៧ជំហ៊ានក្នុងការដោះស្រាយបញ្ហាប្រកបដោយភាពឆ្លាតវៃ
ប័ញហា ឬប៉័ញ– បា.; សំ. ( ន. ) (បញ្ហា; ប្រឝ្ន) ពាក្យឬសេចក្ដីដែលមានអាថ៌កំបាំង លុះតែអ្នកមានប្រាជ្ញាវាងវៃទើបអាចដឹង ឬលុះតែសួរអ្នកចេះ ទើបអាចដឹងច្បាស់បាន; ប្រស្នា, ចំណោទ : ដោះបញ្ហា (ប្រើជា ប្រស្នា វិញក៏បាន)។
ក្នុងនាមជាអ្នកគ្រប់គ្រង ពិតណាស់ដែលអ្នកត្រូវចេះវិធីសាស្រ្តក្នុងការដោះស្រាយបញ្ហា។ បើសិនជាបញ្ហានោះបានកើតឡើងនៅក្នុងអង្គភាពហើយអ្នកនៅក្រោមបង្គាប់របស់អ្នកមិនអាចដោះស្រាយបានទេ ចង់ឬមិនចង់អ្នកត្រូវតែដោះស្រាយបញ្ហានោះឲ្យបានសម្រេចដោយមានប្រសិទ្ធភាព តម្លាភាព និងត្រឹមត្រូវថែមទៀតផង។
មនុស្សភាគច្រើនពេលជួបប្រទះបញ្ហា គេតែងមានភាពភ័យខ្លាច រួចហើយក៏គេចវេសមិនព្រមរកដំណោះស្រាយ។ មួយវិញទៀតគេតែងរកដំណោះស្រាយចំពោះបញ្ហានោះភ្លាមៗដែលវាជាកំហុសមួយព្រោះគេមិនបានសិក្សាស្វែងយល់ពីឬសគល់នៃបញ្ហានោះឲ្យបានជាក់លាក់។ ជាពិសេសគេចូលចិត្តបន្ទោសអ្នកដទៃពីបញ្ហាដែលកើតមានឡើង។ អ្នកត្រូវចាំថាបញ្ហាអាចកើតមានឡើងគ្រប់ពេលទាំងអស់ ហើយការដោះស្រាយបញ្ហាបាន ជាការផ្លាស់ប្តូរដ៏ល្អនៅក្នុងស្ថាប័នព្រោះថា បើអ្នកដឹងថាការធ្វើបែបហ្នឹងវាមានបញ្ហា អ្នកនឹងមិនធ្វើទៀតទេ ហើយអ្នកនឹងរកផ្លូវផ្សេងដែលវាកាន់តែប្រសើរជាងវិធីចាស់ទៅទៀត។
១. កំណត់បញ្ហា
អ្នកត្រូវស្វែងយល់អោយបានច្បាស់ពីប្រភពបញ្ហា តើបញ្ហានោះមានប្រភពមកពីណា? ការងារ ឬអាជីវកម្ម ឬមកពីស្នេហា? នៅពេលដែលអ្នកបានដឹងច្បាស់ពីប្រភពអ្នកប្រាកដជាអាចរកចំលើយដោះស្រាយវាអោយមានប្រសិទ្ធិភាពខ្ពស់ជាក់ជាមិនខាន។
២. ទទួលស្គាល់បញ្ហា
អ្នកត្រូវមានភាពក្លាហានហ៊ានទទួលថាវាជាបញ្ហាមកពីប្រភពមកពីទីណាអោយប្រាកដ។ពេលដែលអ្នកទទួលវាថាជាបញ្ហាហើយអ្នកនឹងត្រួវតែដោះស្រាយវាដើម្បីបន្តដំណើររលូនរបស់គំរោងឬគោលដៅបន្តទៀត។
៣. បង្កើតនៅដំណោះស្រាយដោះស្រាយបញ្ហា
ចំនុចនេះពិតជាសំខាន់ខ្លាំងណាស់ព្រោះថាអ្នកត្រូវតែស្វែងរករបៀបដោះស្រាយបញ្ហាអោយបានយ៉ាងតិច៣វិធីដើម្បីជួយអោយអ្នកមានជំរើសគ្រប់គ្រាន់ក្នុងការធ្វើការសំរេចចិត្ត។
៤. ជ្រើសរើសដំណោះស្រាយ
ក្នុងចំនោមដំណោះស្រាយទាំង៣ខាងដើមអ្នកមានសិទ្ធិរើសយកត្រឹមដំណោះស្រាយមួយសំរាប់ដោះស្រាយតែប៉ុណ្ណោះ។ដូចច្នេះតំរូវអោយអ្នកគិតអោយបានម៉ត់ចត់និងច្បាស់លាស់។
៥. វាយតំលៃដំណោះស្រាយ
បញ្ហាបានកើតឡើងហើយរីឯ ដំណោះស្រាយក៏បានដោះស្រាយរួចរាល់ដែលមកដល់ជំហាននេះជានាទីនៃការវាយតំលៃភាពមានប្រសិទ្ធិភាពនិងត្រួតពិនិត្យមើលភាពជោគជ័យកំរិតណាទៅលើដំណោះស្រាយមួយនោះ។
៦. សម្រេច ផ្សព្វផ្សាយ និងអនុវត្ត
បន្ទាប់ពីអ្នកបានជ្រើសរើសយកជម្រើសមួយឬច្រើនរួចមកហើយ អ្នកត្រូវតែប្រកាសប្រាប់ដល់អ្នកឯទៀតឲ្យពួកគេបានដឹងព្រមទាំងវាស់ស្ទង់ពីភាពពេញចិត្តរបស់គេម្នាក់ៗ និងចាត់វិធានការអនុវត្តដំណោះស្រាយនោះ។ បើអ្នកបានអនុវត្តដំណាក់កាលខាងលើបានល្អ នោះមកដល់ដំណាក់កាលនេះអ្នកនឹងមិនជួបប្រទះការប៉ះទង្គិចឡើយ។
៧. គ្រប់គ្រងដំណើរការ និងមានផែនការណ៍បម្រុង
ក្រោយពីអនុវត្តន៍ដំណោះស្រាយហើយ អ្នកមិនអាចទុកវាចោលនោះទេ អ្នកត្រូវតែគ្រប់គ្រងនិងតាមដានដំណើរការនោះឲ្យបានខ្ជាប់ខ្ជួនដើម្បីការពារការថ្លោះធ្លោយដោយប្រការណាមួយ។ អ្នកត្រូវប្រាកដថាដំណើរការរបស់អ្នកប្រព្រឹត្តទៅបានល្អនិងអាចគ្រប់គ្រងភាពរអាក់រអួលបានទាន់ពេលវេលា។ មួយវិញទៀតអ្នកមិនត្រូវភ្លេចផែនការណ៍បម្រុងទេក្នុងករណីដែលដំណោះស្រាយនោះមិនទៅតាមអ្វីដែលអ្នកចង់បាន ហើយអ្នកក៏អាចបកទៅរកជំហានទីមួយបានដែរបើដំណោះស្រាយរបស់អ្នកគ្មានប្រសិទ្ធភាព។
បញ្ហាជាមិនមែនជារឿងគួរឲ្យខ្លាចនោះទេ។ វាគ្រាន់តែបង្ហាញប្រាប់អ្នកថាស្ថានភាពបច្ចុប្បន្នរបស់អ្នកខុសប្រក្រតីតែប៉ុណ្ណោះ ហើយអ្នកត្រូវរកវិធីផ្សេងមកប្រើជំនួសវិញ។
អ្នកក៏អាចស្វែងយល់សម្រង់សម្តីទាំង៥ខាងក្រោមនេះ ដើម្បីជាការពិចារណាបន្ថែម៖
១. ការរក្សាភាពស្ងប់ស្ងាត់ មិនឆេវឆាវ គឺជាការដោះស្រាយបញ្ហាដ៏ល្អបំផុត ព្រោះបើអ្នកឆេវឆាវ នោះរឿង នឹងកាន់តែធំទៅ។
២. ការឱនលំទោន ក៏ជាវិធីដែលអ្នកគួរតែប្រើដែរ ព្រោះបើអ្នកខ្លាំងទាំងសងខាង នោះបញ្ហា គឺមិនចេះចប់ឡើយ ហើយនឹងមាន កាន់តែច្រើនទៅ។
៣. នៅពេលដែលមានបញ្ហា អ្នកមិនត្រូវគិតពីអតីតកាលថា អ្នកមិនគួរធ្វើនោះទេ ព្រោះពេលនេះ អ្នករស់នៅបច្ចុប្បន្នកាល ដូចនេះ អ្នកត្រូវតែរកមធ្យោបាយផ្សេងៗ ដើម្បីដោះស្រាយបញ្ហាទាំងនេះ។
៤. នៅពេលដែលជួបបញ្ហាលំបាក អ្នកត្រូវតែខិតខំប្រឹងប្រែង ដើម្បីរិះរកវិធីផ្សេងៗ មកដោះស្រាយ មិនត្រូវអង្គុយចាំអ្នកដទៃ មកជួយដោះស្រាយទេ។
៥. អ្នកមិនត្រូវគិតច្រើននោះទេ នៅពេលដែលជួបបញ្ហាផ្សេងៗ ព្រោះមធ្យោបាយនឹងមាន សម្រាប់អ្នកដែលមានចិត្តដោះស្រាយ។ បើអ្នកគិតច្រើន វាអាចប៉ះពាល់ ដល់សុខភាពអ្នកណាស់។