ចម្លើយ ៣ សំខាន់ៗ អំពីភាពជាអ្នកដឹកនាំ ពីលោក John C. Maxwell
តាមរយៈបទពិសោធន៍របស់លោក John C. Maxwell ក្នុងភាពជាអ្នកដឹកនាំអស់ជាង៤០ឆ្នាំមកនេះ ពួកយើងអាចទទួលបាននូវចំណេះដឹងជាច្រើន និងគួរឲ្យស្ងប់ស្ងែង។ ខាងក្រោមនេះ គឺជាចម្លើយចំនួន ៣សំខាន់ៗ ដែលដកស្រង់ចេញពីបទសម្ភាសន៍មួយរវាងលោក John C. Maxwell និងទស្សនាវដ្ដី TwoTen ស្តីអំពីភាពជាអ្នកដឹកនាំ៖
- ១) សំណួរ៖ លោកបានបូជាជីវិតរបស់លោក ដើម្បីប្រាស្រ័យទាក់ទង និងបង្រៀននូវគោលការណ៍ភាពជាអ្នកដឹកនាំ។ វប្បធម៌ និងស្ថានការណ៍ការងារបានផ្លាស់ប្ដូរយ៉ាងច្រើនសន្ធឹកសន្ធាប់អស់រយៈកាលជាង៤០ឆ្នាំមកហើយ។ ដូច្នេះ តើវិធីសាស្ត្រក្នុងភាពជាអ្នកដឹកនាំបានផ្លាស់ប្ដូរដែរឬទេ ? ហើយបើដូច្នេះ តើវាផ្លាស់ប្ដូរយ៉ាងដូចម្ដេចខ្លះ?
ចម្លើយ៖ វិធីសាស្ត្រពិតជាមានការផ្លាស់ប្ដូរទៅតាមនោះដែរ។ កាលពីច្រើនឆ្នាំកន្លងទៅ ភាពសំខាន់បានផ្ដោតទៅលើរបៀបគ្រប់គ្រង។ ប៉ុន្តែក្នុងទសវត្សឆ្នាំ១៩៧០ និង១៩៨០ ការផ្ដោតសំខាន់ គឺនៅលើភាពជាអ្នកដឹកនាំវិញ ព្រោះមនុស្សចាប់ផ្ដើមយល់ដឹងថាពួកគេអាចគ្រប់គ្រងប្រព័ន្ធការងារបាន ប៉ុន្តែពួកគេចាំបាច់ត្រូវចេះដឹកនាំមនុស្ស។ ការផ្លាស់ប្ដូរមួយទៀតនោះ គឺពីការផ្ដោតសំខាន់ទៅលើភាពជាអ្នកដឹកនាំបែបបុគ្គល ទៅភាពជាអ្នកដឹកនាំបែបក្រុមការងារវិញ ព្រោះមនុស្សម្នាក់មិនអាចធ្វើគ្រប់យ៉ាងបានល្អនោះទេ ដូច្នេះពួកយើងត្រូវបង្កើតក្រុមដើម្បីសម្រេចគោលដៅបានជោគជ័យ។ ពួកគេចាប់ផ្ដើមផ្ដល់ភាពសំខាន់ទៅលើវប្បធម៌ការងារ ដែលលើកទឹកចិត្តលើការរួមចំណែករបស់បុគ្គលិក ហើយវាជាកាតព្វកិច្ចរបស់អ្នកដឹកនាំ ដោយធ្វើបែបណាដើម្បីជម្រុញមនុស្សរបស់ខ្លួនឲ្យធ្វើការរួមគ្នា ដើម្បីសម្រេចនូវគោលដៅដ៏អស្ចារ្យរួមមួយ។
- ២) សំណួរ៖ តើអ្វីទៅដែលផ្ដល់ឲ្យលោកនូវភាពសុទិដ្ឋិនិយមចំពោះមនុស្សជំនាន់ក្រោយជាអ្នកជំនួញ និងអ្នកដឹកនាំ?
ចម្លើយ៖ រឿងម្យ៉ាងដែលខ្ញុំមើលឃើញនៅខាងក្នុងក្មេងៗជាអ្នកដឹកនាំបច្ចុប្បន្ននេះ គឺជាចំណង់ដ៏ខ្លាំងក្លានៅក្នុងការបង្កើតការផ្លាស់ប្ដូរ។ ស្របពេលដែលលក្ខណៈបែបនេះធ្វើឲ្យពួកគេទទួលបានការរិះគន់ នូវការងប់ងុលចំពោះខ្លួនឯង ខ្ញុំបែរជាមើលឃើញថាវាផ្ទុយពីបែបនេះទៅវិញ។ ខ្ញុំមើលឃើញនូវស្មារតីម្យ៉ាងដែលពួកគេចង់បង្កើតផ្លាស់ប្ដូរដ៏ធំធេង ចំពោះពិភពលោកនេះ និងបង្កើតនូវតម្លៃបម្រើជាប្រយោជន៍សម្រាប់អ្នកដទៃ។
- ៣) សំណួរ៖ តើអ្វីខ្លះជាឧបសគ្គដ៏ធំបំផុតដែលអ្នកដឹកនាំជំនាន់ក្រោយប្រឈមមុខក្នុងការគ្រប់គ្រងស្ថាប័នការងាររបស់ពួកគេ?
ចម្លើយ៖ ទំនោរនៃការប្រកបមុខជំនួញក្នុងពេលបច្ចុប្បន្ននេះ គឺជំនួញតូចៗជាច្រើន គឺជាអ្នកជំរុញសេដ្ឋកិច្ច។ វាជាដំណឹងដ៏ល្អមួយដែលបង្ហាញពីស្មារតីធ្វើជំនួញរបស់ក្មេងៗជំនាន់ក្រោយនេះ។ ដូច្នេះ នៅពេលទំនោរនៃការប្រកបមុខជំនួញមានកាន់តែខ្លាំងទៅ បុគ្គលិកនឹងមិននៅធ្វើការឲ្យអ្នកតែមួយកន្លែងច្រើនជាង៣០ឆ្នាំដូចពីមុនទៀតនោះទេ ពួកគេនឹងឆាប់ផ្លាស់ប្ដូរទីកន្លែងការងារ ជាពិសេសនោះ គឺអាជីពការងាររបស់ពួកគេផងដែរ។ បើអ្នកគិតថាអ្នកមិនចាំបាច់អភិវឌ្ឍបុគ្គលិក ដោយសារតែមិនដឹងថាអាចរក្សាពួកគេទុកឬអត់នោះ វាគឺជាគំនិតដ៏អាក្រក់បំផុតមួយ។ ការអភិវឌ្ឍបុគ្គលិកហើយចុងក្រោយត្រូវបាត់បង់ពួកគេនឹងមិនអាក្រក់ដូចដែលការមិនអភិវឌ្ឍបុគ្គលិក ហើយរក្សាពួកគេទុកនោះឡើយ។