វីធីធ្វើជាមនុស្សបើកចិត្តឲ្យទូលាយទាំង១០យ៉ាង

បើសិនជាឲ្យខ្ញុំគិតពីចំណុចខុសគ្នារវាងអ្នកគ្រប់គ្រង និង​បុគ្គលិកធម្មតា ខ្ញុំនឹងឆ្លើយថា ការបើកចិត្តឲ្យទូលាយ។ បុគ្គលិកធម្មតា មានចិត្តប្រកាន់ច្រើន ហើយជាទូទៅវាកើតមកពីបទពិសោធន៍ក្មេងខ្ចីរបស់ពួកគាត់។ អ្នកគ្រប់គ្រង មិនអាចធ្វើតាមបុគ្គលិកធម្មតានោះទេ។ តួនាទីរបស់គាត់ តម្រូវឲ្យគាត់ទទួលយករឿងរ៉ាវផ្សេងៗ ដោយចិត្តទូលាយ ហើយព្យាយាមដោះស្រាយឲ្យចេញ។

ក្នុងអត្ថបទនេះ ខ្ញុំនឹងលើកយកវិធីសាស្ត្រទាំង១០ ដែលជួយឲ្យអ្នកក្លាយជាមនុស្សដែលចេះបើកចិត្តបាន។ ខ្ញុំជឿថា វិធីសាស្ត្រខ្លះ អ្នកធ្លាប់ធ្វើរួចមកហើយ។

ទី១ គឺ សាកល្បងអ្វីដែលថ្មី ឬអ្វីដែលមិនដឹង

បើអ្នកមិនហ៊ានសាកល្បង បានន័យថាអ្នកមិនទាន់ហ៊ានបើកចិត្តទេ។ មិនថា អាហារថ្មី សម្លៀកបំពាក់ថ្មី ឬជំនាញការងារថ្មីទេ សុទ្ធតែអាចធ្វើឲ្យអ្នកមើលឃើញជ្រុងម្ខាងទៀតដែលអ្នកមិនធ្លាប់ដឹង។ អ្វីដែលអ្នកមិនដឹងតែងតែធ្វើឲ្យអ្នកខ្លាច ហើយធ្វើឲ្យអ្នកបដិសេធមិនព្រមធ្វើ។​ លើកក្រោយពេលដែលមានអ្វីថ្មី ត្រូវតែធ្វើភ្លាម។

ទី២ គឺ កុំបង្កើតគំនិតអវិជ្ជមាន មុនពេលសាកល្បង

គំនិតអវិជ្ជមាន អាចធ្វើឲ្យយើងបាត់បង់ឱកាសក្នុងការស្គាល់អ្វីថ្មី។ ពេលខ្លះ យើងមើលឃើញរឿងអ្វីមួយត្រឹមពីខាងក្រៅ​ ទើបយើងវាយតម្លៃថាមិនល្អ។ ទាល់តែសាកសិន ទើបអាចដឹង។

នៅក្រុមហ៊ុនដែលខ្ញុំធ្វើការ ពួកយើងបានចំណាយពេលជិត១ឆ្នាំពេញដើម្បីសាកល្បងការបង្កើតមេរៀនអនឡាញបែបថ្មី ហៅថា Microlearning។ ពួកយើងមិនដឹងថាវាប្រើការកើតឬអត់ទេ ប៉ុន្តែដោយសារតែចង់ដឹង ពួកយើងបានរៀបចំធ្វើមេរៀនប្រភេទនេះបានប្រហែលជា ៣០មេរៀនដើម្បីដាក់ឲ្យគេរៀនលើវេបសាយ។ ជាលទ្ធផល វាក្លាយជាផ្នែកមួយនៃការធ្វើទីផ្សាររបស់ក្រុមហ៊ុនមកដល់សព្វថ្ងៃ។

ទី៣​ គឺ រៀនមើលរឿងរ៉ាវពីជ្រុងផ្សេងគ្នា

អ្វីដែលយើងមើលឃើញ មានព្រំដែន ហើយភាគច្រើនអ្វីដែលយើងមើលឃើញ គឺមិនគ្រប់គ្រាន់ក្នុងការវិនិច្ឆ័យនោះទេ។

អ្នកគ្រប់គ្រង អាចនឹងមើលឃើញបុគ្គលិកម្នាក់មកធ្វើការយឺត ហើយគាត់អាចនឹងគិតថា បុគ្គលិកនោះមិនគោរពម៉ោងការងារ។ បើគាត់ទៅស្តីឲ្យភ្លាមៗ នោះគាត់ធ្វើខុសហើយ។ បើគាត់សួរអ្នកដទៃ ឬសួរសាមីខ្លួន គាត់អាចដឹងពីហេតុផលពីក្រោយ។ ចុះបើបុគ្គលិកនោះមានគ្រោះថ្នាក់ចរាចរណ៍ ឬធ្វើការដាច់យប់ដើម្បីបញ្ចប់កិច្ចការអ្វីមួយ តើគាត់គួរតែទទួលការស្តីបន្ទោសដែរទេ?

ការមើលរឿងរ៉ាវពីជ្រុងផ្សេងទៀត ជួយឲ្យយើងដឹងថា អ្នកដទៃដឹងអ្វីដែលយើងមិនដឹង។ តួនាទីរបស់អ្នកគ្រប់គ្រង គឺដឹងអ្វីដែលអ្នកដទៃដឹង ហើយប្រើវាជាប្រយោជន៍ក្នុងការងារ។

ទី៤ គឺ ស្វ័យសិក្សាលើប្រធានបទច្រើនផ្សេងគ្នា

ស្វ័យសិក្សា ឬការរៀនដោយខ្លួនឯង ជាវិធីតែមួយគត់ដែលអ្នកគ្រប់គ្រងអាចពង្រីកចំណេះដឹងខ្លួនឯងបាន។ គ្មានស្ថាប័នណាចង់បានអ្នកគ្រប់គ្រង ឬថ្នាក់លើ ដែលជាកង្កែបក្នុងអណ្តូងនោះទេ។ បើគាត់មានចំណេះដឹងទូលាយ គាត់ក៏មានចិត្តទូលាយដែរ។

រាល់ពេលទំនេរ គាត់អាចស្រាវជ្រាវប្រធានបទថ្មីៗដែលគាត់មិនធ្លាប់ដឹងពីមុនមក ហើយរៀនវាម្តងបន្តិច។ អ្នកគ្រប់គ្រង ត្រូវដឹងឲ្យច្រើន ទោះបីមិនបានស៊ីជម្រៅក៏ដោយ។

ទី៥ គឺអានឲ្យបានច្រើន

អ្នកគ្រប់គ្រងមិនអានតែសៀវភៅមួយមុខទេ។​ ពួកគេអានទស្សនាវដ្តី អត្ថបទ និងសូម្បីតែអ្វីដែលបុគ្គលិកសរសេរនៅលើបណ្តាញសង្គម។ អ្នកគ្រប់គ្រង អានដើម្បីទទួលពត៌មាន ព្រោះបើពត៌មានមិនគ្រប់ អ្នកគ្រប់គ្រងក៏មិនអាចសម្រេចចិត្តបានដែរ។​

ការអានគំនិតរបស់អ្នកដទៃ ធ្វើឲ្យអ្នកមើលឃើញពិភពលោកក្នុងផ្លូវផ្សេងគ្នា។ រាល់ពេលដែលមានបុគ្គលិកផ្ញើអុីម៉េលមកអ្នកដើម្បីប្រាប់ពីអ្វីមួយ ពួកគេកំពុងតែប្រាប់អ្នកពីពិភពលោកដែលគេជួបប្រទះហើយ។​

ទី៦ គឺ ធ្វើដំណើរឲ្យបានច្រើន

ការធ្វើដំណើរ ជាវិធីមួយដែលបង្រៀនអ្នកពីរឿងរ៉ាវជាច្រើន។ អ្នកអាចយល់ពីវប្បធម៌ និង​ការរស់នៅរបស់មនុស្សនៅតាមកន្លែងផ្សេងគ្នា។ អ្នកអាចយល់ពីរបៀបធ្វើការរបស់បុគ្គលិកនៅតាមតំបន់ខុសគ្នា។ វាក៏ជួយឲ្យអ្នកស្រឡះចិត្តពីការងារផងដែរ។

ការធ្វើដំណើរ ធ្វើឲ្យអ្នកមើលឃើញថា ខ្លួនអ្នកតូចណាស់ បើប្រៀបទៅនឹងពិភពលោក ហើយការគិតឃើញបែបនេះ នឹងធ្វើឲ្យអ្នករៀនបើកចិត្តទទួលអ្វីថ្មីមិនខាន។

ទី៧ គឺPodcast

Podcast ជាមធ្យោបាយផ្សព្វផ្សាយមួយទាន់សម័យ ដែលកំពុងតែពេញនិយមនៅប៉ែកបស្ចឹមប្រទេស​។ អ្នកអាចស្តាប់ Podcast បានដោយឥតគិតថ្លៃ និង​មានប្រធានបទជាច្រើនដែលអ្នកអាចនឹងចាប់អារម្មណ៍។ អ្វីដែលអ្នកមិនធ្លាប់ដឹងពីទូរទស្សន៍ ឬវិទ្យុ អ្នកនឹងរកឃើញនៅលើ Podcast ព្រោះ Podcast មិនបិទមាត់អ្នកដទៃនោះទេ។

កម្មវិធី $100 MBA (https://100mba.net/show/)ជា Podcast ល្បីឈ្មោះមួយសម្រាប់អ្នកគ្រប់គ្រង​​។

ទី៨ គឹ កុំប្រញាប់វាយតម្លៃអ្នកណាម្នាក់

ការវាយតម្លៃអ្នកណាម្នាក់ មិនមែនជារឿងមិនល្អទេ។ ពេលខ្លះ ដើម្បីសុវត្ថិភាព អ្នកត្រូវតែវាយតម្លៃគេ មុននឹងចូលទៅរាក់ទាក់។ ការប្រញាប់វាយតម្លៃ ទើបជាបញ្ហា។ បើគេគ្រាន់តែនិយាយប៉ុន្មានម៉ាត់ អ្នកក៏វាតម្លៃថាគេមិនចេះអ្វីទៅហើយ នោះអ្នកនឹងបាត់ឱកាសរៀនពីអ្នកដទៃ។

ការវាយតម្លៃ ត្រូវធ្វើឡើងនៅពេលអ្នកមានពត៌មានគ្រប់គ្រាន់ពីអ្នកណាម្នាក់។

ទី៩ គឺសួរសំណួរឲ្យបានច្រើន

ការសួរសំណួរ ជាការរៀនមួយបែបដែលនាំចិត្តរបស់អ្នកផ្តោតទៅលើរឿងអ្វីមួយ។ អ្នកដែលមិនចេះសួរ គឺមិនអាចរៀនអ្វីចេះទេ។ អ្នកដែលមានគំនិតច្នៃប្រឌិត សុទ្ធតែជាមនុស្សពូកែសួរ ហើយពួកគេសុទ្ធតែមានចិត្តទូលាយ។

អ្នកត្រូវរៀនសួររាល់ថ្ងៃ ពីសំណួរធម្មតា ទៅសំណួរដែលស្មុគស្មាញ។ អ្នកអាចសួរនាំបុគ្គលិកក្រោមបង្គាប់ ឬអ្នកធ្វើការជាមួយគ្នាបាន។ ការសួរនាំ ក៏បង្ហាញថាអ្នកយកចិត្តទុកដាក់លើអ្នកដទៃផងដែរ។

១០ ចូលរួមក្នុងការ Debate

ការ Debate ដែលត្រឹមត្រូវ គឺធ្វើឡើងដើម្បីរកត្រូវខុស មិនមែនយកចាញ់ឈ្នះនោះទេ។ ភាគីទាំងសងខាង ត្រូវលើកពីគំនិតរបស់ខ្លួនចេញមក រហូតទាល់តែឃើញការពិតទាំងអស់គ្នា។ អ្នកត្រូវចាត់ទុកការ Debate ជាការធ្វើការជាក្រុមដើម្បីរកចម្លើយអ្វីមួយ ទើបអាចរៀនបានច្រើនវា។

កុំចូលរួមក្នុងការ Debate យកចាញ់ឈ្នះ ព្រោះវាធ្វើឲ្យចិត្តអ្នកកាន់តែចង្អៀត។ អ្នកនឹងគិតថា គំនិតខ្លួនឯងត្រូវគ្រប់ពេល ហើយព្យាយាមចាប់កំហុសអ្នកដទៃគ្រប់ពាក្យទាំងអស់។

Peter Drucker ធ្លាប់បានសរសេរថា “ចំណុចសំខាន់របស់ការគ្រប់គ្រង គឺប្រើប្រាស់ចំណេះដឹងដែលខ្លួនមានឲ្យបានប្រសិទ្ធផលខ្ពស់“។ ពេលអ្នកបើកចិត្តឲ្យទូលាយហើយ អ្នកនឹងទទួលបានចំណេះដឹងគ្រប់ប្រភេទទាំងអស់ ហើយពេលនោះ អ្នកនឹងត្រូវចាត់ចែងចំណេះដឹងទៅតាមផ្នែកនីមួយៗ។​