្នកដែលចង់ទៅរស់នៅឋានសួគ៌ ក៏មិនចង់ស្លាប់ដើម្បីទៅទីនោះដែរ។

៥. ពួកយើងរើសយកមនុស្សដែលចង់បង្កើតរបស់អស្ចារ្យបំផុតនៅក្នុងពិភពលោក។

៦. កុំធ្លាក់ចូលអន្ទាក់របស់គោលការណ៍ទាំងឡាយ ដែលជាការរស់នៅជាមួយនឹងលទ្ធផលនៃការគិតរបស់អ្នកដទៃ។

៧. អ្នកមិនអាចភ្ជាប់ចំណុចទាំងអស់នៅក្នុងជីវិតដោយការមើលទៅកាន់ពេលវេលាខាងមុខនោះទេ អ្នកអាចភ្ជាប់វាបានដោយមើលមកក្រោយវិញប៉ុណ្ណោះ ដូច្នេះអ្នកត្រូវតែជឿថា គ្រប់ចំណុចនឹងភា្ជប់គ្នានៅពេលអនាគត។

៨. មធ្យោបាយ​តែមួយដើម្បីធ្វើការងារអស្ចារ្យបាន គឺត្រូវស្រលាញ់អ្វីដែលអ្នកធ្វើ។ 

៩. អ្វីដែលសាមញ្ញ អាចពិបាកជាងអ្វីដែលស្មុគ្រស្មាញ ព្រោះអ្នកត្រូវខិតខំធ្វើការយ៉ាងខ្លាំង ដើម្បី​ឱ្យការគិតរបស់អ្នកងាយស្រួល និងសាមញ្ញ។

១០. បើសិនថ្ងៃនេះជាថ្ងៃចុងក្រោយនៃជីវិតរបស់អ្នក តើអ្នកនឹងធ្វើអ្វីក្នុងថ្ងៃនេះ?

ស្ទីវ ចប បាន​ទទួល​មរណភាព​ នៅថ្ងៃ​ទី៥ ខែ​តុលា ឆ្នាំ២០១១  ដោយ​បន្សល់​ទុក​នូវ​ក្រុមហ៊ុន​ដ៏​ជោគជ័យ​មួយ ដែល​បច្ចុប្បន្ន​ក្លាយ​ជា​ក្រុមហុន​ដែល​មាន​តម្លៃ​ខ្ពស់​ជាង​គេ​បំផុត​នៅ​លើ​ពិភពលោក ព្រមទាំង​បន្សល់​ទុក​នូវ​ផលិតផល និង​បច្ចេកវិទ្យា ដ៏​មាន​ឥទ្ធិពល​បំផុតមួយ សម្រាប់​ការ​រស់នៅ​ប្រចាំថ្ងៃ​របស់​ប្រជាជន​នៅ​ទូទាំង​ពិភពលោក​។

 

Leave a Reply