សញ្ញាណសំខាន់ៗចំនួន ៤ បង្ហាញថានិយោជិតម្នាក់ចាប់ផ្តើមនឿយណាយនឹងការងារ
អារម្មណ៍មិនល្អនៅពេលព្រឹក ការស្អប់ខ្ពើមចំពោះគំនិតការងារ ការព្រងើយកន្តើយចំពោះសំណើ និងគំនិតថ្មីៗ ការពន្យារពេល មានអារម្មណ៍ធុញទ្រាន់ និងឈឺក្បាលបានក្លាយជាដៃគូនឹងនិយោជិតរបស់អ្នក? តើមានអ្វីកើតឡើង?
មនុស្សភាគច្រើនចាប់ផ្ដើមការងារថ្មីជាមួយនឹងភាពស្វាហាប់ចង់រៀនអ្វីដែលថ្មី និងធ្វើការឲ្យបានល្អ។ ទោះជាយ៉ាងណា ក្រោយរយៈពេលពីរបីឆ្នាំក្ដីរំភើបទាំងនោះចាប់ផ្ដើមរសាយ ហើយកិច្ចការដែលធ្លាប់តែជាទីចាប់អារម្មណ៍ពេលដំបូង ចាប់ផ្ដើមក្លាយជាធម្មតា និងមិនសូវជាមានភាពប្រកួតប្រជែង។
ការងាររបស់អ្នកក្នុងនាមជាថ្នាក់ដឹកនាំ គឺត្រូវតែប្រាកដថា មនុស្សដែលកំពុងធ្វើការជាមួយអ្នកនៅតែមានទឹកចិត្ត និងស្មារតីល្អក្នុងការងារ។ អ្នកត្រូវតែកត់សម្គាល់ពីសញ្ញាណដែលពួកគេចាប់ផ្ដើមណាយនឹងការងារមុននឹងអ្វីគ្រប់យ៉ាងយឺតពេល។
១. ពួកគេមិនសូវចាប់អារម្មណ៍នឹងដំណឹងថ្មីៗរបស់ក្រុមហ៊ុន
មនុស្សដែលចាប់អារម្មណ៍នឹងការងាររបស់ខ្លួន តែងតែតាមយ៉ាងប្រកៀកជាមួយនឹងព័ត៌មានចុងក្រោយ បរិបទនៃឧស្សាហកម្ម ការបង្កើតថ្មី និងបច្ចេកវិជ្ជា។ ពួកគេចង់ឲ្យខ្លួនឯងប្រសើរឡើង ឬចេះច្រើនជាងមុន។ ជាអ្នកដឹកនាំ អ្នកគួរតែតាមដានថា តើបុគ្គិលរបស់អ្នកព្យាយាមស្វែងយល់ពីការងារពាក់ព័ន្ធបន្ថែមទេ ពួកគេកំពុងអនុវត្តន៍ និងចែករំលែកចំណេះដឹងជជែកពីរបកគំហើញថ្មីដែរឬទេ? ប្រសិនជាពួកគេមិនធ្វើទេ អ្នកត្រូវស្វែងរកហេតុផល។ តើពួកគេប្រកាន់គំនិតថាខ្លួនចេះទាំងអស់ឬ? តើពួកគេបានស្វែងយល់ពីគ្រប់ប្រភពហើយឬនៅ? ឬមួយក៏ពួកគេបាត់បង់ចំណាប់អារម្មណ៍លើការងារ? ការស្វែងរកចម្លើយសម្រាប់សំណួរទាំងនេះ នឹងជួយអ្នកឲ្យសម្រេចជ្រើសរើសយកដំណោះស្រាយមួយដ៏សមស្រប។
២. ពួកគេមិនសូវចូលខ្លួនមកពាក់ព័ន្ធ
ពេលដែលមនុស្សរំភើបនឹងអ្វីមួយ ពួកគេតែងតែនិយាយពីវា។ ជាអ្នកដឹកនាំអ្នកនឹងកត់សម្គាល់ឃើញថា បុគ្គលិកថ្មីចូលរួមក្នុងកិច្ចប្រជុំ តែងរំលេចចេញនូវមតិយោបល់របស់ពួកគេ ហើយប្រាប់អ្នកពីមធ្យោបាយថ្មីដើម្បីធ្វើកិច្ចការអ្វីមួយ។ ពួកគេចាប់អារម្មណ៍ក្នុងការធ្វើឲ្យមានផល និងឥទ្ធិពល។ ពេលដែលពួកគេបាត់បង់ចំណាប់អារម្មណ៍ ពួកគេអាចនឹងមិនសូវចូលខ្លូនមកពាក់ព័ន្ធ ឬអាចនិយាយថាមិនសូវជារវីរវល់។ ពួកគេអាចនឹងចាប់ផ្ដើមដោយការមកធ្វើការយឺតពេល ឬខលទូរស័ព្ទមកប្រាប់ថា ឈឺញឹកញាប់។ ប្រសិនបើអ្នកកត់សម្គាល់ឃើញសញ្ញានេះ អ្នកគួររៀបចំការប្រជុំសម្ងាត់មួយជាមួយបុគ្គលិកនោះ ហើយធ្វើបទបង្ហាញ និងដាក់ផែនការ ឬគោលដៅថ្មីដែលនឹងធ្វើឲ្យគេជក់ចិត្តជាថ្មី។
៣. ពួកគេលាក់គំនិត និងយោបល់
ពេលដែលមនុស្សស្រលាញ់អ្វីមួយ ពួកគេមានគំនិត ខណៈដែលអ្នកមិនមានចំណាប់អារម្មណ៍ពួកគេនឹងមិនបញ្ចេញយោបល់ ឬសូម្បីតែខ្វាយខ្វល់។ ប្រសិនបើអ្នកសង្ស័យបុគ្គលិកណាម្នាក់លើចំណុចនេះ ចូរអ្នកតាមដានឥរិបទរបស់គេនៅក្នុងកិច្ចប្រជុំបុគ្គលិក ដែលជាកត្តាវាស់វែងពីចំណាប់អារម្មណ៍របស់បុគ្គលិកលើការងារ រាប់បញ្ចូលទាំងការសុន្ទនារបស់គេជាមួយនឹងបុគ្គលិកផ្សេងទៀតដែរ។
ពេលដែលអ្នកវិនិយោគទាំងចិត្ត ទាំងបេះដូងនៅក្នុងពាណិជ្ជកម្មរបស់អ្នក វាគឺជាសំខាន់បំផុតក្នុងការធ្វើឲ្យអ្នកដទៃបញ្ចេញ និងនាំមកនូវគំនិតយោបល់ថ្មីៗ។
៤. ពួកគេមិនទទួលបន្ទុកការងារថ្មី
ចូរប្រយ័ត្នចំពោះបុគ្គលិកដែលមិនពុះកញ្ជ្រោលជាមួយនឹងទំនួលខុសត្រូវថ្មី។ ពួកគេអាចនឹងបាត់បង់ចំណាប់អារម្មណ៍លើការងារ ឬសក្ដានុពលរបស់ពួកគេបានដុតកំឡោចអស់ទៅហើយ។ អ្នកគួរតែចាប់ផ្ដើមរកដំណោះស្រាយ ដោយផ្ដើមពីទម្លាប់ការងារប្រចាំថ្ងៃ។ ពួកគេប្រហែលជាត្រូវការពេលវេលាសម្រាក។ តើពួកគេបានសុំច្បាប់ឈប់សម្រាក ឬលំហែកាយហើយឬនៅ? ឬមួយពួកគេត្រូវការជំនួយសម្រាប់បន្ទុកការងារប្រចាំថ្ងៃរបស់ពួកគេ។
បុគ្គលិកខ្លះធ្វើការប្រកបដោយភាពមុះមុត ពួកគេនឹងធ្វើការឲ្យអស់ពីកម្លាំងកាយចិត្ត មុននឹងពួកគេរាយការណ៍ពីការលំបាក។ ការជជែកគ្នា គឺជាគន្លឹះឆ្ពោះទៅរកជោគជ័យសម្រាប់អ្នក និងនិយោជិតរបស់អ្នក។ ចូរពិនិត្យមើល ប្រសិនបើបន្ទុកការងាររបស់ពួកគេស្មុគស្មាញពេក ឬធ្ងន់ពេកសម្រាប់មនុស្សម្នាក់ក្នុងការដោះស្រាយ។
សម្រួលពី៖ Jacqueline Whitmore (2016), 4 Early Warning Signs an Employee Is Losing Interest, Entrepreneur Asia Pacific
អត្ថបទទាក់ទង