ហេតុអ្វីបានជាអ្នកគ្រប់គ្រងត្រូវហ៊ានទទួលស្គាល់កំហុសខ្លួនឯង?
មិនថាអ្នកជាបុគ្គលិកធម្មតា ឬជាអ្នកគ្រប់គ្រងទេ កំហុសក្នុងការងារ ជារឿងដែលគ្មានអ្នកណាជៀសផុត។ បើអ្នកអាងឋានៈខ្លួនឯងជាអ្នកគ្រប់គ្រង ហើយមិនព្រមទទួលស្គាល់កំហុសខ្លួនឯង អ្នកនឹងធ្វើឲ្យខ្លួនឯងបាត់បង់ឥទ្ធិពលជាអ្នកគ្រប់គ្រងបន្តិចម្តងៗ។
ក្នុងអត្ថបទនេះ ខ្ញុំនឹងលើកយកមូលហេតុទាំង៥ដែលអ្នកគួរតែទទួលស្គាល់កំហុសខ្លួនឯង។
មូលហេតុទី១ គឺ ធ្វើឲ្យអ្នកអាចធ្វើការបានជិតស្និទ្ធជាមួយបុគ្គលិកដទៃ
ការដែលហ៊ានទទួលកំហុសខ្លួនឯង ធ្វើឲ្យបុគ្គលិកដទៃចូលចិត្តអ្នកច្រើនជាងមុន។ អ្នកមិនលាក់បាំងពេលដែលខ្លួនធ្វើខុស ហើយហ៊ានលើកយកមកនិយាយទៀត។ បុគ្គលិកផ្សេង ក៏មិនចាំបាច់ខ្លាចអ្នកខឹងពេលដែលគេប្រាប់ពីអ្វីដែលអ្នកធ្វើខុសដែរ។
មូលហេតុទី២ គឺ ធ្វើជាគម្រូដល់បុគ្គលិកដទៃ
បើអ្នកចង់ដឹកនាំគេ អ្នកត្រូវដឹកនាំខ្លួនឯងជាមុនសិន។ អ្នកដែលចេះដឹកនាំខ្លួនឯង មិនគេចវេសពីកំហុសដែលខ្លួនបានធ្វើទេ។ ពួកគេទទួលយកកំហុសនោះ ហើយកែប្រែវាឲ្យទៅជារឿងល្អវិញ។
បុគ្គលិក តែងតែចាំមើលថ្នាក់លើជានិច្ច ហេតុនេះអ្នកមិនគួរធ្វើរឿងណាដែលជះផលអាក្រក់ដល់ការដឹកនាំរបស់អ្នកទេ។ ការធ្វើខុស ហើយមិនព្រមទទួល ជារឿងអាម៉ាស់មួយសម្រាប់អ្នកធ្វើការ។
មូលហេតុទី៣ គឺ បង្ហាញពីរឹងមាំរបស់អ្នក
គេអាចមើលឃើញចរិតពិតរបស់មនុស្សបាន នៅពេលមនុស្សនោះជួបបញ្ហា។ មនុស្សទន់ខ្សោយ មិនហ៊ានទទួលកំហុសខ្លួនឯងនៅចំពោះមុខអ្នកដទៃទេ។ ពួកគេគិតថា ការធ្វើបែបនោះ នឹងធ្វើឲ្យអ្នកមើលស្រាលខ្លួន ប៉ុន្តែការមិនទទួលស្គាល់កំហុសទៅវិញទេ ដែលនាំឲ្យគេគិតបែបនោះ។
មនុស្សរឹងមាំ ធ្វើខុស ហ៊ានទទួល។ មិនមែនទទួលឲ្យតែល្អមើលទេ គឺទទួលដោះស្រាយ និងធានាថាមិនឲ្យកំហុសដដែលកើតឡើងបានទៀត។
មូលហេតុទី៤ គឺ បង្ហាញថាអ្នកជាមនុស្សដែលអាចដោះស្រាយបញ្ហាបាន
ស្ថាប័នមានទំហំប៉ុណ្ណា ក៏ត្រូវការអ្នកដោះស្រាយបញ្ហាដែរ។ អ្នកអាចអានអត្ថបទនេះ បានដើម្បីដឹងថា តើអ្នកជាមនុស្សដែលចេះដោះស្រាយបញ្ហា ឬអត់។
គេទុកចិត្តមនុស្សដែលចេះរកដំណោះស្រាយ។ អ្នកមិនអាចដោះស្រាយអ្វីបានទេ បើអ្នកគិតតែប្រកែកកំហុសដែលខ្លួនបានធ្វើ។ ការនិយាយថា ខ្ញុំធ្វើខុស ជាជំហានទីមួយនៅក្នុងការស្វែងរកដំណោះស្រាយ។
មូលហេតុទី៥ គឺទទួលជំនួយពីអ្នកដទៃ
បើអ្នកមិនហ៊ានទទួលស្កាល់ថាខ្លួនខុស អ្នកដទៃក៏មិនជួយអ្នកដែរ។ ភាពរឹងរុះ ឬការស្រលាញ់មុខមាត់របស់អ្នក អាចក្លាយជាអ្នកបំផ្លាញស្មារតីក្រុមក្នុងស្ថាប័នបាន។ អ្នកត្រូវបង្ហាញថា អ្នកមិនអាចធ្វើបានជាមុនសិន ទើបអ្នកដទៃអាចជួយអ្នកបាន។
អ្នកអាចមិនជឿនោះទេថា បុគ្គលិកដទៃ រង់ចាំជួយអ្នកដើម្បីឲ្យការងារបានទៅមុខទាំងអស់គ្នា។ គេមិនចង់ជួយ មនុស្សគេចវេស តែគេចង់ជួយ អ្នកដែលស្មោះត្រង់ និងហ៊ានប្រឈមមុខនឹងកំហុសខ្លួនឯង។
អ្នកគ្រប់គ្រង ដែលគិតថា កំហុស ជារឿងអាក្រក់សម្រាប់កេរ្តិ៍ឈ្មោះ មិនអាចទទួលបានអត្ថប្រយោជន៍ខាងលើនេះទេ។ គ្រាន់តែចំណុចចុងក្រោយមួយ គឺល្មមឲ្យអ្នកគិតឡើងវិញពីការទទួលកំហុសទៅហើយ។ ស្មារតីក្រុមរឹងមាំ ស្ថាប័នរឹងមាំ។ បុគ្គលិកគិតតែពីខ្លួនឯង នាំឲ្យគោលដៅរបស់ស្ថាប័នបរាជ័យ។